Kom-bɩɩse, tũ-y-yã a Zeova ne y sũy fãa
Kom-bɩɩse, tũ-y-yã a Zeova ne y sũy fãa
“Kell n sak bũmb nins fo sẽn da zãms la f bãng tɩ yaa sɩdã.”—2 TƖM. 3:14.
1. A Zeova tagsg yaa bõe ne kom-bɩɩs nins sẽn tũud-a wã?
A ZEOVA nanda kom-bɩɩs nins sẽn tũud-a ne b sũy fãa wã wʋsgo, hal t’a kɩt tɩ yɩɩl-gʋlsdã ra pĩnd n gom b yell n yeel woto: “Yãmb nebã na n dɩka b mens n kõ yãmb ne yamleoog daar ninga yãmb kʋʋngã sẽn na n tigim tãn-sõamyã zutã. Yãmb kom-bɩɩs na n waa yãmb nengẽ wa meenem sẽn yit yibeoogo.” (Yɩɩl 110:3) A Zeova sɩd nonga kom-bɩɩs nins sẽn maand a raabã ne b sũy fãa wã wʋsgo.
2. Rũndã-rũndã, bõe la neb wʋsg sagend kom-bɩɩsã tɩ b maane?
2 Tigingã kom-bɩɩsã, rẽ yĩnga, yãmb zoe n pʋʋsa a Zeova n wilg-a tɩ y rɩka y mens n kõ-a n na n maan a raabã bɩ? Kom-bɩɩs wʋsg tõe n getame tɩ yaa toog ne-b tɩ b yãk yam n tũ a Zeova. Tʋʋm taoor dãmba, karen-saam dãmba, la baa roagdb la zo-rãmb mengã mi n sagenda kom-bɩɩsã tɩ b mao n wa yɩ nin-bɛda. Bi-bɩɩg sã n yãk yam n na n lʋɩɩs Wẽnnaam daabã maaneg taoore, neb wʋsg yaand-a lame. La bũmb yaool n kae n kõt sũ-noog n yɩɩd Wẽnnaam daabã maaneg ye. (Yɩɩl 27:4) Bɩ d bao n bãng bũmb ning sẽn kɩt tɩ y segd n maan Wẽnnaam daabã. Sã n mik tɩ y zoe n dɩka y mens n kõ Wẽnnaam, bɩ d bao n bãng y sẽn tõe n maan to-to n kell n tũ-a ne y sũy fãa baa nebã sã n dat n kɩt tɩ y toeem yam. Sẽn na n baase, d na n goma tʋʋm y sẽn tõe n paam n tʋm Wẽnnaam tʋʋmã sʋk yelle.
Y segd n maana a Zeova raabã
3. D sã n tags n ges bũmb nins a Zeova sẽn naanã, segd n kɩtame tɩ d tʋlg n maan bõe?
3 Bõe yĩng tɩ y segd n maan Wẽnnaam ninga sẽn vɩ wã raabo? Wilgr 4:11 leokda sok-kãngã woto: “Tõnd Zusoab la tõnd Wẽnnaam, yãmb n zems tɩ reeg pẽgre, la waoogre, la pãnga, tɩ bõe, yãmb n naan bũmb fãa, la yaa yãmb daabã yĩng la yãmb naan bãmb tɩ b beẽ.” Yaa a Zeova n naan bũmb nins fãa sẽn be wã. Ges-y tẽngã a sẽn naanã sẽn tar dasãnd to-to wã! Tɩɩsã ne flɛɛr dãmbã buud toor-toorã, rũmsã, kʋɩlsã, tãensã la bõn-neeb a taabã fãa yaa a Zeova n naane. Yɩɩl Sõamyã 104:24 soabã yeta woto: “[Zeova], . . . dũniyã pida ne yãmb paoongo.” Ad d sũy sɩd yaa noog wʋsgo, a Zeova sẽn naan tõnd to-to la a kõ-d yam tɩ kɩt tɩ d tõe n pẽg la d rɩ bõn-kãensã fãa sẽn yaa sõma wʋsgã yõodã! D sũy sã n sɩd nooma ne bũmb nins Wẽnnaam sẽn naan n kõ-dã, segd n kɩtame tɩ d tʋlg n maan a raabã.
