Fuukulenuhu Kumukalakela Yehova Hampinji Yimuchidi Atwansi

“Shakamaku muyuma yiwadizili nakushinshikamu.”—2 TIMOTEWU 3:14.

1. Indi Yehova wamonaña ñahi mudimu wakalakalañawu atwansi aYinsahu jindi?

 MUDIMU wajila wakalakalañawu atwansi walema chikupu kumesu aYehova chakwila wonena niwuprofwetu wahosha hadi atwansi. Ñimbi yamasamu wembili nindi: “Antu eyi hiyakudilambula himulambu wakutwala chanyichima yawu awenawu mwifuku deyi dañovu; mulubanji lwakujila, chakufuma mwivumu dabudidi, eyi wukweti wuumi wakuwukwenzi weyi.” (Masamu 110:3) Eñañi, Yehova wamonaña atwansi anakukeña kumukalakela nindi alema chikupu.

2. Kukalanyi kwayuma yakumujimba kwamonañawu atwansi makonu kutalisha hachihandilu chawu?

² Enu atwansi adi muchipompelu chawakwaKristu, komana mwadihana kudi Yehova? Atwansi amavulu chinateli kuyikalila kufuukulahu kumukalakela Nzambi walala. Anlomboli amujakulanda nakulandulula, antañishi, mpinji yikwawu amuchisaka niamabwambu alejaña atwansi kufwila maheta. Neyi atwansi afuukulahu kumukalakela Yehova, antu ayisehaña. Hela chochu, kumukalakela Nzambi walala dichuma chachiwahi chimwatela kwila muchihandilu chenu. (Masamu 27:4) Dichi, toñojokenu hanawa malwihu asatu: Chumanyi chikuyileteshenu kumukalakela Nzambi? Hela chakwila antu anakuyihoshola hela kudi yuma yinakukoñawu, chumanyi chikuyikwasha kutwalekahu hamu neyi muntu wadihana kudi Yehova? Kukoolekanyi kwakuwahi kwamudimu wajila kumwatela kwikala naku?

Kumukalakela Yehova Dichuma Chachiwahi

3. Indi yuma yaleñayi Yehova yatuleñelaña kwiladi?

³ Muloñadi wumwatelela kumukalakela Nzambi wamumi nawa walala? Mukanda waChimwekeshu 4:11 washimunaña muloña waweni nawu: ‘Eyi Yehova, eyi Nzambi yetu, wunateli kutambula kulema nimpuhu niñovu, muloña yeyi waleñeli yuma yejima, nawa muloña wankeñelu yeyi dichi chiyekalilaku, dichayileñeleluwu.’ Eñañi, Yehova diyi Nleñi muwahi waleñeli yuma yejima. Mwalala, iseki damwekanaña lubanji chikupu. Nyitondu, nkenu, atunyama, tuluñalwiji, mpidi, nijimpola—Yehova diyi waleñeli yuma yejimiyi. Masamu 104:24 yahoshaña nawu: ‘Iseki dinenzali to-o namaheta [aNzambi].’ Dichi twatela kumusakilila Yehova muloña wakukeña kwindi watwinka mujimba niyitoñojoka yatuleñelaña kukeña iseki niyuma yayiwahi yekalahu! Neyi twikala namuchima wakusakilila hayuma yayiwahi yaleñayi chikutukwashaku kumukalakela Nzambi.

4, 5. Nyidimwinyi yakoñeliyi Nzambi yamuletesheli Yoshuwa kuswila kudi Yehova?

⁴ Mazu ahosheliyi nlomboli yawaIsarela Yoshuwa anamwekeshi chuma chikwawu chikutuleñela kumukalakela Yehova. Henohu wudi kwakwihi nakufwa, Yoshuwa wayilejeli antu jaNzambi nindi: “Enu muneluki nanyichima yenu yejima, nawumi wenu wejima, nenu hikunakañanyi chuma chachiwahi nichimu chayiteneniyi Yehova Nzambi yenuku, yejima munayimoni, kwosi nichuma chinakañanyuku.” Muloñadi Yoshuwa chahosheleliyi awa mazu?—Yoshuwa 23:14.

