Duahia Taudia Idia Henanadai

Dirava be Tano Mareremarere o Unai Bamona Gaudia amo Taunimanima Ia Panisia, A?

Matamana negana amo ema bona hari, Dirava be tano mareremarere o unai bamona dika gaudia amo kara namo taudia ia panisia lasi bona nega vairai danu unai bamona do ia karaia lasi. Dahaka dainai? Badina 1 Ioane 4:8 ia gwau: “Dirava be lalokau.”

Dirava be mai ena lalokau ida gau ibounai ia karaia. Lalokau tauna be kara namo tauna dekenai dika ia havaraia lasi, badina Baibel ia gwau, “Daika ese iena badibadinai tauna ia lalokau henia, be do ia hadikaia diba lasi.” (Roma 13:10) Iobu 34:12 ia gwau: “Momokani, Siahu Ibounai Dirava ese, kara dika ia karaia lasi.”

Momokani, Baibel be iseda nega ia perovetalaia neganai, ia gwau gau dikadia do idia vara, hegeregere “tano do ia mareremarere.” (Luka 21:11) To Iehova be unai dika ia havaraia lasi. Unai be hegeregere nius halasia tauna ta be reidio amo taunimanima ia hadibaia, lai gubana ta do ia vara, to unai tau be unai lai gubana ia havaraia lasi. Vadaeni bema Dirava be unai dika ia havaraia lasi, vadaeni daika ese ia havaraia?

Baibel ese ia hahedinaraia, Satani Diabolo be “tanobada taudia ibounai ia gunalaia noho.” (1 Ioane 5:​19) Matamana negana amo ema bona hari, Satani be taunimanima edia mauri ia hadikaia. (Ioane 8:​44) Satani ia itaia taunimanima edia mauri be anina lasi. Ia mataganigani dainai tanobada ibounai dekenai dika ia havaraia. Hari inai negai, mataganigani taudia ese kara namo taudia be gabu dikadia dekenai idia atoa, herevana unai bamona gabudia be tano mareremarere o unai bamona dika gaudia ma haida ese idia hadikaia diba. (Efeso 2:2; 1 Ioane 2:​16) Momokani, mataganigani taudia edia kerere dainai kara namo taudia ese dika idia davaria. (Hadibaia Tauna 8:9) Edena dala amo?

Toana be idia vara dika haida be taunimanima ese idia havaraia. Haheitalai be inai: New Orleans, U.S.A., dekenai lai gubana bona abata ese taunimanima edia noho dalana ia hadikaia, bona Venezuela dekenai ororo badadia amo kopukopu idia diho bona ruma momo idia hadikaia. Unai dika bona ma haida, hegeregere lai bona medu ese dika bada herea idia havaraia badina taunimanima be lai o medu o unai bamona gaudia idia diba namonamo lasi, ruma idia karaia namonamo lasi, gaukara idia palania namonamo lasi, hadibaia hereva idia kamonai lasi, bona gavamani ena dipatmen haida be edia gaukara idia karaia namonamo lasi.

Baibel negadiai ia vara dika ta mani oi laloa. Iesu ena negai, ruma ta ia moru neganai, taunimanima 18 idia mase. (Luka 13:4) Ena be unai dika be ia vara kava o taunimanima edia kerere dainai ia vara, to unai be Dirava ena hahemaoro karana ta lasi.​​—Hadibaia Tauna 9:​11.

Dirava be abata o unai bamona dika gaudia haida ia havaraia danu, a? Oibe, to idia be taunimanima ese idia havaraia gaudia bamona lasi. Dirava ese unai bamona dika be ia havaraia momo lasi, to mai edia badina dainai ia havaraia bona ia abia hidi daika do ia mauri bona daika do ia mase. Haheitalai rua be inai: Noa ena negai Dirava ese Abata badana ia havaraia, bona Lota ena negai Sodoma bona Gomora hanua ia hadikaia. (Genese 6:​7-9, 13; 18:​20-​32; 19:24) Unai nega rua lalodiai, Dirava ese kara dika taudia sibona ia hamasea to Dirava vairanai kara maoromaoro idia karaia taudia be idia mauri.

Momokani, Iehova Dirava be mai ena dala, mai ena ura, bona mai ena siahu tano mareremarere o unai bamona gaudia ese idia havaraia hisihisi ibounai ia haorea bona namo ia havaraia diba. Salamo 72:12 ese Dirava ia abia hidi King, Iesu Keriso, be inai bamona ia herevalaia: “Ogogami taudia be ia dekenai idia boiboi neganai, ia ese do ia durua. Edia gau be lasi, bona edia durua be lasi taudia, be king ese do ia hamauria.”