Noe i e Diluvio Ta un Echo i No Fantasia

BO TA deseá un mihó mundu? Es desir, un mundu kaminda no tin guera, ni krímen, ni opreshon i kaminda hende ta biba na pas ku otro? Si ta asina, bo por haña animashon for di un relato históriko ku probablemente bo konosé bon. Ta trata aki di e relato di Noe, un bon hende ku a traha un arka ku a skapa su bida i bida di su famia durante un diluvio mundial den kua hende malbado a peresé.

Masha poko relato ta asina bon konosí. Loke a pasa ku Noe a keda registrá den e buki bíbliko di Génesis, kapítulo 6 pa 9, i e ta ser ripití den e Koran i leyenda di masha hopi nashon rònt mundu. Pero e Diluvio realmente a sosodé, òf e ta simplemente un kuenta ku ta animá hende pa hasi loke ta bon? Teólogo i sientífiko a debatí pa siglonan riba e pregunta aki. Sin embargo, Beibel, e Palabra di Dios ta kita tur duda; e relato ta un echo i no fantasia. Konsiderá lo siguiente:

E relato di Génesis ta bisa nos e aña, luna i dia eksakto ku e Diluvio a kuminsá, ki ora i na unda e arka a bai para i ki ora e tera a seka. Detayenan tokante e arka tambe ta eksakto: e diseño, e midínan i e material ku a ser usa pa trah’é. Na kontraste ku esaki, fábulanan hopi bes no ta duna un deskripshon muchu kla.

Dos liña di desendensia den Beibel ta proba ku Noe tabata un persona real. (1 Krónikanan 1:4; Lukas 3:36) Tantu Esdras komo Lukas, kendenan a kompilá e liñanan di desendensia aki, tabata hendenan ku a hasi investigashon kuidadoso. Lukas a determiná e liña di desendensia di Hesukristu bayendo bèk te na Noe.

Tantu e profetanan Isaias i Ezekiel komo e apòstelnan kristian Pablo i Pedro a referí na Noe òf na e Diluvio.​—Isaias 54:9; Ezekiel 14:​14, 20; Hebreonan 11:7; 1 Pedro 3:​19, 20; 2 Pedro 2:5.

Hesukristu a referí na e Diluvio, bisando: “Meskos ku a sosodé den e dianan di Noe, asina lo ta tambe den e dianan di e Yu di hende: nan tabata kome, nan tabata bebe, nan tabata kasa, nan tabata wòrdu duná pa kasa, te na e dia ku Noe a drenta e arka, i e diluvio a bin i a destruí nan tur.” (Lukas 17:​26, 27) Si e Diluvio no a sosodé, e ora ei loke Hesus a deklará tokante “e dianan di e Yu di hende” lo no tin ningun sentido.

Apòstel Pedro a predisí ku lo bin “bofonadónan” ku lo menospresiá loke Beibel ta bisa. Pedro a skirbi, “Di nan mes boluntat nan no kier aseptá e echo aki, ku . . . e mundu di e tempu [di Noe] a wòrdu destruí, siendo inundá ku awa.” Nos por pasa por haltu di “e echo aki”? Klaru ku nò! Pedro a sigui: “E shelunan i e tera aktual pa medio di su palabra ta wòrdu reservá pa kandela, wardá pa e dia di huisio i destrukshon di hendenan impio.”​—2 Pedro 3:​3-7.

Un biaha mas Dios lo bai destruí e malbadonan, i un biaha mas lo tin sobrebibiente. Si nos imitá Noe su ehèmpel, nos lo por ta entre e hustunan ku lo sobrebibí pa drenta un mihó mundu.