Зианджын адӕймаджы цы бафидар кӕндзӕн?

«Йӕ фырттӕ ӕмӕ йӕ чызджытӕ се ’ппӕт дӕр цыдысты ӕмӕ йӕ сабыр кодтой, фӕлӕ сӕм уый нӕ хъуыста ӕмӕ дзырдта: „Ӕз мӕ хъӕбулмӕ ингӕнмӕ кӕугӕйӕ ныххиздзынӕн!“ Ӕмӕ афтӕ куыдта фыд йӕ фыртыл» (РАЙДИАН 37:35).

ХУЫЦАУЫ лӕггадгӕнӕг Иаков тынг маст кодта, афтӕ ӕнхъӕл куы уыди, ӕмӕ йӕ фырт амард. Искуы ма йӕ мидбылты дӕр бахуддзӕн, уый ныфс ӕй нал уыд. Кӕд дӕуыл дӕр зиан ӕрцыд, уӕд ды дӕр, чи зоны, хъуыды кӕныс, зӕгъгӕ, мӕ зӕрдӕйы рыст никуы банцайдзӕн. Цымӕ адӕймаг тынг кӕй маст кӕны, уый ууыл дзурӕг у, ӕмӕ Хуыцауыл йӕ ныфс нӕ дары? Афтӕ хъуыды кӕнын раст нӕу.

Библийӕ базонӕн ис, Иаков фидар уырнындзинады хицау кӕй уыд. Йӕ фыд Исахъ ӕмӕ йӕ фыдыфыд Авраамау ӕппӕт зӕрдӕйӕ ӕууӕндыд Хуыцауыл (Дзуттӕгтӕм 11:8, 9, 13). Цӕмӕй йын Хуыцау раарфӕ кодтаид, уый тыххӕй иухатт ӕнӕхъӕн ӕхсӕв зӕдимӕ хъӕбысӕй хӕцыд (Райдиан 32:24–30). Бӕрӕг у, Иаков Йегъовӕйы тынг кӕй уарзта. Иаков йӕ фыртыл кӕй хъыг кодта, уымӕй цӕуыл ахуыр кӕнӕм? Фидар уырнындзинад кӕмӕ ис, уыдон дӕр фӕмаст кӕнынц. Адӕймаг йӕ зианыл кӕй хъыг кӕны, уым ӕвзӕрӕй ӕмӕ худинагӕй ницы ис.

 Адӕймаг куыд фӕмаст кӕны?

Адӕм сӕ зианыл иухуызон нӕ фӕхъыг кӕнынц. Иуӕй-иутӕ тынг фӕмаст кӕнынц. Леонардойыл 14 азы куы цыди, уӕд ӕнӕнхъӕлӕджы йӕ фыд йӕ зӕрдӕйӕ амард. Леонардо никуы ферох кӕндзӕн, йӕ мады хо йын уыцы хабар куы загъта, уыцы бон. Фыццаг ын йӕ ныхӕстыл нӕ баууӕндыд. Зианы бон чырынмӕ куы каст, уӕд цыма фын уыдта, афтӕ йӕм каст. Ӕхсӕз мӕйы дӕргъы Леонардойӕн йӕ бон кӕуын дӕр нӕ уыд. Арӕх йӕ цӕстытыл уади, цыма ныртӕккӕ йӕ фыд куыстӕй ӕрбацӕудзӕн, ӕмӕ-иу ӕнхъӕлмӕ каст. Иу азы бӕрц куы рацыд, ӕрмӕстдӕр уӕд бамбӕрста, йӕ фыд кӕй амард, ӕмӕ йӕм уӕд афтӕ фӕкаст, цыма бынтондӕр иунӕгӕй баззад. Хӕдзармӕ-иу куы ’рбацыд, уӕд-иу йӕ зӕрдыл ӕрбалӕууыд, йӕ фыд кӕй нал ис. Ӕмӕ-иу уӕд йӕхи нал баурӕдта ӕмӕ-иу кӕуын райдыдта. Куыд тынг мысыд йӕ фыды!

