Ka Ui ta Tatou Aronga Tatau

E Akautunga Anga Ainei te Au Tumatetenga Natura na te Atua?

Kare te Atua e taangaanga ana i te au tumatetenga natura i te akautunga i te au tangata apa kore. Kare rava aia i pera ana, e kare rava rai aia e akapera. No teaa ra? No te mea “ko te Atua oki te aroa,” i karanga ai te Pipiria ia 1 Ioane 4:8.

Ko te aroa te tumu i te au angaanga a te Atua. Kare te aroa e tamamae ana i te aronga apa kore, no te mea te akakite ra te Pipiria e “kare rava te aroa e takinga-kino i te tangata tupu.” (Roma 13:10) I roto ia Iobu 34:12, te akakite ra te Pipiria e: “Kare takiri te Atua e rave i te tuatua kino.”

E tika rai, kua totou te Pipiria i te au tumatetenga no to tatou tuatau, mei te au “ngaruerue maata.” (Luka 21:11) Inara kare e rauka i te akaapa ia Iehova no te au takinokinoanga tei akatupuia e ratou mei te tangata akakite mai rai i te reva kare e rauka kia akaapaia no te takinokino tei akatupuia e te uriia tana i akakite mai. No reira, me kare e ko te Atua te tumu i akatupuia ai te mamaeanga ki te tangata e teia au tumatetenga natura, eaa i reira te tumu?

“Te vai ua nei rai to te ao ravarai i raro ake i taua vaerua kino ra,” ko Satani te Tiaporo, i akaari mai ei te Pipiria. (1 Ioane 5:19) E ta tangata aia mei tona meameaau anga i te akamataanga mai te tangata e tae rava mai ki to tatou nei tuatau. (Ioane 8:44) Te manako ra a Satani i te oraanga tangata ei mea manako koreia e te puapinga kore. Te akakeuia ra aia e tona uaorai tu karapii e te noinoi, no reira kare i te mea umere e kua anga aia i tetai akatereanga ao katoa te inangaro ra i te tu karapii. Te akatereanga a teia ao i teia tuatau te ariki ra i te taangaanga karapii i te tangata tei tae rava ki te turanga e e manganui te au tangata paruru koreia e noo ra i roto i te tu kino, i roto i te au ngai te ka tupu mai te au tumatetenga no te tu natura me kore na te tangata i maani. (Ephesia 2:2; 1 Ioane 2:16) No reira, ka tau te au tangata noinoi kia akaapaia no tetai o te au kino e taii ana ki te aronga tei kite i te mamaeanga. (Koheleta 8:9) Akapeea te reira?

E mea poitirere tikai te numero o te au tumatetenga tei tupu e ka tau te akaapaanga i te tangata. Ka akamanako ana, ei akaraanga, i te mate tei takinokino i te au tangata e noo ra ki roto i te oire tei taii ki te uriia e te Vaipuke ko New Orleans, U.S.A., me kore te au are tei parari i te au oroanga vari no runga mai i te au maunga i te pae tai o Venetuera. I roto i taua au turanga ra e etai atu, ko te au tupuanga natura, mei te matangi e te ua, kua akatupu i te tumatetenga kino e ko te tumu maata ko te tu kamakura o te tangata i te aorangi, te angaanga mako kore, te paranianga tarevake, te akarongo kore i te au akamatakiteanga, e te akatereanga tarevake a te mana akaaere.

E akamanako ana i tetai tumatetenga i te tuatau Pipiria. I to Iesu tuatau, kua topa poitirere ua tetai are e kua mate e 18 tangata. (Luka 13:4) Penei kua tupu teia tumatetenga no te tarevake o te tangata, “te au tuatau e te tupu anga kite koreia ka tupu kia ratou ravarai,” me kore no nga mea roa ai​—inara e mea papu e kare i te akavaanga na te Atua.​—Koheleta 9:11, NW.

Kua tupu ainei tetai au tumatetenga i te rima o te Atua? Ae, inara kare i aite ki te tumatetenga natura me kore tei maaniia e te tangata, kua akataka meitakiia te aronga ka mate e te aronga ka ora, e akakoroanga to ratou, e kare teia e tupu ngoie ua ana taki tai ua ake taime. Te Vaipuke i te ao nei i te tuatau o te pateriareka ko Noa e te takoreanga o nga oire ko Sodoma raua ko Gomora i te tuatau o Lota nga akaraanga. (Genese 6:7-9, 13; 18:20-32; 19:24) Kua riro taua nga akavaanga tu-Atua ra i te tairipoti i te au tangata tataraara kore i te kino pakari tikai inara kua akaora i te au tangata tuatua tika i roto i nga mata o te Atua.

Ei tika tikai, tei te Atua ko Iehova te au ravenga, te inangaro, e te mana i te takore i te au mamaeanga katoatoa e te apai mai i te tauturuanga mei te au takinokino anga a te au tumatetenga natura. No runga i te Ariki ikiia e te Atua, ko Iesu Karaiti, kua totou a Salamo 72:12 e: “Ko tei putaua ra me kapiki maira, nana ïa e akaora; e tei akaaka ra, e kare ona e tauturu.”