Noa le Meetse-fula​—Ke Selo sa Kgonthe, ga se Nonwane

NA O hlologetšwe lefase le lekaone—lefase leo go lona batho ba phelago ka khutšo? leo go lona go se nago ntwa, bosenyi le kgatelelo? Ge e ba go le bjalo, o tla kgothatšwa ke pego ya histori yeo go ka diregago gore o e tseba gabotse. Ke pego ya Noa, monna yo a lokilego e le ka kgonthe yo a ilego a aga areka yeo e ilego ya mo phološa gomme ya phološa le lapa la gagwe Meetse-fuleng a lefase ka bophara ao a ilego a fediša ba kgopo.

Ke dikanegelo tše mmalwa tšeo di tsebjago go swana le ya gagwe. Pego ya seo se diragaletšego Noa e hwetšwa ka Beibeleng ka pukung ya Genesi, dikgalolo 6 go ya go 9 le gona e anegwa ka go Koran le dinonwaneng tša batho ba bantši go dikologa lefase. Na meetse-fula a bile gona e le ka kgonthe, goba na ke nonwane feela yeo e anegwago e le go kgothaletša batho go dira se se nepagetšego? Bo-rathutatumelo le bo-rathutamahlale ba ngangišane ka potšišo ye ka nywaga-kgolo e mentši. Lega go le bjalo, Beibele, Lentšu la Modimo, ga le bjale dipelaelo ka taba ye—pego ye ke ya kgonthe, ga se nonwane. Ela hloko mabaka a:

Pego ya Genesi e re botša ka go lebanya gore Meetse-fula a bile gona ka ngwaga ofe, kgwedi le letšatši, gore areka e ile ya ema kae le gore meetse a ile a pšha neng. Ditaba tša mabapi le areka le tšona ke tše di lebanyago—tsela yeo e bego e dirilwe ka yona, bogolo bja yona le dilo tšeo e bego e dirilwe ka tšona. Ka mo go fapanego, gantši dinonwane ga di hlalose dilo ka mo go kwagalago.

Dipego tše pedi tša mašika ka Beibeleng di hlatsela gore Noa e be e le motho wa kgonthe. (1 Koronika 1:4; Luka 3:36) Bobedi Esera le Luka, bao ba ilego ba kgoboketša mašika a, e be e le banyakišiši bao ba bego ba nyakišiša ka kelohloko. Luka o latišišitše lešika la Jesu Kriste go ba go fihla go Noa.

Moporofeta Jesaya le moporofeta Hesekiele gotee le baapostola ba Bakriste e lego Paulo le Petro ba bolela ka Noa goba Meetse-fula.—Jesaya 54:9; Hesekiele 14:14, 20; Baheberu 11:7; 1 Petro 3:19, 20; 2 Petro 2:5.

Jesu Kriste o boletše ka Meetse-fula a re: “Go etša ge go diregile mehleng ya Noa, go tla ba bjalo le mehleng ya Morwa wa motho: batho ba be ba e-ja, ba e-nwa, banna ba nyala, basadi ba nyadišwa go fihla letšatšing leo Noa a tsenego arekeng ka lona, gomme meetse-fula a tla a ba fediša ka moka.” (Luka 17:26, 27) Ge e ba Meetse-fula a sa ka a ba gona, gona mantšu a Jesu a mabapi le ‘mehla ya Morwa wa motho’ a be a ka se be le seo a se bolelago.

Moapostola Petro o boletše e sa le pele gore go be go tla ba le “bakweri” bao ba bego ba tla nyatša seo Beibele e se bolelago. Petro o ngwadile gore: “Go ya ka go rata ga bona, ga ba kgone go lemoga taba ye ya gore . . . lefase la nakong [ya Noa] le ile la senywa ge le be le apešwa ke meetse.” Na le rena re swanetše go hlokomologa “taba ye”? Le gatee! Petro o tšwetše pele ka gore: “Magodimo le lefase tše di lego gona, gona bjale di boloketšwe mollo gomme di lotetšwe letšatši la kahlolo le la tshenyego ya batho ba sa boifego Modimo.”—2 Petro 3:3-7.

Modimo o tla fediša ba kgopo gape gomme go tla buša gwa ba le baphologi. Ka go ekiša mohlala wa Noa, re ka ba gare ga baloki bao ba tlago go phološetšwa lefaseng le lekaone.