Леонардойы хабарӕй бӕрӕг у, адӕймаг тынг кӕй фӕмаст кӕны. Фӕлӕ рӕстӕг куыд цӕуы, афтӕ адӕймагӕн фенцондӕр вӕййы. Цӕмӕй буары лыг байгас уа, уый тыххӕй рӕстӕг куыд хъӕуы, афтӕ ацы хъуыддаджы дӕр. Цӕмӕй адӕймагӕн фенцондӕр уа, уый тыххӕй хатт бахъӕуы мӕйтӕ, азтӕ кӕнӕ уымӕй фылдӕр. Рӕстӕг куыд цӕуы, афтӕ адӕймагӕн йӕ зӕрдӕйы рыст къаддӕрӕй къаддӕр кӕны ӕмӕ та йын цард раздӕрау ад кӕнын райдайы.

Афтӕ дзурынц, зӕгъгӕ, адӕймаг куы фӕмаст кӕны, уӕд ын фенцондӕр вӕййы ӕмӕ йӕ царды ног уавӕрты цӕрын фӕахуыр кӕны. Хъуамӕ сахуыр уа, чи йын амард ӕнӕ уыцы адӕймагӕй цӕрын. Адӕймаг йӕ тыппыртӕ куы суадзы, уӕд ын фенцондӕр вӕййы. Кӕй зӕгъын ӕй хъӕуы, иууылдӕр иухуызон нӕ фӕхъыг кӕнынц. Фӕлӕ иу хъуыддаг ис фидарӕй зӕгъӕн: адӕймаг йӕ зӕрдӕйы рыст куы не ’ргом кӕна, уӕд йе ’нӕниздзинадӕн стыр зиан ӕрхӕсдзӕн. Уӕдӕ цы саразӕн ис? Библийы ис хорз уынаффӕтӕ *.

Зианджын адӕймаджы цы бафидар кӕндзӕн?

Зиан кӕуыл ӕрцыд, уыдонӕй бирӕтӕ загътой, искӕимӕ кӕй ныхас кодтой, уый сын кӕй баххуыс кодта. Библийы фыст ӕрцыдысты, дӕс сывӕллоны кӕмӕн фӕмард ӕмӕ ӕндӕр стыр бӕллӕхтӕ кӕуыл ӕрцыд, ахӕм адӕймаджы ныхӕстӕ. Уыцы лӕг, Иов, загъта: «Мӕ цард ма цы у? Мӕхицӕн загътон: „Мӕ маст суадзон ӕмӕ мӕ зӕрдӕйы хъыгтӕ радзурон“» (Иов 1:2, 18, 19; 10:1). Иовы фӕндыд йӕ «маст суадзын». Куыд? Иов загъта: «Радзурон».

Йӕ мад кӕмӕн амард, уыцы нӕлгоймаг, Паулу, зӕгъгӕ, дзуры: «Мӕ мады  тыххӕй иннӕтимӕ кӕй ныхас кодтон, уый мын тынг баххуыс кодта». Дӕ зӕрдӕйы цы ис, уый дӕ хорз ӕмбалӕн куы дзурай, уӕд дын фенцондӕр уыдзӕн (Ӕмбисӕндтӕ 17:17). Иу сылгоймаг Йонэйӕн йӕ мад куы амард, уӕд ӕмбырдӕй ӕфсымӕртӕн загъта, цӕмӕй йӕм арӕхдӕр цыдаиккой. «Мӕ зӕрдӕйы рыст-иу сын куы раргом кодтон, уӕд-иу мын фенцондӕр»,– загъта Йонэ. Дӕуӕн дӕр, чи зоны, дӕ зӕрдӕйы рыст фӕсабырдӕр уа, чи дӕ бамбардзӕн, ахӕм адӕймагимӕ куы ныхас кӕнай, уӕд.

Адӕймагӕн ма фӕнцондӕр вӕййы, йе ’нкъарӕнты тыххӕй куы ныффыссы, уӕд. Йӕ зӕрдӕйы цы ис, ууыл ныхас кӕнын зын кӕмӕн у, уыдонӕн ӕнцондӕр вӕййы уый тыххӕй гӕххӕттыл ныффыссын. Саул ӕмӕ Ионафан куы фӕмард сты, уӕд Давид ныффыста, йӕ зӕрдӕйы хъыгтӕ кӕм райхӕлдта, ахӕм хъарӕг. Уыцы хъарӕг фӕстӕдӕр фыст ӕрцыд Библийы (2 Самуилы 1:17–27).

