Ia Koe e Mapu nei rai, e Iki kia Tavini ia Iehova

“Kia mou marie ra koe i taau i apii ra, i tei tukuia atu ia koe ra.”​—2 TIMO. 3:14.

1. Mei teaa ra to Iehova manako no runga i te angaanga a tona Au Kite mapu?

NO TE mea e e puapinga tikai te angaanga tapu a te au mapu kia Iehova no reira kua akauru aia i tetai totou no runga ia ratou. “E puareinga roa to toou ra au tangata, i te rā o toou ra mana,” i imene ei te tata taramo. “Ma te kakā tapu ra; toou ra uanga, mei te au ïa o te kopu o te popongi.” (Sala. 110:3) Ae, e mea akaperepere maata na Iehova te au mapu tei inangaro puareinga ua i te tavini iaia.

2. Eaa te au akakeuanga i te pae materia ta te au mapu e aro atu nei no runga i to ratou tuatau ki mua?

² Kotou e te au mapu ou i roto i te putuputuanga Kerititiano, kua akatapu ainei kotou ia kotou kia Iehova? Penei ka riro te ikianga kia tavini i te Atua mou ei mea ngata no te manganui kia rave. E akamaroiroi ana te au arataki pitiniti, te au puapii, e i tetai au taime te au mema e te au taeake o te au pamiri, i te au mapu kia aruaru i te au akakoroanga pae materia. Me aruaru te au mapu i te au akakoroanga pae vaerua, te maataanga o te taime e aviri ana to teianei ao ia ratou. Inara ko te tikaanga tikai koia oki ko te tavini anga i te Atua mou te mataara meitaki rava atu noou kia aruaru. (Sala. 27:4) No runga i teia, ka akamanako ana e toru au uianga: Eaa ra koe ka tavini ei i te Atua? Akapeea koe e puapingaia ai i te noo anga i tetai oraanga akatapuia ki te Atua noatu e eaa ta etai ke ka tuatua me kore ka rave? Eaa te au tuatau tau no te angaanga tapu, ka rauka mai noou?

Ko te Tavini ia Iehova te Apinga Tau i te Rave

3. Akapeea ra ta Iehova au apinga i anga i te akakeu anga ia tatou?

³ Eaa ra koe ka tavini ei i te Atua mou e te ora? Te oronga maira a Apokalupo 4:11 i te tumu maata: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” Ko Iehova, koia Tei Anga umere mai i te au apinga ravarai e vai nei. Kare e aiteia te manea o te enua! Te au tumu rakau, te tiare, te manu, te moana, te maunga, e te vai rere​—na Iehova i anga mai ia ratou pouroa. “Kua ki te enua nei i taau [ta te Atua] ra apinga,” e akaite maira te Salamo 104:24. E mea tau tikai kia akameitaki tatou e kua oronga aroa ua mai a Iehova i tetai kopapa e te manako te ka tauturu ia tatou kia rekareka ua i te enua e te au apinga memeitaki anake i runga! Kare ainei te arikianga ngakau tae no te au mea umere tei angaia, e akakeu ana ia tatou kia inangaro i te tavini iaia?

4, 5. Eaa te au angaanga tu-Atua tei akavaitata atu ia Iosua kia Iehova?

⁴ Ka kiteaia tetai tumu ke mai no te tavini anga ia Iehova i roto i te au tuatua a Iosua te arataki o te ngati Iseraela. I te vaitata anga ki te openga o tona oraanga, kua akakite a Iosua ki te iti tangata o te Atua e: “Kua kite oki kotou ravarai i roto i to kotou ngakau, e i roto i to kotou katoa au vaerua, e kare rava tetai o te au mea meitaki ta to kotou Atua ta Iehova i tuatua mai ia kotou i poka; kua ope rava i te tupu ia kotou.” No teaa i rauka ai ia Iosua kia tuatua i teia?​—Iosu. 23:14.

