Lalometau Haheaukalaia Dalana

“Iena natuna tatau bona hahine ibounai idia lao ia dekenai, iena lalona idia hanamoa totona. To ia ura lasi iena lalona do idia hanamoa, vadaeni ia tai mai boiboi danu, ia gwau, ‘Lasi. Lauegu natuna dekenai mase gabuna dekenai dohore lau lao, mai tai danu.’ Ia taitai noho unai bamona, iena natuna totona.”​​—⁠GENESE 37:​35.

IAKOBO be ena natuna ena mase dainai ia lalometau bada. Ia ura do ia taitai ela bona ia mase. Iakobo bamona, reana oi mamia emu lalokau tauna ta ia mase neganai, ena hisihisi be bada herea bona do ia ore lasi. Unai bamona oi lalometau dainai, unai ese ia hahedinaraia oi be Dirava oi abidadama henia lasi, a? Lasi!

Baibel ia gwau Iakobo be abidadama tauna. Iakobo ena tubuna Aberahamo bona ena tamana Isako bamona, Iakobo ena abidadama dainai Baibel ese ia gwauraia namo. (Heberu 11:​8, 9, 13) Nega ta, Dirava ena hahenamo abia totona, ia be aneru ta ida idia heatu ela bona kahirakahira daba ia rere! (Genese 32:​24-​30) Unai ese ia hahedinaraia Iakobo ena hetura karana Iehova ida be ia goada. To, Iakobo ena lalometau amo dahaka ita dibaia? Ena be ta be Dirava ia abidadama henia, to ena lalokau tauna ia mase neganai, ia lalometau bona ia taitai diba. Vaia, iseda lalokau tauna ta ia mase neganai, ita lalometau.

Lalometau be Dahaka?

Taunimanima momo dekenai, mase ia vara neganai, idia lalometau bada. Leonardo  ena ekspiriens mani oi laloa, iena mauri lagani be 14 neganai ena tamana be kudou gorerena dainai ia mase. Leonardo be ena lalana amo ena tamana ena mase sivarai ia kamonai dinana ia laloaboio diba lasi. Matamanai, unai sivarai ia abia dae be auka. Tamana ena tauanina be fineral rumana ai ia itaia, to ia hamomokania lasi iena tamana be ia mase. Hua 6 lalodiai, Leonardo ia tai diba lasi. Nega momo, ia be ruma dekenai ena tamana ia naria noho, gaukara amo ia giroa mai totona. Kahirakahira lagani ta lalonai unai bamona ia karaia, ia laloparara lasi ena tamana be ia mase vadaeni. To ia laloparara neganai, ia mamia ia be sibona ia noho. Dina ta ta ai ruma dekenai ia lao bona ia itaia ena tamana ia noho lasi neganai, ia tai dikadika. Oibe, Leonardo ia lalometau bada, badina ena tamana ia reaia.

Leonardo ena sivarai amo ia hahedinaraia, ruma bese lalonai ta ia mase neganai, ita lalometau bada. Lalometau be ita hanaia diba, to do ia ore haraga lasi. Haheitalai ta be inai: Bema ta ena tauanina dekenai toto badana ta ia noho, unai toto be do ia ore haraga lasi. Unai hegeregerena, lalometau be hua ta eiava lagani haida eiava do ia noho sisina daudau murinai do ia ore. To nega ia hanaia lalonai, matamanai oi mamia hisihisina be do ia maragi ia lao, bona metairametaira mauri do oi moalelaia bona oi itaia mauri be mai ena anina.

Eda lalokau tauna ta ia mase dainai ita tai neganai, unai ese iseda lalometau do ia hamaragia bona eda noho dalana ia haidaua diba. Eda lalokau tauna be ia mase dainai, ita mamia ia do ita reaia momokani. To namona be ita hekwarahi mauri lalonai guna ita karaia hebou gaudia haida ita haidaua totona. Oi tai neganai, unai ese oi do ia durua emu lalometau oi hahedinaraia totona. Momokani, taunimanima edia tai daladia be idauidau. To, bema emu lalometau oi hahedinaraia lasi, unai ese emu laloa dalana, hemami, bona tauanina ia hadikaia diba. Edena dala ai emu lalometau oi hahedinaraia diba? Baibel ese heduru daladia haida ia gwauraia. *

Lalometau Hanaia Dalana

Lalometau taudia momo idia mamia, ma ta dekenai edia hemami idia herevalaia karana ese idia ia durua. Hegeregere, Baibel lalonai Iobu​​—⁠ena natuna ibounai 10 ia haboioa bona dika ma haida ia davaria tauna​​—⁠ena hereva mani oi laloa. Ia gwau: “Egu mauri ena namo lau laloa lasi, lau hesikulaia noho. Unai dainai egu maumau do lau gwauraia hedinarai noho. Egu lauma ena mamina ia dika dainai do lau maumau.” (Iobu 1:​2, 18, 19; 10:⁠1) Iobu be ena hemami ia “gwauraia hedinarai.”

