Karemdbã sogsgo

Wẽnnaam tũnugda ne sabaab rãmbã n sɩbgd nebã bɩ?

Wẽnnaam pa tũnugd ne sabaab rãmbã n sɩbgd nebã ye. A zɩ n maan woto ye. La a kõn maan woto me abada n sɩbg nebã ye. Bõe yĩnga? Bala Biiblã yeta 1 Zã 4:8 pʋgẽ tɩ “Wẽnnaam yaa nonglem.”

Yaa ne nonglem la Wẽnnaam maand bũmb fãa. A sẽn yaa nonglmã yĩnga, a pa tõe n maan nebã wẽng ye. Bala Biiblã yetame tɩ “nonglem ka maand a yak wẽng ye.” (Rom dãmba 13:10) Zoob 34:12 yeta woto: “Hakɩka, Wẽnnaam Sẽn-tõeyã-fãa wã ka maand wẽng ye.”

Biiblã reng n wilgame tɩ sabaab rãmb na n zĩnda tõnd wakatã. Wala makre “tẽn-digimdg kãsemse.” (Luk 21:11) Wala meteo wã rãmb sẽn tõe n togs tɩ seb-kãseng n na n wa tɩ yaool n pa bãmb n kɩt t’a sɩd wa wã, a Zeova me reng n wilgame tɩ sabaab rãmb n na n zĩndi, la yaool n pa yẽ n kɩt tɩ b wa ye. La sã n pa Wẽnnaam n kɩtd tɩ sabaab rãmbã namsd ãdem-biisã, yaa ãnd dãmba?

Biiblã wilgdame tɩ “dũniyã fãa bee wẽng soabã nugẽ,” rat n yeel t’a Sʋɩtãan nugẽ. (1 Zã 5:19) A yaa nin-kʋʋd hal sẽn sɩng ne wakat ning a sẽn kɩɩs Wẽnnaam n tudg a Ãdem ne Hawa wã tɛk n tãag masã. (Zã 8:44) A tagsdame tɩ ninsaal vɩɩm pa tar yõod ye. A Sʋɩtãan baooda a meng nafr bala. Dẽnd dũniyã neb sẽn baood b mens nafr balã pa lingr ne tõnd ye. Rũndã-rũndã neb nins sẽn baood b mens nafr balã kɩtdame tɩ naong rãmbã tɩ vɩ zĩis sabaab rãmb sẽn tõe n tiig n wa. (Efɛɛz dãmba 2:2; 1 Zã 2:16) Dẽnd yaa ninsaalbã yão-beedã yĩng n kɩt tɩ sabaab rãmb kẽer namsd nebã. (Koɛɛg Soaba 8:9) Wãn to?

Sabaab rãmbã fãa la bal yaa ninsaalbã meng n wat ne. Wala makre, yel-beed ning sẽn paam neb nins sẽn vɩ New Orleans sẽn yaa Etazĩni tẽng ning koom sẽn tiig n sãamã, bɩ bɛgdã sẽn yi Venezuela tãensã zut n sãam rot wʋsgã. Sabaab-kãensã la sabaab rãmb a taab wala sebd la sa-kãsems sãamda teed la kʋʋd neb wʋsgo. Bala yaa ninsaalbã sẽn pa kelgd keoogrã, b sẽn pa get weoogã la tẽngã yell sõma wã, b sẽn pa tʋmd sõma ne teed nins b sẽn yiisdã, la b sẽn pa met rotã sõma bɩ n met-b sabaab rãmb zĩisẽ wã. Sẽn paase, b pa tagsd sõma la b yaool n maan b sẽn datã ye.

D ges sabaab rãmb sẽn zĩnd pĩnd wẽndẽ wã. A Zezi wakatẽ wã, gasg a ye n tiig n lʋɩ n kʋ neb 18. (Luk 13:4) Tõe n yaa nebã n tudg n maan bũmb bɩ yel-lingdem n wa ne sabaab kãngã lakae pa Wẽnnaam n tũnug ne rẽ n sɩbg nebã ye.—Koɛɛg Soaba 9:11.

Rẽ yĩnga Wẽnnaam zoe n sãama neb bɩ? N-ye, la a pa tũnug ne sabaab rãmbã ninsaalbã sẽn kɩtd tɩ watẽ wã n sãam-b ye. Sãoong kãens sasa, pa nebã fãa n kiid ye. Wẽnnaam pa wae n maand dẽ ye. La a maanda woto bũmb takɩ yĩnga. A Nowe wakatẽ sa-kãsengã la Sodom ne Gomoor sãangã a Lot wakatẽ wã yɩɩ sãoong a yiib sẽn yi Wẽnnaam nengẽ. (Sɩngre 6:7-9, 13; 18:20-32; 19:24) Bʋ-kaoor kãens sasa, Wẽnnaam sãamã neb nins fãa sẽn da pa rat n toeemã, la a kogl nin-tɩrsã.

Sɩd-sɩda, Wẽnnaam a Zeova ratame la a tara tõog me n na n kɩt tɩ namsg buud fãa sa, la a sõng neb nins sabaab rãmb sẽn paamã. Yɩɩl Sõamyã 72:12 ra pĩnd n goma a Zezi Kirist sẽn yaa Rĩm ning Wẽnnaam sẽn yãkã yell woto: “Yẽ na n fãaga nimbãan-ned sẽn kelemda la naong soab sẽn ka tar sõngda.”