Hala Serka Dios

“E No Ta Leu di Kada Un di Nos”

Echonan 17:​24-27

TA BÈRDAT ku hende ta insignifikante kompará ku e universo inmenso. Kisas bo ta puntra bo mes, ‘Ta realmente posibel pa un hende gewon tin un relashon íntimo ku e Dios Todopoderoso?’ E relashon ei lo ta posibel solamente si Dios, kende su nòmber ta Yehova, ke pa nos hala serka dje. E ta deseá esei? Nos por haña e kontesta alentador den e palabranan elokuente ku apòstel Pablo a dirigí na e hòmbernan eduká di Atenas, ku ta pará skirbí na Echonan 17:​24-27. Tuma nota di kuater kos ku Pablo a menshoná tokante Yehova.

E promé kos ku Pablo a bisa ta ku Dios “a traha mundu i tur kos ku tin den dje.” (Versíkulo 24) E bunitesa i variedat ku ta hasi bida asina dushi ta duna prueba ku nos Kreador ta amoroso i bondadoso. (Romanonan 1:20) Lo ta apsurdo pa imaginá ku un Dios asina ta skohe pa ta leu for di esnan ku e ta stima.

Di dos, Yehova “ta duna tur hende bida i rosea i tur kos.” (Versíkulo 25) Yehova ta e Sostenedó di bida. (Salmo 36:9) Aire, awa i kuminda ta esensial pa bida i nan tur ta regalo di nos Kreador. (Santiago 1:17) Ta rasonabel pa kere ku nos generoso Dios lo isolá su mes i di e forma ei nenga di duna nos e regalo di haña sa ken e ta i di hala serka dje?

Di tres, “for di ún [“hende,” NW] El a traha tur nashon.” (Versíkulo 26) Yehova no ta hasi distinshon di persona ni e no tin ningun klase di prehuisio. (Echonan 10:34) Esei ta mas ku klaru, ya ku ta for di “ún hende,” Adam, Dios a krea tur nashon i rasa. Dios “ta deseá pa tur hende wòrdu salbá.” (1 Timoteo 2:4) Pues kaminda ta habrí pa nos hala serka dje sin importá nos koló, nashonalidat òf antesedente étniko.

Por último, Pablo a ekspresá un bèrdat masha animante: Yehova “no ta leu di kada un di nos.” (Versíkulo 27) Ounke Yehova ta sumamente elevá, tòg hende ku sinseramente ke hala serka dje por aserk’é na kualke momento. Su Palabra ta duna nos e siguransa ku e no ta leu, sino “serka di tur esnan ku ta sklama na dje.”​—Salmo 145:18.

Pablo su palabranan ta indiká bon kla ku Dios ke pa nos hala serka dje. Sinembargo, Pablo ta splika ku Dios ta permití hende hala serka dje solamente si nan ta dispuesto pa “buska” i ‘fula’ pa hañ’é. (Versíkulo 27) Un buki di konsulta pa traduktornan di Beibel ta bisa ku “ámbos verbo ta duna e idea di algu ku bo por logra hasi . . . òf un deseo ku bo por logra kumpli kuné.” Pa ilustrá: Den un kamber skur ku bo konosé bon, lo bo tin ku fula pa haña e porta òf e switch di lus, pero bo sa ku lo bo hañ’é. Asina tambe, si nos buska Dios sinseramente i fula pa hañ’é, nos por tin sigur ku nos esfuerso no ta enbano. Pablo ta sigurá nos ku nos lo “hañ’é.”​—Versíkulo 27.

Bo ta deseá di hala serka Dios? Si bo kuminsá “buska Dios” i ‘fula pa por hañ’é’ ku fe, lo bo no keda desepshoná. No ta difísil pa haña Yehova, pasobra “e no ta leu di kada un di nos.”