⁵ Ei tamaiti ua e tupu akera i Aiphiti, kare e kore e kua kite a Iosua i ta Iehova taputou kia oronga ki te ngati Iseraela i tetai enua no ratou uaorai. (Gene. 12:7; 50:24, 25; Exo. 3:8) I reira kua akara iora Iosua i to Iehova akatupu anga i taua taputou ra, na te apai mai anga i te Mate Ngauru ki rungao ia Aiphiti e te maro anga ia Pharao marokiakia kia tuku i te tamariki o Iseraela kia aere. Ko Iosua tetai i roto i te aronga tei akaoraia mai na roto i te Tai Muramura, e oti kua akara atura aia i taua tai ra i te tapoki anga ia Pharao e tona nuku vaeau. I te tuatau o tetai aereanga roa na roto i te “medebara maata [e te] mataku” o te Metepara o Sinai, kua  kite a Iosua e akapeea a Iehova i te oronga anga i te au apinga ravarai ta te ngati Iseraela e anoano ra. Kare okotai i mate i te kaki vai me kore i te onge. (Deu. 8:3-5, 14-16; Iosu. 24:5-7) I te tae anga te taime no te ngati Iseraela kia akavi i te au pa enua ririnui o Kanaana e kia noo i te enua Taputouia, kua kite tikai a Iosua e akapeea te Atua tana i akamori ana, pera katoa ta etai atu au ngati Iseraela, i te turuturu anga ia ratou i roto i teia angaanga.​—Iosu. 10:14, 42.

6. Eaa te ka tauturu ia koe kia akatupu i te anoano kia tavini i te Atua?

⁶ Kua kite a Iosua e kua akono rai a Iehova i Tana au taputou. No reira a Iosua i akakite ei e: “Kareka au e toku ra ngutuare, e akamori ïa matou ia Iehova.” (Iosu. 24:15) Peea ra koe? Me akamanako ua koe i te au taputou ta te Atua mou i akatupu takere ana e te au mea tana ka akatupu mai, kare ainei koe e inangaro ana i te tavini iaia mei ia Iosua rai?

7. No teaa i riro ei te papetitoanga i roto i te vai ei takainga puapinga tikai?

⁷ I te atokotoko marie anga i ta Iehova au mea i anga e te akamanako anga no runga i tana au taputou umere e te irinaki pu tikai ka akakeu te reira ia koe kia rave i tetai akatapuanga kia Iehova e kia akatutu katoa i taua akatapuanga ra na roto i te tarukuanga ki roto i te vai. E takainga puapinga tikai te apainga o te papetitoanga no te aronga e inangaro ra i te tavini i te Atua. Kua akataka meitakiia mai teia e to tatou Akaraanga, e Iesu. I mua ua ake ka akamata ai aia i tana angaanga ei Mesia, kua oronga aia iaia uaorai kia Ioane Papetito kia papetitoia. Eaa ra a Iesu i apai ei i taua takainga ra? “I eke mai nei au mei te rangi mai, e akono i to tei tono mai iaku nei anoano, auraka i toku uaorai anoano,” i tuatua ai aia i muri mai. (Ioane 6:38) Ei akatutu i tona orongaanga iaia uaorai kia rave i te anoano o tona Metua, kua papetitoia a Iesu.​—Mata. 3:13-17.

8. Eaa ra a Timoteo i iki ei kia tavini i te Atua, e eaa ra te ka anoanoia kia rave koe?

⁸ Ka akamanako katoa ana ia Timoteo, e Kerititiano mapu ua tei maata oki ta Iehova angaanga i oronga nana i te openga e te au tukuanga angaanga takake e manganui. Eaa ra a Timoteo i iki ei kia tavini i te Atua mou? Te akakite maira te Pipiria kia tatou e ‘kua mou marie aia i tana i apii ra, i tei taikuia atu iaia ra.’ (2 Timo. 3:14) Me kua apii ana koe i te Tuatua a te Atua e kua mou i tei taikuia atu ia koe ra kia irinaki e e tika ta te reira au apiianga, tei roto koe i reira i taua turanga ra mei to Timoteo rai. Ka anoanoia koe i teianei kia rave i tetai ikianga. Kore koe e tuatua atu ki toou nga metua no runga i taau e inangaro ra i te rave? Ma te tauturu a te aronga pakari o te putuputuanga, ka rauka ia ratou i te tauturu ia koe kia marama i te au umuumuanga Tuatua Tapu no te papetitoanga.​—E tatau ia Angaanga 8:12.

