Edena Dala ai Taunimanima Ita Kara Henia be Namo?

“Umui ura taunimanima ese umui dekenai idia karaia hegeregerena, umui danu inai bamona do umui karaia idia dekenai.”​​—⁠LUKA 6:​31.

1, 2. (a) Ororo Haroro herevana be dahaka? (b) Inai stadi bona gabeai stadi dekenai dahaka do ita herevalaia?

IESU KERISO be Tisa Hereadaena. Farisea taudia be haida idia siaia Iesu idia dogoatao totona, to idia dogoatao lasi bona idia gwau: “Hamatamaia nega dekena amo ia mai bona hari, tau ta ia hereva lasi inai tau ia hereva bamona.” (Ioa. 7:​32, 45, 46) Iesu be ororo ai taunimanima dekenai haroro hereva namo hereana ta ia henia. Evanelia bukana Mataio karoa 5 ia lao 7 ai unai sivarai ia noho, bona Luka 6:​20-​49 ai ia torea danu. *

² Momo be unai haroro herevana lalonai Iesu ese ia gwauraia taunimanima kara namo henia dalana ena hakaua herevana idia diba. Iesu ia gwau: “Umui be umui ura taunimanima ese umui dekenai idia karaia hegeregerena, umui danu inai bamona do umui karaia idia dekenai.” (Luka 6:​31) Iesu ese taunimanima dekenai kara namodia ia karaia! Ia ese gorere taudia ia hanamoa bona mase taudia ia hatorea isi lou danu. To, Iesu ese ia harorolaia sivarai namona idia abia dae taudia ia hanamodia. (Luka 7:​20-​22 duahia.) Ita be Iehova ena Witnes taudia dainai, mai moale ida ita ura Basileia harorolaia gaukarana ita karaia. (Mat. 24:14; 28:​19, 20) Inai stadi bona gabeai stadi dekenai, ita be Iesu ena hereva unai gaukara dekenai bona Ororo Harorona ai taunimanima kara namo henia herevadia ma haida do ita herevalaia.

Umui Manau

3. Manau karana ena anina be dahaka?

³ Iesu ia gwau: “Dagedage lasi [“manau,” NW ] taudia be idia namo, badina tanobada do idia abia.” (Mat. 5:⁠5) Baibel lalonai, manau karana ia hahedinaraia tauna be goada tauna. Manau karana ita hahedinaraia badina Dirava ena taravatu ita badinaia. Taunimanima ita kara henidia neganai, unai bamona kara ita hahedinaraia. Hegeregere, ta ena ‘kara dika davana do ita henia lasi.’​​—⁠Roma 12:​17-​19.

4. Dahaka dainai manau taudia be idia namo?

⁴ Manau taudia be idia namo badina “tanobada do idia abia.” Iesu be “dagedage lasi bona manau tauna” dainai, Dirava ese ia abia hidi “gau ibounai be ia ese ia biagua,” bona ia be tanobada ibounai do ia Abia Tauna. (Mat. 11:29; Heb. 1:2; Sal. 2:⁠8) Baibel ia peroveta Mesia o taunimanima ena natuna ena guba Basileia lalonai haida be ia ida do idia lohia hebou. (Dan. 7:​13, 14, 21, 22, 27) Manau horoa taudia, 144,000 taudia unai, be ‘Dirava ese Keriso ia henia hanamoa gaudia do idia abia’ danu bona Iesu ida tanobada do idia lohiaia. (Roma 8:​16, 17; Apok. 14:⁠1) Unai Basileia henunai manau taudia ma haida be tanobada ai mauri hanaihanai do idia abia.​​—⁠Sal. 37:⁠11.

5. Keriso ena manau karana ita tohotohoa neganai, unai ese edena bamona iseda kara ia hanamoa?

⁵ Bema ita be ma haida ita kara auka henidia, ita do idia ura henia lasi bona ita do idia dadaraia. To, Keriso ena manau karana ita tohotohoa neganai, kongrigeisen lalonai tadikaka taihu do ita kara namo henia bona ita hagoadaia. Manau karana be Dirava ena lauma helaga ena huahua ta, bona lauma helaga ese iseda mauri ia biagua neganai, manau karana do ita hahedinaraia diba. (Galatia 5:​22-​25 duahia.) Oibe, ita ura Iehova ena lauma helaga ese ia hakaua manau taudia ai ita lao totona!

Hebogahisi Idia Hahedinaraia Taudia be Namo!

