Li Noé xchiʼuk li nojelal ta voʼe jaʼ melel, maʼuk noʼox jecheʼ loʼil

¿MI OY van ta avoʼonton ti oyuk junuk balumil ti bu xuʼ jmoj xi jnakiutik ti lek xkil jbatik ta jujuntale? ¿Mi ta xa kʼan ti oyuk junuk balumil ti bu chʼabal pas kʼop mi jaʼuk choplejal xchiʼuk utsʼintaele? Mi jaʼ jeche, oy jun loʼil ta voʼne ti xuʼ tstsatsubtasbot avoʼontone. Taje jaʼ sloʼil xkuxlejal Noé ti lek ojtikinbile, jun vinik ti lek yoʼonton ti la smeltsan jun arka sventa li stuke xchiʼuk sventa li yutsʼ yalale yoʼ xkolik li ta jun nojelal ta voʼ ta spʼejel Balumil ti jaʼ te ilaj skotol li chopol krixchanoetike.

Muʼyuktik yan loʼil ti lek ojtikinbil kʼuchaʼal li loʼil taje. Li sloʼil xkuxlejal Noee te tsakal komel ta Vivlia, xuʼ jtatik te ta slivroal Génesis ta skapituloal 6 kʼalal ta 9, xchiʼuk xtok te ta xichʼ chaʼalel ta Corán xchiʼuk ta yan loʼiletik ta buyuk noʼox jotukal lumal ta spʼejel Balumil. ¿Mi ta melel iʼechʼ li Nojelal ta voʼe, o mi jaʼ noʼox jun ixtol loʼil sventa lekuk spas sbaik li krixchanoetike? Oy xa jayibuk sienal jabil li buchʼutik chchanbeik skʼoplal Diose (teólogos) xchiʼuk li sientifikoetike saʼojbeik skʼoplal mi echʼ ta melel li Nojelal ta voʼe. Pe, li Vivlia, ti jaʼ sKʼop Diose, lek jamal ta xalbe smelolal: li Nojelal ta voʼe kʼot ta pasel ta melel, maʼuk noʼox jecheʼ loʼil. Li kʼusitik chichʼ albel skʼoplal liʼe chakʼ ta ilel ti jaʼ melele.

Ta baʼyele, li loʼilal ta slivroal Genesise lek jamal ta xalbe skʼoplal jlom kʼusitik, ta xal kʼusi kʼakʼalil, kʼusi ual xchiʼuk kʼusi jabilal lik li Nojelal ta voʼe, chal xtok bakʼin xchiʼuk bu kajal ikom li arkae xchiʼuk bakʼin lik takijuk li Balumile. Jech noxtok lek ta xalbe smelolal jlom kʼusitik ta sventa li arkae, jech kʼuchaʼal ti kʼuyelane, sbisol, xchiʼuk kʼusitik la stunesik sventa laj yichʼ pasel-o. Jech kʼuchaʼal chkiltike, toj jelel xvinaj ta yan loʼiletik li loʼil liʼe, yuʼun li yan loʼiletike muʼyuk jamal ta xalbe smelolal jlom kʼusitik.

Jech noxtok, xuʼ jtabetik lek sprevail ti ikuxi ta melel li Noee, taje te chvinaj kʼalal ta jkʼeltik chib slistail snitilultak utsʼ-alaliletik ti te tsʼibabil ta Vivliae (1 Crónicas 1:4; Lucas 3:36). Li buchʼutik la stsʼibaik ta sventa li snitilultak Noee, ti jaʼ Esdras xchiʼuk Lucase, lek la xchanbeik skʼoplal, li Lucase lek la xcholbe talel snitilultak Noé kʼalal to ta Jesús.

Yan jtsʼibajometik ta Vivlia, jech kʼuchaʼal li j-alkʼop Isaías xchiʼuk Ezequiele, xchiʼuk li jtakbol Pablo xchiʼuk Pedro, laj yalbeik xtok skʼoplal li Noee o li nojelal ta voʼe (Isaías 54:9; Ezequiel 14:14, 20; Hebreos 11:7; 1 Pedro 3:19, 20; 2 Pedro 2:5).

Kʼalal xi laj yal li Jesuse jaʼ laj yalbe skʼoplal ti vaʼ kʼusi kʼot ta pasele: «Jech chac cʼu chaʼal la spasic li cristianoetic cʼalal cuxul li Noee, jaʼ noʼox jech tspasic ec cʼalal chital vuʼun ti Xnichʼon cristiano licʼote. Jun yoʼnton chveʼic, ch-uchʼbajic, chnupinic, cʼalal to iʼoch ta barco li Noee. Cʼalal ital li pulel ta voʼe, icham o scotolic» (Lucas 17:26, 27). Jaʼ yuʼun, kʼalal laj yal Jesús «chital vuʼun ti Xnichʼon cristiano» xie, muʼyuk sbalil jechuk ti muʼyukuk xkʼot ta pasel li nojelal ta voʼe.

Li jtakbol Pedroe laj onoʼox yal ti ta xtal «jlabanvanejetic» ti ta slabanik li kʼusi ta xal li Vivliae. Pe, vaʼun xi la stsʼibae: «Yuʼun ti buchʼutic taje, yalel mu scʼan svules ta sjolic ti [...] lum banomil ta voʼnee, tub scʼoplal ta sventa ti tal ti nojel ta voʼe». ¿Mi ta van xkakʼtik kʼotuk ta pasel ek ta jtojolaltik jech kʼuchaʼal taje: ti mu jkʼan jvules ta joltik «[ti] tub scʼoplal[ik]» jech kʼuchaʼal laj yalbe skʼoplal li Pedroe? An moʼoj kʼuxi un, yuʼun li jtakbole xi laj yal «ti vinajel banomil avi tana liʼe, [...] qʼuejbil chapal scʼoplal ta xlaj ta cʼocʼ. Ti cʼocʼ taje ta xchiqʼueic yuʼun ti cʼalal ta sta yorail ti chapanele, ti jaʼ o xa ta stsuts o scʼoplal ti buchʼutic toj chopolique» (2 Pedro 3:3-7, Ch).

Yan velta xtok, li Diose ta xakʼbe slajel li chopol krixchanoetike. Jech noxtok, oy me buchʼu kuxul ta xkomik. Mi ta jchanbetik stalelal li Noee, te me kapal jkʼoplaltik chi jkʼot xchiʼuk li buchʼu tukʼik ti te ch-ochik ta naklej ta jun lekil balumile.