9. Akapeea tetai aronga i te akakeu angaia me rave koe i te takainga no te papetitoanga?

⁹ Me papetitoia koe, e akamataanga manea tikai teia i roto i te tavini anga i te Atua mou. Na te apai anga i teia takainga, te tomo ra koe ki roto i tetai oroanga mamao e ora mutu kore e te rekareka tona tutaki ka rauka mai i teianei, mei te rave anga i te anoano o te Atua. (Ebe. 12:2, 3) Ka apai katoa mai koe i te rekareka ki te au mema o toou pamiri tei roto ke ana i te oroanga e ki toou au taeake i roto i te putuputuanga Kerititiano. Te mea puapinga maata roa atu, ka akarekareka koe i to Iehova ngakau. (E tatau ia Maseli 23:15.) E tika e, penei kare tetai aronga e marama e eaa ra koe i iki ei kia akamori ia Iehova, e penei ka akaekoko mai ratou i taau ikianga. Penei ka patoi katoa mai ratou ia koe. Inara ka rauka ua ia koe kia autu atu i teia au akaaoanga.

 Me Akaekoko e me Patoi Mai Tetai Aronga ia Koe

10, 11. (a) Eaa ra te au uianga ka ui mai te tangata kia koe no runga i taau ikianga kia tavini i te Atua? (e) Eaa taau ka kite mai mei te mataara i pau ei a Iesu i te au uianga no runga i te akamorianga mou?

¹⁰ Penei ka riro taau ikianga kia tavini ia Iehova ei akatupu i te manako oripu ua ki te au oa apii, te au tangata tupu, e te kopu tangata. Kare e kore ka ui mai ratou kia koe e eaa koe i iki ei kia aru i teia arataa e ka ui mai no runga i taau e irinaki ra. Ka akapeea ra koe me pau atu? E tika rai, e ka anoanoia koe kia akara meitaki i toou aerenga manako e toou manako ngakau kia rauka ia koe i te akamarama atu i te au tumu no taau ikianga. E i te pau anga atu i te au uianga no runga i toou au irinakianga, kare ainei e no Iesu ua rai te akaraanga meitaki rava noou kia aru?

¹¹ I te ui taee anga atu te au arataki akonoanga ngati Iuda ia Iesu no runga i te tuakaouanga, kua taki tika atu aia ia ratou ki te irava kare roa ratou i akamanako ana. (Exo. 3:6; Mata. 22:23, 31-33) I te ui anga atu tetai tata tuatua kiaia e ko teea te akauenga maata roa atu, kua taiku atu a Iesu i te au irava Pipiria i tau kiaia. Kua akameitaki atura taua tangata ra ia Iesu no te pauanga. (Levi. 19:18; Deu. 6:5; Mare. 12:28-34) Kua riro ta Iesu taangaanga anga i te au Tuatua Tapu e te mataara i tuatua ai aia ei akatupu i “te tauetono i taua au tangata ra iaia,” e kare atura e rauka i te aronga e patoi ra iaia kia takinga kino iaia. (Ioa. 7:32-46) Me pau koe i te au uianga no runga i toou akarongo, e taangaanga i te Pipiria e ka ariu atu ei “ma te maru e te kauraro marie.” (1 Pete. 3:15) Me kare koe i kite i te pauanga ki tetai uianga, e akakite e kare koe i kite, e oti, ka akakite ei e ka aere koe ka rave i tetai kimikimianga. I muri ake, e kimi i taua tumu manako ra, na te taangaanga anga i te Watch Tower Publications Index me kore i te Watchtower Library i runga i te CD-ROM me ka rauka mai i roto i toou reo. Na te akapapa meitaki anga, ka ‘kite koe i te mea tika kia tuatua atu.’​—Kolo. 4:6.

12. Eaa ka kore ei e tau kia akatika koe i te takinga kino kia akaparuparu ia koe?

¹² Penei e maata atu taau ka aro atu i to te au uianga ua no runga i toou turanga e te au irinakianga. I na oki e, na te enemi o te Atua, ko Satani te Tiaporo, e akatere nei i te ao . (E tatau ia 1 Ioane 5:19.) Kare i te mea tau kia tapapa atu i te akameitakianga me kore i te arikianga mei te katoatoa, e penei ka aro atu koe i te patoianga. Tetai au tangata penei ka ‘akakino mai ia koe,’ e penei ka akapera ua atu rai. (1 Pete. 4:4) Inara e akamaara, e kare ko koe anake ua. Kua takinga kino katoaia ana a Iesu Karaiti. Kua pera katoa rai te apotetoro ko Petero, e kua tata aia e: “E aku akaperepere e, auraka e poitirere i te takinga-kino maata i roto ia kotou ei timata anga ia kotou, mei te mea e kua rokoia kotou i tetai mea ke: E rekareka ra, i te mea te rave katoa ra kotou i te au mate o te Mesia.”​—1 Pete. 4:12, 13.