4, 5. Bõe la a Zozue yã tɩ kɩt t’a ra nong a Zeova wʋsgo?
4 Israɛll nebã taoor-lʋɩt a Zozue wilga bʋʋm a to sẽn kɩt tɩ d segd n maan a Zeova raabã. A kʋʋlem zugẽ, a yeela Wẽnnaam nin-buiidã woto: “Yãmb bãngame la y miime tɩ yãmb Zusoab a Wẽnnaam sẽn da yeel tɩ b na n maana bũmb nins fãa n kõ yãmbã, b maaname n ka tol n bas baa a ye tɩ vaal ye. Bãmb maana fãa, baa a ye ka pa ye.” Bõe yĩng t’a Zozue wa yet woto?—Zoz. 23:14.
5 Israɛll nebã sẽn da wa n be Ezipt t’a Zozue ra nan yaa biiga, a tog n da wʋmda b sẽn gomd t’a Zeova pʋlmame t’a na n kõo Israɛll kambã tẽng tɩ b sooge. (Sɩng. 12:7; 50:24, 25; Yik. 3:8) A Zozue yãa a Zeova sẽn maan to-to n pids a sẽn pʋlem bũmb ningã. Wala makre, a yãa Wẽnnaam sẽn sɩbg Ezipt nebã ne tood piigã n kɩt tɩ wuk-m-meng soab a Faraõ wa kong n bas Israɛll kambã tɩ b yi Eziptã. A Zeova sẽn wa n na n kɩt tɩ b pasg Mog-miuugã n loog t’a Faraõ ne a sodaasã ki koomã pʋgã, a Zozue zĩnda be. Wakat ninga fãa Israɛll kambã sẽn zĩnd Sinayi rasempʋɩɩgã sẽn tar dabeemã pʋgẽ wã, a Zozue yãa a Zeova sẽn ges nin-buiidã yell to-to wã. Kom wall ko-yũud pa kʋ b ned baa a yembr ye. (Tõo. 8:3-5, 14-16; Zoz. 24:5-7) B sẽn wa n na n zab ne Kanaã soolmã neb sẽn da tar zab-teed wʋsg la b mi zabr sõma wã, a Zozue yãa Wẽnnaam sẽn sõng-b to-to tɩ b tõog n deeg tẽn-kãngã a sẽn da pʋlem-bã.—Zoz. 10:14, 42.
6. Bõe n na n sõng-y tɩ y tʋlg n tũ Wẽnnaam ne y sũy fãa?
6 A Zozue yãame t’a Zeova sɩd pidsa a pʋlemsã fãa. Rẽ n so t’a yeel woto: “Maam ne m yir dãmba yẽ, tõnd na n tũ [a Zeova].” (Zoz. 24:15) La yãmb yẽ? Rẽ yĩnga y me sã n tags Wẽnnaam pʋlems nins a sẽn zoe n pidsã la a na n pids-b rãmb ka la bilfã yelle, pa kɩtd tɩ yãmb me tʋll n tũ-a wa a Zozue sɩda?
7. Bõe yĩng tɩ yaa tɩlae tɩ d reng n deeg lisgu?
7 Y sã n maag y yĩng n ges bũmb nins a Zeova sẽn naanã, la y bʋgs a kãab-nood nins sẽn na n pids ka la bilfã zugu, segd n kɩtame tɩ y rɩk y meng n kõ-a n na n maan a raabã, la y reeg lisg n wilg rẽ. Yaa tɩlae ne ned ninga fãa sẽn sɩd rat n tũ Wẽnnaam t’a reng n deeg lisgu. A Zezi sẽn kõ tõnd mak-sõngã me maana woto. Nand t’a lebg Mesi wã n sɩng a tʋʋmdã, a kẽnga a Zãmbatiis nengẽ t’a lis-a. Bõe yĩng t’a reng n deeg lisgu? Kaoosg zugẽ, a meng yeela woto: “Mam ka yi [saasẽ] n na n wa maan m meng ratem ye, la yaa tɩ maan sẽn tʋm-a maamã ratem.” (Zã 6:38) Dẽnd a Zezi reega a lisgã n na n wilg a ba wã t’a tʋll n maana a raabã.—Mat. 3:13-17.
