Fa wi musu handri nanga trawan?
Fa wi musu handri nanga trawan?
„San unu wani meki sma du gi unu, na dati un musu du gi den tu.”—LUK. 6:31.
1, 2. (a) San na a Bergitaki? (b) Na sortu sani wi sa poti prakseri na ini na artikel disi èn na ini a wan di e kon baka disi?
YESUS KRESTES trutru ben de a Bigi Leriman. Di den kerki fesiman di ben e gens en, seni skowtu fu go grabu en, dan den skowtu disi drai kon baka sondro Yesus. Den ben taki: „Noiti ete wan sma taki leki a man disi” (Yoh. 7:32, 45, 46). Wan fu den moro moi taki di Yesus ben hori, na a Bergitaki. A skrifi na ini kapitel 5 te go miti kapitel 7 fu na Evangelietori fu Mateyus. Den srefi tori disi skrifi na Lukas 6:20-49. *
2 Kande a moro pôpi sani di Yesus ben taki na ini a Bergitaki fu en, na a prenspari gronprakseri di skrifi na Lukas 6:31, pe Yesus e leri wi fa fu handri nanga trawan. Yesus ben taki: „San unu wani meki sma du gi unu, na dati un musu du gi den tu.” Èn a no de fu taki dati Yesus du furu bun sani gi sma! A ben dresi sikisma èn a gi dedesma wan opobaka srefi. Ma sma ben kisi blesi spesrutu te den ben e gi yesi na a bun nyunsu di a ben preiki gi den. (Leisi Lukas 7:20-22.) Wi leki Yehovah Kotoigi breiti taki wi e teki prati na a srefi Kownukondre preikiwroko dati (Mat. 24:14; 28:19, 20). Na ini na artikel disi, èn na ini a wan di e kon baka disi, wi sa poti prakseri na den sani di Yesus ben taki fu a wroko disi. Wi sa poti prakseri tu na tra sani di a ben taki na ini a Bergitaki, fu sori wi fa wi musu handri nanga trawan.
Abi safri-atifasi
3. San na safri-atifasi?
3 Yesus ben taki: „Koloku fu den safri-atisma, bika den o kisi grontapu” (Mat. 5:5). Soleki fa Bijbel e sori, dan safri-atifasi a no wan swakifasi. Te wi abi safri-atifasi, dan dati wani taki dati wi e sori switifasi gi trawan soleki fa Gado wani. Dati sa de fu si na ini a fasi fa wi e handri nanga trawan. Fu eksempre, wi ’no e du ogri baka nanga wan sma te a du wan ogri nanga wi’.—Rom. 12:17-19.
4. Fu san ede safri-atisma de koloku?
4 Den safri-atisma de koloku fu di „den o kisi grontapu”. Yesus di ben „abi safri-ati nanga sakafasi”, na „a sma di o kisi ala gudu” èn fu dati ede a de a moro prenspari Sma di o kisi grontapu (Mat. 11:29; Hebr. 1:2; Ps. 2:8). Bijbel ben taki dati a „manpikin fu libisma” di ben de a Mesias, ben o tiri makandra nanga tra sma na ini a Kownukondre na hemel (Dan. 7:13, 14, 21, 22, 27). Den 144.000 salfuwan di abi safri-atifasi ben o ’kisi wan gudu makandra nanga Krestes’, èn den ben o kisi grontapu tu (Rom. 8:16, 17; Openb. 14:1). Tra safri-atisma sa kisi a grani fu libi fu têgo na grontapu di sa de na ondro a tiri fu a Kownukondre.—Ps. 37:11.
5. Sortu wini wi sa kisi te wi e sori safri-atifasi neleki Krestes?
5 Efu wi no ben o abi safri-atifasi, dan a no de fu taki dati tra sma no ben o lobi fu abi demakandra nanga wi èn den ben o wai pasi gi wi. Ma te wi abi safri-atifasi neleki Krestes, dan wi sa sori switifasi gi wi Kresten brada nanga sisa, èn wi sa tranga a bribi fu den. Te wi e ’meki a yeye tiri wi èn te wi e waka nanga a yeye’, dan wi sa kon abi safri-atifasi fu di dati na wan fu den froktu fu a yeye. (Leisi Galasiasma 5:22-25.) A no de fu taki, dati wi wani de wán fu den safri-atisma di e meki a santa yeye fu Yehovah tiri den!
Den wan di abi sari-ati gi trawan de koloku trutru!
