“Siya Dili Halayo Gikan sa Matag Usa Kanato”
Pakigsuod sa Diyos
“Siya Dili Halayo Gikan sa Matag Usa Kanato”
ANG tawo gamitoy lamang kaayo kon itandi sa hilabihan ka dako nga uniberso. Tingali ikaw nakapangutana, ‘Posible ba gayod nga masuod ang tawo sa Labing Gamhanang Diyos?’ Posible lamang kana kon buot sa Diyos, kansang ngalan maoy Jehova, nga kita masuod kaniya. Mao ba kana ang kabubut-on ni Jehova? Ang makapahupayng tubag niana makaplagan diha sa puwersadong mga pulong ni apostol Pablo ngadto sa edukadong mga tawo sa Atenas, nga narekord sa Buhat 17:24-27. Matikdi ang upat ka butang nga gihisgotan ni Pablo bahin kang Jehova.
Una, si Pablo miingon nga ang Diyos “naghimo sa kalibotan ug sa tanang butang diha niini.” (Bersikulo 24) Siya naglalang sa daghang matahom nga mga butang aron kita malipay. Kini nagpamatuod nga ang atong Magbubuhat mahunahunaon ug mahigugmaon. (Roma 1:20) Dili gayod makataronganon ang paghunahuna nga ang maong mahigugmaong Diyos maghikaw sa iyang kaugalingon kanato.
Ikaduha, si Jehova “naghatag ngadto sa tanang tawo ug kinabuhi ug gininhawa ug tanang butang.” (Bersikulo 25) Si Jehova mao ang Tigsustento sa kinabuhi. (Salmo 36:9) Ang hangin, tubig, ug pagkaon nga hinungdanon kaayo sa kinabuhi maoy mga gasa gikan sa atong Maglalalang. (Santiago 1:17) Makataronganon ba ang paghunahuna nga ang atong manggihatagong Diyos magpahilayo gikan kanato ug maghikaw kanato sa gasa sa pagkaila ug pagkasuod kaniya?
Ikatulo, “gihimo [sa Diyos] gikan sa usa ka tawo ang tanang nasod sa katawhan.” (Bersikulo 26) Si Jehova dili mapihigon ug wala gayoy pinalabi. (Buhat 10:34) Nganong makaingon man kita niana? Iyang gilalang ang “usa ka tawo,” si Adan, nga maoy gigikanan sa tanang nasod ug rasa. ‘Kabubut-on sa Diyos nga ang tanang matang sa mga tawo mangaluwas.’ (1 Timoteo 2:4) Busa kitang tanan adunay kahigayonan nga masuod kaniya bisag unsa pay atong kolor, nasyonalidad, o kagikan.
Ikaupat, gipahayag ni Pablo ang makapahupay pag-ayo nga kamatuoran: Si Jehova “dili halayo gikan sa matag usa kanato.” (Bersikulo 27) Bisan pag si Jehova halangdon kaayo, siya kanunayng andam nga modawat sa mga tawong naninguha gayod sa pagpakigsuod kaniya. Ang iyang Pulong nagpasalig kanato nga siya dili halayo kondili “haduol kanilang tanan nga nagatawag kaniya.”—Salmo 145:18.
Ang mga pulong ni Pablo tin-awng nagpakita nga buot sa Diyos nga kita masuod kaniya. Apan, siya makigsuod lamang niadtong andam “mangita” ug “mangapkap” kaniya, nag-ingon si Pablo. (Bersikulo 27) Ang usa ka reperensiya alang sa mga maghuhubad sa Bibliya nag-ingon nga ang “maong duha ka pulong pagasabton nga nagpahayag sa usa ka posibilidad . . . o sa usa ka butang nga mahimong mahitabo.” Sa pag-ilustrar: Sa usa ka kuwarto nga mangitngit apan pamilyar kanimo, tingali mangapkap ka sa swits sa suga o sa pultahan, apan ikaw segurado nga imo ra kining makaplagan. Sa ingon, kon kita sinserong mangita sa Diyos ug mangapkap kaniya, ingnon ta, kita makaseguro nga dili gayod mausik ang atong mga kahago. Kita “makakaplag gayod kaniya,” si Pablo nagpasalig kanato.—Bersikulo 27.
Gitinguha mo ba nga masuod sa Diyos? Kon pinaagi sa pagtuo ikaw “mangita sa Diyos” ug ‘mangapkap kaniya,’ dili ka gayod magmahay. Dili gayod lisod pangitaon si Jehova, tungod kay “siya dili halayo gikan sa matag usa kanato.”