Kʼáatchiʼob ku beetaʼal

¿Dios wa beetik u yúuchul le nukuch loobiloʼoboʼ?

Tiʼ Dioseʼ maʼatech u beetik u yantal le ciclonoʼob mix u tíitkuba le luʼum utiaʼal u castigartik máakoʼ. Mix utéen u beete yéetel mix bikʼin ken u beete. ¿Baʼaxten? Tumen le Bibliaoʼ tiʼ 1 Juan 4:8 ku yaʼalikeʼ «Jajal Dioseʼ yaakunaj».

Le yaabilajoʼ le péeksik Dios u beet tuláakal baʼal. Máax yaan u yaabilajeʼ maʼatech u beetik u muʼyaj le máaxoʼob utsoʼoboʼ, le Bibliaoʼ ku yaʼalik: «Le máax yaan u yaakunaj tiʼeʼ maʼ tu beetik kʼaas tiʼ uláakʼ» (Romailoʼob 13:10). Tsʼoʼoleʼ Dioseʼ «maʼatech u beetik mix baʼal kʼaas» (Job 34:12).

Baʼaleʼ ¿maʼ wa u yaʼalmaj le Bibliaoʼ teʼ tu tsʼook kʼiinoʼobaʼ yaan u yantal «nukuch kíilbal luʼumoʼob» yéetel uláakʼ nukuch loobiloʼob? (Lucas 21:11.) Jaaj, tu yaʼalaj, baʼaleʼ jeʼex utúul máak ku yaʼalik tuʼux kun máan upʼéel ciclón maʼ tu páajtal u culpartaʼal yoʼolal le loobiloʼob ku beetik le ciclonoʼ, Jéeobaeʼ maʼ tu páajtal xan u culpartaʼal yoʼolal le baʼaxoʼob tsʼíibtaʼan teʼ Biblia táan u béeytal teʼ kʼiinoʼobaʼ. Wa maʼ Dios beetik u yúuchul le nukuch loobiloʼoboʼ, ¿baʼax túun beetik u yúuchloʼob?

Le Bibliaoʼ ku yaʼalikeʼ «u túulisil yóokʼol kaabeʼ tiʼ yaan yáanal u páajtalil kʼaasibaʼaleʼ» (1 Juan 5:19). Letiʼeʼ desde ka tu tusaj le yáax wíinikoʼoboʼ kʼuch u beetubaj utúul j-kíimsaj wíinik, yéetel tak bejlaʼa le ku beetikeʼ (Juan 8:44). Le óolaleʼ, ku yilik u kuxtal wíinik bey upʼéel baʼal minaʼan u beelal jeʼel u páajtal u luʼsik jeʼel baʼaxak hora u kʼáateʼ. Letiʼeʼ jach chéen u yutsil ku kaxtik le oʼolal le máaxoʼob yanoʼob yáanal u páajtaliloʼ bey xan tsʼoʼok u pʼáatloʼoboʼ. Yoʼolal u tsʼuʼutil le máakoʼoboʼ yaʼab familiaʼob tsʼoʼok u kʼaʼabéettal u binoʼob kajtal tuʼuxoʼob séeb jeʼel u yúuchul loob tiʼoboʼ, jeʼex teʼ tuʼuxoʼob mantatsʼ ku búululoʼ (Efesoiloʼob 2:2; 1 Juan 2:16). Le oʼolaleʼ yaʼab tiʼ le nukuch talamiloʼob ku muʼyajtaʼaloʼ ku yúuchul yoʼolal u tsʼuʼutil wíinik (Eclesiastés 8:9). ¿Jach wa jaaj le baʼax k-aʼalikaʼ?

U jaajileʼ, yaʼab tiʼ le baʼaxoʼob ku muʼyajtaʼal ken úuchuk upʼéel nojoch loobiloʼ, tiʼ wíinik yaan u culpai. Jeʼex le baʼaxoʼob tu muʼyajtaj u kajnáaliloʼob Nueva Orleans, upʼéel káaj yaan Estados Unidosoʼ. Le kaajaʼ jach búul le ka máan le ciclón Katrinaoʼ. Tu luʼumil xan Venezuelaeʼ yaʼab tiʼ le máaxoʼob kajaʼanoʼob jáal jaʼoʼ kíimoʼob ka muʼuk u yotochoʼob tumen yaʼabkach luukʼ. Ken úuchuk baʼaloʼob beyaʼ, maases tiʼ wíinik yaan u culpaiʼ tumen táan u kʼaskúuntik le Luʼumaʼ, ku beetik u yotoch tuʼux maʼ unajiʼ yéetel maʼ maʼalob bix u beetkiʼ, yaan horaeʼ le gobiernoʼob xanoʼ maʼ tu chʼaʼatuklikoʼob tubeel le baʼax ku beetkoʼoboʼ yéetel yaan xan máaxoʼobeʼ maʼatech u yóotik u beetoʼob baʼax ku yaʼalaʼal utiaʼal maʼ u yúuchultiʼob loob.

Tu kʼiiniloʼob Jesuseʼ úuch xan upʼéel nojoch loobil, níik upʼéel torreiʼ ka tu kíimsaj dieciocho máakoʼob (Lucas 13:4). Le baʼax úuchaʼ, maʼ xaaneʼ tiʼ wíinik anchaj u culpai, maʼ xaan xaneʼ chéen ka jáan úuchi, tiʼ mix máak yanchaj u culpai. Maʼ Dios beet u yúuchul utiaʼal u castigartik wa máaxiʼ (Eclesiastés 9:11, NM).

Dioseʼ, ¿mix utéen wa túun u taas upʼéel loobil utiaʼal u castigartik wa máax? Tsʼoʼokiʼ, baʼaleʼ maʼ jeʼex le chéen ku jáan antaloʼob wa le ku beetaʼal u yantal tumen wíinikoʼ. Le baʼaxoʼob tu beetaj Diosoʼ tu xuʼulsaj chéen le kʼasaʼan máakoʼoboʼ, tsʼoʼoleʼ yaan baʼax oʼolal tu beetaj yéetel maʼ cada tu beetiʼ. Tu kʼiiniloʼob Noeeʼ tu taasaj upʼéel búulkabal yéetel tu kʼiiniloʼob Loteʼ tu xuʼulsaj u kaajiloʼob Sodoma yéetel Gomorra (Génesis 6:7-9, 13; 18:20-32; 19:24). Yéetel le castigoʼobaʼ tu xuʼulsaj tiʼ le kʼasaʼan máakoʼoboʼ, baʼaleʼ tu salvartaj le máaxoʼob ku beetkoʼob baʼax utstutʼaanoʼ.

Jéeobaeʼ jeʼel u páajtal u luʼsik le baʼaxoʼob beetik u muʼyaj máakoʼ, yéetel u yutskíintik tuláakal le loobil tsʼoʼok u yantal yoʼolal le ciclonoʼoboʼ, u tíitkuba le Luʼumoʼ yéetel tumen uláakʼ baʼaloʼob, tsʼoʼoleʼ jach u kʼáat u beete. Utiaʼal lelaʼ tsʼoʼok u beetik Reyil Jesucristo, u Hijo, utiaʼal u salvartik «le óotsil ku kʼáat óolaloʼ yéetel xan le máaxoʼob pechʼaʼanoʼob minaʼan mix máak áantikoʼoboʼ» (Salmo 72:12).