Wayna sipas kashaspayki Jehová Diosta serviy

“Qan ichaqa, imatachus yachaqasqaykipi allinta iñisqaykipipas qaqata sayay.” (2 TIM. 3:14.)

1. ¿Imaynatan Jehová Dios qhawarin payta serviq wayna sipaskunata?

JEHOVÁ DIOSQA ancha allinpaqmi qhawarin wayna sipaskunaq servisqanta, chaymi Salmo taki qelqaqta yuyaycharan kay profeciata qelqananpaq: “Guerraman lloqsiqtiykin llaqtaykiqa kikillankumanta qatikusunki. Ch’uyallaña waynaykikunaqa pacha illarimuy chhulla hinan kanku”, nispa (Sal. 110:3, NM). Jehová Diosqa anchatan valoran tukuy sonqo payta serviq wayna sipaskunata.

2. ¿Ima ruwanankupaqmi wakin runakuna kallpachanku wayna sipaskunata?

² Diospa llaqtanwan huñukuq wayna sipas, ¿ñachu Jehová Diosman prometekurankiña servinaykipaq? Askha wayna sipaskunan mana decidikunkuchu chayta ruwanankupaq. ¿Imaraykun mana decidikunkuchu? Wakin wayna sipaskunataqa allin negocioyoq runakuna, profesorninku, amigonku, familiankupas kallpachankun qhapaq kanankupaq. Chaymantapas wakin runakunaqa pisichankun Dios serviypi kallpachakuq wayna sipaskunata. Ichaqa, wayna sipas, yuyariy, Dios serviyta akllakuspaqa aswan allin kawsaytan akllakushanki (Sal. 27:4). Chayraykun kay estudiopi kinsa tapuykunata kutichisunchis: ¿Imanaqtinmi Diosta servinayki? Runakuna imataña rimaqtinkupas ruwaqtinkupas, ¿imaynatan Dios serviyniykita allinta hunt’awaq? ¿Imakunapi llank’anaykipaqmi kusapuni kashan?

¿Imanaqtinmi Jehová Diosta servinayki?

3. ¿Ima ruwaymanmi kallpachawanchis Jehová Diospa kamasqankuna qhawariy?

³ ¿Imanaqtintaq kawsaq cheqaq Diosta servinayki? Apocalipsis 4:11 nin: “Qanqa Señor Diosniyku, hatunchaytapas, yupaychaytapas, atiytapas chaskinaykipaq hinapunin kanki, tukuy imaymanata qan kamasqaykirayku, chaymi munayniykiwan kashankupas, kamasqapas karqanku”, nispa. Jehová Diosmi Ancha Hatun Kamaqqa, tukuy imapas paypa ruwasqanmi. Kay pacha kamasqanpas ancha sumaqmi. Paymi kamaran sach’akunata, t’ikakunata, animalkunata, hatun qochakunata, orqokunata, phaqchakunata, tukuy imaymanatapas. Salmo takita qelqaqmi Kamaqta niran: “Kamasqaykikunan teqsimuyuntinta hunt’aykun”, nispa (Sal. 104:24). Ancha munakuq kaspan Jehová Diosqa sumaq cuerpoyoqta yuyayniyoqta kamawaranchis kay pachapi tukuy imaymana kamasqankunawan kusirikunanchispaq. Chay kamasqankunamanta anchata agradecekuymi kallpachawananchis Jehová Diosta tukuy sonqo servinanchispaq.

4, 5. ¿Imanaqtinmi Josué tukuy sonqowan Jehová Diospi confiaran?

⁴ ¿Imaraykupiwanmi Jehová Diosta servinanchis? Chaypaq yuyarisun Israel runakunata umalliq Josué nisqanta, paymi sinchi kurakña kashaspa Diospa llaqtanta niran: “Ñoqaqa wañukapusaqñan, ichaqa ñawpaqtaraqmi munani qankuna tukuy alma, tukuy sonqo Señor Diospa sumaq nisqasuykichista llapanta hunt’asqanta reqsikunaykichista, payqa llapantapunin rimarisqantaqa hunt’arqan”, nispa. ¿Imanaqtinmi chayta Josué niran? (Jos. 23:14.)

