Te wan lobiwan fu yu dede

Tapu tudewroko 17 yuli 2007, na wan ten fu seibi yuru mofoneti, wan opolani grati komoto fu na opolani pasi fu a moro bigi opolani presi na Brasyonkondre. Na opolani presi disi de leti na mindrisei fu a foto São Paulo. Na opolani koti abra wan bigi pasi èn a go naki panya na wan bigi maksin. Sowan 200 sma lasi den libi na ini a rampu disi.

DEN wan di lasi lobiwan na ini a rampu disi, noiti no sa man frigiti a sani disi di sma e kari a moro bigi rampu di oiti pasa nanga wan opolani na Brasyonkondre. Claudete ben de wan fu den sma di lasi wan lobiwan fu en na ini a rampu disi. A ben e luku telefisi di a yere a nyunsu taki wan opolani naki panya. A boi fu en di nen Renato, ben de na ini na opolani. A ben abi 26 yari nomo. A ben sreka sani fu trow na ini oktober. Claudete skreki srefisrefi di a yere fu a rampu, èn a pruberi fu bel en na tapu en cel, ma nowan sma ben e piki. A fadon na gron èn a bigin bari krei.

Antje ben meki mofo fu trow, ma na ini yanuari 1986, a patna fu en lasi en libi di a wagi fu en go naki. Di Antje yere a nyunsu, a skreki srefisrefi. A e taki: „Di mi yere san ben pasa, dan mi no ben man bribi srefisrefi san pasa. A ben gersi leki na wan takru dren mi ben kisi, èn taki mi ben o wiki wantronso fu kon si taki na dren mi ben dren. Mi ben e beifi, èn mi bere ben hati mi so te, taki a ben gersi leki wan sma ben naki mi drape.” Den dri yari baka dati, Antje ben e firi brokosaka doronomo. Aladi moro leki 20 yari pasa sensi a sani disi miti en, toku a e beifi ibri leisi te a e prakseri baka san ben pasa.

Te wan lobiwan fu wi lasi en libi sondro taki wi fruwakti dati, dan wi e skreki srefisrefi, wi no man bribi san pasa, èn wi e sari trutru. Wortu no de fu tyari kon na krin fa wi e firi trutru. Son leisi a de so taki wan sma ben fruwakti taki a lobiwan fu en ben o dede, kande fu di a sma ben siki wan heri pisi ten. Ma awansi dati de so, toku a sma kan sari srefisrefi. Nowan sma kan sreka ensrefi dorodoro gi a dede fu wan lobiwan. Nanci en mama dede na ini a yari 2002, baka di a ben siki wan heri pisi ten. Toku, a dei di en mama dede, Nanci ben e sidon na gron na ini na ati-oso, èn a no ben man bribi san ben pasa. A ben gersi leki a libi no ben e gi noti moro. Feifi yari pasa kaba sensi a sani disi miti en, ma toku a e krei ibri leisi te a e prakseri en mama.

Datra Holly G. Prigerson ben taki: „Te wan lobiwan fu wan sma dede, dan a sma noiti e kaba sari, ma a e teki a sani disi nomo soleki fa a de.” Efu wan lobiwan fu yu dede, awinsi yu ben fruwakti dati noso awinsi yu no ben fruwakti dati, dan kande yu e aksi yusrefi: ’A fiti te mi e sari? San mi kan du fu no lasi-ati tumusi te wan lobiwan fu mi dede? Oiti mi sa si a lobiwan fu mi baka?’ A tra artikel sa piki den aksi disi èn sosrefi tra aksi di yu abi kande.

[Sma di abi a reti fu a prenki na tapu bladzijde 3]

EVERTON DE FREITAS/AFP/Getty Images