6. Hebogahisi idia hahedinaraia taudia edia kara namodia be dahaka?

⁶ Iesu ena Ororo Harorona ai ia gwau: “Bogahisihisi henia taudia be idia namo, Dirava  ena bogahisihisi do idia davaria.” (Mat. 5:⁠7) Hebogahisi idia hahedinaraia taudia be ma haida edia hisihisi idia lalopararalaia bona kara namona ta idia karaia unai taudia idia durua totona. Iesu be hoa dalanai hisihisi idia davaria taudia ia durua, badina ia hebogahisi henidia. (Mat. 14:14; 20:34) Taunimanima hebogahisi henia bona edia namo laloa karana ese ita ia doria idia ita durua totona.​​—⁠Iam. 2:​13.

7. Iesu ia hebogahisi dainai, ia ura dahaka ia karaia?

⁷ Iesu be ia ura laga-ani, to hutuma bada ia itaia neganai, “ia bogahisihisi idia dekenai, badina idia be mamoe hegeregere, bona naria tauna lasi. Vadaeni, ia ese mauri sivarai momo ia hadibaia.” (Mar. 6:​34) Ita danu be ma haida dekenai Basileia ena sivarai namona bona Dirava ena hebogahisi bada karadia ita herevalaia neganai, ita moale!

8. Dahaka dainai hebogahisi idia hahedinaraia taudia idia moale?

⁸ Hebogahisi idia hahedinaraia taudia be idia namo o idia moale, badina ‘Dirava ena bogahisihisi idia davaria.’ Mai hebogahisi ida taunimanima ita kara henia neganai, idia danu be unai bamona ita do idia kara henia. (Luka 6:​38) Danu, Iesu ia gwau: “Bema taunimanima edia dika umui gwauatao neganai, emui Tamana, guba dekenai ia noho ese emui dika danu do ia gwauatao.” (Mat. 6:​14) Hebogahisi idia hahedinaraia taudia sibona be Dirava ese edia kara dika do ia gwauatao bona ia lalonamo henidia, unai dainai idia moale.

“Maino Idia Karaia Taudia” Idia Moale Ena Badina

9. Bema ita be maino karaia taudia, iseda kara be edena bamona?

⁹ Iesu be moale ena badina ta ia gwauraia: “Taunimanima huanai maino idia karaia taudia be idia namo, badina be Dirava ese do ia gwauraia idia be iena natuna.” (Mat. 5:⁠9) Bema ita be maino karaia taudia, ita be do ita udu mauri lasi bona “turana korikori taudia edia turana dala ia hamakohia” udu mauri herevadia do ita kamonai lasi. (Aon. 16:28) Iseda hereva bona kara amo kongrigeisen lalonai bona murimuri ai idia noho taudia ida maino ita karaia. (Heb. 12:14) Gau badana be ita ura Iehova Dirava ida maino ai ita noho.​​—⁠1 Petero 3:​10-​12 duahia.

10. Dahaka dainai “maino karaia taudia” be idia moale?

¹⁰ Iesu ia gwau “maino karaia taudia” be idia namo o idia moale, “badina be Dirava ese do ia gwauraia idia be iena natuna.” Horoa Keristani taudia idia abidadama Iesu be Mesia dainai, Iesu ese idia dekenai siahu ia henia “Dirava ena natudia” ai idia lao totona. (Ioa. 1:​12; 1 Pet. 2:​24) To Iesu ena “mamoe idaudia” taudia, maino taudia ma haida unai, be edena bamona? Lagani 1,000 Lohia Negana lalonai Iesu be 144,000 taudia ida do ia lohia bona mamoe idaudia edia “Hanaihanai Noho Tamana” ai do ia lao. (Ioa. 10:​14, 16; Isa. 9:6; Apok. 20:⁠6) Lagani 1,000 Lohia Negana murinai, unai maino karaia taudia be tanobada ai Dirava ena natudia ai do idia lao.​​—⁠1 Kor. 15:​27, 28.

11. Bema ‘Dirava dekena amo ia mai aonega’ ese ita ia hakaua, edena dala ai taunimanima do ita kara henia?

¹¹ Iehova ida ita hetura namonamo totona, “maino ia henia Dirava” ena kara ita tohotohoa be namo, ena kara ta be maino. (Fili. 4:⁠9) Bema “Dirava dekena amo aonega” ita abia, maino dalanai ma haida do ita kara henia. (Iam. 3:​17) Oibe, ita be maino ita karaia taudia dainai, do ita moale.

‘Emui Diari Umui Hahedinaraia’

12. (a) Iesu ese hereva momokani ena diari be edena bamona ia herevalaia? (b) Iseda diari be edena bamona ita hahedinaraia diba?