8. Bõe yĩng t’a Tɩmote yãk yam n na n tũ Wẽnnaam, la y me sã n yaa wa a Tɩmote, bõe la y segd n maane?
8 Ges-yã a Tɩmote makrã me. A bi-bɩɩlem wakate, a Zeova wa n bobl-a-la tʋʋm wʋsgo, tɩ tʋʋm kẽer da yaa kãsems menga. Bõe yĩng tɩ bi-bɩɩg a Tɩmote yãk yam n na n tũ Wẽnnaam? Biiblã yeelame t’a ‘saka bũmb nins a sẽn da zãms la a bãng tɩ yaa sɩdã.’ (2 Tɩm. 3:14) Yãmb sã n zãmsa Wẽnnaam Gomdã la y miẽ tɩ bũmb nins y sẽn zãmsã yaa sɩda, d tõe n yeelame tɩ y me yaa wa a Tɩmote. Bɩ yãmb me yãk yam n tũ Wẽnnaam. Yɩta sõma tɩ y reng n wilg rẽ y roagdbã. Bãmb ne tigingã kãsem dãmb tõe n sõng-y lame tɩ y bãng Wẽnnaam sẽn dat tɩ y maan bũmb ning n tõog n deeg lisgã.—Karm-y Tʋʋm 8:12.
9. Y sã n deeg lisgu, na n maana nebã bõe?
9 Y sã n deeg lisga, y wilgame tɩ y sɩd yãka yam masã n na n tũ Wẽnnaam ne y sũur fãa. Y lisgã reegr tɛka, y rɩka so-wok ning sẽn debd vɩɩm sẽn pa satã zĩigẽ. Sẽn paase, y na n paama sũ-noog y sẽn mi tɩ y maanda Wẽnnaam daabã. (Heb. 12:2, 3) Y roagdb la y zo-rãmb nins sẽn zoe n tũud so-kãngã me sũy na n yɩɩ noogo. La sẽn tɩ yɩɩd fãa, y na n nooga a Zeova sũuri. (Karm-y Yelbũn 23:15.) Yaa sɩd tɩ kẽer pa na n wʋm y sẽn yãk yam n na n tũ a Zeova wã võore, la b tõe n yetẽ meng tɩ y yam-yãkrã pa sõma ye. Tõe meng tɩ b bao n na n gɩdg-yã. La y tõe n tõoga zu-loe-kãens fãa.
La y yam-yãkrã sã n pa noom kẽere?
10, 11. a) Y sã n yãk yam n na n tũ a Zeova, sogs-bʋs la nebã tõe n sok-yã? b) A Zezi sẽn da leokd sogsg nins b sẽn da sokd-a tũudum hakɩkã zug to-to wã kõt-d-la yam bʋse?
10 Y sã n yãk yam n na n maan a Zeova raabã, y karen-bi-taase, y yags wall y roagdb tõeeme n pa wʋmd y võor ye. B tõe n sok-y lame n na n bãng bũmb ning sẽn kɩt tɩ y yãk yam-kãngã, la b tʋlg n na n bãng y sẽn tẽed bũmb ninsã. Wãn to la y tog n leok-ba? Yaa vẽeneg tɩ sẽn na yɩl n tõog n leoke, rẽndame tɩ y mi bũmb ning sẽn kɩt tɩ y yãk yam n na n tũ a Zeova wã. Yɩta sõma tɩ y rɩk a Zezi togs-n-taar n leok sogsg nins b sẽn na n sok y tũudmã zugã.