⁵ Egipto llaqtapi wawallaraq kashaspan Josueqa uyarinman karan ñawpaq tiempopi Jehová Dios llaqtanman prometesqanta. Diosmi llaqtanta prometesqa hallp’ayoq kanankupaq (Gén. 12:7; 50:24, 25; Éxo. 3:8). Kurakña kashaspan Josueqa rikuran Jehová Dios promesankunata hunt’ayta qallarisqanta. Diosmi Egipto llaqtaman chunka plagakunata chayachimuspa k’ulluchakuq rey faraonta obligaran Israel runakunata kacharinanpaq. Josueqa Israel runakunawan kuskan Puka Qochaq chawpinta ch’aki pampanta chimparan, rikurantaq faraonta ejercitontawan Puka Qocha  millp’upusqanta. Chaymantan ‘hatun manchana ch’inneqninta’ Jehová Dios llaqtanta pusaran. Chaypipas Josueqa rikuranmi llaqtanta Jehová Dios cuidasqanta; Diosqa tukuy necesitasqankutan qoran, manan huknillankupas yarqaymanta ch’akiymanta wañurankuchu (Deu. 8:3-5, 14-16; Jos. 24:5-7). Chaymantapas Israel runakuna Prometesqa Hallp’ata hap’ikapunankupaqmi maqanakuranku Canaanpi kaq llaqtakunawan, chaypipas Josueqa rikuranmi servisqanku Dios yanapasqanta (Jos. 10:14, 42).

6. ¿Imapin yuyaymananayki Jehová Dios serviyta munanaykipaq?

⁶ Qhawasqanchispas hina, Josueqa rikuranmi Jehová Dios promesankuna hunt’asqanta. Chaymi niran: “Ñoqaqa familiantinmi Señor Diosllatapuni servisaqku”, nispa (Jos. 24:15). Qanrí, wayna sipas, cheqaq Dios promesankuna hunt’asqanpi, qhepaman huk promesankuna hunt’ananpipas yuyaymanaspa, ¿manachu sonqoykiraq llanllarin Josué hina Jehová Diosta servinaykipaq?

7. ¿Imanaqtinmi Diosta servinapaq necesario bautizakuy?

⁷ Jehová Diospa promesankunaqa ancha sumaqmi, hunt’akuqpunitaq. Sichus chaykunapi, Diospa tukuy imaymana kamasqankunapipas yuyaymananki chayqa, kallpatan hap’inki Jehová Diosman: wiñaypaqmi servisayki nispa prometekunaykipaq, bautizakunaykipaqpas. Pipas Jehová Diosta serviyta munaqqa bautizakunanmi, chaytan Jesús ruwaran; cristianokunaqa paypa ruwasqanta hinan ruwanchis. Jesús manaraq kay pachapi Mesías hina Diospaq llank’ayta qallarishaspanmi Bautizaq Juanman riran bautizachikunanpaq. ¿Imarayku bautizakuran? Jesús kikinmi kutichin: “Hanaq pachamantaqa uraykamuni, manan munayniyta ruwanaypaqchu, aswanpas kachamuwaqniypa munayninta ruwanaypaqmi”, nispa (Juan 6:38). Bautizakusqanwanmi Jesusqa rikuchisharan Taytanpa munayninta ruwananpaq listo kasqanta (Mat. 3:13-17).

8. ¿Imanaqtinmi Timoteo decidiran Jehová Dios serviyta? ¿Imatan qanpas ruwanayki?

⁸ Timoteomantañataq rimasunchis, kay cristianoqa wayna kasqanmantapachan Diosta serviran, tiempowantaqmi Jehová Diosmanta askha llank’ayta chaskiran, chaymantapas hatun kamachita ruwananpaqmi akllasqa karan. ¿Imanaqtinmi Timoteo decidiran Jehová Dios serviyta? Bibliaqa willanmi Timoteo Diospa Siminmanta ‘yachaspa chaypi allinta iñisqanta’ (2 Tim. 3:14). Sichus qanpas Diospa Siminta estudiaranki, iñinkitaq Bibliapi yachasqayki cheqaq kasqanta chayqa, Timoteo hinan decidinayki Dios serviyta. Tayta mamaykiwan rimay Dios serviy munasqaykimanta. Paykunapas congregacionpi umalliqkunapas yanapasunkikumanmi bautizakunaykipaq imakunaraq ruwanayki kashan chayta hunt’anaykipaq (leeychis Hechos 8:12).

9. ¿Imatan wakin runakuna ruwankuman bautizakuqtiyki?