⁵ Hamuloña wakulila muEjipitu, Yoshuwa watela welukili chikaninu chaYehova chayikaniniyi aIsarela kuyinka ituña dawu. (Kutachika 12:7; 50:24, 25; Kwidika 3:8) Kulondelahu, Yoshuwa wamweni chatachikiliyi Yehova kushikija china chikaninu kuhitila mukuleta Yipupu Ikumi  hadi aEjipitu nikushinjila Fwaro wachinchika kuyumbaku anyana kaIsarela. Yoshuwa wadiñi hakachi kawantu apulwishiluwu hakuzambuka Kaluñalwiji Kachinana, nawa wamweni Fwaro ninjita yindi chanoñeluwu mukaluñalwiji. Halwendu lwalulehi lwakuhita “mwisaña dina deneni dikweti woma nankashi” daChinkalampata chaSinayi, Yoshuwa wamweni chayinkeliyi Yehova aIsarela yuma yejima yakeñeleñawu. Kwosi niwumu wafwili nampwila hela nanzalaku. (Kuhituluka 8:3-5, 14-16; Yoshuwa 24:5-7) Chelili aIsarela hiyakukeña kushinda muza wañovu waweniKenani kulonda atambuli Ituña daChikaninu, Yoshuwa wamweni Nzambi walombeleñayi yena niakwawu aIsarela chayikwashili muniyi njita.—Yoshuwa 10:14, 42.

6. Chumanyi chikuyikwashaku kwikala nampwila yakumukalakela Nzambi?

⁶ Yoshuwa welukili nindi Yehova washikijili yikaninu Yindi. Dichi, Yoshuwa wahosheli nindi: “Hakwila ami nimutaña wami tukumukalakela kwetu Yehova.” (Yoshuwa 24:15) Indochu enu mukukalakelanyi? Neyi mutoñojoka hayikaninu yashikijayi dehi Nzambi walala nihayikaninu yikwawu yakashikijayi, komana mwekalaña nampwila yakumukalakela neyi chelili Yoshuwa?

7. Muloñadi kupapatishewa chikwekalila kwalema?

⁷ Kushinshika hanyidimu yayiwahi yaYehova nikutoñojoka hayikaninu yindi yayiwahi nawa yalala chikupu, yatela kuyiletesha mudihani kudi Yehova cheñi nikumwekesha kudihana kwenu kuhitila muchipapatishu. Chipapatishu hinjila yeneni yatela kulondelawu antu anakukeña kumukalakela Nzambi. Yesu, Chakutalilahu chetu, nalumbululi chumichi. Henohu kanda yatachiki mudimu windi neyi Mesiya, Yesu wayili kudi Yowanu Mpapatishu kulonda amupapatishi. Muloñadi Yesu chakeñeliyi nindi amupapatishi? Wahosheli cheñi nindi: “Chinasuluki mwiwulu hinalondi kwila [nkeñelu yamami] awenuku,” “nalondi kwila [nkeñelu yayena] wantemesheli.” (Yowanu 6:38) Hakwila yodimwekeshi nindi nadihani kwila nkeñelu yaTata yindi, Yesu amupapatishili.—Matewu 3:13-17.

8. Muloñadi Timotewu chafuukwiluhu kudifukula kudi Nzambi, nawa chumanyi chimwatela kwila?

⁸ Talenu cheñi nsañu yaTimotewu, mukwaKristu wakansi wenkeluwu mudimu weneni kudi Yehova nikukooleka kwakuvulu mukuhita kwampinji. Muloñadi Timotewu chafuukwiluhu kudifukula kudi Nzambi walala? Bayibolu yatulejaña nawu “wadizili yuma nakushinshikamu.” (2 Timotewu 3:14) Neyi munadizi Izu daNzambi nawa muneteji chikupu nenu datañishaña mwalala, anenu nawa mudi neyi Timotewu. Ichi dinu mwatela kufuukulahu. Komana kwila muyilejamu anvwali jenu hachuma chimunakukeña kwila nehi? Kuzatila hamu nawaeluda muchipompelu, akuyikwashaku kwiluka yuma yamuNsona yakeñekaña hakwila muntu amupapatishi.—Tañenu Yililu 8:12.