6. Sortu moi fasi „den sma di abi sari-ati gi trawan” e sori?
6 Wan tra sani di Yesus ben taki na ini a Bergitaki fu en, na disi: „Koloku fu den sma di abi sari-ati gi trawan, bika sma o abi sari-ati gi den” (Mat. 5:7). Den „sma di abi sari-ati gi trawan” e firi gi trawan di abi problema èn den e broko den ede nanga den fu di den lobi den. Yesus ben du wondru fu yepi sma di ben e pina, fu di a „ben sari den” (Mat. 14:14; 20:34). Te wi e firi sari gi trawan èn te wi e broko wi ede nanga den, dan wi musu du wan sani fu yepi den sma disi.—Yak. 2:13.
7. San Yesus du fu di a ben abi sari-ati gi trawan?
7 Di Yesus miti wan grupu sma di a ben de na pasi fu go rostu, dan ’a sari den, bika den ben de leki skapu di no abi wan skapuman’. Ne „a bigin leri den furu sani” (Mark. 6:34). Wi e kisi prisiri trutru te wi e fruteri trawan tu fu a Kownukondre boskopu èn te wi e meki den kon sabi na sortu fasi Gado sori sari-ati gi libisma!
8. Fu san ede sma di abi sari-ati gi trawan de koloku?
8 Den sma di e sori sari-ati gi trawan de koloku fu di ’trawan e sori sari-ati gi den’. Te wi e sori sari-ati gi sma, dan nofo tron den e du a srefi gi wi (Luk. 6:38). Boiti dati, Yesus ben taki: „Efu unu e gi sma pardon fu den sondu fu den, dan un Tata na hemel sa gi unu pardon tu” (Mat. 6:14). Soso den wan di abi sari-ati gi trawan sa kisi pardon fu sondu, èn na den sma disi wawan Gado feni bun. A sani disi e meki taki den de koloku.
Fu san ede „sma di e suku vrede” de koloku
9. Fa wi sa handri te wi lobi fu suku vrede?
9 Yesus ben taki fu wan tra sani di e meki sma de koloku. A ben taki: „Koloku fu den sma di e suku vrede, bika sma sa kari den, ’manpikin fu Gado’” (Mat. 5:9). Te wi na sma di lobi fu suku vrede, dan wi no sa feni en bun te sma e taki takru fu trawan, fu di dati kan „prati den wan di de bun nanga makandra” (Odo 16:28). Wi sa taki èn du sani di e sori taki wi wani libi na ini vrede nanga den Kresten brada nanga sisa fu wi, èn nanga tra sma (Hebr. 12:14). Ma san moro prenspari, na taki wi sa du ala san wi man fu sorgu taki Yehovah Gado feni wi bun.—Leisi 1 Petrus 3:10-12.
10. Fu san ede „sma di e suku vrede” de koloku?
10 Yesus ben taki dati „den sma di e suku vrede” de koloku, „fu di sma sa kari den ’manpikin fu Gado’”. Fu di salfu Kresten e bribi taki Yesus na a Mesias, meki den e kisi „a reti fu tron Gado pikin” (Yoh. 1:12; 1 Petr. 2:24). Fa a de nanga den „tra skapu” fu Yesus di lobi vrede? Den sa abi Yesus leki den „Têgo Tata” na a pisi ten te a sa tiri Dusun Yari langa makandra nanga den tra salfuwan (Yoh. 10:14, 16; Yes. 9:6; Openb. 20:6). Na a kaba fu a Dusun Yari Tiri fu en, den sma disi di lobi vrede sa tron trutru pikin fu Gado na grontapu.—1 Kor. 15:27, 28.
11. Fa wi sa handri nanga trawan te wi e meki „a koni fu Gado” tiri wi?
11 Fu man abi wan bun matifasi nanga Yehovah, „a Gado fu vrede”, dan wi musu sori den srefi fasi fu en. Dati wani taki dati wi musu lobi vrede tu (Fil. 4:9). Te wi e meki „a koni fu Gado” tiri wi, dan wi sa sori switifasi gi trawan (Yak. 3:17). Iya, wi sa de koloku fu di wi e suku vrede.
„Meki ala sma si a leti fu unu”
12. (a) San Yesus ben taki fu a leti fu wi? (b) Fa wi kan meki a leti fu wi skèin?
12 A moro bun fasi fa wi kan handri nanga sma, na te wi e yepi den fu kon sabi den tru leri fu Gado (Ps. 43:3). Yesus ben taigi den disipel fu en taki den ben de „a leti fu grontapu” èn a ben gi den deki-ati fu meki a leti fu den skèin so taki trawan ben kan si den ’bun di den e du’, noso den bun sani di den e du gi trawan. Na so den ben o yepi sma fu kon sabi den tru tori fu Bijbel, èn dati ben o tyari wini kon gi den sma disi. (Leisi Mateyus 5:14-16.) Na ini a ten disi, wi e meki a leti fu wi skèin gi trawan fu di wi e du bun gi trawan, èn fu di wi e preiki a bun nyunsu „na ala sei fu grontapu”, noso „na ala kondre”(Mat. 26:13; Mark. 13:10). Dati na trutru wan bigi grani di wi abi!
