Go Lebeletšana ka Katlego le go Hwelwa

“Barwa ba xaxwe [Jakobo] ka moka le barwedi ba xaxwe ka moka ba leka xo mo homotša; yêna a xana xo homotšwa a re: Aowa, ke tlo foloxêla kwa bo-dula-bahu xo morwa wa-ka kè lla. Tat’axwe a mo llêla a r’yalo.”—GENESI 37:35.

 MOPATRIAREKA Jakobo o ile a lla kudu ka baka la go hwa ga morwa wa gagwe. O be a ikemišeditše go lla go fihlela lehung. Go swana le Jakobo, o ka kwa eka bohloko bja go hwelwa ke moratiwa wa gago ke bjo bo tseneletšego kudu moo bo ka se tsogego bo fedile. Na go kwa bohloko kudu ka mokgwa woo go bontšha gore ga o na tumelo go Modimo? Ga go bjalo le gatee!

Beibele e hlalosa Jakobo e le monna wa tumelo. Yena le rakgolo wa gagwe Aborahama gotee le tatagwe, Isaka, Jakobo o retwa ka baka la tumelo ya gagwe e kgahlišago. (Baheberu 11:8, 9, 13) Tiragalong e nngwe, o ile a ba a lwa le morongwa bošego ka moka e le gore Modimo a mo šegofatše! (Genesi 32:24-30) Go molaleng gore Jakobo o be a e-na le tswalano e tiilego le Jehofa. Ka gona, re ka ithuta’ng ka go lla gabohloko ga Jakobo? Maikwelo a tseneletšego a go lla le go nyama ge moratiwa a e-hwa ga a sepedišane le taba ya go ba le tumelo e tiilego go Modimo. Go lla ke tsela e tlwaelegilego le ya tlhago yeo re arabelago ka yona ge re hwetšwe ke motho yo re mo ratago.

Go Lla Ke’ng?

Go lla go ka re kgoma ka ditsela tše di fapa-fapanego, eupša go ba bantši maikwelo a matla kudu ke bohloko bjo bo tseneletšego bja maikwelo. Ela hloko seo se diragaletšego Leonardo yo a bego a e-na le nywaga e 14 ge tatagwe a bolawa ke bolwetši bja pelo go sa letelwa. Leonardo a ka se tsoge a lebetše letšatši leo ka lona mmane’agwe a mmoditšego ditaba tšeo. Mathomong o ile a gana go dumela seo. O ile a bona setopo sa tatagwe polokong, eupša seo se bego se direga se be se bonala eka ga se sa kgonthe. Leonardo o ile a palelwa ke go lla ka dikgwedi tše ka bago tše tshela. Gantši o be a ikhwetša a letetše tatagwe gore a tle gae a e-tšwa mošomong. Go ile gwa mo tšea mo e ka bago ngwaga go kwešiša ka mo go feletšego gore tatagwe o hwile. Ka morago ga moo, o ile a ikwa a le noši. Dilo tšeo di tlwaelegilego—tše bjalo ka go tla gae ntlong yeo go se nago motho—di be di mo gopotša tatagwe yo a bego a se gona. Gantši dinakong tše bjalo o be a lla. Ruri o be a hlologela tatagwe!

Go etša ge seo se diragaletšego Leonardo se bontšha gabotse, go lla e ka ba mo go tseneletšego. Se se kgahlišago ke gore go a kgonega gore o fole. Lega go le bjalo, go ka tšea nako e itšego. Go etša ge ntho e šoro e ka tšea nako go fola, go bjalo le ka go hwelwa. Go fola bohlokong bja go hwelwa go ka tšea dikgwedi, nywaga e mmalwa goba gaešita le go feta moo. Eupša bohloko bjo bogolo bjo o bo kwago mathomong bo tla fokotšega ge nako e dutše e e-ya, gomme ganyenyane-ganyenyane bophelo bo tla bonagala bo kgahliša e bile bo e-na le morero.