9. Indi amakwawu akutiya ñahi neyi munapapatishewi?

⁹ Kupapatishewa hinjila yayiwahi yakutachikilamu kumukalakela Nzambi walala. Dichi neyi mukupapatishewa, mukutachika lwendu lwalulehi mwakafuma wuloku wawumi wahaya nyaka nikwikala namuzañalu hayinu mpinji hamuloña wakwila nkeñelu yaNzambi. (Aheberu 12:2, 3) Cheñi nawa mukazañalesha chisaka chenu chidi dehi muchalala niamabwambu jenu adi muchipompelu chawakwaKristu. Sweje-e dinu, mukuzañalesha muchima waYehova. (Tañaku Yishimu 23:15.) Eñañi, antu amakwawu hiyanateli kwiluka  chuma chinayileteshi kufuukulahu kudifukula kudi Yehova, nawa akuyisehaña nawu munaluwañeshi chikupu. Akutachika nikuyidimbulula. Ilaña munateli kushinda kukala kwamuchidiwu.

Neyi Antu Ayihula Hela Kuyidimbulula

10, 11. (a) Malwihwinyi atela kuyihulawu antu kutalisha hakufuukula kwenu kwakumukalakela Nzambi? (b) Chumanyi chimukudizila kudi Yesu chakwileñayi malwihu enhwileñawu hakudifukula kwalala?

¹⁰ Kufuukula kwenu kwakukeña kumukalakela Yehova kukukojeja akwenu akashikola, antuñi nenu, niantaña jenu kuhayama chikupu. Akutachika kuyihula chuma chinaleteshi mwili mwenimu nikuyihula hayuma yimwakuhwelela. Hanu dinu mukwakula nenudi? Eña, mwatela kushinshika hayitoñojoka yenu kulonda mulumbululi chayileñela kufuukula kwila mwenimu. Dichi neyi himukwakula malwihu anakundami kuyuma yimwakuhwelela, mwatela kulondela chakutalilahu chachiwahi chaYesu.

¹¹ Hampinji yamwihujoleluwu Yesu kudi akulumpi jansakililu yawaYudeya kutalisha hakusañuka, wayilejeli nsañu yadiñi munsona yabulileñawu kutaña. (Kwidika 3:6; Matewu 22:23, 31-33) Chelili nsoneki wumu yomwihuli lushimbi lwabadika nshimbi jejima, Yesu wamulejeli mazu atelela amumavasi amuBayibolu. Ona iyala wamusakilili Yesu hakumwakula chachiwahi. (Alevi 19:18; Kuhituluka 6:5; Maku 12:28-34) Hamuloña wakwila Yesu wazatishileña Nsona nikuhosha chiwahi chaleñeleli ‘izaza kwambuka . . . hansañu yindi,’ niantu amudimbulwileña hiyamumwesheli ihuñuku. (Yowanu 7:32-46) Neyi himukwakula malwihu anakundami kuchikuhwelelu chenu, zatishenu Bayibolu nawa akulenu ‘nakudizoza nakalemesha kakeni.’ (1 Petulu 3:15) Neyi ñakwilu himunayilukiku, shimunenu nenu ñakwilu himunayilukiku nawa yilejenu nenu mukuya nakusandujola. Dichi keñakeñenu nsañu haniwu mutu, kuzatisha Watch Tower Publications Index hela Watchtower Library yidi ha CD-ROM yidi mwidimi dimweluka. Neyi muloñesha chiwahi, ‘mukwiluka mwakwakwila.’—Akolose 4:6.

12. Muloñadi makabi chiyakubulila kuyifuntisha hanyima?

¹² Kudi yuma yikwawu yinabadiki hamalwihu yimukutalañana nayu kutalisha hakumukalakela Nzambi nihayuma yimwakuhwelela. Neyi chimuneluki, chilumbu chaNzambi, Satana Diyabolu, diyi wunakuyula ituña. (Tañenu 1 Yowanu 5:19.) Dichi bayi mukuhwelela nenu antu ejima akuyihameka hela akwiteja chuma chimunafuukuluku, nawa anateli kuyidimbulula. Antu amakwawu ‘akuyitena chatama,’ nawa anateli kutwalekahu kuyihoshola. (1 Petulu 4:4) Ilaña mwatela kwanuka nenu, yenu hohu munakumona yuma yamuchidiwuku. Yesu Kristu niyena amuyandishili. Kapostolu Petulu niyena wayandili, nawa wasonekeli nindi: “Enu akwetu twakeña, bayi muhayama chakuyesekawu nakesi kanenzi mukachi kenu nakuyikabisha, nenu kunatuwani chuma chacheñuku. Chiña kuzañalala nanochu chimuneli akwakutambwila makabi chimu naKristu; kulonda hakamwekanayi mulubanji lwakulema kwindi, mwakazañalali namuzañalu wasweja nankashi.”—1 Petulu 4:12, 13.