11 Zʋɩf rãmbã tũudum taoor dãmb sẽn da wa n sok a Zezi sokr kũum vʋʋgrã wɛɛngẽ wã, a leok-b-la ne Biiblã verse yell b sẽn da pa tagse. (Yik. 3:6; Mat. 22:23, 31-33) Gʋlsd a ye me sẽn da wa n sok-a n na n bãng noor ning sẽn yaa kãseng n yɩɩdã, a tẽeg-a-la verse rãmb sẽn leokd a sokrã. Raoã sũur yɩɩ noog wʋsg ne a Zezi, a sẽn leok-a to-to wã yĩnga. (Maan. 19:18; Tõo. 6:5; Mark 12:28-34) A Zezi sẽn da leokd nebã ne verse rãmbã, n paas a sẽn da gomd ne-b to-to wã ra kɩtdame t’a kɛlgdbã wẽed no-koɛɛma, tɩ ra kɩtdẽ t’a bɛɛbã pa tõe n paam-a ye. (Zã 7:32-46) Ned sã n sok yãmb me sokr y tũudmã zugu, bɩ y tall Biiblã n leoke. La maan-y woto ne “sũ-maasem la sik-m-menga,” la ne waoogre. (1 Pɩɛ. 3:15) Y sã n pa mi leoorã, bɩ y wilg a soab tɩ y na n tɩ baoa sɛbã pʋsẽ. Y tõe n tɩ rɩka yʋʋm-sar kiuug Gũusg Gasgã n ges gom-zutã ẽndɛgse, wall y sã n tara Watchtower Library wã ne CD-ROM dãmb buud-gomd y sẽn tõe n karem pʋgẽ, bɩ y gẽes beenẽ me. Y sã n segl y meng sõma, y na n bãnga y sẽn na n tɩ leok a soab to-to tɩ zemse.—Kol. 4:6.
12. Bõe yĩng tɩ y pa segd n koms raoodo, b sã n namsd-y y tũudmã yĩnga?
12 Y sã n yãk yam n na n maan Wẽnnaam daabã, pa sogsg bal la nebã na n sogsd-y ye. Bala yaa a Sʋɩtãan sẽn yaa Wẽnnaam bɛ wã n so dũniyã. (Karm-y 1 Zã 5:19.) Woto yĩnga, neb wʋsg sẽn pa na n pẽg-yã pa lingr ye. Tõe tɩ kẽer na n gɩdg-y lame menga. Sãnda na n tʋ-y lame, la tõe tɩ b na n ket n tʋʋd-y lame. (1 Pɩɛ. 4:4) La tẽeg-y tɩ pa yãmb y ye la b namsd ye. B namsa a Zezi Kirist me. Tʋm-tʋmd a Pɩɛɛr me paama namsgo, la a pʋd n gʋlsame n yeel woto: “Mam zo-nongdse, bɩ y ra sak tɩ makr [bɩ namsg] sẽn wẽnd bugum sẽn makd yãmbã, ling yãmb wa bõn-sãang ye. La bɩ y maan sũ-noogo, yãmb sẽn paam pʋɩɩr ne Kirist namsgã.”—1 Pɩɛ. 4:12, 13.
13. Bõe yĩng tɩ kiris-nebã segd n maan sũ-noogo, b sã n namsd-b b tũudmã yĩnga?
13 B sã n namsd-y y sẽn yaa kiris-nedã yĩnga, y segd n kɩdma sũ-noogo. Bõe yĩnga? Bala dũniyã neb sã n nong-yã, wilgdame tɩ y maanda a Sʋɩtãan daab la pa Wẽnnaam daab ye. A Zezi ra keooga neb woto: “Yãmb sẽn tar nebã fãa pẽgrã yãmb na paam toogo; tɩ bõe, bãmb ba rãmbã ra maana zãmb bãngdbã me woto.” (Luk 6:26) B sã n namsd-y y tũudmã yĩnga, wilgdame tɩ y maand a Zeova raabã. Yaa rẽ n kɩt t’a Sʋɩtãan ne a dũniyã neb sũy pa noom ne-yã. (Karm-y Matɩe 5:11, 12.) B ‘sã n gomd-y wẽng Kiristã yʋʋr yĩnga,’ y segd n kɩdma sũ-noogo.—1 Pɩɛ. 4:14.
14. Ned sã n kell n sak a Zeova namsg pʋgẽ, bõe n na n maane?
14 Y sã n kell n sak a Zeova namsg pʋgẽ, y kõta a Zeova ne a bi-riblã kaseto. Y sakrã na n kenga y tẽed-n-taasã raood me. Leb n tõe n kɩtame tɩ neb sẽn pa mi a Zeova tʋlg n bãng-a. (Karm-y Filip rãmb 1:12-14.) Sẽn paase, y sẽn ne t’a Zeova sõngd-y-la y toogã pʋgẽ wã na n kɩtame tɩ y nong-a n paasdẽ.