Nakong ye, go lla go hlaloswa e le karolo yeo e nyakegago ya mogato wa go fola le go ithuta go tlwaelana le maemo a mafsa. Go bulegile sekgoba seo mathomong go bego go e-na le motho go sona. Re swanetše go tlwaelana le bophelo ka ntle le motho yoo. Go lla go ka go thuša gore o bontšhe maikwelo a gago. Ke therešo gore batho ga ba lle ka tsela e swanago tlwa. Lega go le bjalo, therešo ke gore: Go se lle go ka ba kotsi monaganong, maikwelong le mmeleng. Ka gona, re ka bontšha maikwelo a rena bjang ka ditsela tše di swanetšego? Beibele e na le keletšo e šomago. *

 Go Lebeletšana ka Katlego le go Hwelwa

Batho ba bantši bao ba hwetšwego ba hweditše gore go bolela maikwelo a bona go a ba imolla. Ka mohlala, ela hloko mantšu a moanegwa wa ka Beibeleng e lego Jobo, yo a ilego a lahlegelwa ke bana ka moka ba lesome gomme a kgotlelela dikotsi tše dingwe. O itše: “Moya wa-ka o tennwe ke bophelo bja-ka, ke tlo ineelela sello, ke tlo bolela go galakelwa ga moya wa ka.” (Jobo 1:2, 18, 19; 10:1, PK) Ela hloko gore Jobo o be a nyaka go “ineelela sello.” O be a tla dira seo bjang? O hlalositše gore “ke tlo bolela.”

Paulo, yo a hwetšwego ke mmagwe o re: “Se sengwe sa dilo tšeo di nthušitšego ke go bolela ka mma.” Ka gona, go bolela le mogwera yo a botegago ka maikwelo a gago go ka go tlišetša tekanyo e itšego ya kimologo. (Diema 17:17) Ka morago ga go hwelwa ke mmagwe, Yone o ile a kgopela bana babo ba Bakriste gore ba mo etele gantši. O gopola ka gore: “Go bolela go nthušitše go okobatša bohloko.” Le wena o ka hwetša gore go bolela maikwelo a gago le go a botša motheetši yo a nago le kwelobohloko go ka go thuša go lebeletšana le ona ka katlego.

Go ngwala le gona go ka go imolla. Ba bantši bao ba hwetšago go le thata go bolela maikwelo a bona ba ka hwetša go le bonolo go itlhalosa ka go ngwala. Ka morago ga lehu la Saulo le Jonathane, monna yo a botegago e lego Dafida o ile a ngwala kopelo ya go bontšha go nyama kudu yeo go yona a ilego a tšholla manyami a gagwe. Mafelelong, maikwelo a go nyama a ile a feleletša ka go ba karolo ya puku ya Beibele ya Samuele wa Bobedi.—2 Samuele 1:17-27.

Go lla le gona go ka thuša go re imolla maikwelong. Beibele e re: “Tšohle di na le mohla wa tšôna, le . . . xo lla xo na le mohla wa xôna.” (Mmoledi 3:1, 4) Ge e le gabotse, ge motho yo re mo ratago a e-hwa ‘ke nako ya go lla.’ Ga se ra swanela go lešwa dihlong ke megokgo ya manyami. Beibele e na le mehlala e mentši ya banna le basadi ba botegago bao ba ilego ba bonagatša manyami a bona phatlalatša ka go lla. (Genesi 23:2; 2 Samuele 1:11, 12) Jesu Kriste o ile “a ntšha megokgo” ge a batamela lebitla la mogwera wa gagwe wa paala e lego Latsaro, yo a bego a sa tšwa go hwa.—Johane 11:33, 35.

 Go lebeletšana le go nyama go tšea nako, ka gobane o ka ikwa eka o na le maikwelo a feto-fetogago. Gopola gore ga se wa swanela go lešwa dihlong ke mekgogo ya gago. Batho ba bantši bao ba botegago ba hweditše gore go lla ka baka la go nyama ke selo se se tlwaelegilego gomme ke karolo e nyakegago ya mogato wa go fola.

