Shighe u Or u Doon We Ishima Nan Kpe Yô

Sha iyange i Tomahar aikighe, Julai 17, 2007, er ahwa ataankarahar nahan, igirgi i purugh undu gbenda u i ken zege tashan u igirgi hen atô u gar u São Paulo ken tar u Brazil. Igirgi ne per zege gbenda za ta ken ijiir igen i haan ikyav. Aikyôr ne wua ior kuma er 200 nahan.

I KAA ér ka aikyôr u igirgi i purugh u hemban vihin ken tar u Brazil je ne, man mayange kwagh ne una hungur mba ior vev yange ve kpe la ga. Kwase ugen, iti na ér Claudete, un kpa lu môm ken mba ior vev kpe ken aikyôr ne yô. Yange tema lu nenge televishen maa ungwa ibaver i aikyôr u igirgi ne. Wan na, Renato kpa lu sha igirgi ne. Wan na ne lu anyom 26 tseegh tsô. Yange wa ishima u vôson kwase ken uwer u Oktoba. Claudete ongo kwagh ne yô, ishima gba nyian un, nahan a yila namba u telefon u wan na fele, kpa or tôô ga. Tsô a mindi mliam a gba vaan, je lumun ér or a kumbur un ga.

Bo aikyôr ugen yange wua shiôr i gumkwase ugen ken uwer u Janawari, 1986, iti i gumkwase shon ér Antje. Shighe u ungwa kwagh u aikyôr shon yô, ishima ta un kwe. A kaa wener, “hiihii la, lum er ka mimi ga nahan. Lum er mnyam ma cier mo a cier, me nure me nder maa kwagh a bee nahan. M lu gbidyen ikyarkyase iyol shi iyol lu nyoon mo dang dang er or tan iju sha uya nahan.” Antje ule anyom atar. Aikyôr ne er anyom kar hegen hemba 20, kpa hanma kwa u ka una umbur kwagh u yange er la yô, a gbidye ikyarkyase iyol.

Se fatyô u pasen mciem man mnyoon man lanshima kua ijungwen i or wase ka nana kpe ku swendegh ve se lu a mi la been ga. Ka sea vande fan ser or wase nana kpe, er shighe u nan gbe angev ica i gbe nahan je kpa, nana kpe yô, se zungwe kpishi. Or môm kpa nan we agoyol sha ku u or u nan nan been ga. Ngô u Nanci yange gba angev ica i gba, va mase kpen ken inyom 2002 la. Nahan kpa, sha iyange i ngô u Nanci kpe la, ishima ta un kwe gba sharen hen tembe iyouci tsô. Uma due un ishima hen shighe la. Anyom kar hegen ataan, kpa hanma kwa u ka una hen kwagh u ngô na yô, a vaa kpishi.

Ortwer ugen, mba yer un ér Holly G. Prigerson, a kaa ér: “Ior mba hungur a kwagh u a saa ve la ga, ka ve wa a wa ishima tsô.” Aluer or wou kpe ku swendegh shin ka ku swendegh ga je kpa, alaghga u lu henen wer: ‘Ka shami u zungwenee? Me fatyô u wan ishima a ku u or wam je kpa? A tsa nahan me nenge a ior av mba ve kpe la je he?’ Ngeren u a dondo ne una time sha mbampin mban man mbagenev kpaa.

[Picture Credit Line on page 3]

EVERTON DE FREITAS/AFP/Getty Images