‘Kʋɩlen-kãseng n pak y taoore’
15. “Kʋɩlen-kãseng” ning sẽn pak tʋm-tʋmd a Poll taoorã yaa bõe?
15 A Poll da goma a koe-moonegã Efɛɛz soolmẽ wã yell n yeel tɩ ‘kʋɩleng kãseng paka yẽ taoore.’ (1 Kor. 16:8, 9) Kʋɩlen-kãseng sẽn pakã yaa segb ning a sẽn da paam n na n moon koe-noogã la a maan karen-biis tẽn-kãngã pʋgẽ wã. A Poll tũnuga ne segb kãng n sõng neb wʋsg be tɩ b bãng a Zeova la b maan a raabã.
16. B sẽn yeel tɩ yʋʋmd 1919 wã, kiris-neb nins sẽn paam vʋʋsem sõngã zaeeb n ket tẽngã zugã tũu kʋɩleng sẽn pak b taoor n kẽ wã võor yaa bõe?
16 Yʋʋmd 1919 soabã pʋgẽ, rĩm a Zezi Kirist paka kʋɩleng n kõ kiris-neb nins sẽn paam vʋʋsem sõngã zaeeb n ket tẽngã zugã me. (Wil. 3:8) Kiris-nin-kãensã tũu kʋɩlen-kãng n kẽ, rat n yeel tɩ yʋʋmd kãng tɛka, b moona koe-noogã la b zãms nebã Biiblã ne yẽesem n yɩɩd pĩndã. B koe-moonegã woma bi-bʋse? Kɩtame tɩ koɛɛgã ta dũniyã tɛk fãa rũndã-rũndã, tɩ sẽn na maan neb milyõ a yopoe kɩs sɩd tɩ b na n wa paam n vɩɩmda Wẽnnaam dũni paalgã pʋgẽ wakat sẽn kõn sa.
17. “Kʋɩlen-kãseng” bʋg n pak tɩ y tõe n tũ n kẽ?
17 Baa rũndã-rũndã, “kʋɩlen-kãseng” n ket n pak yalengo, t’a Zeova nin-buiidã tõe n tũ n kẽ n paam tʋʋm a taaba. Sẽn tũud-b kʋɩlen-kãng n kẽedẽ wã moonda koe-noogã wʋsg n yɩɩd pĩndã tɩ kɩt tɩ b tar sũ-noogo. Kom-bɩɩse, rẽ yĩnga yãmb me sũy nooma y sẽn paam n tõe n sõng nebã tɩ b ‘tẽ koe-noogã’ bɩ? (Mark 1:14, 15) Y zoe n tagsa y sẽn tõe n maan to-to n wa yɩ zall so-pakda, wakat fãa so-pakd wall sõngr so-pakd bɩ? Y leb n tõe n wa tɩ tʋma Betɛll dãmbẽ wall y yɩ misioneer dãmba, pa rẽ bɩ n sõngd n met Rĩungã roto. A Sʋɩtãan dũniyã sẽn na n menem ka la bilfã yĩnga, rẽndame tɩ d bao n tʋm Rĩungã tʋʋm kãensã ne yãgb n yɩɩg pĩndã. Bɩ y tũ “kʋɩlen-kãsengã” n kẽ tɩ nan ket n tõeyã.
‘Lemb-y n ges-y t’a Zeova yaa sõma’
18, 19. a) Bõe n kɩt t’a Davɩɩd tʋlg n na n maan a Zeova raabã ne a sũur fãa? b) Bõe n wilgd t’a Davɩɩd pa tol n maan a bãngẽ a sẽn maan Wẽnnaam daabã?
