Mbaʼéichapa ikatu jagueropuʼaka ñane ñembyasy

‘Jacob raʼy ha itajyrakuéra oñehaʼã ombopyʼaguapy chupe. Haʼe katu ndoikuaaséi mbaʼeve ha heʼi: “Añembyasýne che raʼýre amano meve”. Ha oguerojaheʼo chupe.’ (GÉNESIS 37:35.)

JACOB oñeñandu vaieterei vaʼekue itaʼýra omano rire. Heʼi voi oñembyasytaha omano meve. Jacob oñeñandu haguéicha, oiméne nde reñembyasyeterei avei ne hénte omano haguére ha ere voi arakaʼeve ndohasamoʼãiha ndehegui pe vyʼaʼỹ. Heʼisépa upéva nderejeroviaiha Ñandejárare? Nahániri!

Epensamína, la Biblia heʼi Jacob ojerovia hague Jehováre. Ijavuélo Abrahán, itúva Isaac ha chupe ojeguerohory ijerovia mbarete haguére (Hebreos 11:8, 9, 13). Pór ehémplo Jacob oñorairõ peteĩ pyhare pukukue peteĩ ánhenldi Ñandejára ovendesi hag̃ua chupe (Génesis 32:24-30). Añetehápe ningo Jacob ohayhuvaʼekue Jehovápe! Mbaʼépa ñanemboʼe upéva? Ñanemboʼe jajeroviáramo jepe Ñandejárare ñambyasyetereiha avei omanóramo peteĩ jahayhúva. Entéro ihénte manóva oñeñandu vai ha oñembyasy.

Mbaʼéichapa ñañeñandu omanórõ ñane hénte?

Ñambyasy ningo omano jave peteĩ jahayhúva péro ijetuʼuvéva hína jagueropuʼaka  pe vyʼaʼỹ ñañandúva. Jahechamína oikovaʼekue Leonardo rehe. Haʼe orekórõ guare 14 áño itúva hasy sapyʼa ikorasõme ha omano. Leonardo arakaʼeve ndahesaraimoʼãi pe oikovaʼekuégui itia omombeʼúrõ guare chupe itúva omano hague. Ñepyrũrã ndoroviaséi upe ohendúva. Jepe haʼe ohecha itúva retekue pe kahónpe haʼetévaicha chupe ndoikóiva mbaʼeve. Seis mése rupi ohasa ha Leonardo ndaikatúi gueteri hasẽ. Pyʼỹi ohaʼarõ itúva ou itravahohágui. Un áño rire ae haʼete ku ohechakuaáva itúva omano hague, ha oñeñandu haʼeñoite. Og̃uahẽramo hógape ha ndaipóri avave imanduʼa jey itúva ndaiporiveimaha. Péicha jave haʼe oñeñandu vaieterei ha hasẽ. Ohechagaʼueterei anga itúvape!

Leonardo ohasavaʼekue ohechauka mbaʼeichaitépa tuicha pe vyʼaʼỹ ikatúva ñañandu. Péro ani jajepyʼapyeterei, mbeguekatúpe ñañeñandu porãvéta. Peteĩ erída oikotevẽháicha tiémpo oñemboty ha okuera hag̃ua, upéicha avei ñaikotevẽ tiémpo ñañeñandu porãve hag̃ua. Ikatu ohasa mése térã heta áño upearã. Péro pe vyʼaʼỹ tuichaite ñañandúva iñepyrũme mbeguekatúpe ohasamiéta ha ñanekyreʼỹ jeýta jahávo.

Ñañembyasýtante voi jajepokuaa peve pe oikovaʼekuére, ha upéva ñanepytyvõta ñañeñandu porãve hag̃ua. Ñambyasy ningo noĩvéi haguére ñanendive peteĩ ñande rapicha jahayhuetéva. Ha jajepokuaavaʼerã jaiko heseʼỹ. Ñañembyasýramo ikatúta ñanohẽ okápe upe ñañandúva. Ñanemanduʼákena naentéroi oñembyasyha peteĩcha. Péro oĩ peteĩ mbaʼe entéro ñantendevaʼerã: jajokóramo pe ñañandúva ojapo vaíta ñanderehe, ikatu ndajapytaporãvéi ha ñanembohasy. Mbaʼéichapa upéicharõ ikatu ñanohẽ okápe pe ñañandúva? La Bíbliape oĩ konsého ñanepytyvõtava upearã.