13. Eaa ka rauka ai i te au Kerititiano kia rekareka me takinga kinoia ratou?

¹³ Ko te akakoromaki marie anga i te takinga kino me kore i te patoianga ei Kerititiano, tetai tumuanga tau no te rekareka. No teaa ra? No te mea me rauka ia koe te marekaanga o teia ao te akaari maira te reira e te akaau ra koe i toou oraanga kia tau ki to Satani au turanga​—kare i to te Atua. Kua akamatakite mai a Iesu e: “E ae oki kotou kia akameitaki mai te tangata ravarai ia kotou! i pera oki to ratou ai tupuna i te au peroveta pikikaa ra.” (Luka 6:26) Te akaari maira te takinga kinoanga e te riri maira a Satani e tona ao ia koe no te mea te tavini ra koe ia Iehova. (E tatau ia Mataio 5:11, 12.) E “kia akakinoia kotou i te ingoa o te Mesia ra” e mea rekareka rava ia.​—1 Pete. 4:14.

14. Eaa te puapinga ka rauka mai me vai akarongo mou ua rai tetai tangata kia Iehova noatu te takinga kino?

 ¹⁴ Me vai akarongo mou ua rai koe kia Iehova noatu te patoianga, e a au mea puapinga ka rauka mai. Te oronga ra koe i tetai akakiteanga no runga i te Atua e tana Tamaiti. Te akamaroiroi ra toou tu akakoromaki marie ma te akarongo mou i toou au taeake e te au tuaine Kerititiano. Penei ka akakeuia tetai aronga e akara ua maira, tei kore ra i kite ia Iehova, kia kimi iaia. (E tatau ia Philipi 1:12-14.) E ia koe e kite ra ia Iehova e oronga maira i te maroiroi kia akakoromaki marie i te au timataanga, ka tupu maata roa atu toou aroa nona.

“Ei Ngutupa Maata” Tei Akatueraia Mai kia Koe

15. Eaa te “ngutupa maata” tei akatueraia atu ki te apotetoro ko Paulo?

¹⁵ No runga i tana angaanga orometua i Ephesia, kua tata te apotetoro ko Paulo e: “Ei ngutupa maata te taki atura ki te angaanga kua akatueraia mai kiaku.” (1 Kori. 16:8, 9, NW) Ko te ngutupa ia te taki atura ki te angaanga maata i te tutu aere anga i te tuatua meitaki e te akariro anga i te au tangata ei pipi i roto i taua oire. Na te ariki anga i taua tikaanga ra, e maata ua atu ta Paulo i tauturu kia kite no runga ia Iehova e kia akamori Iaia.

16. Akapeea te toenga o te aronga akatainuia i te tomo anga na roto i “te ngutupa matea” i te mataiti 1919?

¹⁶ I te mataiti 1919 kua tuku atu a Iesu Karaiti tei akakakaia i “te ngutupa matea” ki mua i te toenga o te aronga akatainuia. (Apo. 3:8) Kua tomo ratou na roto i taua ngutupa ra e kua akamata i te tutu aere i te tuatua meitaki, i te apii atu i te tuatua mou o te Pipiria ma te maroiroi maata rava atu i to mua ana. Eaa ra te ua tei rauka mai no ta ratou angaanga orometua? I teianei kua taeria e te tuatua meitaki te openga o te enua, e mei te itu mirioni tangata tei rauka te manakonakoanga no te rauka anga mai te oraanga e tuatau ua atu i roto i te ao ou o te Atua.

17. Akapeea e rauka ai ia koe kia tomo na roto i te “ngutupa maata te taki atura ki te angaanga”?

¹⁷ Te tuera nei rai te “ngutupa maata te taki atura ki te angaanga” ki te au tavini katoatoa rava o Iehova. Te aronga e tomo ra na roto i reira te kite ra i te rekareka e te merengo, ia ratou e rave ra i tetai tuanga maata i te tutu aere anga i te tuatua meitaki. E kotou e te au tavini mapu o Iehova e, te akaperepere maata ra ainei kotou i te tikaanga aite koreia i te tauturu anga i etai ke kia “akarongo i te evangelia nei”? (Mare. 1:14, 15) Kare ainei koe i akamanako ana kia tavini ei painia tamou me kore ei painia tauturu? Penei ko tetai atu au tikaanga ka rauka i te manganui ia kotou koia oki, te patuanga i te Are Uipaanga Patireia, te angaanga i Betela, e te angaanga mitinari. I te mea e te viviki nei i te pou te tuatau no to Satani ao kino, te riro nei te piri anga ki roto i teia au tuanga o te angaanga Patireia ei mea rapurapu i te au ra ravarai. Ka tomo ainei koe na roto i te “ngutupa maata” koi vai ei te tuatau?

