Hmangaih Takin Min Boralsan Hian

July 17, 2007, Thawhlehni tlai dâr sarih vêlah, São Paulo khawpui laili taka awm Brazil rama thlawhna ṭum hmun lûn berah chuan khualzin mite chuanna thlawhna pakhat chu a tlânna kawng pêl rawkin a tleng phei a. Thlawhna chu kawngpui piaha bungraw dah khâwmna hmunpui sûin a keh chhia a. Chu chêtsualnaah chuan mi 200 vêl lai an thi a ni.

CHU chu Brazil rama thlawhtheihna chêtsualna râpthlâk ber a ni a, an hmangaih tak chântute chuan chu thilthleng chu an theihnghilh thei ngai hauh lo vang le. Claudete-i chu chutianga chântute zîngah chuan a tel a ni. Thlawhna chesual chu TV-ah a lo hmu a. A fapa kum 26 mi lek Renato-a, chu mi kum October thlaa nupui neih tum chu, chu thlawhnaah chuan a chuang a ni. Claudete-i chuan biak tumin a fapa cell phone chu a han phone ṭhîn a; mahse, chhângtu rêng a awm thei si lo. Chhuatah chuan tlu hnawkin, hnem rual lohvin a ṭap ta hawm hawm mai a ni.

Antje-i chuan January 1986 khân a pasal hual chu lîrthei chesualah a chân a. Chu mi chanchin a han hriat chuan, hun engemawti chhûng chu mu leh mal pawh nei lovin a awm a ni. “Ka hriat tirh chuan ka ring thei mai lo. Mumang mai niin, thilthleng tak tak a nih lohzia hre tûra harh chhuak mai tûrah ka inngai rum rum a. Ka khûr zawih zawih a, ka pumah tuemaw hian a rawn hnek chawrh ang maiin nâ ka ti ngawih ngawih a ni,” a ti. Antje-i chu kum thum chhûng ngawt rilru beidawng leh khawhar takin a awm a. Kum 20 aia tam liam tawh mah se, chu thilthleng a ngaihtuah chhuah apiang chuan a la khûr ṭhîn a ni.

Chutiang thil râpthlâk tak leh rin loh taka chânna avânga lo awm nasa taka thin ṭhâwnna te, a thleng tak tak a ni tih rin theih lohna te, mu leh mal pawh neih lohna te, leh beidawnna te chu ṭawngkam maia sawifiah theih a ni lo. Amaherawhchu, hun rei tak chhûng natna avânga a dam chhuah leh pawh kan beisei tawh loh kan hmangaih tak tuemawin min boralsan pawh hian, kan tawrhna chu a nêp bîk chuang lo. Mihring tute mah hi hmangaih takte thihna atân an inpeih tak tak thei lo a ni. Nanci-i nu chu rei tak a nat hnuin kum 2002 khân a thi a. Mahse, a nu thih nî chuan Nanci-i chu mu leh mal pawh nei lovin a awm a, damdawi in chhuatah a tlu hnawk a. A tân chuan nun hian awmzia rêng a nei lo niin a lang. Kum nga lai a liam tawh nâin, a nu a ngaihtuah chhuah châng apiangin a la ṭap ṭhîn a ni.

“Mite chuan an hmangaih thi tate chu an theihnghilh tak tak thei lova, ngaiah an nei mai zâwk a ni,” tiin Dr. Holly G. Prigerson-a chuan a sawi. I rin loh takin emaw, i rin ang ngeiin emaw i hmangaih takin a boralsan che a nih chuan, heti hian i ngaihtuah mai thei a ni: ‘Nasa taka tawrh chu thil pângngai a ni em? Engtin nge hmangaih takte chânna chu tawrh thiam theih a nih? Ka hmangaih tak chu ka hmu leh ngai ang em?’ tiin. A dawta thuziakah hêng zawhnate leh zawhna dang i neih mai theihte chu sawiho a ni ang. (w08 7/1)

[Phêk 3-naa Thlalâk Hawhtîrtu]

EVERTON DE FREITAS/AFP/Getty Images