Mbaʼépa ñanepytyvõta ñañeñandu porãve hag̃ua

Heta ihénte manovaʼekue heʼi oñeñandu porãveha oñeʼẽramo umi mbaʼe oñandúvare. Pór ehémplo, jahechamína mbaʼépa heʼivaʼekue Job omano rire chugui 10 ifamília ha ohasa rire hetave mbaʼe vai. Haʼe heʼi: “Chekuerái che rekovégui, tove katu tachepyahẽ sãso añeʼẽ hag̃ua che pyʼaro oĩhaichaite che pyʼapýpe” (Job 1:2, 18, 19; 10:1, ÑÑB). Upéicharõ Job oñeñandu porãve vaʼekue omombeʼu rire mbaʼéichapa oñeñandu.

Paulo sy omanovaʼekue, ha haʼe omombeʼu: “Tuicha ningo chepytyvõ añeʼẽ che sýre”. Ikatu ñañeñandu porãmie ñamombeʼúramo peteĩ ñane amígope mbaʼéichapa ñañeñandu (Proverbios  17:17). Omano rire isy, peteĩ ermána hérava Yone ojerure ermanokuérape pyʼỹive ovisita hag̃ua chupe. “Añeʼẽvo añandúvare ojehasave chehegui pe vyʼaʼỹ” heʼi haʼe. Ndéve avei tuicha nepytyvõta remombeʼúramo reñandúva peteĩ ne amígo imbaʼeporãvape.

Jahaíramo ñañandúva ikatu avei ñanepytyvõ. Oĩ ndaikatúiva oñeʼẽ oñandúvare péro ndahasýi chupekuéra ohai hag̃ua. Pór ehémplo Saúl ha Jonatán omano rire, rréi David ohai peteĩ purahéi oñembyasy hag̃ua hesekuéra. Ha upe purahéi oñemoĩ la Bíbliape Segundo de Samuélpe (2 Samuel 1:17–27).

Ñanerasẽramo ñanepytyvõta avei ojehasamie hag̃ua ñane ñembyasy. “Opaite mbaʼe hiʼára [...]. Pe tasẽ hiʼára” heʼi la Biblia (Eclesiastés 3:1, 4, ÑÑB). Ha ikatu jaʼe omano jave peteĩ jahayhúva og̃uahẽha ‘ára ñanerasẽ hag̃ua’. Ani ñatĩ ñanerasẽ haguére. La Biblia omombeʼu oĩ hague heta kuimbaʼe ha kuña ojerovia mbaretéva Jehováre hasẽvaʼekue oñembyasýgui (Génesis 23:2; 2 Samuel 1:11, 12). Jesús jepe ‘hasẽvaʼekue’ og̃uahẽvo Lázaro retekue oñemoĩ haguépe. Haʼekuéra ningo oñoamigoite vaʼekue (Juan 11:33, 35).

Tekotevẽ ñanepasiénsia ñañehaʼãvo jagueropuʼaka ñane ñembyasy. Ikatu ñaime porãhágui ñañeñandu vai sapyʼa. Péro ñanemanduʼákena ndaivairiha ñanerasẽ. Heta ñande rapicha ojeroviáva Jehováre ohechakuaa hasẽ rire oñeñandu porãveha.

