Noa ye Kizalu Lusansu Lwakieleka, ke Savu ko

NGA olakukilang’o moyo mu zingila mu nza yambote​—⁠mun’o wantu bekala mu luvuvamu muntu yo nkw’andi, e nza yakondwa vita, nsoki ye lubangamu? Avo i wau, nanga lenda solola lukasakeso muna lusansu olu tomene zaya. Lusansu lwa Noa wa muntu ansongi ona watunga nzaza ina kavuluzilwa y’esi nzo andi, muna kiz alu kia nz’amvimba kiafwasa yimpumbulu.

Vena ye tusansu twayingi tutomene zayakana. O lusansu lwa Noa lwasonama mu Nkand’a Nzambi mun’Etuku kapu kia 6 yakuna kapu kia 9. Lwasonama mpe muna Alcorão yo yikwa kwa wantu ayingi mu nza yawonso. Nga Kizalu kiakala kieleka, ovo savu kwandi kiyikwanga mu kasakesa wantu bavanga edi diansongi? Tuka kolo andongota y’akwa ngangu za nza ke belendanga vana mvutu za kiuvu kiaki ko. Kansi, Nkand’a Nzambi una vo i Diambu dia Nzambi, ukiesesanga e diambu diadi. Usonganga vo lusansu lwalu lwakieleka, ke savu ko. Tala edi uvovanga:

E nkand’Etuku ukutuzaisanga e mvu, ngonde ye lumbu kia yantika Kizalu, ye ngonde yayuma maza ye ntangwa yavwanda e nzaza ova ntoto. Mambu masikididi uvovanga mu kuma kia nzaza, nze i la, lambuka, ntau ye salanganu yatungilwa. E savu ke yikalanga ye mambu masikididi ko.

Tusansu tole twa mvila zina mu Nkand’a Nzambi tusonganga vo Noa wazinga kieleka. (1 Tusansu 1:4; Luka 3:​36) Muna soneka e mvila zazi, Ezera ye Luka batoma fimpa mambu. Luka wasoneka luvila lwa Yesu Kristu yamuna Noa.

Yesaya ye Yezekele wa ngunza, Paulu ye Petelo wa ntumwa bayika oma ma Noa ye Kizalu.​—⁠Yesaya 54:9; Yezekele 14:​14, 20; Ayibere 11:7; 1 Petelo 3:​19, 20; 2 Petelo 2:⁠5.

Yesu Kristu wavova mu kuma kia Kizalu vo: “Una wakala muna lumbu ya Noa, i una ukala muna lumbu ya Mwan’a muntu. Badianga, banuanga, basompanga, basompeswanga, yamuna lumbu kiakota Noa muna nzaza, e kizalu mpe kiakwiza kiakubabùkumuna yau awonso.” (Luka 17:​26, 27) Kele vo Kizalu ke kiakala ko, e mvovo mia Yesu mu kuma kia ‘lumbu ya Mwan’a muntu’ ke miadi kala nsasa ko.

Petelo wa ntumwa wayika “akwa nsokela” ana befidisanga e mpaka za mana kevovanga Nkand’a Nzambi. Wasoneka vo: ‘Muna kuma kia zolela yau’ ‘bavilakana kuna luzolo, ovo . . . e nz’a tandu kia [Noa] wau yalangw’o maza, yakufwila.’ Nga tufwete vilakana e ziku kiaki? Ve kikilu! Petelo wakudikila vo: “Vo i zulu dina wau, yo ntoto, muna diambu diau adimosi, dialundilw’o tiya, dialundilw’e lumbu kia mfundiswa ye mbukumunw’a akwa luvezo.”​—⁠2 Petelo 3:​3-7.

Vava Nzambi kefwasa diaka yimpumbulu, vekala y’awana besala ye moyo. Muna tanginina e mbandu a Noa, tulenda kala vana vena asongi ana bevuluzwa yo kota muna nz’ampa.