Адӕймаг куы фӕкӕуы, уӕд дӕр йӕ зӕрдӕйы рыст фӕрогдӕр вӕййы. «Алцӕмӕн дӕр ис йӕхи рӕстӕг... ис йӕхи рӕстӕг кӕуынӕн дӕр»,– фыст ис Библийы (Екклесиаст 3:1, 4). Кӕй зӕгъын ӕй хъӕуы, адӕймагыл зиан куы ’рцӕуы, уӕд уый у «рӕстӕг кӕуынӕн». Кӕуын худинаг нӕу. Библийы ис бакӕсӕн, зиан кӕуыл ӕрцыд ӕмӕ ӕргом чи хъыг кодта, бирӕ ахӕм нӕлгоймӕгты ӕмӕ сылгоймӕгты тыххӕй (Райдиан 23:2; 2 Самуилы 1:11, 12). Йесо Чырысти дӕр йе ’мбал Лазӕры зӕппадзмӕ куы бацыд, уӕд «йӕ цӕссыгтӕ ӕркалдысты» (Иоанны 11:33, 35).

Зианджыны фӕхъӕуы фӕразондзинад, уымӕн ӕмӕ йӕ зӕрдӕйы уаг ӕвиппайды ӕмӕ арӕх фӕивы. Кӕуынӕй ӕфсӕрмы кӕнын нӕ хъӕуы. Хуыцауы иузӕрдион лӕггадгӕнджытӕй бирӕтӕ дзурынц, зӕгъгӕ, кӕуын худинаг нӕу, уый фӕрцы адӕймагӕн фенцондӕр вӕййы.

 Хуыцаумӕ баввахс у

Библийы фыст ис: «Баввахс ут Хуыцаумӕ, ӕмӕ уӕм уый дӕр ӕрбаввахс уыдзӕн» (Иаковы 4:8). Уый тыххӕй та хъӕуы кувын. Куывдӕн стыр тых ис. «Йегъовӕ хӕстӕг у, зӕрдӕсаст чи у, уыдонмӕ, ӕмӕ, ныфссаст чи у, уыдоны ирвӕзын кӕны»,– дзуры Библи (Псалом 34:18). Стӕй ма нын зӕрдӕ ’вӕры: «Дӕ уаргъ Йегъовӕйыл сӕвӕр, ӕмӕ дын уый баххуыс кӕндзӕн» (Псалом 55:22). Ахъуыды-ма кӕнӕм ацы ныхӕстыл. Уӕлдӕр дзырдтам, адӕймагӕн кӕй фенцондӕр вӕййы, йӕ хорз ӕмбалимӕ куы фӕныхас кӕны, уӕд. Уӕдӕ йын цас фенцондӕр уыдзӕн, ӕххуысӕй йын ныфс чи ’вӕры, уыцы Хуыцауӕн йӕ зӕрдӕйы сагъӕстӕ куы дзура, уӕд?! (2 Фессалоникӕгтӕм 2:16, 17).

Цы Паулуйы кой кодтам, уый загъта: «Мӕ бон-иу куы нал уыд, уӕд-иу мӕ уӕрджытыл ӕрлӕууыдтӕн ӕмӕ-иу Хуыцауӕй ӕххуыс куырдтон». Паулу фидарӕй зӕгъы, куы-иу скуывта, уӕд-иу ын кӕй фенцондӕр. Нӕ «удӕнцойдӕттӕг Хуыцаумӕ» ды дӕр зӕрдиагӕй куы кувай, уӕд дӕуӕн дӕр баххуыс кӕндзӕн, ратдзӕн дын ныфс ӕмӕ дӕ бафидар  кӕндзӕн (2 Коринфӕгтӕм 1:3, 4; Ромӕгтӕм 12:12).