⁹ Bautizakuspaykin Dios serviyniykita allinta qallarinki. Hatun carreratapas qallariwaq hinan kanqa, sumaq premiokunatataq chaskinki: kay tiempopi cheqaq kusikuyta, hamuq tiempopitaq wiñay kawsayta (Heb. 12:2, 3). Chaymantapas cristiano tayta mamaykita congregacionpi amigoykikunatapas kusichinkin, paykunaqa ñan chay hatun carrerapiña tarikunku. Astawanqa Jehová Diospa sonqontan kusirichinki, chay ruwaymi aswan allinqa (leeychis Proverbios 23:15). Wakinqa manapaschá entiendenqakuchu Diosta servinaykipaq decidikusqaykita, hinaspa nisunkikuman: Manan allintachu ruwashanki, nispa. Chaymantapas contraykipiraqmi churakunkuman. Chhaynaña kaqtinpas qanqa atipawaqmi chay pruebakunata.

 Dios servisqaykita mana allinpaq qhawariqtinku

10, 11. a) ¿Imakunatan wakin runakuna tapusunkikuman Dios serviyta qallarisqaykimanta? b) ¿Imaynatan Jesús hina kutichiwaq tapuqniykikunaman?

¹⁰ Jehová Dios serviyta qallariqtiykiqa, yaqapaschá compañeroykikuna, wasimasiykikuna, otaq familiaykikunapas mana entiendenqakuchu imarayku chay ruwasqaykita. Hinaspa tapusunkikuman: ¿Imaraykun chayta ruwashanki? ¿Imakunapitaq creenkiri? nispa. Chaykunata tapuqtinku, ¿imaynatan paykunaman kutichiwaq? Chaypaqqa allintaraqmi qhawarikunayki imaraykus Dios serviyta decidikuranki chayta. Chaymantapas yachanaykin Jesús hina kutichiyta.

¹¹ Huk kutinmi judío religionpi umalliqkuna Jesusta tapuranku kawsarimpuymanta, Jesustaq Diospa Simin Qelqakunaq nisqanta yuyarichispa sut’ita rikuchiran kawsarimpuy cheqaq kasqanta (Éxo. 3:6; Mat. 22:23, 31-33). Huk kutinpas kamachikuy simita yachachiqmi Jesusta tapuran: ¿Mayqenmi aswan hatun kamachikuy? nispa, Jesustaq Diospa Simin Qelqakunaq nisqanman hina kutichiran, chaymi chay runaqa kusikuran Jesuspa kutichisqanwan (Lev. 19:18; Deu. 6:5; Mar. 12:28-34). Jesús Diospa Simin Qelqakunamanta allinta yachachisqanraykun ‘runakunaqa mana yuyayninkuta tupachirqankuchu’, chaymi enemigonkunapas mana Jesusta imanaytapas atirankuchu (Juan 7:32-46). Sichus qantapas, wayna sipas, imakunapi creesqaykimanta tapusunkikuman chayqa, Jesús hinan kutichinayki: Bibliata qhawachispa “llamp’u sonqowan respetowan” ima (1 Ped. 3:15). ¿Imatan ruwawaq mana yachasqaykimanta tapusuqtiykiku? Niwaqmi: Manan yachanichu, huk p’unchayña kutichisayki, nispa. Hinaspa chay temamanta maskhawaq Índice de las publicaciones Watch Tower nisqa libropi, otaq CD-ROM Watchtower Library nisqapipas. Sichus allinta preparakunki chayqa, ‘yachankin imaynatachus sapankamanpas allin kutichiyta’ (Col. 4:6).

12. ¿Imanaqtinmi mana pisi kallpayanaykichu runakuna contraykipi hatariqtinku?

¹² Wakin runakunaqa manapaschá tapullasunkikuchu, aswanpas contraykiraqmi hatarinkuman. Manan qonqanaykichu kay pacha Saqraq kamachisqan kasqanta, payqa Diospa enemigonmi (leeychis 1 Juan 5:19). Chayraykun askha runakuna mana allinpaq qhawarinqaku Dios servisqaykita. Wakinqa yaqapaschá sapa kutillan ‘qanpa contraykipi rimanqaku’ (1 Ped. 4:4). Ichaqa manan sapallaykichu chhaynapiqa tarikunki. Jesucristoq contranpipas askha runakunan hatariranku. Kaqllataqmi sucederan apóstol Pedrotapas, chaymi niran: “Munasqa wawqe-panaykuna, sinchi sasakunapiñan kashankichis, chaywanpas ama mancharikuychischu mana reqsisqa sasachakuykunapas kashanman hinaqa. Aswanpas kusikuychis Cristoq ñak’ariyninkunapi ñak’ariqmasin kasqaykichismanta”, nispa (1 Ped. 4:12, 13).