13. Muloñadi akwaKristu chatela kuzañalelawu neyi anakuyiyandisha?

¹³ Kumika makabisha hela ikañesha hamuloña wakwikala akwaKristu dichuma chatela kutuletela muzañalu. Muloñadi? Muloña neyi  antu amudinu ituña akuyikeña chikumwekesha nawu munakulondela nshimbi jaSatana bayi jaNzambuku. Yesu wasoñamishili nindi: “O yihuñu yimwamba kamonenu adi nakuhamekawu kudi antu ejima! Muloña dichi chahamekeluwu atuprofwetu akutwamba kudi ankakulula.” (Luka 6:26) Makabisha amwekeshaña nawu Satana niituña dindi ayihela muloña mwamukalakelaña Yehova. (Tañenu Matewu 5:11, 12.) Nawa mukwikala namuzañalu neyi “akuyisawula hansañu yejina daKristu.”—1 Petulu 4:14.

14. Yumanyi yayiwahi yikufumamu neyi muntu yatwalekahu nakashinshi kudi Yehova hela chakwila nakumona yihuñu?

¹⁴ Neyi mwikala ashinshika kudi Yehova hela chakwila munakumona makabisha, kudi yuma yiwana yayiwahi yikufumamu. Mukuhana wunsahu wawuwahi hadi Nzambi niMwanindi. Neyi mukumika nakashinshi mukukolesha ana kwenu niahela akwaKristu. Antu akuyimonaña abula kumwiluka Yehova niwena akutachika kumukeñakeña. (Tañenu Afwilipi 1:12-14.) Chimukumonaña chahanañayi Yehova ñovu yakumika kweseka, kukeña kwenu kukuswejelaku.

“Chenzelu . . . Cheneni” Chinayenzulukili

15. ‘Chenzelwinyi cheneni’ chamwenzulukilili kapostolu Pawulu?

¹⁵ Kapostolu Pawulu wahosheli kutalisha hamudimu windi wakushimwina muEfwesesa nindi: “Chenzelu chanyidimu cheneni chinañenzulukili.” (1 Akorinda 16:8, 9) Chadiñi chenzelu chalombweleña kumudimu weneni wakushimwina nsañu yayiwahi nikwilisha atumbanji muwuna musumba. Chetejeliyi iku kukooleka, Pawulu wakwashili antu amavulu kumwiluka Yehova nikudifukula kudi Yena.

16. Indi awayishewa ashalahu eñilili ñahi muchisu “chachashi” mu 1919?

¹⁶ Mu 1919, Yesu Kristu walemesheluwu wayishilili ashalawu awayishewa “chenzelu chachashi.” (Chimwekeshu 3:8) Eñilili munichi chisu nikutachika kushimwina nsañu yayiwahi, nikutañisha chalala chamuBayibolu namukoyi. Chumanyi chinafumi mumudimu wawu wakushimwina? Nsañu yayiwahi yinashiki kunsa yamatuña, nawa kwakwihi nayihita yitanu nayiyedi yawantu akweti chikuhwelelu chakutambula wumi wahaya nyaka mwituña daNzambi dadiha.

17. Munateli kwiñila ñahi ‘muchenzelu chanyidimu cheneni’?

¹⁷ “Chenzelu chanyidimu cheneni” chichidi chayenzulukila ambuña Yehova ejima. Antu ejima eñilañamu ekalaña namuzañalu hampinji yinakudikitawu chikupu mumudimu weneni wakushimwina nsañu yayiwahi. Enu atwansi ambuña Yehova, munjilanyi mumwalemeshela kukooleka kwakukwashaku amakwawu ‘kwitiya nsañu yayiwahi’? (Maku 1:14, 15) Mwatoñojokahu dehi kuzataku wupayiniya wampinji yejima hela wakukwasha? Munateli kwikala cheñi nakukooleka kukwawu kwakukalakala muMudimu wakutuña Matala aWanta, mudimu wahaBeteli, niwumishonali. Chineli ituña daSatana keña dikisiki, mwatela kukalakala muniyi nyidimu yaWanta chakadi kulaba hefuku hefuku. Komana mukwiñila ‘muchenzelu cheneni’ hohanu hikuchidi mpinji?