Мӕрдтӕ райгас уыдзысты

Йесо Чырысти загъта: «Ӕз дӕн райгасдзинад ӕмӕ цард. Мӕныл чи ’ууӕнды, уый куы амӕла, уӕддӕр райгас уыдзӕн» (Иоанны 11:25). Библийы фыст ис, чи амард, уыдон кӕй райгас уыдзысты *. Чырысти зӕххыл куы уыд, уӕд равдыста, йӕ бон кӕй уыд мӕрдты ӕгас кӕнын. Иухатт райгас кодта 12-аздзыд чызджы. Куы йӕ райгас кодта, уӕд йӕ ныййарджытӕ «фырцинӕй цы акодтаиккой, уый нал зыдтой» (Марчы 5:42). Уӕларвон Паддзах Йесо Чырысти фидӕны райгас кӕндзӕн бирӕ адӕмы, уӕд зӕххыл уыдзӕн сабыр ӕмӕ амондджын цард (Хъуыддӕгтӕ 24:15; 2 Петры 3:13). Дӕ цӕстытыл ма ауайын кӕн, мӕрдтӕ ӕгас кӕнын куы райдайой ӕмӕ сӕ хиуӕтты куы феной, уӕд не ’ппӕт дӕр куыд тынг цин кӕндзыстӕм!

Клаудети йӕ лӕппу Ренатойы къам сӕвӕрдта холодильникы сӕр (фыццаг статьяйы сӕ кой цыди). Арӕх ӕм фӕкӕсы ӕмӕ йӕхицӕн фӕдзуры: «Тагъд райгас уыдзынӕ ӕмӕ кӕрӕдзи фендзыстӕм». Леонардойӕн дӕр йӕ цӕстытыл фӕуайы, Хуыцауы ног дунейы йӕ фыдимӕ куыд фембӕлдзӕн, уый. Зиан кӕуыл ӕрцыд, уыцы адӕмӕн райгасдзинад у ӕцӕг ныфс. Ды дӕр хайджын у уыцы ныфсӕй!

[Фиппаинӕгтӕ]

[Рамкӕ/Ныв 7 фарсыл]

«Удӕнцойдӕттӕг Хуыцау»

«Табу нӕ Хицау Йесо Чырыстийы Хуыцау ӕмӕ Фыдӕн, тӕригъӕдгӕнаг Фыдӕн ӕмӕ удӕнцойдӕттӕг Хуыцауӕн» (2 Коринфӕгтӕм 1:3).

Ацы ныхӕстӕ ууыл дзурӕг сты, ӕмӕ Хуыцауӕн йӕ бон кӕй у йӕ лӕггадгӕнджытӕн баххуыс кӕнын, цыфӕнды зындзинӕдтыл ӕмӕ фӕлварӕнтыл ма сӕмбӕлой, уӕддӕр. Гӕнӕн ис, Йегъовӕ нын баххуыс кӕна не ’мбӕлттӕй кӕнӕ, нӕ хӕстӕджытӕй уырнӕг чи у, уыдоны фӕрцы.

Леонардойӕн йӕ зӕрдыл лӕууы, йӕ фыды зианы фӕстӕ йӕ иу хабар куыд бафидар кодта, уый. Иухатт хӕдзармӕ куы ’рбацыд ӕмӕ дзы куы никӕй баййӕфта, уӕд фӕкуыдта. Стӕй ацыд, сӕ фарсмӕ цы парк ис, уырдӕм, бандоныл ӕрбадт ӕмӕ та кӕуын райдыдта. Леонардо цӕссыгкалгӕйӕ Хуыцауӕй ӕххуыс куырдта. Уалынмӕ йӕ разы иу машинӕ баурӕдта – уый разынд ӕмбырдӕй иу ӕфсымӕр. Уыцы ӕфсымӕр дуканитӕм цыдӕртӕ фӕласы ӕмӕ, цӕмӕдӕр гӕсгӕ, ацы хатт ӕндӕр фӕндагыл рацыд. Леонардойӕн ӕрмӕст йӕ уындӕй дӕр фенцондӕр.