13. ¿Imanaqtinmi cristianokuna kusikunku contrankupi runakuna hatariqtinku?

¹³ Sichus Diosta servisqaykirayku runakuna contraykipi hatarinku chayqa, kusikuy. Contraykipi hatarisqankun rikuchin Diospa munayninman hina kawsashasqaykita. Sichus kay pacha runakunaq allin qhawarisqan kawaq chayqa, Satanaspa munasqanman hinan kawsashawaq. Jesusmi niran: “¡Ay, imaynaraqmi kankichis lliw runakuna qankunata alabaqtinku! Chay hinatapunin ñawpa taytankupas llulla profetakunamanta allinta rimarqanku”, nispa (Luc. 6:26). ¿Imatan rikuchin runakuna contraykipi hatarisqanku? Chayqa rikuchin Satanaspas runankunapas Diosta servisqaykirayku sinchi phiñasqa kasqankutan (leeychis Mateo 5:11, 12). “Cristoraykuchus  k’amisqa” kashanki chayqa, kusikunaykin (1 Ped. 4:14).

14. Contraykipiña runakuna hatariqtinkupas, ¿imanaqtinmi Diospaq hunt’aq kanayki?

¹⁴ ¿Imanaqtinmi runakuna hark’ashaqtinkupas contraykipi hatariqtinkupas Jehová Diospaq hunt’aq kanayki? Hukpi, Diosmanta Churinmantawan allin willakuykunata mast’arinki. Iskaypi, pruebakunata aguantasqaykin cristianomasiykikunata kallpachanqa. Kinsapi, yaqapaschá hunt’aq kasqaykita rikuspanku, Diosta mana reqsiq runakunapas Diosmanta yachayta munanqaku (leeychis Filipenses 1:12-14). Tawapitaq, pruebakuna aguantanaykipaq Diospa yanapayninta reparaspayki astawanraq Jehová Diosta munakunki.

‘Allinta llank’anaykipaq kusapuni kashan’

15. ¿Ima ruwananpaqmi apóstol Pablopaq ‘kusapuni kasharan’?

¹⁵ Apóstol Pablo Éfeso llaqtapi predicananmantan niran: “Allinta llank’anaypaqmi kusapuni kashan”, nispa (1 Cor. 16:8, 9). Allinpunin kasharan chay llaqtapi allin willakuykunata willananpaq, runakunata Jesús qatikuyta yachachinanpaqpas. Chayta ruwaspan apóstol Pabloqa askha runakunata yanaparan Jehová Diosta servinankupaq.

16. ¿Imaynatan hanaq pachapaq akllasqa cristianokuna 1919 watapi ‘kicharayasqa punkunta’ haykuranku?

¹⁶ 1919 watamantapachan rey Jesucristoqa, hanaq pachapaq akllasqa cristianokunaq ñawpaqenpi ‘punkuta kicharipuran’ (Apo. 3:8). Chay punkunta haykuspankun chay cristianokunaqa allin willakuykunata willayta qallariranku, aswan kallpawanmi Bibliaq yachachikuyninkunatapas yachachiranku. Tukuy sonqowan llank’asqankuraykun allin willakuykunata pachantinpiña predicakun, chaymi yaqa qanchis millón runakunaña mosoq pachapi wiñaypaq kawsayta suyakushanku.

17. ¿Imakunapi ‘llank’anaykipaqmi kusapuni kashan’?

¹⁷ Lliw cristianokunapaqmi ‘kusapuniraq kashan allinta llank’anankupaq’. Allin willakuykunata tukuy sonqowan willaqkunaqa kusisqan kawsanku. Qanrí, cristiano wayna sipas, ¿ancha allinpaqchu qhawarinki ‘allin willakuykunapi iñinankupaq’ runakuna yanapayta? (Mar. 1:14, 15.) ¿Kallpachakuwaqchu precursor auxiliar otaq precursor regular kanaykipaq? Chaymantapas llank’allawaqtaqmi Huñunakuy Wasi hatarichiypi, Betel wasipi, otaq misionero kaspapas. Pisillañan tiempo kashan Satanaspa kamachisqan pacha tukukapunanpaq, chayraykun tiemponchista mana usuchispa astawan kallpachakunanchis Diospa qowasqanchis llank’aykunapi yanapakunanchispaq. ¿Kallpachakunkichu chay llank’aykunapi yanapakunaykipaq tiempo kashaqtinraq?