Batamela Kgaufsi le Modimo

Beibele e re botša gore: “Batamelang Modimo, gomme o tla le batamela.” (Jakobo 4:8) E nngwe ya ditsela tše dikgolo tša go batamela kgaufsi le Modimo ke thapelo. O se ke wa tšeela bohlokwa bja yona fase! Beibele e nea kholofetšo ye e homotšago: “Morêna ó kxaufsi le ba ’pelo di rôbexilexo; ó phološa meôya e kxobetsi.” (Psalme 34:18) Le gona e re kgonthišetša ka gore: “Lahlêla Morêna morwalô wa xaxo; Yêna ó tlo Xo babalêla.” (Psalme 55:22) Akanya ka seo. Bjalo ka ge re bone pejana, ba bantši ba hweditše e le mo go thušago go bolela le mogwera yo a botegago ka maikwelo a bona. Na e ka se be mo go thušago le go feta go tšhollela maikwelo a gago go Modimo yo a re holofetšago go homotša dipelo tša rena?—2 Bathesalonika 2:16, 17.

Paulo, yo go boletšwego ka yena pejana, o boletše gore: “Ge ke be ke se sa kgona go kgotlelela bohloko gomme ke kwa gore nka se kgone go lebeletšana le bjona, ke be ke khunama gomme ke rapela Modimo. Ke be ke mo kgopela gore a  nthuše.” Paulo o kgodišegile gore dithapelo tša gagwe di mo thušitše. Le wena o ka hwetša gore ka baka la go rapela ga gago ka go se kgaotše, “Modimo wa khomotšo yohle” o tla go nea sebete le matla a go kgotlelela.—2 Bakorinthe 1:3, 4; Baroma 12:12.

Kholofelo ya Tsogo

Jesu o itše: “Ke nna tsogo le bophelo. Yo a dumelago go nna, gaešita le ge a ka hwa, o tla phela.” (Johane 11:25) Beibele e ruta gore bahu ba tla phela gape. * Ge Jesu a be a le lefaseng, o ile a bontšha gore o kgona go tsoša bahu. Tiragalong e nngwe, o ile a tsoša ngwanenyana wa nywaga e 12. Batswadi ba ngwanenyana yoo ba ile ba arabela bjang? Ba ile “ba thaba wa go se kgone go itshwara.” (Mareka 5:42) Ka tlase ga pušo ya Mmušo wa gagwe, Kgoši ya legodimong e lego Jesu Kriste o tla tsošetša batho ba bantši bophelong mo lefaseng—eupša ka tlase ga maemo a khutšo le a go loka. (Ditiro 24:15; 2 Petro 3:13) Nagana ka lethabo le legolo leo le tlago go ba gona ge bahu ba tsošetšwa bophelong gomme ba kopanywa gape le baratiwa ba bona!

Claudete, yo a hwetšwego ke morwa kotsing ya sefofane, o bea seswantšho sa morwa wa gagwe e lego Renato setšidifatšing. O lebelela seswantšho seo gantši gomme a bolele a nnoši gore, ‘Re tla kopana gape nakong ya tsogo.’ Leonardo o bona tatagwe ka leihlo la kgopolo a tsošetšwa bophelong lefaseng le lefsa le le holofeditšwego la Modimo. Ee, kholofelo ya tsogo ke mothopo wa kgonthe wa khomotšo go bona le go ba bangwe ba bantši bao ba hwetšwego ke baratiwa ba bona. Le go wena e ka ba bjalo!

[Mengwalo ya tlase]

[Box/​Picture on page 7]

“Modimo wa Khomotšo Yohle”

“Go tumišwe Modimo le Tatago Morena wa rena Jesu Kriste, Tate wa dikgaugelo tše bonolo le Modimo wa khomotšo yohle.”—2 Bakorinthe 1:3.

Temana ye ya Beibele e bontšha gore Modimo a ka thuša bahlanka ba gagwe ba botegago go kgotlelela mathata le ge e le afe goba ditlhohlo tšeo ba ka lebeletšanago le tšona. Tsela e nngwe yeo Jehofa a ka neago khomotšo ka yona ke ka mogwera goba motho yo re mo ratago yo a nago le ditumelo tše di swanago le tša rena.

