Pe a Maliu se Tasi e Pele iā te Oe

I le afiafi o le Aso Tofi, Iulai 17, 2007, pe tusa o le tā o le fitu, na see ese ai se vaalele laʻu pasese mai le alā vaalele i le malae vaalele pito sili ona pisi i Pasili, i le ogatotonu o São Paulo. Na oso le vaalele i luga o le auala tele, ma taia ai le fale e felaʻuaʻi ai uta. E tusa ma le 200 tagata na maliliu ai i lenā faalavelave.

E MAUTINOA lava, o le a mau pea i mafaufau o ē na maliliu ai ē pele iā i latou, i lea faalavelave tau vaalele mataʻutia tele i Pasili. O Claudete, o se tasi o i latou na maliliu ai o latou tagata e pele iā i latou i lea faalavelave. I lenā taimi, sa matamata o ia i le TV ae faaali mai loa le tala e uiga i se vaalele ua lavea. Sa malaga ai lana tama tama o Renato i lenā vaalele. E na o le 26 ona tausaga. Sa ia fuafua e faaipoipo iā Oketopa. Na taumafai Claudete e vili le telefoni feaveaʻi a lana tama, ae leai se tali mai. Na ia paʻū i lalo ma tagi auēuē.

Na maliu le uō tama a Ane i se faalavelave tau taavale iā Ianuari 1986. Ina ua ia faalogo i le tala, sa matuā faateʻia o ia. “Sa ou lē talitonu i le mea ua tupu. Na ou faapea ua na o se miti leaga. Ae ou te ala aʻe ma iloa, e lē o se mea moni. Sa ou mataʻu ma matuā mafatia e pei lava o loo tuʻi e se tasi loʻu manava.” Na maua Ane i mafatiaga o le mafaufau i le tolu tausaga na sosoo ai. E ui lava ua sili atu i le 20 tausaga talu ona tuanaʻi le faalavelave, ae o loo mafatia pea o ia pe a ia manatua le mea na tupu.

E lē mafai e upu ona faamatala faalogona ootia o le faateʻia, le lē talitonu, le lē magagana, ma popolega na iʻu i ai ona o na faalavelave mataʻutia e leʻi faatalitalia. Peitaʻi, e oo foʻi i le maliu o se tasi e pele iā te oe ua leva ona faatalitalia, atonu o se tasi ua leva ona maʻi ae ua maliu, e mafai lava ona aafia loloto i tatou i le faavauvau. E leai se tasi e sauniuni atoatoa i le maliu o se tasi e pele iā te ia. Na maliu le tinā o Nanci i le tausaga e 2002 ona o se maʻi faaumiumi na maua ai. Ae i le aso na maliu ai lona tinā, sa nofo Nanci i le fola o le falemaʻi ma se faalogona o le matuā faateʻia. E foliga mai ua leai se uiga o le olaga mo ia. E ui lava ua lima tausaga talu ai, ae e tagi pea pe a ia mafaufau i lona tinā.

“E lē taitai ona vave mavae atu lagona faavauvau o se tagata pe a maliu se tasi, ae e oo ina latou masani ai,” o le faamatalaga lea a se fomaʻi e suafa iā Holly G. Prigerson. Pe afai ua maliu se tasi sa pele iā te oe, pe faatalitalia pe leai, atonu e te tomānatu: ‘Po o se tulaga e masani ai le faavauvau? E faapefea ona ou onosaia le maliu o se tasi e pele iā te aʻu? Po o le a ou toe vaai ea iā te ia?’ O le a talanoaina nei fesili ma isi fesili o loo i lou mafaufau, i le mataupu o sosoo mai.

[Ē Ana le Ata i le itulau 3]

EVERTON DE FREITAS/AFP/Getty Images