13. San sma e si fu wi?
13 Yesus ben taki: „Wan foto no man kibri te a de na tapu wan bergi.” Te wan foto ben de na tapu wan bergi, dan sma ben o man si en makriki. Na so a de tu taki, te wi e preiki a bun nyunsu, dan sma e si den bun sani di wi leki Kownukondre preikiman e du, èn den e si taki wi e tyari wisrefi na wan fasi di fiti èn taki wi e libi wan krin libi.—Tit. 2:1-14.
14. (a) Fa den lampu fu a fosi yarihondro ben e wroko? (b) Fu san ede wi no e kibri wi leti na ondro wan „baskita”?
14 Yesus ben taki dati te sma ben e leti wan lampu, dan den no ben e poti en na ondro wan baskita, ma den ben musu poti en na tapu wan hei presi, so taki a leti ben kan skèin na tapu ala sma na ini na oso. Nofo tron den lampu fu a fosi yarihondro ben meki fu kleidoti, èn den ben abi wan pisi titei na ini di ben e soigi na oli (nofo tron dati ben de olèif oli), so taki a lampu ben e tan skèin. Nofo tron te a lampu ben de na tapu wan hei presi, dan a ben e ’skèin na tapu ala sma na ini na oso’. Sma no ben o leti wan lampu fu poti en na ondro wan „baskita”, noso wan bigi beki di ben kan hori pikinmoro neigi liter. Yesus no ben wani taki den disipel fu en ben musu kibri a leti fu den na ondro wan agersi baskita. Fu dati ede, wi musu meki a leti fu wi skèin, èn noiti wi musu tapu fu fruteri trawan den tru tori fu Bijbel, soso fu di wi e kisi gens noso frufolgu.
15. Sortu krakti den ’bun di wi e du’ abi tapu son sma?
15 Baka di Yesus ben taki fu wan lampu di e skèin, dan a taigi den disipel fu en: „Sosrefi, meki ala sma si a leti fu unu, dan den kan si den bun di unu e du èn den kan gi glori na un Tata di de na hemel.” Fu di wi e du „bun”, meki son sma e tron futuboi fu Gado, èn na so den e „gi glori” na en. A sani disi trutru e gi wi deki-ati fu tan „sma di e skèin leti na ini grontapu”!—Fil. 2:15.
16. San wi musu du fu di wi na „a leti fu grontapu”?
16 Fu di wi na „a leti fu grontapu”, meki wi musu preiki a bun nyunsu fu a Kownukondre, èn wi musu meki disipel. Ma wi musu du ete wan sani. Na apostel Paulus ben skrifi: „Tan tyari unsrefi leki pikin di de na ini a leti, bika a bakapisi fu a leti de fu si na ini ibri sortu bun sani di wi e du, sosrefi na ini a regtfardiki fasi èn a reti fasi fa wi e tyari wisrefi” (Ef. 5:8, 9). Ala ten wi musu tyari wisrefi na wan fasi di e kruderi nanga den hei markitiki fu Gado. Iya, wi musu gi yesi na a rai disi di na apostel Petrus ben gi: „Tan tyari unsrefi na wan bun fasi na mindri den grontapusma, so taki a srefi sani di e meki den taki ogri fu unu neleki unu na ogri sma, sa meki den gi Gado glori na a dei te a sa kon krutu sma, fu di densrefi e si den bun wroko fu unu” (1 Petr. 2:12). Ma san wi musu du wi e kisi problema nanga wan Kresten brada noso sisa?
„Meki vrede nanga yu brada”
17-19. (a) San na a ofrandi di skrifi na Mateyus 5:23, 24? (b) Fu san ede a de prenspari fu meki vrede nanga wan brada noso wan sisa, èn fa Yesus tyari dati kon na krin?
17 Na ini a Bergitaki, Yesus ben warskow den disipel fu en fu no abi bita-ati gi wan brada noso wan sisa. Na presi fu dati, den ben musu go meki vrede wantewante nanga wan brada noso wan sisa di den ben afrontu. (Leisi Mateyus 5:21-25.) Luku bun san Yesus ben taki. Te yu ben e tyari yu ofrandi go na a altari èn yu ben e memre taki yu brada ben abi wan sani teige yu, dan san yu ben musu du? Yu ben musu libi na ofrandi na fesi na altari, èn yu ben musu go meki vrede nanga yu brada. Te yu ben du dati, dan yu ben kan drai go baka fu tyari yu ofrandi.
