“Sia Bakong Harayo sa Lambang Saro sa Sato”
Rumani sa Dios
“Sia Bakong Harayo sa Lambang Saro sa Sato”
KUN ikokomparar sa mahiwason na unibersong ini, talagang saditon an mga tawo. Tibaad iniisip nindo, ‘Posible daw talaga para sa ordinaryong mga tawo na magkaigwa nin dayupot na relasyon sa Dios na Makakamhan sa Gabos?’ Posible sana iyan kun gusto nin Dios, na an ngaran Jehova, na kita magin harani sa saiya. Gusto nia daw? An nakakarangang simbag manonompongan sa mapuersa asin malinaw na mga tataramon ni apostol Pablo sa mga may inadalan na tawo sa Atenas, arog kan nakasurat sa Gibo 17:24-27. Mangnohon an apat na bagay na sinabi ni Pablo manongod ki Jehova.
Enot, sinabi ni Pablo na an Dios an “naggibo kan kinaban asin kan gabos na yaon dian.” (Bersikulo 24) An kagayonan asin pagkalaenlaen kaya nakakaogmang marhay an buhay nagpapatotoo sa pagigin maginirumdom asin mamomoton kan satong Kaglalang. (Roma 1:20) Bakong rasonableng isipon na pipilion kan siring na Dios na magin harayo sa mga namomotan nia.
Ikaduwa, si Jehova “nagtatao sa gabos nin buhay asin hinangos patin gabos na bagay.” (Bersikulo 25) Si Jehova an Parasustenir sa buhay. (Salmo 36:9) An aire, tubig, asin pagkakan na kaipuhan na gayo sa buhay gabos balaog hale sa satong Kaglalang. (Santiago 1:17) Rasonable daw na maniwala na isusuway kan satong matinaong Dios an saiyang sadiri asin sa siring ipanguri sa sato an balaog na mamidbid kun siisay sia asin rumani sa saiya?
Ikatolo, “ginibo [nin Dios] hale sa sarong tawo an gabos na nasyon kan mga tawo.” (Bersikulo 26) Si Jehova daing ipinapaorog asin mayo nanggad nin biribid na paghusgar o ano man na klase nin daing binabasaran na pagkaanggot. (Gibo 10:34) Paano sia magigin bakong arog kaiyan? Linalang nia an “sarong tawo,” si Adan, na ginikanan kan gabos na nasyon asin rasa. “An kabotan [nin Dios] iyo na an gabos na klase nin tawo makaligtas.” (1 Timoteo 2:4) Kaya an oportunidad na rumani sa saiya bukas sa sato ano man an kolor kan satong kublit, an satong nasyonalidad, o rasang pinaghalean.
Ultimo, ipinahayag ni Pablo an sarong nakakapakosog sa boot na katotoohan: Si Jehova “bakong harayo sa lambang saro sa sato.” (Bersikulo 27) Minsan ngani mamurawayon, si Jehova pirmeng madaling dolokon para sa mga sinserong nagmamawot na magin harani sa saiya. Inaasegurar kita kan saiyang tataramon na sia bakong harayo kundi “harani sa gabos na nag-aarang sa saiya.”—Salmo 145:18.
Maliwanag sa mga tataramon ni Pablo na gusto nin Dios na magin harani kita sa saiya. Minsan siring, itinotogot ni Jehova an siring na pagigin harani sa saiya duman sana sa mga andam na “hanapon” asin ‘kapkapon sia kun baga,’ oyon sa paliwanag ni Pablo. (Bersikulo 27) An sarong reperensia para sa mga paratradusir kan Biblia nagsasabi na “an duwang berbong ini sinasabot na nagpapahayag magsalang nin posibilidad na puedeng makamtan . . . o nin kamawotan na puedeng makamtan.” Bilang ilustrasyon: Sa sarong madiklom alagad pamilyar na kuarto, tibaad kinakapkap nindo an swits kan ilaw o an pinto, pero aram nindo na iyan makukua nindo. Siring man, kun sinsero niatong hahanapon an Dios asin kakapkapon sia kun baga, makakasierto kita na an satong mga paghihingoa babalosan. Inaasegurar kita ni Pablo na ‘sia talagang makukua’ niato.—Bersikulo 27.
Hinihimuyawot daw nindo na magin harani sa Dios? Kun poponan nindong may pagtubod na ‘hanapon an Dios’ asin ‘kapkapon sia kun baga,’ dai masusudya an saindong linalaoman. Si Jehova bakong depisil na hanapon, huli ta “sia bakong harayo sa lambang saro sa sato.”