Disolo ya Noa ti ya Mvula ya Ngolo Kele Kyeleka, Kansi Disapu Ve

KETI nge kevingila ti mpusa ya ngolo nsi-ntoto mosi ya mbote, kisika bantu tazinga na ngemba bo na bo? insi yina mvita, nku, to minyokudi tavanda ve? Kana yo kele mpidina, nge lenda baka kikesa na disolo mosi ya nge lenda zaba mbote. Yo kele disolo ya Noa, muntu ya mbote mpenza ya kutungaka maswa yina kugulusaka yandi mpi dibuta na yandi na mvula mosi ya ngolo yina kunokaka na ntoto ya mvimba, mpi ya kufwaka bantu ya mbi.

Masolo yina mezabanaka mingi kele fyoti. Disolo ya mambu yina kukuminaka Noa kele na mukanda ya Kuyantika, kapu 6 tii na 9. Bo mevutukilaka disolo yango na Koran mpi na masapu mingi ya bantu na nsi-ntoto ya mvimba. Keti Mvula ya Ngolo kunokaka mpenza, to keti yo kele kaka disolo mosi buna sambu na kusyamisa bantu na kusala mambu ya mbote? Bantu ya teolozi ti ya siansi metubilaka ngyufula yai banda bamvu-nkama mingi. Ata mpidina, Biblia, Ndinga ya Nzambi kemonisa pwelele nde disolo yango kele ya kyeleka, kansi yo kele ve disapu. Beto tadila mambu yai:

Disolo ya mukanda ya Kuyantika kezabisa beto mvula, ngonda, mpi kilumbu ya sikisiki yina Mvula ya Ngolo kuyantikaka. Yo kezabisa beto mpi ntangu ti kisika yina maswa kutelamaka, mpi ntangu yina masa kuyumaka na ntoto. Mambu yina yo ketubila sambu na maswa mpi kele ya sikisiki, disongidila pula, bandilu, mpi bima yina bo sadilaka sambu na kutunga yo. Kansi, mbala mingi, masapu ya bantu kepesaka ve bansangu ya sikisiki.

Masolo zole ya Biblia ya ketubilaka ndonga ya mabuta kemonisa nde Noa kuvandaka muntu ya kyeleka. (1 Bansangu 1:4; Luka 3:36) Esdrasi ti Luka, yina kutubilaka bandonga yai, kusalaka bansosa na dikebi yonso mpenza. Luka kutubilaka ndonga ya Yezu Kristu banda na Noa.

Profete Yezaya ti Ezekiele, mpi ntumwa Polo ti Piere kutubilaka disolo ya Noa to ya Mvula ya Ngolo.​—Yezaya 54:9; Ezekiele 14:14, 20; Baebreo 11:7; 1 Piere 3:19, 20; 2 Piere 2:5.

Yezu Kristu kutubilaka Mvula ya Ngolo mutindu yai: “Mambu yina bwaka na ntangu ya Noa, yo ta bwa mpi mutindu mosi na ntangu ya Mwana-muntu. Bantu vandaka kudia, kunwa, kukwelana, tii kilumbu yina ya Noa kotaka na maswa; masa fulukaka mingi na ntoto yonso, ebuna yo fwaka bo yonso.” (Luka 17:26, 27) Kana dyambu ya metala Mvula ya Ngolo kusalamaka ve, bangogo ya Yezu ya metala “ntangu ya Mwana-muntu” zolaka kuvanda ve na mfunu.

Ntumwa Piere kutubaka nde bantu tabasika yina ‘tasekaka’ mambu yina Biblia ketuba. Piere kusonikaka nde: “Mutindu nzala na bo ke tindaka bo na kusala . . . bo zola ve kundima nde Nzambi . . . fwaka bantu ya [ntangu ya Noa] kaka na masa yina fulukaka na ntoto yonso.” Keti beto fwete buya kundima dyambu yai? Ata fyoti ve. Piere kulandaka na kutuba nde: “Nzambi . . . me bumbaka zulu ti ntoto yai ke zingaka tii bubu yai, sambu na kufwa yo kimakulu na tiya, na kilumbu yina ya Nzambi ta sambisa bantu ya mbi ti kufwa bo.”​—2 Piere 3:3-7.

Dyaka, Nzambi tafwa bantu ya mbi, mpi mbala yai dyaka bantu taguluka. Kana beto landa mbandu ya Noa, beto mpi lenda vanda na kati ya bantu ya lunungu yina Nzambi tagulusa mpi takotisa na ntoto ya mbote.