“Reqsiykuychis, hinaspa rikuychis may sumaqchus Señor Diosqa kashasqanta”

18, 19. a) ¿Imanaqtinmi David tukuy sonqonwan Jehová Dios serviyta munaran? b) ¿Imaynapin yachanchis David Diosta servisqanmanta mana hayk’aqpas ñakapakusqanta?

¹⁸ Rey Davidmi Diospa yuyaychasqan kayta qelqaran: “Reqsiykuychis, hinaspa rikuychis may sumaqchus Señor Diosqa kashasqanta”, nispa (Sal. 34:8). Paymi waynachallaraq kashaspa oveja michiq karan, paytan Jehová Dios salqa animalkunamanta libraran. Goliatta atipananpaqpas yanaparanmi, hark’aykullarantaqmi wakin enemigonkunamantapas (1 Sam. 17:32-51; Sal. 18, capituloq hawanpi willakuypiwan). Jehová Diospa khuyapayasqanta reparaspan Davidqa niran: “Diosnilláy Señor Dios, askhallañan musphana ruwasqaykikunaqa, askhallañan yuyarikuwasqaykikunaqa. ¡Manan pipas qan hinaqa kanchu! Chaykunamanta rimariyman chaypas, manan yupayta atiymanchu”, nispa (Sal. 40:5).

¹⁹ Davidqa anchatan Jehová Diosta munakuran, chayraykun payqa tukuy sonqonwan tukuy yuyayninwan Jehová Diosta hatunchayta munaran (leeychis Salmo 40:8-10). Davidqa manan hayk’aqpas ñakapakuranchu tukuy kawsasqan tiempo Jehová  Diosta servisqanmantaqa. Paypaqqa Diospa munayninta ruwaspa kawsaymi aswan allinqa karan, chaymi kusisqapas kawsaran. Machuña kashaspan niran: “Señor Diosníy, qanmi suyakunayqa kanki, wayna kasqaymantan qanman hap’ipakamuni. Diosníy, machullaña soqo umallaña kashaqtiypas ama saqerpariwaychu”, nispa (Sal. 71:5, 18). Davidqa sinchi kurakña kashaspapas, astawanmi Diosta munakuran, astawantaq paypi confiaranpas.

20. ¿Imanaqtinmi Diosta servispa kawsay aswan allin imamantapas?

²⁰ Josuepa, Davidpa, Timoteoq kawsayninkuta qhawarispanchismi yachanchis Jehová Diosta servispa kawsay aswan allin kasqanta. Kay pachapi qhapaq kayqa manan igualakunmanchu ‘tukuy almawan, tukuy sonqowan’ Diosta serviqkuna hamuq tiempopi chaskinankuwanqa (Jos. 22:5). Sichus manaraq Jehová Diosman prometekurankichu servinaykipaq chayqa, tapukuy: “¿Iman hark’awashan Jehová Diospa testigon kanaypaq?” nispa. Sichus bautizakurankiña chayqa, ¿imatan ruwawaq aswan kusisqa kawsanaykipaq? Astawan yapay Dios serviyniykita, kallpachakuytaq aswan allin cristiano kanaykipaq. Kay estudioq qatiqninpin yachanki imaynatas apóstol Pabloq ejemplon yanapasunkiman cristiano kawsayniykipi wiñarinaykipaq chayta.

¿Imanispan kutichiwaq?

• ¿Imanaqtinmi Diosta servinanchis?

• ¿Iman Timoteota yanaparan Dios serviyta decidikunanpaq?

• Askhaña contraykipi hatarinkuman chaypas, ¿imanaqtinmi Jehová Diospaq hunt’aq kanayki?

• ¿Ima sumaq llank’aykunapin yanapakuwaq?

[Tapuykuna]

[22 paginapi foto]

Jehová Diosta servispa kawsaymi aswan allinqa

[23 paginapi foto]

¿Preparasqachu kashanki tapuqniykikunaman kutichinaykipaq?