„A no de fara fu nowan fu wi”
Kon krosibei na Gado
„A no de fara fu nowan fu wi”
TE WI e luku hemel nanga ala den stari nanga den planeiti, dan wi e si taki libisma na noti. Kande yu e aksi yusrefi: ’A de so trutru taki libisma kan tron mati fu na Almakti Gado?’ A sani dati ben o man, soso te Gado, di nen Yehovah, ben o wani taki wi kon krosibei na en. A wani dati? Wi kan kisi piki tapu na aksi disi te wi e luku den moi sani di na apostel Paulus ben taigi den koniman na ini Ateine. Den wortu dati e gi wi trowstu trutru. Luku san a taki na ini Tori fu den Apostel 17:24-27. Na ini den vers dati, Paulus e taki fu fo sani di abi fu du nanga Yehovah.
A fosi sani di Paulus e taki, na taki Gado „meki grontapu nanga ala sani na en tapu” (Vers 24). Den someni difrenti moi sani di e gi wi prisiri na ini a libi e sori taki wi Mekiman abi a bun fu wi na prakseri èn taki a lobi wi (Romesma 1:20). A ben o de wan don sani fu denki taki so wan Gado no wani abi noti fu du nanga den sma di a lobi.
A di fu tu sani di Paulus e taki, na taki Yehovah „gi ala sma libi, a e meki den bro, èn a e gi den ala sani” (Vers 25). Yehovah na a Sma di e hori wi na libi (Psalm 36:9). A loktu, a watra, èn a nyanyan di wi abi so tranga fanowdu fu man tan na libi, na presenti fu wi Mekiman (Yakobus 1:17). Yu denki taki wi Gado di e gi wi ala sani no ben o wani abi noti fu du nanga wi? Yu denki taki a no ben o wani gi wi na okasi fu kon sabi en èn fu kon krosibei na en?
A di fu dri sani di Paulus taki, na taki „fu wán sma nomo [Gado] meki ala tra sma” (Vers 26). Yehovah lobi ala sortu sma (Tori fu den Apostel 10:34). Wi no kan fruwakti tra fasi fu en. Na en meki a „wán sma” dati di nen Adam, èn ala pipel nanga ras na bakapikin fu a man disi. Gado „wani taki ala sortu sma musu kisi frulusu” (1 Timoteyus 2:4). Sobun, wi alamala kan kon krosibei na en, awinsi sortu kloru wi skin abi, awinsi na ini sortu kondre wi e libi, noso awinsi fu sortu ras wi de.
Leki lasti, Paulus taki fu wan sani di de wan bigi trowstu gi wi. A taki dati Yehovah „no de fara fu nowan fu wi” (Vers 27). Aladi Yehovah hei moro ala sma, toku den wan di trutru wani kon krosibei na en, kan kon sabi en. En Wortu e gi wi a dyaranti taki a no de fara fu wi, ma taki a de „krosibei fu ala den wan di e kari en” (Psalm 145:18).
Den sani di Paulus skrifi e sori wi krin taki Gado wani taki wi musu kon krosibei na en. Ma soleki fa Paulus e sori, dan soso den wan di de klariklari fu „suku Gado fayafaya” e kisi na okasi fu kon krosibei na en (Vers 27). Wan buku di sma e gebroiki fu vertaal Bijbel, e taki dati „den wortu disi abi fu du nanga wan sani di wi man kisi, noso nanga wan winsi di man kon tru”. Fu eksempre: Kon meki wi taki dati yu de na ini wan dungru kamra di yu sabi bun. Kande yu e firifiri fu leti a faya, noso fu feni a doro. Ma yu de seiker taki yu o feni en. Na so a de tu taki te wi e suku Gado fayafaya, dan wi kan de seiker taki a sa blesi a muiti di wi e meki. Paulus e gi wi a dyaranti taki wi sa ’feni Gado trutru’.—Vers 27.
Yu e angri fu kon krosibei na Gado? Efu yu e bigin „suku Gado fayafaya” èn yu e bribi taki yu o feni en, dan yu o feni en trutru. A no muilek fu kon sabi Yehovah, fu di „a no de fara fu nowan fu wi”.