Yuvu Y’atangi eto

E Sumbula nga Tumbu kia Nzambi?

Nzambi ke sadilanga sumbula ko mu tumba minkondwa kuma. Tuka kuna nz’ankulu ke sadilanga yo ko, ye kesinga yo sadila ko kuna sentu. Ekuma? Kadi muna 1 Yoane 4:8 tutanganga vo, “Nzambi i zola.”

Zola i tuku dia mawonso kevangang’o Nzambi. Nkwa zola kalendi mwesa mpasi kwa minkondwa kuma ko, i kuma Nkand’a Nzambi uvovelanga vo “zola ke kuvanga nkw’andi mbi ko.” (Roma 13:​10) Muna Yobi 34:12 tutanganga vo: “Yamu ludi, o Nzambi kevanga umpumbulu ko.”

Kansi, Nkand’a Nzambi wazaisa e sumbula ibwanga mu lumbu yeto, nze i “nzakama zangolo za ntoto.” (Luka 21:​11) Akwa ngangu za nza ana belongokanga e nsungi, ntangwa zayingi beteka zayisanga e tembwa yangolo ifwasanga mbanza. Kansi ke yau ko betwasanga yo. Diau adimosi mpe, kana una vo Yave wateka zayisa e sumbula yibwang’o unu, ke yandi ko otwasanga yo. Wau vo ke Nzambi ko otwasanga e sumbula yimwesanga wantu e mpasi, nki kitwasanga yo?

Nkand’a Nzambi usonganga vo “e nza yawonso muna mbi ilele,” i sia vo Satana wa Nkadi Ampemba oyalanga yo. (1 Yoane 5:​19) Oyandi mumponda-muntu tuka kakolamena kuna lubantiku lwa lusansu lwa wantu, yamu lumbu yeto. (Yoane 8:​44) Satana obadikilanga moyo a muntu nze má kiakondwa mfunu. Wau vo nkw’eloko, e fu kiaki kiwokelanga muna nkubika za nza yawonso zina muna wisa kiandi. Muna kuma ki’eloko dia nza yayi, ndonga beyambulanga vo akaka bazingila muna fulu ya vonza ina ibwilanga sumbula. (Efeso 2:2; 1 Yoane 2:​16) Muna kuma kiaki, wantu ayingi bena ye mbebe mu kuma kia sumbula ibwilanga wantu. (Kimpovi 8:⁠9) Mu nkia mpila?

Kieleka, sumbula yayingi yibwanga, ina vo wantu betwasanga yo. Kasikil’owu, badika mpasi za kizalu kia maza bamona nkangu muna mbanza New Orleans, Estados Unidos yovo nzo zakukula muna nteke yatuka kuna mongo a Venezuela. E sumbula yayi ye yakaka mpe, nze tembwa ye mvula za ngolo yibwanga mu kuma kia wantu balembi zitisanga nsema, makompani mampwena mefutumunanga mwisi uyivisanga e ngambwila, nkubika zifunganga, lembi lemvokela lulukisu yo lembi zaya nsiku mia nsema.

Yindula sumbula kiabwa kuna nz’ankulu. Muna lumbu ya Yesu, nzo mosi y’ezulu yabwa kuna kinsalukisa yo vonda wantu 18. (Luka 13:⁠4) E sumbula kiaki nanga mu kuma kia vilwa wa wantu kiabwila yovo mu kuma kia ‘kolo ye susi kibwilanga awonso’​—⁠kansi ke tumbu kia Nzambi ko.​—⁠Kimpovi 9:11.

Nga vena ye sumbula katwasa o Nzambi? Elo, kansi yaswaswana ye sumbula yitwasanga wantu, e sumbula yayi ekani diandi yalungisa, ke yayingi ko mpe. E Kizalu kia nz’amvimba kia lumbu ya Noa wankulu ye lufwasu lwa Sodomo ye Ngomora muna lumbu ya Loti, i mbandu zole. (Etuku 6:​7-9, 13; 18:​20-32; 19:​24) Nzambi watwasa sumbula yayi mu fwasa yimpumbulu yo vuluza asongi vana meso mandi.

Ka lukatikisu ko, Yave wa Nzambi vwidi luzolo ye nkuma wasukisa mpasi ye sumbula yawonso. Muna Nkunga 72:12 tutanganga mu kuma kia Yesu Kristu wa Ntinu wasolwa kwa Nzambi vo: “Okôla nkondami vava kekaza; yo nsukami ona kena ya nsadisi ko.”