“Tompenu Mutiyi Chawahayi Yehova”

18, 19. (a) Chumanyi chamukwashili Davidi kwikala nampwila yakumukalakela Yehova chikupu? (b) Chumanyi chamwekeshaña nawu Davidi haditoñesheli hamuloña wakumukalakela Nzambuku?

¹⁸ Ñimbi yamasamu wonenenuwu walejeli antu ‘kutompa kulonda atiyi chawahayi Yehova.’ (Masamu 34:8) Henohu Mwanta Davidi wamuIsarela yakushankulu wuchidi kansi nawa kabiña, Yehova wamupulwishili kudi ayisumi. Nzambi wamukwashili hakulwa naGoliyati nawa wamupulwishili mukukala kukwawu kwakuvulu. (1 Samweli 17:32-51; Masamu 18, tumazu twahewulu)  Hamuloña waluwi lwaNzambi lwasweja kutoha, chamuletesheli Davidi kusoneka nindi: “Eyi Yehova Nzambi yami, nyidimu yeyi yakuhayama yiwuneli yinavuli, niyitoñojoka yeyi yiwatutoñojokaña, hiyakutwesha kukuchindilayuku.”—Masamu 40:5.

¹⁹ Davidi wamukeñeli Yehova chakwila wakeñeleña kumushimeka namuchima windi wejima niyitoñojoka. (Tañaku Masamu 40:8-10.) Mukuhita kwayaaka, Davidi haditoñesheli hamuloña wakudifukula kudi Nzambi walala mukuhanda kwinduku. Kudi yena, kumwakama Nzambi dichadiñi chuma cheneni, chamuleteleleña muzañalu weneni. Chashinakajiliyi, Davidi wahosheli nindi: “Yeyi nachiñeja, eyi Mwanta Nzambi; yeyi nakuhwelela kufumisha kuwansi wami. Eyi Nzambi, bayi wunshiyaku, hela ichi chinakula dehi chinela dehi ninvu kumutuku.” (Masamu 71:5, 18) Chikuhwelelu chaDavidi niwubwambu windi naYehova wakoleli chikupu, hela chakwila ñovu jamukeheli.

20. Indi kumukalakela Nzambi kwekaliladi chuma chachiwahi chakwila mukuhanda kwenu?

²⁰ Chihandilu chaYoshuwa, Davidi, niTimotewu chinakumwekesha nawu kumukalakela Yehova dichuma chachiwahi chimwatela kwila mukuhanda kwenu. Kufwila maheta akapinji kantesha hohu mukanu kaayi hiyikwesekana nayuma yayiwahi yahaya nyaka yimukatambwila hamuloña ‘wakumukalakela Yehova namuchima wenu wejima niwumi wenu wejimaku.’ (Yoshuwa 22:5) Neyi kanda mudihani kudi Yehova mukulomba, dihulenu nenu, ‘Chumanyi chinakunkañesha kubula kwikala Chinsahu chaYehova?’ Neyi mudi akwakudifukula aYehova apapatishewa, komana kwila muswejesha muzañalu mukuhanda kwenu nehi? Dichi dinu, mukalakelenu Nzambi nañovu, nawa yilenuku hambidi hamu neyi mukwaKristu. Chibaba chinalondeluhu chikuyilumbulwila chimwatela kukulilaku lwakuspiritu kuhitila mukulondela chakutalilahu chakapostolu Pawulu.

Mukwakula Nenudi?

• Shimunenu yuma yiyedi yikutuletesha kumukalakela Nzambi.

• Chumanyi chamukwashili Timotewu kufuukulahu kumukalakela Nzambi?

• Muloñadi chimwatela kumikila hampinji yinakuyikabishawu?

• Kukoolekanyi kunateli kuyenzulukila?

[Malwihu aKuzatisha haKudiza]

[Mwevulu wudi hefu 22]

Kumukalakela Yehova dichuma chachiwahi chakwila mukuhanda kwenu

[Mwevulu wudi hefu 23]

Komana munateli kwakula malwihu ehulañawu hachikuhwelelu chenu?