Oikoparakaʼe Noé ha avei pe Diluvio?

REIKOSÉNEPA peteĩ múndo opavave oiko porãhápe oñondive? Ndereikoséipa peteĩ múndo ndaiporihápe umi oñorairõva, omondáva ni ombohasa asýva hapichápe? Upéicharamo, oĩ peteĩ mbaʼe oikovaʼekue nemokyreỹetereítava. Ñañeʼẽñaína Noé tiémpope oikovaʼekue rehe. Haʼe ningo peteĩ kuimbaʼe nevuénova ojapovaʼekue peteĩ árka. Ko árkape Noé ha ifamília ojesalva oúrõ guare pe ama guasuete ohundivaʼekue umi hénte añáme.

Ko mbaʼe oikovaʼekue ningo ojekuaa opárupi. La Bíbliape jajuhu Génesis kapítulo 6 guive 9 peve. Ikatu avei jatopa pe Coránpe. Ha ojekasea avei heta henda rupi ko Yvy ape ári. Añetehápepa oikorakaʼe pe Diluvio, térãpa oñemombeʼu reínte oñemongyhyje hag̃ua umi iñañávape? Umi Teólogo ha sientifikokuéra ymaite guivéma ojodiskuti ko mbaʼére. La Biblia katu omyesakã porã voi: pe Diluvio añetehápe oikovaʼekue. Umi mbaʼe jahechátava ohechauka ñandéve upéva.

Génesispe omombeʼu porã voi mbaʼe áño, més, ha mbaʼe díapepa oñepyrũvaʼekue pe Diluvio. Heʼi avei arakaʼépa ha moõpa opytavaʼekue pe árka, ha arakaʼépa ikãmba ko Yvy. La Biblia omombeʼu porã avei mbaʼéichapa rakaʼe pe árka, mboýpa omedi ha mbaʼe mbaʼépa ojeporu ojejapo hag̃ua. Péro umi ñemombeʼuguaʼúpe ndojeʼéi koʼã mbaʼe.

Mokõi hendápe jajuhu la Bíbliape máva familiarépa Noé. Ha upéva ohechauka Noé añetehápe oikohague (1 Crónicas 1:4; Lucas 3:36). Esdras ha Lucas ohaivaʼekue upéva la Bíbliape. Ha ojapo hag̃ua haʼekuéra ohesaʼỹijo porã vaʼekue heta mbaʼe. Lucas omombeʼu máva mávapa ouvaʼekue Noé familiarégui, og̃uahẽ meve Jesúspe.

Proféta Isaías ha Ezequiel, apóstol Pablo ha Pedro, oñeʼẽvaʼekue avei Noé térã pe Dilúviore (Isaías 54:9; Ezequiel 14:14, 20; Hebreos 11:7; 1 Pedro 3:19, 20; 2 Pedro 2:5).

Jesucristo voi oñeʼẽ pe ama guasu ouvaʼekuére heʼírõ guare: “Yvypóra raʼy árape oikopavaʼerã umi oikovaʼekue Noé árape. Haʼekuéra okaru, omboyʼu ha omendavaʼekue, Noé oikeha ára peve árkape ha ou pe ama guasu ha ohundi opavavépe” (Lucas 17:26, 27, JMP). Péro pe Diluvio ndoikóirire Jesús heʼi reiete vaʼerãmoʼã “Yvypóra raʼy árape”.

Apóstol Pedro heʼivaʼekue oĩvaʼerãha ‘umi oñembohorýva’ la Biblia heʼívare. Pedro ohai: ‘Haʼekuéra niko ndohechakuaaséi ko Yvy ári oikovaʼekue [Noé tiémpope], oñehundihague opa mbaʼe, ku ama guasu oúramo guare’. Ñandépa ndajahechakuaaséi avei, heʼihaguéicha Pedro? Ndahaʼéi ningo upéicha. Pedro heʼi avei: ‘Pe yvága ha Yvy koʼag̃agua opyta tatápe oñehundi hag̃ua’. Pe ára pahápe, umi hembiapo vaíva oñehundíta (2 Pedro 3:3-7).

Ñandejára ohundi jeýta umi hénte añáme. Ha oĩ jeýta avei ojesalváva. Jajapóramo Noé ojapo haguéicha, ñaiméta umi ipyʼaporãva apytépe. Opavave oiko porãtahápe oñondivepa.