 Paulo ena sinana ia mase neganai, ia gwau: “Lau ia durua gauna ta be, ma haida dekenai egu sinana lau herevalaia.” Unai dainai emu turana namona ta dekenai emu hemami oi herevalaia neganai, unai ese emu lalometau ia hamaragia diba. (Aonega Herevadia 17:17) Yone ena sinana ia mase murinai, ia be Keristani tadikaka taihu ia noidia ia dekenai idia vadivadi loulou totona. Ia gwau: “Haida dekenai egu hemami lau herevalaia neganai, unai ese egu lalometau ia hamaragia.” Reana oi danu be unai bamona, emu sivarai ia ura kamonai namonamo tauna dekenai emu hemami oi herevalaia neganai, unai ese oi ia durua emu lalometau oi hanaia totona.

Danu oi ia durua gauna ta be, oi laloa gaudia oi torea neganai, emu lalometau ia hamaragia diba. Haida dekenai be ia auka edia hemami idia herevalaia totona, unai dainai pepa dekenai idia torea. Saulo bona Ionatana idia mase murinai, abidadama tauna Davida ena lalohisihisi herevadia be ane dekenai ia torea. Unai lalohisihisi anena be Baibel bukana, Samuela Iharuana lalonai ia noho.​​—⁠2 Samuela 1:⁠17–​27.

Ma danu, oi tai neganai emu hemami do ia namo. Baibel ia gwau: “Inai tanobada dekenai idia vara gaudia ibounai be mai edia nega korikori, . . . taitai be mai ena nega.” (Hadibaia Tauna 3:​1, 4) Momokani, ita lalokau henia tauna ta ia mase neganai, unai be “taitai” negana. Namo lasi oi tai dainai oi hemarai. Baibel lalonai abidadama tau bona hahine momo edia sivarai idia noho, idia be idia tai danu. (Genese 23:2; 2 Samuela 1:​11, 12) Iesu Keriso be ena turana namona, Lasaro ena mase guria gabuna ia raka kahirakahira lao neganai, “ia tai.”​​—⁠Ioane 11:​33, 35.

Reana nega haida emu lalometau oi haheaukalaia be ia auka. To namona be oi laloatao, tai karana be hemarai gauna lasi. Dirava idia abidadama henia taudia momo idia mamia, idia lalometau neganai idia tai be namo bona unai ese edia hemami ia hanamoa.

 Dirava Kahirakahira Oi Lao

Baibel ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” (Iamesi 4:⁠8) Guriguri karana be dala ta Dirava kahirakahira ita lao totona. Bona unai ese oi do ia durua bada! Baibel ese inai gwauhamata namona ia gwauraia: “Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho.” (Salamo 34:18) Ma danu, ia gwau: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua.” (Salamo 55:22) Mani inai oi laloa: Guna ita herevalaia bamona, momo be idia davaria edia turana namona ta dekenai edia hemami idia herevalaia karana ese idia ia durua bada. To Dirava dekenai eda hemami ita herevalaia neganai, Ia gwauhamata ita do ia hagoadaia.​​—⁠2 Tesalonika 2:​16, 17.

Ita herevalaia vadaeni tauna, Paulo, ia gwau: “Bema lau lalometau bada bona lau mamia unai lau hanaia diba lasi, vadaeni lau tui diho bona Dirava lau guriguri henia. Dirava lau noia lau ia durua totona.” Paulo ia diba momokani, guriguri karana ese ia ia durua bada. Oi danu bema oi guriguri loulou, do oi mamia “durua ibounai ia  henia Diravana” ese oi do ia hagoadaia bona emu lalometau gaudia oi haheaukalaia diba.​​—⁠2 Korinto 1:​3, 4; Roma 12:⁠12.

Toreisi Lou Helarona

Iesu ia gwau: “Toreisi lou be lau inai, mauri danu be lau. Lau dekenai ia abidadama henia tauna, ia be do ia mase, to do ia mauri lou.” (Ioane 11:25) Baibel ia gwau mase taudia be do idia toreisi lou. * Iesu be tanobada dekenai ia noho neganai, ia hahedinaraia goevagoeva mase taudia ia hatorea isi lou diba. Nega ta, Iesu ese kekeni ta​​—⁠ena mauri lagani be 12​​—⁠ia hatorea isi lou. Ena tama sina be dahaka idia karaia? “Idia hoa dikadika.” (Mareko 5:​42) King Iesu Keriso be ena Basileia ena lohia henunai, mase taudia milioni momo do ia hatorea isi lou bona tanobada dekenai maino bona kara maoromaoro taudia ida do idia noho. (Kara 24:15; 2 Petero 3:​13) Mase taudia idia toreisi lou bona edia lalokau taudia ida do idia hedavari lou neganai, edia moale bada mani oi laloa!

Claudete ese ena natuna Renato​​—⁠peleini dekenai ia mase merona unai​​—⁠ena laulau be frisa ena iduara dekenai ia atoa. Nega momo unai laulau ia itaia bona ia gwau, ‘Toreisi lou neganai, do ita hedavari lou.’ Leonardo be ena lalona dekenai ena tamana ia itaia bamona, Dirava ena tanobada matamatana lalonai ia toreisi lou. Oibe, toreisi lou helarona ese idia bona edia lalokau taudia idia haboioa taudia edia lalona ia hagoadaia. Inai helaro namona ese oi do ia hagoadaia danu!