¹² Taunimanima ita kara henidia dala namona ta be, Dirava amo ia mai hereva momokani ena  diari be idia dekenai ita hahedinaraia. (Sal. 43:⁠3) Iesu ese ena hahediba taudia ia hamaoroa idia be “tanobada taudia ibounai edia diari,” bona idia ia hagoadaia edia diari idia hahedinaraia totona, unai amo edia “kara namodia” be taunimanima ese do idia itaia. Unai idia karaia neganai, “taunimanima edia vairanai” hereva momokani do idia harorolaia. (Mataio 5:​14-​16 duahia.) Hari, iseda dekena taudia ita kara namo henidia bona sivarai namona be “bese ibounai” dekenai ita harorolaia amo eda diari ita hahedinaraia. (Mat. 26:13; Mar. 13:10) Unai be hahenamo badana!

13. Taunimanima be edena bamona ita idia diba?

¹³ Iesu ia gwau: “Ororo dekenai ia noho hanua be ia hunia diba lasi.” Ororo dekenai ia noho hanuana be taunimanima ese idia itaia haraga diba. Unai hegeregerena, ita be Basileia harorolaia taudia dainai, taunimanima be iseda kara namo, laloa namonamo bona hemataurai karadia idia diba.​​—⁠Tito 2:​1-​14.

14. (a) Aposetolo edia negai idia gaukaralaia lamepa be edena bamona do oi herevalaia? (b) Hereva momokani ena lamepa be edena bamona “maua” henunai do ita hunia lasi?

¹⁴ Iesu ia gwau lamepa idia gabua neganai, maua henunai do idia atoa lasi, to lamepa ena gabu dekenai do idia atoa, unai amo ena diari be ruma taudia ese do idia itaia. Aposetolo edia negai idia gaukaralaia lamepa be raro amo idia karaia gauna. Lamepa be olive dehoro amo idia hahonua bona uiki idia gabua murinai, lamepa be atai gabuna ta ai idia atoa, unai amo ena diari be ruma taudia ibounai ese idia itaia diba. Taunimanima be lamepa do idia gabua bona “maua” henunai do idia atoa lasi. Iesu ia ura lasi iena hahediba taudia ese hereva momokani ena diari be maua henunai idia hunia. Unai dainai iseda diari do ita hahedinaraia, to namo lasi dagedage karadia dainai ita gari bena Baibel ena hereva momokani ita hunia eiava ma haida dekenai ita harorolaia lasi.

15. Iseda “kara namodia” ese haida be edena bamona ia durua diba?

¹⁵ Iesu be lamepa ia herevalaia murinai, iena hahediba taudia ia hamaoroa: “Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” Iseda “kara namodia” dainai, haida be Dirava ena hesiai taudia ai idia lao bona Dirava idia “hanamoa.” Unai ese ita ia hagoadaia tanobada taudia huanai iseda diari ita hahedinaraia noho totona!​​—⁠Fili. 2:​15.

16. Ita be “tanobada taudia ibounai edia diari” ena anina be dahaka?

¹⁶ Ita be “tanobada taudia ibounai edia diari,” anina be ita ese Basileia harorolaia bona hahediba taudia halaoa gaukarana ita karaia be namo. To, gau ma haida ita karaia danu be namo. Paulo ia gwau: “Diari taudia bamona do umui noho be namo. Badina be diari ese inai bamona gau namodia ia havaraia: Kara namodia, kara maoromaoro, bona hereva momokani.” (Efe. 5:​8, 9) Namona be iseda kara amo ita hahedinaraia Dirava ena kara maoromaoro taravatu ita badinaia. Namona be Petero ena sisiba ita laloa: “Dirava idia diba lasi taudia edia vairanai, kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa, Keriso do ia giroa mai dinana dekenai.” (1 Pet. 2:​12) To, bema iseda tadikaka huanai hepapahuahu ia vara, dahaka idia karaia be namo?

 Emu Tadikaka ida Maino Umui Karaia

17-19. (a) Mataio 5:​23, 24 ai Iesu ese ia herevalaia “harihari gauna” be dahaka? (b) Iesu ese edena bamona ia hahedinaraia emu tadikaka ida maino umui karaia be mai anina bada?

¹⁷ Iesu ena Ororo Harorona ai, iena hahediba taudia ia sisiba henia, ia gwau edia lalona dekenai edia tadikaka do idia badu henia lasi bona gwauraia dika lasi. To, ita dekenai ia lalohisihisi tadikakana ida maino idia karaia haraga be namo. (Mataio 5:​21-​25 duahia.) Iesu ena sisiba mani oi laloa. Bema, oiemu harihari gauna be pata helagana dekenai oi mailaia bona oi laloatao emu tadikaka dekenai oi be mai emu kerere, dahaka do oi karaia? Emu harihari gauna be pata vairanai do oi rakatania, oi lao, emu tadikaka ida maino oi karaia. Unai murinai, oi giroa lou bona emu harihari gauna oi bouboulaia.