Ñañemoag̃uíkena Ñandejárare

La Biblia heʼi: ‘Peñemboja Ñandejárare ha haʼe oñembojáta penderehe’ (Santiago 4:8). Ñañemoag̃ui hag̃ua Ñandejárare ñañemboʼevaʼerã chupe. Ani ñaimoʼã nañanepytyvõmoʼãiha! La Bíbliape jatopa ko promésa porãite: “Ñandejára oñemboja  umi ohasa asýva rehe ha oguenohẽ umi ikangypávape jejopy vaígui” (Salmo 34:19 [34:18, NM]). Heʼi avei: “Ñandejára pópe emoĩ umi mbaʼe ndepyʼapýva ha haʼe oñangarekóta nderehe” (Salmo 55:23 [55:22, NM]). Ñapensamíntena koʼã promésare. Jahecha haguéicha angete, oĩ heta oñeñandu porãvéva omombeʼúvo oñandúva peteĩ iñamigoitépe. Ha koʼýte ñanepytyvõta ñamoĩramo Ñandejára pópe ñane ñembyasy jaikuaágui haʼe opromete hague ñanekonsolataha (2 Tesalonicenses 2:16, 17).

Paulo, ñañeʼẽma hague ajeʼi, omombeʼu: “Añandu jave ndaikatuveimaha agueropuʼaka pe vyʼaʼỹ, añesũ ha ajerure Ñandejárape tachepytyvõ”. Paulo ohechakuaa upéva oipytyvõha chupe. Nde avei reñemboʼe meméramo, rehecháta mbaʼéichapa “Ñandejára tapia oporokonsoláva” nemombarete ha nepytyvõ (2 Corintios 1:3, 4, BNP; Romanos 12:12).

Umi omanovaʼekue oñemoingove jeýta

Jesús heʼivaʼekue: “Che haʼe pe jeikove jevy ha pe tekovete. Pe ojeroviáva  cherehe, omanóramo jepe, oikove jevy vaʼerã” (Juan 11:25, BNP). La Biblia heʼi umi omanovaʼekue oikove jeytaha. * Jesús oĩrõ guare ko yvy ape ári ohechauka ikatuha oporomoingove jey. Peteĩ jey haʼe omoingove peteĩ mitãkuñaʼi orekóva 12 áño. Mbaʼéichapa oñeñandúne ituvakuéra ohechávo upéva? Haʼekuéra ningo “ijurujái opytávo” ha ovyʼaiterei (Marcos 5:42). Ág̃a ogoverna vove Jesús omoingove jeýta hetaiterei tapichápe oiko hag̃ua pyʼaguapy ha vyʼápe ko yvy ape ári (Hechos 24:15; 2 Pedro 3:13). Ñapensamíntena mbaʼeichaitépa javyʼáta umi omanovaʼekue oikove jeývo ha ojotopa jey ihentekuérandi!

Ña Claudete oguerovia umi omanovaʼekue oikove jeytaha. Jaʼémakuri imemby Renato omano hague peteĩ aksidéntepe. Ña Claudete omoĩ ijeladérare imemby fóto, ha pyʼỹinte omaña hese ha heʼi: “Jajotopa jeýta ág̃a reñemoingove jey vove”. Leonardo katu haʼete ku ohechapámava itúvape ág̃a oikove jeývo Ñandejára múndo pyahúpe. Haʼekuéra tuicha ipyʼaguapy oikuaágui oñemoingove jeytaha ihénte ohayhuetévape. Ha oĩ heta tapicha ogueroviáva avei upéva. Ñande ikatu avei ñañeñandu haʼekuéraicha!

[Nóta]

[Rrekuádro oĩva páhina 7-pe]

“Ñandejára tapia oporokonsoláva”

‘Ñamombaʼeguasu Ñandejára, Jesucristo Rúpe, haʼe niko ñande Ru oporoporiahuverekóva ha Ñandejára tapia oporokonsoláva.’ (2 Corintios 1:3, BNP.)

Ko téysto ohechauka Ñandejára ikatuha oipytyvõ hembiguaikuéra iñeʼẽrendúvape ogueropuʼaka hag̃ua oimehaichagua provléma. Upearã ikatu ojevale peteĩ ñane amígo térã ñane héntere ojeroviáva avei Hese.

