Noa ma le Lolo—O se Tala Moni, Ae e Lē o se Tala Fatu

PO O e moomoo mo se lalolagi e sili atu ona lelei, se lalolagi e nonofo filemu ai tagata uma? se lalolagi e leai ai ni taua, leai se solitulafono, leai foʻi ma ni faiga sauā? Afai o lou tulaga lenā, o le a faalaeiauina la oe i lenei tala faasolopito, atonu ua e masani ai. O le tala lea iā Noa, o se tagata lelei tele na ia fausiaina se vaa, lea na faasaoina ai o ia ma lona aiga a o lofia le lalolagi atoa i se lolo, ma na faaumatia ai tagata amioleaga.

E lē tele ni tala e lauiloa e le toʻatele. O le tala o le mea na tupu iā Noa, o loo i le Tusi Paia i le Kenese, mataupu e 6 seʻia oo i le mataupu e 9, ma o loo faamatalaina foʻi i le Koran ma isi tala tuu a nisi o tagata i le lalolagi aoao. Pe na tupu moni le lolo, po ua na o se tala faatusa e uunaʻia ai tagata e fai le mea saʻo? E tele senituri o finauina e tagata suʻesuʻe i mataupu faalotu ma saienitisi lenei fesili. Peitaʻi, o loo manino le faamatalaga a le Afioga a le Atua, le Tusi Paia, e moni ma faamaoni le tala, o se tala moni ae e lē o se talafatu. O nisi nei o faamaoniga:

O loo taʻua i le tala i le Kenese le tausaga, le masina, ma le aso tonu na amata ai le Lolo, o anafea ma po o fea foʻi na toʻa ai le vaa, ma le taimi na toe mātūtū ai le laueleele. E saʻo aʻiaʻi foʻi le fua o le vaa, le umi, lautele ma lona maualuga, o le telē, ma mea na faaaogā e fausia ai. A o tala fatu, e tele ina lē manino ia faamatalaga e iai.

E lua gafa i le Tusi Paia e faamaonia ai o Noa o se tagata sa soifua moni lava. (1 Nofoaiga a Tupu 1:4; Luka 3:36) O Luka ma Esera na tusiaina gafa nei, o i laʻua o ni tagata suʻesuʻe ma le faaeteete. Na tala e Luka le gafa o Iesu Keriso ma tau atu iā Noa.

Na taʻua e perofeta o Isaia ma Esekielu, faapea foʻi ma aposetolo Kerisiano o Paulo ma Peteru ia le Lolo ma Noa.—Isaia 54:9; Esekielu 14:14, 20; Eperu 11:7; 1 Peteru 3:19, 20; 2 Peteru 2:5.

Na faasino atu Iesu Keriso i le Lolo ina ua ia fetalai: “E pei o aso o Noa, e faapena foʻi aso o le Atalii o le tagata. Na latou aai ma inu, na faaipoipo tamāloloa ma fafine, seʻia oo lava i le aso na ulu atu ai Noa i le vaa, na oo mai le lolo ma faaumatia ai i latou uma.” (Luka 17:26, 27) Afai e leʻi tupu moni se Lolo, atonu la e leai se uiga o fetalaiga a Iesu e faatatau i le “aso o le Atalii o le tagata.”

Na valoia mai e le aposetolo o Peteru o le a iai ē “tauemu” e latou te lē amanaʻia mea o loo i le Tusi Paia. Na tusi Peteru, “E tusa foʻi ma o latou manaʻo, ua latou lē amanaʻia ai lenei mea moni e faapea . . . o mea foʻi ia na oo ai le faaumatiaga i le lalolagi i lenā taimi [o Noa], ina ua lofia i le vai.” Pe e talafeagai ona tatou lē amanaʻia “lenei mea moni?” E leai! Na toe faapea mai Peteru: O “le lagi ma le lalolagi o loo iai i le taimi nei mo le afi, ma ua taofia seʻia oo i le aso faamasino ma le faaumatiaga o tagata faalēmataʻu.”—2 Peteru 3:3-7.

O le a toe faaumatia e le Atua tagata amioleaga, ma o le a toe iai foʻi i latou e faasaoina. O lo tatou faataʻitaʻi la i le faaaʻoaʻoga a Noa, atonu o le a tatou aofia ai i tagata amiotonu o le a faasaoina atu i se lalolagi e sili ona lelei.