“Tongi Ana kia Kite i te Meitaki o Iehova”

18, 19. (a) Eaa tei tauturu ia Davida kia maroiroi tona anoano i te tavini ia Iehova? (e) Eaa te akaari maira e kare rava a Davida i tataraara ana no tei tavini aia i te Atua?

¹⁸ Kua pati atu te tata taramo tei akauruia, i etai ke atu kia “tongi ana kia kite i te meitaki o Iehova!” (Sala. 34:8) I te taime e tamaiti tiaki mamoe ua te Ariki ko Davida o Iseraela i taito, kua akaora mai a Iehova iaia mei te au manu taetaevao. Kua turu te Atua iaia i roto i tana tamakianga kia Golia e kua akaora mai iaia mei te au tumatetenga e manganui. (1 Samu. 17:32-51; Sala. 18, tataanga i runga ake) No te maata oki i to te Atua aroa takinga meitaki, kua akakeuia a Davida kia tata e: “E manganui, e taku Atua, e Iehova, te au angaanga taka ke i raveia e koe ra, e toou ra manako ia matou nei: kare e tika kia tatau ua atu ki mua ia koe na.”​—Sala. 40:5.

¹⁹ E aroa maata tikai to Davida no Iehova e  kua inangaro aia i te akapaapaa Iaia ma te katoaanga o tona ngakau e tona manako. (E tatau ia Salamo 40:8-10.) I te au mataiti tei aereia, kare rava a Davida i tataraara ana no tei akapou aia i tona oraanga i te akamorianga i te Atua mou. Ko te oraanga akono mou i te Atua tana apinga akaperepere maata rava atu​—e tumuanga tikai no te mataora kare e rauka kia akaaiteia. I te ruaineanga, kua tuatua a Davida e: “Ko koe toku manako anga, e taku Atu; toku irinaki anga, e Iehova, mei toku ou anga mairai. Me ruaine oki au, e me inaina toku mimiti, e te Atua e, auraka koe e akaruke mai iaku.” (Sala. 71:5, 18) Kua pakari rava atu to Davida irinakianga i roto ia Iehova e tona pirianga taeake Kiaia, noatu e kua paruparu tona kopapa.

20. Eaa ra i riro ei e ko te tavini anga i te Atua te mataara meitaki rava atu i te akapou i toou oraanga?

²⁰ Te kapiti maira te oraanga o Iosua, o Davida, e Timoteo i te akapapuanga e ko te tavini anga ia Iehova te mataara meitaki rava atu i te akapou i toou oraanga. Te aruaru anga i te au puapinga poto ua o tetai ngai angaanga i roto i teia ao kare roa te reira e piri vaitata atu ki te au puapinga tinamou ka rauka ia koe mei te tavini anga ia Iehova ‘ma to ngakau katoa e ma to vaerua katoa.’ (Iosu. 22:5) Me kare koe i akatapu ake ia koe kia Iehova na roto i te pure, e ui kia koe uaorai e, ‘Eaa ra te tapu nei iaku mei te riro mai anga ei Kite no Iehova?’ Me kua papetito takereia koe ei tangata akamori ia Iehova, ka inangaro ainei koe i te akamaata atu i toou rekareka i te oraanga nei? E akamaata atu i reira i taau angaanga orometua, e kia tere tamou atu rai ki mua i te pae vaerua. Te atikara ka aru mai ka akaari atu te reira kia koe e ka akapeea e rauka ai ia koe kia tupu i te pae vaerua na te aru anga i te akaraanga a te apotetoro ko Paulo.

Akapeea Koe me Pau?

• E oronga mai e rua nga tumu ka tavini ei tatou i te Atua.

• Eaa tei tauturu ia Timoteo kia rave i tetai ikianga kia tavini i te Atua?

• Eaa koe ka vai ngaueue kore ua ai me aro atu koe i te takinga kinoanga?

• Eaa te au tikaanga no te tavinianga ka rauka ia koe?

[Au Uianga Apii]

[Tutu i te kapi 18]

Ko te tavini anga ia Iehova te mataara meitaki rava atu no te oraanga

[Tutu i te kapi 19]

Ka rauka ainei ia koe i te pau i te au uianga no runga i toou akarongo?