Leonardo túva ningo omanovaʼekue ha haʼe imanduʼa peteĩ mbaʼe oikovaʼekuére tuicha omombaretéva chupe. Peteĩ jey og̃uahẽvo hógape imanduʼa sapyʼa ndaiporiha avave upépe ha oñepyrũ hasẽ ha nokirirĩkuaavéi. Upémarõ oho peteĩ plása hiʼag̃uívape upégui, oguapy peteĩ vánko ári ha osegi hasẽ. Haʼe ojerure Jehovápe oipytyvõmi hag̃ua chupe. Upe javete peteĩ kamionéta opyta upépe ha Leonardo ohecha pe omaneháva haʼeha testigo de Jehová. Pe ermáno ohovaʼerã peteĩ hendápe péro ojavy hape. Ohecha hague chupénte tuicha omokyreʼỹ Leonárdope.

Omano rire hembireko peteĩ karai oñeñandu haʼeñoite ha ndovyʼaieterei. Haʼe hasẽ ha nokirirĩvéi haʼetégui chupe ndaiporiveimaha esperánsa. Upémarõ ojerure asy Ñandejárape oipytyvõmi hag̃ua chupe. Oñemboʼe aja gueteri ipu iteléfono. Ohenói chupe iniéta. Ko karai imanduʼa: “Mbykymínte roñemongeta péro tuicha chemokyreʼỹ. Ahechakuaa péicha oñekontesta hague chéve che ñemboʼe”.

 [Rrekuádro oĩva páhina 9-pe]

Ñakonsolákena ñande rapichakuérape

“Ñandejára niko ñanekonsola opa umi ñande jepyʼapýpe, ikatu hag̃ua ñande avei ñakonsola umi ojepyʼapývape pe konsuélo [...] Ñandejára omeʼẽva ñandéve rupi.” (2 Corintios 1:4, BNP.)

Heta kristiáno ohecha añeteha ko téysto heʼíva. Oñekonsola rire chupekuéra, haʼekuéra ikatúma avei okonsola ótro hapicha oñembyasývape.

Jahechamína mbaʼépa ojapo Ña Claudete. Haʼe ovisita jepi ivesinokuérape oñeʼẽ hag̃ua chupekuéra la Bíbliare. Omano mboyve imemby haʼe ohómiva ovisita peteĩ kuñakaraípe imemby kuimbaʼe omanovaʼekue leucémiagui. Ko kuñakaraípe ogusta Ña Claudete heʼíva péro opensa haʼe ndaikatuiha ontende mbaʼéichapa oñeñandu. Ña Claudete memby omano rire katu pe kuñakarai oho hógape ha oporandu chupe osegípa ojerovia Ñandejárare imemby omanóramo jepe. Ohechávo mbaʼeichaitépa Ña Claudete ojerovia, pe kuñakarai ostudia hendive la Biblia ha péicha Ñandejára Ñeʼẽ okonsola avei chupe.

Itúva omano rire, Leonardo oñepyrũ ostudia lenguaje de señas omboʼe hag̃ua la Biblia umi nohendúivape. Haʼe oñandu upéva ojapo porãha hese. Leonardo omombeʼu: “Peteĩ mbaʼe chepytyvõva agueropuʼaka hag̃ua che ñembyasy ningo amboʼe Ñandejára Ñeʼẽ umi nohendúivape. Heta tiémpo aiporu upearã ha añehaʼã aipytyvõ chupekuéra. Ahechávo che estudiánte ojevautisa ojehasa pe vyʼaʼỹ arekovaʼekue. Che túva omano guive upérõ ae añandu jey avyʼaha” (Hechos 20:35).

[Nóta oĩva taʼanga ndive páhina 5]

Iporã ñamombeʼu mbaʼéichapa ñañeñandu

[Nóta oĩva taʼanga ndive páhina 6]

Jahaíramo ñañandúva ikatu ñanohẽ okápe ñane ñembyasy

[Nóta oĩva taʼanga ndive páhina 6]

Tuicha ñanembopyʼaguapýta jaleéramo la Bíbliape umi omanóva oñemoingove jeytaha

[Nóta oĩva taʼanga ndive páhina 8]

Jesús heʼivaʼekue omoingove jeytaha entéro ojeroviávape hese