[Footnotes]

[Box/Picture on page 7]

“Durua Ibounai Ia Henia Diravana”

“Dirava, iseda Lohiabada Iesu Keriso ena Tamana ita hanamoa. Ia be iseda Tamana, bona bogahisihisi bona durua ibounai ia henia Diravana.”​​—⁠2 Korinto 1:⁠3.

Unai siri ese ia hahedinaraia, Dirava be ena kamonai hesiai taudia ia durua diba, hekwakwanai o lalohisihisi idia haheaukalaia totona. Iehova ese tomadiho tamona turana ta o varavara ta ia gaukaralaia diba, ta dekenai heduru ia henia totona.

Leonardo be ena tamana ia mase neganai ia vara gauna ta ia laloatao, unai ese ia ia durua bona hagoadaia. Ia be ruma dekenai ia ginidae bona ia itaia ta be ruma dekenai ia noho lasi neganai, ia tai dikadika. Bena ia lao park ta dekenai bona helai gauna ta ai ia helai, bona ia tai noho. Ia tai noho lalonai, Dirava dekenai heduru totona ia noinoi. Bena Leonardo be motuka ta ia itaia ia mai bona ia stopu, unai motuka ia taria tauna be iena Keristani tadikaka ta. Unai tadikaka be haida edia kohu ia abia lao edia ruma dekenai, to dala kerere ia abia dainai unai bamona ia heau mai bona Leonardo ia itaia. Tadikaka be Leonardo ida nega sisina ia noho, bona unai ese Leonardo ia hagoadaia.

Nega ta, dogae ta be sibona ia noho dainai ia lalohisihisi bada. Bona hanaihanai ia tai, badina ia itaia ena mauri lalonai gau ibounai be anina lasi. Heduru totona Dirava dekenai ia guriguri. Bona ia guriguri noho lalonai, telefon ia rini. Unai be iena tubuna kekeni ia rini. Unai dogae ia gwau: “Emai herevahereva kwadogina ese lau dekenai goada bada ia henia. Egu tubuna kekeni ese lau ia rini henia neganai, lau diba unai be egu guriguri ena haere.”

 [Box on page 9]

Ma Haida Ita Hagoadaia

“Aiemai hisihisi ibounai lalonai [Dirava] ese ai ia durua noho. Unai dainai hisihisi idia abia noho taudia be ai ese ai durua diba. Dirava ese ai dekenai ia henia durua, be ai ese ma ai henia noho idia dekenai.”​​—⁠2 Korinto 1:⁠4.

Keristani taudia korikoridia dekenai unai siri ena hereva ia guguru. Keristani ruma bese lalonai ta ia mase neganai, edia Keristani turadia ese idia hagoadaia, unai ese unai ruma bese ia durua ma haida idia hagoadaia totona.

Claudete ena sivarai mani oi laloa. Ia be hanaihanai ma haida dekenai Baibel ia herevalaia. Ia be hahine ta ia vadivadi henia bona unai hahine ena natuna mero be lukimia gorerena dainai ia mase. Unai hahine be Claudete ena vadivadi karana ia moalelaia, to ia mamia Claudete ese ia durua momokani lasi. To, Claudete ena natuna mero ia mase neganai, unai hahine be Claudete ia vadivadi henia bona ia gwau, emu natuna ia mase dainai, lau mai oi lau itaia bema oi be Dirava oi do abidadama henia noho. Unai hahine be Claudete ena abidadama dainai ia hoa, bona hari ia be Claudete ida Baibel ia stadilaia, bona unai stadi karana amo heduru bada ia abia.

Leonardo be ena tamana ia mase murinai, ia ura taia kudima taudia edia gado ia dibaia, unai amo idia dekenai Baibel ena hereva do ia hadibaia. Leonardo ia hekwarahi unai gado ia dibaia dainai, anina namona ia havaraia. Ia gwau: “Egu lalometau lau haheaukalaia totona, lau ia durua gauna ta be, taia kudima taudia dekenai Dirava ena sivarai lau harorolaia. Egu nega bona goada lau henia idia lau durua namonamo totona. Bona egu Baibel stiuden ginigunana ia bapatiso neganai, lau moale bada! Oibe, egu tamana ia mase negana amo ema bona hari, inai be egu nega ginigunana inai bamona moale mamina lau abia.”​​—⁠Kara 20:⁠35.

[Picture on page 5]

Emu hemami oi gwauraia hedinarai karana ese emu lalometau ia hamaragia diba

[Picture on page 6]

Pepa dekenai emu hemami oi torea neganai, unai ese oi ia durua diba

[Picture on page 6]

Toreisi lou sivaraidia duahia karana ese emu lalona ia hagoadaia diba

[Picture on page 8, 9]

Iesu ia gwauhamata ia idia abidadama henia taudia be do idia toreisi lou