‘Ilatsinnit kimilluunniit ungasinngilaq’
Guutimut palligunniarit
‘Ilatsinnit kimilluunniit ungasinngilaq’
INUIT nunarsuarmut avataarsuanullu angingaartumut naleqqiullugit suunngillat. Immaqa eqqarsaatiginikuuat uagut inuinnannguakkuluit Guuti ajugaqanngitsoq ilumut qanittumik attaveqarfigisinnaaneripput. Taamaattoqarsinnaavoq aatsaat Guutip, Jehovamik atillip, uagut imminut palligunnissarput kissaatigippagu. Tamanna kissaatigaa? Apeqqummut tamatumunnga akissut qiimmaallannartoq apustilip Paulusip angutinut ilisimatuunut Athenimiittunut oqaasiini Apustilit Suliaat 17:24-27-mi allassimasuni nanisinnaavarput. Maluginiariakkit Paulusip Jehova pillugu paasissutissiissutai sisamat.
Siullermik, Paulusi oqarpoq “Guuti silarsuarmik taassumaniittunillu tamanik pinngortitsisuusoq”. (Versi 24) Pinngortitarsuarmi alianaassuseq assigiinngisitaartoqarneralu inuunermik nuannersuutitsisartut Guutip asanninneranut isumatuneranullu uppernarsaataapput. (Romamiut 1:20) Sianiilliornerussaaq eqqarsassalluni Guuti asannittoq asasaminit ungasikkumassasoq.
Aappassaanik, Jehova tassaavoq “tamanut inuunermik anersaartornermillu allanillu tamanik tunisisartoq”. (Versi 25) Jehova inuunermik atatitsisuuvoq. (Tussiaat 36:10) Silaannaq, imeq, inuussutissallu — inuunermut pisariaqavissut — tamarmik Guutimit tunissutaapput. (Jaaku 1:17) Silatusaarnerussava isumaqassalluni Guuterput tukkusooq immikkoorniarumassasoq taamaalillunilu imminik ilisarisimannilernermik imminullu palligunnermik tunissummik tuninata?
Pingajussaanik, Guutip ‘inuiaat tamaasa inummit ataatsimit pinngortippai’. (Versi 26) Jehova kinaassusersiortuunngilluinnarpoq illuinnaasiortuunngilluinnarlunilu. (Apustilit Suliaat 10:34) Tamanna pissusissamisuuginnarpoq! Taassuma inuk siulleq, Adami, tamatta siuaasarput, pinngortippaa. Jehovap “piumasaraa inuit tamarmik [inuit tamalaat, NV] annaanneqassasut”. (1 Timotheusi 2:4) Taamaattumik tamatta — amitta qalipaataa, inuiaassuserput naggueqatigiissuserpullu apeqqutaanatik — Guutimut palligunnissamut periarfissaqarpugut.
Kiisalu, Paulusip uppernarsaavigaatigut Jehova ‘ilatsinnit kimilluunniit ungasinngitsoq’. (Versi 27) Jehovap angingaaraluarluni ilumoorlutik imminut palligukkusuttut tikilluaqqujuassavai. Oqaatsimini, Biibilimi, neriorsoqqissaarpaatigut uatsinnit ungasinnani ‘torlorfigisiminut tamanut qanilluni’. — Tussiaat 145:18.
Paulusip oqaasiini taakkunani erseqqippoq Guutip imminut palligunnissarput kissaatigigaa. Paulusilli oqarneratut, Guutip imminik ‘ujaasiumasut satsillutillu nanisiumasut’ kisiisa imminut qaninnermik immikkut pisinnaatitaaffilertarpai. (Versi 27) Biibilimik nutserisartunut qinerlerfissiami oqariartaaseq “ujaqqullugu satsillutik” pillugu allassimavoq oqariartaatsimi tassani pineqartoq ‘periarfissaq inornanngitsoq’ imaluunniit ‘kissaatigisaq piviusunngorsinnaasoq’. Assersuuteqariarta: Inimi taartumi, nalunngilluakkannili, immaqa matu qulliilluunniit ikittarfiat naniniarlugu satsiinnaq ingerlasariaqarputit, naninissaali qularutiginngilat. Taamatuttaaq qularutiginngilluinnarsinnaavarput Guuti ilumoorluta ujarutsigu satsillutalu naniniarsarigutsigu ilungersornivut pilluaqquneqassasut. Aap, Guuti ‘nanisinnaavarput’, soorlu Paulusip taama uppernarsaavigigaatigut. — Versi 27.
Guutimut qanittumik attaveqalerusuppit? Illit uppernikkut Guuti ujalerukku, ‘satsillutit naniniarsaralugu’, pakatsissanngilatit. Jehova naniuminaanngilaq ‘ilatsinnit kimilluunniit ungasinnginnami’. (wp08 07/01-E)