Leonardo, yo a hwetšwego ke tatagwe, o gopola seo se ilego sa mo nea matla le khomotšo. O be a sa tšwa go fihla gae gomme ge a gopola gore ga go na motho, o ile a thoma go lla wa go se laolege. O ile a ya phakeng ya kgaufsi gomme a dula pankeng moo a ilego a tšwela pele a lla. Ge a dutše a lla, o ile a kgopela Modimo gore a mo thuše. Gatee-tee, go ile gwa ema koloi kgaufsi le yena gomme Leonardo a lemoga gore mootledi wa yona e be e le yo mongwe wa bana babo wa Mokriste. Mokriste yo o be a lahlegile ge a be a išetša batho dithoto tša bona. Go fo ba gona ga gagwe moo go ile gwa homotša Leonardo.

Tiragalong e nngwe, mohlolo yo mongwe o be a ikwa a le noši e bile a gateletšegile kudu. O be a sa kgone go kgaotša go lla ka gobane selo se se sengwe le se sengwe se be se bonagala se sa holofetše. O ile a lopa Modimo gore a mo thuše. Ge a sa rapela, mogala o ile wa lla. E be e le setlogolo sa gagwe. O gopola gore: “Poledišano ya rena e kopana e be e lekane go nnea sebete gape. Ke ile ka gapeletšega go dumela gore go nteletša ga gagwe mogala e be e le karabo ya thapelo yeo ke e rapetšego ke kgopela thušo.”

 [Lepokisi go letlakala 9]

Go Homotša ba Bangwe

‘[Modimo] o re homotša ditlaišegong tša rena tšohle, e le gore re kgone go homotša bao ba lego ditlaišegong tša mohuta le ge e le ofe ka khomotšo yeo le rena re homotšwago ke Modimo ka yona.’—2 Bakorinthe 1:4.

Bakriste ba bantši ba therešo ba ile ba bona seo se bolelwago ke mantšu ao. Ka ge ba ile ba newa khomotšo ya go lebeletšana ka katlego le go hwelwa ke motho yo ba mo ratago, ba hwetša gore ba kgona go kgothatša le go homotša ba bangwe.

Ela hloko mohlala wa Claudete, yo ka mehla a etelago ba bangwe go yo boledišana le bona ka ditumelo tša gagwe tšeo di theilwego Beibeleng. Pele a hwelwa ke morwa, o be a dutše a etela mosadi yoo morwa wa gagwe a bego a bolailwe ke bolwetši bja leukemia. Mosadi yoo o be a thabela diketelo tše bjalo, eupša o be a nagana gore Claudete a ka se tsoge a kwešišitše bohloko bjoo a bo kwago ka mo go feletšego. Lega go le bjalo, go se go ye kae ka morago ga ge morwa wa Claudete a hwile, mosadi yoo o ile a mo etela gomme a mmotša gore o tlo bona ge e ba Claudete a sa dutše a e-na le tumelo go Modimo ka ge ga bjale morwa wa gagwe a hwile. Ka ge a kgahlilwe ke tumelo e tiilego ya Claudete, mosadi yoo o ithuta Beibele ka mehla le Claudete gomme o hwetša khomotšo go tšwa Lentšung la Modimo.

Ka morago ga gore Leonardo a hwelwe ke tatagwe, o ile a dira phetho ya go ithuta polelo ya diatla e le gore a ka boledišana le difoa ka molaetša o homotšago wa Beibele. O hweditše gore maiteko a gagwe a go thuša difoa a mo hotše kudu. O re: “Se sengwe sa dilo tšeo di nthušitšego go lebeletšana ka katlego le go nyama, ke kganyogo ya-ka ya go thuša difoa gore di ithute ka Modimo. Ke neetše nako e ntši le matla go di thuša. Manyami a-ka a ile a fetoga lethabo ge ke be ke bona seithuti sa-ka sa mathomo se kolobetšwa! Ge e le gabotse, ka lekga la pele ga e sa le tate a e-hwa, ke ile ka thaba kudu.”—Ditiro 20:35.

[Seswantšho go letlakala 5]

Go bolela ka maikwelo a gago go ka go tlišetša tekanyo e itšego ya kimologo

[Seswantšho go letlakala 6]

Go bala ka kholofelo ya tsogo e ka ba mothopo wa kgonthe wa khomotšo

[Seswantšho go letlakala 6]

Go ngwala go ka thuša go hlalosa manyami

[Seswantšho go letlakala 8, 9]

Jesu o holofeditše bao ba dumelago go yena gore ba tla tsošwa