Ora un Ser Kerí Muri

Riba djamars 17 di yüli 2007, den kareda di shet’or di anochi, un avion di pasahero a slep baha for di pista di aterisahe na e aeropuerto di mas drùk di Brazil, den e sentro di São Paulo. E avion a krusa un karetera prinsipal i bai dal den un depósito di karga. Mas o ménos 200 hende a muri den e aksidente.

E SUSESO aki lo keda permanentemente grabá den mente di e hendenan ku a pèrdè sernan kerí den e desaster aéreo ku ta ser konsiderá esun di mas pió di Brazil. Claudete ta entre esnan ku a pèrdè un ser kerí den e aksidente ei. E tabata wak televishon ora el a tende e notisia tokante e aksidente di avion. Su yu hòmber, Renato, tabata den e avion. E tabatin solamente 26 aña di edat. E tabata planiá pa kasa òktober. Desesperadamente Claudete a purba yam’é riba su selular, pero e no tabata kontestá. El a kai abou na suela i a yora sin miserikòrdia.

Antje a pèrdè su komprometido den un aksidente di outo na yanüari 1986. Ora el a tende e notisia, el a kai den un estado di shòk. Antje a bisa: “Na promé instante mi no por a kere. Mi a pensa ku tabata un nagmèri i ku lo mi a lanta diripiente for di soño i realisá ku no tabata bèrdat. Mi tabata tembla i a sinti un doló teribel komo si fuera un hende a dal mi den mi barika.” Despues di e momento ei Antje a sufri di depreshon pa tres aña largu. I maske e aksidente a tuma lugá mas ku 20 aña pasá, ainda e ta tembla ora e kòrda loke a pasa.

No tin palabra pa deskribí e sintimentunan devastador di shòk, inkredulidat, insensibilidat i desesperashon ku un hende por sinti despues di un pèrdida inesperá i trágiko asina. Pero, asta ora hende sa ku un ser kerí ta bai muri, manera den kaso di un malesa ku ta dura largu, tòg e tristesa por ta inmenso. Ningun hende no ta totalmente prepará pa morto di un ser kerí. Nanci su mama a muri na aña 2002, despues di un malesa ku a dura hopi tempu. Sinembargo, e dia ku su mama a muri, Nanci a kai sinta abou den e hospital totalmente den un estado di shòk. A parse ku bida no tabatin propósito mas p’e. Sinku aña a pasa desde e dia ei, pero ainda e ta yora ora e pensa riba su mama.

Segun Dr. Holly G. Prigerson: “Hende nunka ta rekuperá kompletamente di un pèrdida asina, simplemente nan ta siña biba kuné.” Si abo a pèrdè un ser kerí, sea ta inesperadamente òf nò, kisas bo ta puntra bo mes: ‘Ta normal ku mi ta sinti mi tristu? Kiko por yuda mi ora mi pèrdè un ser kerí? Lo mi bolbe mira mi ser kerí atrobe?’ E siguiente artíkulo lo trata e preguntanan aki i otro preguntanan ku kisas bo tin.

[Rekonosementu pa Potrèt na página 3]

EVERTON DE FREITAS/AFP/Getty Images