¹⁸ Nega momo unai “harihari gauna” be Iehova ena dubu dekenai ta ese ia bouboulaia gauna. Mose ena Taravatu henunai, animal bouboulaia karana be mai anina bada, ia be Israela taudia edia tomadiho karana ta, badina unai be Dirava ena hahegani. To, bema oi laloatao oi be mai emu kerere emu tadikaka dekenai, unai oi hamaoromaoroa guna be mai anina bada, bona harihari gauna be gabeai oi henia diba. Iesu ia gwau: “Oiemu harihari gauna pata helaga ena vairana dekenai do oi rakatania, oi lao, oiemu tadikakana danu maino do umui ruaosi karaia guna, gabeai oi giroa lou, oiemu harihari gauna Dirava dekenai do oi henia.” Edia tadikaka ida maino idia karaia be mai anina bada, bona Mose ena taravatu ese ia herevalaia boubou gauna ia hereaia.

¹⁹ Iesu be boubou haida eiava kerere haida sibona ia gwauraia lasi. Unai dainai, herevana ta be dahaka harihari gauna ia ura bouboulaia, to do ia rakatania bona iena tadikaka ida maino do ia karaia guna be namo. Bema unai boubou gauna be ia mauri noho animal, “pata helaga ena vairana” dekenai do ia rakatania. Unai hekwakwanai ia hamaoromaoroa murinai, do ia giroa bona ena harihari gauna do ia bouboulaia.

20. Bema iseda tadikaka dekenai ita badu, dahaka dainai unai hekwakwanai ita hamaoromaoroa haraga be namo?

²⁰ Dirava vairanai, iseda tadikaka ita tura henia namonamo karana be tomadiho momokani ena kahana badana ta. Bema ta be ena tadikaka ia kara namo henia lasi, Iehova dekenai ia bouboulaia animal be anina lasi. (Mika 6:​6-8) Unai dainai, Iesu ese iena hahediba taudia ia sisiba henidia, ia gwau: “Maino do umui karaia haraga.” (Mat. 5:​25) Danu Paulo ia gwau: “Bema umui badu neganai, kara dika do umui karaia lasi. Bona dina do ia diho lasi neganai, emui badu do umui haorea. Satani ena dala do umui kehoa lasi.” (Efe. 4:​26, 27) Bema badina maorona dainai ita badu, namona be dala ita tahua unai hekwakwanai ita hamaoromaoroa totona. Namo lasi nega daudau lalonai unai tadikaka ita badu henia noho, badina unai ese Diabolo ena dala ia kehoa diba.​​—⁠Luka 17:​3, 4.

 Mai Hemataurai ida Haida Kara Henia

21, 22. (a) Hari ita stadilaia gaudia be edena bamona ita badinaia diba? (b) Stadi gabena ai dahaka do ita stadilaia?

²¹ Iesu ese Ororo Harorona ai ia henia hereva haida ita herevalaia murinai, namona be unai ese ita ia durua ma haida ita hebogahisi henia bona matauraia totona. Ena be ita be goevadae lasi taudia, to Iesu ena sisiba ita badinaia diba, badina ia bona iseda guba Tamana Iehova be iseda goada hegeregerena ita henia gaudia idia abia dae. Ita guriguri, ita hekwarahi bona Iehova ena heduru amo, manau, hebogahisi, bona maino ita hahedinaraia diba. Iehova ena hairai ena diari ita hahedinaraia diba. Danu, iseda tadikaka bona ita huanai kerere ta ia noho neganai, maino ita karaia diba.

²² Iehova ita tomadiho henia karana ma ta be iseda dekena taudia ita kara namo henidia. (Mar. 12:31) Stadi gabena ai, Iesu ese Ororo Harorona ai ia gwauraia hereva ma haida do ita stadilaia, unai ese ita do ia durua taunimanima ita kara namo henia totona. Hari, Iesu ena haroro herevana amo gau namodia ita dibaia vadaeni unai dainai sibona ita nanadaia: ‘Lau ese taunimanima ma haida lau kara namo henia, a?’

[Footnote]

Edena Bamona Do Oi Haere?

• Ita manau ena anina be dahaka?

• Dahaka dainai “bogahisihisi taudia” idia moale?

• Edena dala ai iseda diari ita hahedinaraia diba?

• Dahaka dainai iseda tadikaka ida maino ita karaia haraga be namo?

[Study Questions]

[Picture on page 4]

Basileia ena sivarai ita harorolaia be mai anina bada iseda diari ita hahedinaraia totona

[Picture on page 5]

Keristani taudia be kara namodia idia hahedinaraia be namo

[Picture on page 6]

Namona be oi hekwarahi emu tadikaka ida maino oi karaia totona kaka ida maino ita karaia haraga be namo?