18 A Zeova vẽnega yɩɩl-gʋlsd a Davɩɩd sẽn yɩ pĩnd wẽndẽ Israɛll rĩmã t’a yeel woto: ‘Bɩ y lemb n ges t’a Zeova yaa sõma.’ (Yɩɩl 34:9) A Davɩɩd sẽn da wa n yaa biig n gũud piisi, a Zeova kogl-a lame tɩ we-rũms pa kʋ-a ye. A sẽn na n zab ne a Goliatã me, Wẽnnaam sõng-a lame. A leb n fãag-a-la yɛl a taab pʋsẽ. (1 Sãm. 17:32-51; Yɩɩl 18:1) A Davɩɩd yãa Wẽnnaam nonglmã sẽn waoog to-to wã hal tɩ kɩt t’a yeel woto: “[Zeova], mam Wẽnnaam, yãmb bõn-bãnã yãmb sẽn maanã ne y tagsgã tõnd yĩngã yaa wʋsgo. A to kae sẽn zem yãmb ye.”—Yɩɩl 40:6.
19 A Davɩɩd sẽn da nong a Zeova to-to wã wa n paasa wʋsgo, tɩ kɩt t’a tʋll n pẽg-a ne a sũur fãa. (Karm-y Yɩɩl 40:9-11.) A pa tol n maan a bãngẽ, a sẽn maan Wẽnnaam daabã a vɩɩmã fãa pʋgẽ wã yĩng ye. A yɩɩ wẽn-zoɛt tɩ kɩt t’a tall sũ-noog wʋsgo. A Davɩɩd sẽn wa n kʋʋlã, a yeela Wẽnnaam woto: “Yãmb yaa mam tẽeb pidsg soaba. Mam della yãmb hal m yãadem wakat tɩ ta masã. Mam Wẽnnaam, baa mam sã n kʋʋl tɩ m zug pelge, bɩ y ra bas maam ye.” (Yɩɩl 71:5, 18) Baa a Davɩɩd sẽn wa n kʋʋndẽ t’a keelmã tar boogrã, a ra ket n teega a Zeova n yɩɩd pĩndã, tɩ b zoodã me ra tar paasgo.
20. Bõe yĩng tɩ d tõe n yeel tɩ yaa Wẽnnaam daabã maaneg n sɩd kõt sũ-noog n yɩɩda?
20 A Zozue ne a Davɩɩd la a Tɩmote fãa vɩɩmã sẽn yɩ to-to wã me wilgda vẽeneg tɩ yaa a Zeova raabã maaneg n sɩd kõt sũ-noog n yɩɩda. Tʋʋm nins y sẽn tõe n tʋm n paam arzɛk dũni kãngã pʋgẽ wã na n naf-y-la bilf bala, la a pa kaoosd me ye. Y pa tol n tõe n mak rẽ ne nafa nins y sẽn na n paame, y sã n sak n maand a Zeova raabã ‘ne y sũur fãa’ la ne y yamã fãa wã ye. Bala, nafa kãens paada wakat fãa. (Zoz. 22:5) Y sã n nan pa pʋʋs a Zeova n yeel-a tɩ y rɩka y meng n kõ-a bɩ y sok y meng n ges bõe n gɩdg-y tɩ y pa tõe n lebg a Zeova kaset soaba. La y sã n zoe n deega lisg me n dat n paas y sũ-noogã, bõe la y tõe n maane? Yaa y sẽn na n wɩng ne Rĩungã tʋʋm sõma, la y modgd n bãngd Wẽnnaam la a raabã n paasdẽ. Sõsg ning sẽn pʋgdã na n wilg-y-la tʋm-tʋmd a Poll makrã sẽn tõe n sõng-y to-to rẽ wɛɛngẽ.
Wãn to la y na n leoke?
• Wilg-y bʋʋm a yiib sẽn kɩt tɩ d segd n maan Wẽnnaam daabã.
• Bõe n sõng a Tɩmote t’a tõog n yãk yam n tũ Wẽnnaam?
• Bõe yĩng tɩ y segd n kell n sak Wẽnnaam baa b sã n namsd-y la b yaand-yã?
• Wẽnnaam tʋʋmã sʋka, bʋs la y tõe n paam n tʋme?
[Zãmsgã sogsgã]
[Foto, seb-neng 22]
Yaa a Zeova raabã maaneg n sɩd kõt sũ-noog n yɩɩda
[Foto, seb-neng 23]
B sã n sok yãmb sogsg y tũudmã zugu, y tõe n leokame bɩ?