“Indi Sia Malayo sa Tagsa sa Aton”
Mangin Suod sa Dios
“Indi Sia Malayo sa Tagsa sa Aton”
KON ipaanggid sa tuman ka sangkad nga uniberso, ang mga tawo tuman gid ka gamay kag mahuyang. Mahimo naghunahuna ka, ‘Posible gid ayhan nga mangin suod ang ahaw nga tawo sa Labing Gamhanan nga Dios?’ Posible lamang ina kon ang Dios, nga ang iya ngalan Jehova, luyag mangin suod sa aton. Luyag bala niya? Makapaumpaw ang sabat nga ginpamulong ni apostol Pablo sa edukado nga mga tawo sa Atenas nga narekord sa Binuhatan 17:24-27. Talupangda ang apat ka butang nga ginsambit ni Pablo tuhoy kay Jehova.
Una, nagsiling si Pablo nga ang Dios “naghimo sang kalibutan kag sang tanan nga butang sa sini.” (Bersikulo 24) Ang katahom kag pagkananuhaytuhay nga nagapahalipay sa kabuhi nagapamatuod sa pag-ulikid kag gugma sang aton Manunuga. (Roma 1:20) Kabuangan gid kon hunahunaon naton nga ini nga sahi sang Dios mabudlay palapitan sang iya mga ginahigugma.
Ikaduha, si Jehova “nagahatag sa tanan nga tawo sang kabuhi kag sang ginhawa kag sang tanan nga butang.” (Bersikulo 25) Si Jehova amo ang Manugsakdag sang kabuhi. (Salmo 36:9) Ang hangin, tubig, kag pagkaon nga importante gid sa kabuhi, tanan ini mga regalo gikan sa aton Manunuga. (Santiago 1:17) Nagakaigo bala maghinakop nga ang aton mahinatagon nga Dios mangin maiyaiyahon kag busa magadingot sang kahigayunan nga makilala sia kag mangin suod sa iya?
Ikatlo, “ginhimo [sang Dios] gikan sa isa ka tawo ang tagsa ka pungsod sang mga tawo.” (Bersikulo 26) Si Jehova wala sing pinilian kag wala sing ginapasulabi. (Binuhatan 10:34) Paano? Gintuga niya ang “isa ka tawo,” si Adan, nga sa iya naggikan ang tanan nga pungsod kag mga rasa. Ang kabubut-on sang Dios amo nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.” (1 Timoteo 2:4) Busa ang kahigayunan nga mangin suod sa iya bukas sa tanan bisan ano man ang ila pamanit, rasa, ukon etniko nga ginhalinan.
Sa katapusan, nagpabutyag si Pablo sing makapasalig nga kamatuoran: Si Jehova “indi sia malayo sa tagsa sa aton.” (Bersikulo 27) Bisan pa ginapakataas si Jehova, mahapos sia palapitan sang mga sinsero nga luyag mangin suod sa iya. Ang iya Pulong nagapasalig sa aton nga, indi sia malayo, apang “malapit sa tanan nga nagapanawag sa iya.”—Salmo 145:18.
Maathag sa mga pulong ni Pablo nga luyag sang Dios nga mangin suod kita sa iya. Apang, mangin suod lamang kita sa Dios kon handa kita nga “pangitaon” sia kag “nagapangapkap” pa gani agod makita sia, paathag ni Pablo. (Bersikulo 27) Ang isa ka reperensia para sa mga manugbadbad sang Biblia nagsiling nga ining “duha ka tinaga nagapakita nga posible matabo ang isa ka butang . . . ukon malambot ang isa ka handum.” Sa pag-ilustrar: Sa isa ka madulom apang pamilyar nga kuarto, mahimo nga nagapangapkap ka sang switch sang suga ukon sang puertahan, pero nakahibalo ka nga makita mo ini. Amo man sini kon sinsero kita nga nagapangita sa Dios, sigurado kita nga ang aton panikasog pagapadyaan. “Makita gid sia” naton, pasalig ni Pablo.—Bersikulo 27.
Luyag mo bala nga mangin suod sa Dios? Kon “pangitaon” mo gid ang Dios upod ang pagtuo, indi ka malugaw-an. Indi mabudlay pangitaon si Jehova, bangod “indi sia malayo sa tagsa sa aton.”