Ӕндӕр хабар та уыд ахӕм. Иу лӕгӕн йӕ ус амард ӕмӕ йӕхимӕ тынг ныхъхъуыста. Ӕппынӕдзух куыдта, ныфс ӕй ницӕмӕйуал уыд. Куывта Хуыцаумӕ, цӕмӕй йын баххуыс кодтаид. Куы куывта, уӕд ӕм йӕ чызджы чызг телефонӕй бадзырдта. Уыцы нӕлгоймаг дзуры: «Иугыццыл кӕй аныхас кодтам, уый фӕрцы та мӕхиуыл фӕхӕцыдтӕн. Афтӕ мӕм кӕсы, ӕмӕ мӕм телефонӕй кӕй ӕрбадзырдта, уый уыди Хуыцауы ’ххуыс».

 [Рамкӕ 9 фарсыл]

Иннӕтӕн ныфсы хос у

Хуыцау «нын удӕнцой дӕтты не ’ппӕт зындзинӕдты дӕр, цӕмӕй нын Хуыцау цы удӕнцой дӕтты, уымӕй махӕн дӕр нӕ бон уа иннӕтӕн цыфӕнды зындзинады дӕр удӕнцой дӕттын» (2 Коринфӕгтӕм 1:4).

Ацы ныхӕстӕ раст кӕй сты, уый Хуыцауы лӕггадгӕнджытӕ сӕхицӕй зонынц. Зианы рӕстӕг сӕ кӕй бафидар кодтой, уый фӕрцы сӕхи бон дӕр у иннӕтӕн ныфс дӕттын.

Клаудети арӕх фӕдзуры иннӕтӕн, Библийӕ цы базыдта, уый. Цалынмӕ йӕ лӕппу нӕ фӕмард, уӕдмӕ-иу цыди, йӕ фырт лейкемийӕйӕ кӕмӕн амард, уыцы сылгоймагмӕ. Уыцы сылгоймаг-иу Клаудетимӕ зӕрдиагӕй хъуыста, фӕлӕ йӕм афтӕ каст ӕмӕ йын йӕ рис никуы бамбардзӕн. Клаудетийӕн йӕ лӕппу куы амард, уӕд ӕм уыцы сылгоймаг ӕрбацыд ӕмӕ йӕ бафарста, ныр дӕр ма Хуыцауыл афтӕ ӕууӕнды ӕви нӕ. Уыцы сылгоймаг куы федта, Клаудети Хуыцауыл йӕ ныфс фидарӕй кӕй дары, уӕд ӕй бафӕндыд Библи ахуыр кӕнын ӕмӕ йын уый стыр удӕнцой хӕссы.

Леонардойы йӕ фыды зианы фӕстӕ бафӕндыд къухӕйамонгӕ ӕвзаг сахуыр кӕнын, цӕмӕй уыцы ӕвзагыл Библийӕ хорз хабар дзырдтаид. Ахӕм адӕмӕн кӕй ӕххуыс кодта, уый йӕхицӕн дӕр пайда уыд. Леонардо зӕгъы: «Хъусӕй чи нӕ хъусы, уыдонӕн Хуыцауы тыххӕй базонынӕн кӕй ӕххуыс кодтон, уый фӕрцы мын дзӕвгар фенцондӕр. Уыцы хъуыддагыл бирӕ рӕстӕг хардз кодтон ӕмӕ мӕхиуыл нӕ ауӕрстон. Библи фыццаг кӕимӕ ахуыр кодтон, уый донаргъуыд куы райста, уӕд мӕ маст цинӕй раивта. Мӕ фыды зианы фӕстӕ афтӕ никуыуал цин кодтон» (Хъуыддӕгтӕ 20:35).

[Ныв 5 фарсыл]

Дӕ зӕрдӕйы рыст искӕмӕн куы ’ргом кӕнай, уӕд дын фенцондӕр уыдзӕн

[Ныв 6 фарсыл]

Адӕймагӕн фенцондӕр вӕййы, йе ’нкъарӕнты тыххӕй куы ныффыссы, уӕд

[Ныв 6 фарсыл]

Райгасдзинады тыххӕй Библийы куы кӕсӕм, уӕд бафидар уыдзыстӕм

[Ныв 8 фарсыл]

Чырысти загъта, чи йыл ӕууӕнды, уыдоны кӕй райгас кӕндзӕн