Taem Wan We Yu Laekem Hem Tumas i Ded

Long Tusde, Julae 17, 2007, klosap long seven klok long naet, wan plen we i fulap long ol pasenja i foldaon long bigfala epot blong Brasil, we i stap long medel blong taon blong São Paulo. Be taem plen i tajem graon, hem i glis i go afsaed long epot, i krosem wan big rod, mo i smasem wan dok we i fulap long kago. Ale plen i bosta mo samwe long 200 man i ded long aksiden ya.

BIGFALA disasta ya we i mowas i bitim eni narafala aksiden blong plen long Brasil, bambae i stap olwe long tingting blong olgeta we oli lusum wan we oli laekem hem tumas long aksiden ya. Claudete i wan long olgeta we i pastru long traem ya. Hem i stap lukluk televisen taem hem i harem nius long saed blong plen ya we i bosta. Boe blong hem, Renato, we i gat 26 yia nomo, i stap long plen ya. Hem i bin mekem plan blong i mared long manis Oktoba. Claudete i traem bakegen mo bakegen blong kasem hem long mobaelfon, be i no gat ansa. Ale, hem i foldaon long floa mo i krae we i krae.

Long Jenuware 1986, Antje i lusum boefren blong hem long wan nogud aksiden long trak. Hem i sek taem i harem bad nius ya. Hem i talem se: “Fastaem mi no save bilivim nating wanem we i bin hapen. Mi harem se hemia i wan nogud drim nomo, mo se bambae mi wekap mo mi faenemaot se bad nius ya i no tru nating. Mi seksek mo mi harem se bel blong mi i soa we i soa olsem se wan man i bin faetem mi.” Long ol tri yia afta, Antje i harem nogud tumas mo tingting blong hem i foldaon olgeta. Nomata we aksiden ya i bin hapen 20 yia bifo finis, Antje i stap seksek yet taem hem i tingtingbak long wanem we i bin hapen.

I no gat ol stret tok blong eksplenem filing blong olgeta we oli lusum wan we oli laekem hem tumas. Oli sek, oli no save bilivim wanem we i bin hapen, mo oli no moa gat strong tingting blong mekem wan samting, from we oli no bin tingbaot nating se bambae oli lusum wan we oli laekem hem tumas. ?Be olsem wanem sipos yu save se wan we yu laekem hem tumas bambae i ded i no longtaem, maet from wan nogud sik we hem i kasem? Nomata we yu save samting ya finis, be bambae yu mas harem nogud tumas yet. I no gat wan man we i rere blong akseptem ded blong wan we hem i laekem tumas. Long 2002, mama blong Nanci i ded long hospital, afta we hem i bin sik longtaem. Long dei we hem i ded, Nanci i sidaon long floa blong hospital mo i olsem se tingting blong hem i lus. Hem i harem se laef blong hem i no moa gat mining. Naoia 5 yia i pas finis, be taem hem i tingbaot mama blong hem, hem i krae bakegen.

Dokta Holly G. Prigerson i talem se: “Ol man oli neva haremgud bakegen fulwan taem oli lusum wan we oli laekem hem tumas. Oli lan nomo blong laef wetem tingting ya se oli lusum wan we oli laekem hem tumas.” Sipos yu yu bin lusum wan we yu laekem hem tumas, nating se yu bin save se bambae hem i ded no yu bin sek long nius blong ded blong hem, be ating yu bin askem se: ‘?I stret we mi sore bigwan olsemia? ?Olsem wanem mi mi save winim traem ya? ?Bambae mi save luk bakegen hemia we mi laekem tumas?’ Haf we i kam biaen, bambae i tokbaot ol kwestin ya mo ol narafala kwestin we maet yu gat.

[Credit Line blong pija long pej 3]

EVERTON DE FREITAS/AFP/Getty Images