18 Nofo tron sma ben kan tyari ofrandi na ini a tempel fu Yehovah. A ben de tumusi prenspari taki sma ben e tyari meti leki ofrandi, fu di na dati Gado ben taigi den Israelsma di ben de na ondro a Wet di A ben gi Moses. Ma efu wan Israelsma ben e memre taki wan brada fu en ben abi wan sani teige en, dan a ben moro prenspari srefi fu meki vrede nanga en leki fu tyari na ofrandi. Yesus ben taki: „Libi yu ofrandi drape na fesi na altari, èn gowe go meki vrede nanga yu brada fosi, èn te yu drai kon baka, dan yu kan gi na ofrandi fu yu.” A ben de tumusi prenspari taki den meki vrede baka nanga wan brada, fosi den tyari wan ofrandi soleki fa a Wet ben taki.
19 A rai di Yesus ben gi, no ben abi fu du nomo nanga spesrutu ofrandi, noso nanga spesrutu fowtu di sma ben e meki. Fu dati ede, efu wan sma ben e memre taki en brada ben abi wan sani teige en, dan a ben musu go meki vrede fosi nanga a brada dati, fosi a ben e tyari iniwan ofrandi. Efu a sma ben e tyari wan libilibi meti leki ofrandi, dan a ben musu libi a meti dati „na fesi na altari” pe den priester ben e tyari ofrandi na tapu, èn di ben de na ini a fesidyari fu a tempel. Baka te a ben meki vrede nanga en brada, dan a ben kan drai go baka fu go tyari na ofrandi fu en.
20. Fu san ede wi no musu draidrai fu meki vrede baka nanga wan brada noso sisa te wi e atibron na en tapu?
20 Gado e si en leki wan prenspari sani taki den tru anbegiman fu en e libi na ini vrede nanga makandra. Gi Yehovah, srakti-ofrandi no ben wani taki noti efu den sma di ben e tyari den no ben e libi bun nanga trawan (Mika 6:6-8). Fu dati ede, Yesus ben gi den disipel fu en a rai fu ’lusu problema heri esi’ (Mat. 5:25). Paulus ben gi wan srefi sortu rai. A ben taki: „Unu kan kisi atibron, ma toku un no musu du sondu; no meki son dongo, dan unu e mandi ete; no gi Didibri okasi” (Ef. 4:26, 27). Te wi abi bun reide fu atibron tapu wan sma, dan wi musu meki en bun baka heri esi nanga a sma dati, so taki wi no e gi Didibri okasi fu kori wi.—Luk. 17:3, 4.
Sori lespeki gi trawan ala ten
21, 22. (a) Fa wi kan fiti a rai fu Yesus di kon na krin na ini na artikel disi? (b) Na sortu sani wi sa poti prakseri na ini a artikel di e kon?
21 Now di wi poti prakseri baka na wan tu fu den sani di Yesus ben taki na ini a Bergitaki fu en, dan dati musu yepi wi fu sori switifasi nanga lespeki gi trawan. Aladi wi alamala na sondusma, toku wi kan fiti a rai fu Yesus, fu di a no e fruwakti moro fu wi leki san wi man du, èn wi hemel Tata no e du dati tu. Ma te wi e begi Gado, te wi e du ala san wi man fu kweki den fasi disi, èn te Yehovah e horibaka gi wi, dan wi kan tron sma di abi safri-atifasi, di e sori sari-ati gi trawan, èn di e suku vrede. Wi kan skèin a leti fu wi so taki Yehovah e kisi glori. Boiti dati, wi kan meki vrede nanga wi brada noso sisa te dati de fanowdu.
22 Efu wi wani anbegi Yehovah na wan fasi di a feni bun, dan wi musu handri bun nanga trawan (Mark. 12:31). Na ini na artikel di e kon, wi sa poti prakseri na tra sani di Yesus ben taki na ini a Bergitaki, fu sori wi fa fu tan du bun gi trawan. Ma te wi denki dipi fu den sani di wi leri fu a tumusi moi taki fu Yesus, dan wi ben kan aksi wisrefi a sani disi: ’Mi e libi bun nanga trawan?’
[Futuwortu]
^ paragraaf 1 A ben o bun fu leisi den pisi disi, fosi yu e bigin studeri na artikel disi èn a wan di e kon baka disi.
San yu ben sa piki?
• San a wani taki fu abi safri-atifasi?
• Fu san ede „den sma di abi sari-ati gi trawan” de koloku?
• Fa wi kan meki a leti fu wi skèin?
• Fu san ede wi no musu draidrai fu ’meki vrede nanga wi brada’?
[Aksi fu a tori disi]
[Prenki na tapu bladzijde 4]
Wan tumusi prenspari fasi fa wi kan meki a leti fu wi skèin, na te wi e preiki a Kownukondre boskopu
[Prenki na tapu bladzijde 5]
Sma musu man si krin taki Kresten e tyari densrefi na wan fasi di Gado feni bun
[Prenki na tapu bladzijde 6]
Du ala san yu man fu meki vrede nanga yu brada