Modimo o Nkgaugetše

Bjalo ka ge go anega Bolfenk Moc̆nik

“Bjale tia matla.” A ke mantšu a matla ao mma a mpoditšego ona ka go akgofa ge a be a nkgokarela. Mašole a ile a re aroganya gomme tsheko ya thoma. Mafelelong kahlolo e ile ya tsebatšwa: nywaga e mehlano kgolegong. Mohlomongwe batho ba bantši ba ka ba ba ile ba nyamišwa ke seo. Lega go le bjalo, therešo ke gore nna ke ile ka ikwa ke e-na le khutšo e ntši ya monagano. Anke ke hlalose.

DITIRAGALO tšeo di hlalositšwego ka mo godimo di diragetše ka 1952 kua Slovenia. * Eupša ge e le gabotse taba ya-ka e thoma nywageng e fetago 20 pele ga moo, ka 1930. Ke nakong ya ge Barutwana ba Beibele, bjalo ka ge Dihlatse tša Jehofa di be di bitšwa bjalo ka nako yeo, ba be ba rulagantše ka lekga la mathomo gore sehlopha sa batho se kolobetšwe ka nako e tee nageng ya gešo. Batswadi ba-ka e lego Berta le Franz Moc̆nik, ba be ba le gare ga bao ba kolobeditšwego. Ka nako yeo ke be ke e-na le nywaga e tshela gomme kgaetšedi’a-ka e lego Majda o be a e-na le nywaga e mene. Legae la gešo leo le bego le le motseng wa Maribor, le be le dirišetšwa mediro ya Bokriste.

Adolf Hitler o ile a thoma go buša ka 1933 kua Jeremane gomme a thoma go tlaiša Dihlatse. Dihlatse tše dintši tša Majeremane di ile tša hudugela Yugoslavia go yo thuša ka modiro wa go bolela ka Beibele. Batswadi ba-ka ba be ba thabela gore batho ba bjalo ba botegago ba re etele. Moeng yo mongwe yo bjalo yoo ke mo gopolago gabotse e be e le Martin Poetzinger, yoo ka morago a ilego a fetša nywaga e senyane dikampeng tša tshwenyo tša Nazi. Nywaga e mentši ka morago, go tloga ka 1977 go fihlela lehung la gagwe ka 1988, o ile a hlankela bjalo ka setho sa Sehlopha se Bušago sa Dihlatse tša Jehofa.

Ge a be a re etetše, ka mehla Martin o be a robala malaong a-ka, mola nna le kgaetšedi’a-ka re be re robala le batswadi ba rena ka phapošing ya bona ya go robala. O be a e-na le encyclopedia e nyenyane ya mebala-bala yeo e ilego ya dira gore ke nagane kudu ge ke be ke sa le ngwana. Ke be ke rata go bala puku yeo.

Nako ya Diteko tše Šoro

Ka 1936, ge pušo ya Hitler e gola, batswadi ba-ka ba ile ba ya kopanong ya bohlokwa ya ditšhaba-tšhaba kua Lucerne, Switzerland. Ka ge tate a be a e-na le lentšu le bosana le lekoto, kopanong yeo o ile a kgethwa gore a gatiše dithero tša Beibele tšeo ka morago di ilego tša bapalelwa beng ba dintlo kua Slovenia. Nakwana ka morago ga kopano yeo e sa lebalegego, Dihlatse tša kua Yuropa di ile tša thoma go tlaišwa o šoro. Tše dintši di ile tša tlaišwa gomme tša hwela dikampeng tša tshwenyo tša Nazi.

Ka September 1939, Ntwa ya II ya Lefase e ile ya thoma gomme ka April 1941, mašole a Jeremane a ile a thoma go laola dikarolo tša Yugoslavia. Dikolo  tša Slovenia di ile tša tswalelwa. Re ile ra thibelwa go bolela leleme la rena phatlalatša. Ka ge Dihlatse tša Jehofa di sa tšee karolo dikgohlanong ka moka tša dipolitiki, di ile tša gana go tšea karolo dintweng. * Ka baka leo, bontši bja tšona bo ile bja golegwa gomme tše dingwe tša bolawa—go akaretša le lesogana leo le bitšwago Franc Drozg, leo ke bego ke le tseba gabotse. Mašole a Nazi ao a bego a bolaya bagolegwa ka go ba thuntšha, a be a bolaela batho mo e ka bago dimithara tše lekgolo go tloga gagešo. Ke sa dutše ke kgona go bona mma a thiba ditsebe tša gagwe ka lešela e le gore a se ke a kwa modumo wa dithunya. Mantšu a mafelelo ao Franc a a ngwadilego ka lengwalong la go laela mogwera wa gagwe ke a rego, “Ke tla go bona Mmušong wa Modimo.”

Tsela ya Bophelo Yeo ke Itsholelago Yona e le Ruri

Ka nako yeo ke be ke e-na le nywaga e 19. Gaešita le ge ke be ke kgahlwa ke Franc ka baka la go ema ga gagwe a tiile, ke be ke tšhogile. Na le nna ke be ke tla hwa? Tumelo ya-ka e be e fokola gomme ke be ke se na tswalano e botse le Jehofa Modimo. Ke moka, ke ile ka bitšwa gore ke tlo tsenela sešole. Poifo ya-ka e be e le matla go feta tumelo ya-ka, ka gona ke ile ka ya.

Ke ile ka romelwa moo mašole a bego a e-lwa le Russia. Go se go ye kae, ke ile ka bona mašole ao ke bego ke e-na le ona a e-hwa. Ntwa e be e boifiša e bile e le e sehlogo. Letswalo la-ka le be le dula le ntshwenya. Ke ile ka kgopela Jehofa gore a ntebalele le gore a nnee matla a go sepela tseleng e swanetšego. Ge sehlopha sa rena se hlaka-hlakana ka baka la tlhaselo e šoro, ke ile ka bona seo e le sebaka sa go ngwega.

Ke be ke tseba gore ge e ba nka swarwa, ke tla bolawa. Dikgweding tše šupa tše latelago, ke ile ka ikuta mafelong a fapa-fapanego. Ke ile ka ba ka kgona go romela Majda poskarata yeo e nago le mantšu a rego: “Ke tlogetše mothwadi wa-ka gomme ga bjale ke šomela yo mongwe.” Ke be ke e-ra gore ga bjale ke ikemišeditše go šomela Modimo, eupša go ile gwa ntšea nako e teletšana pele ke dira bjalo e le ka kgonthe.

Ka August 1945, dikgwedi tše tharo ka morago ga ge Jeremane e ineetše mašoleng a kopantšwego go tšwa dinageng tše dintši, ke ile ka kgona go boela Maribor. Seo se makatšago ke gore ka moka ga rena—tate, mma le kgaetšedi’a-ka—re be re phologile ntweng yeo e sehlogo. Lega go le bjalo, ka nako yeo Makomanisi a be a thomile go buša gomme a be a tlaiša Dihlatse tša Jehofa. Modiro wa go bolela ka Beibele o be o thibetšwe semmušo, eupša Dihlatse di ile tša šoma ka sephiring gomme tša tšwela pele ka modiro wa go bolela ka Beibele.

Ka February 1947, Dihlatse tše tharo tše botegago—Rudolf Kalle, Dus̆an Mikić le Edmund Stropnik—ba ile ba ahlolelwa lehu. Lega go le bjalo, ka morago kahlolelo yeo e ile ya fetošwa go ba nywaga e 20 kgolegong. Mekero ya ditaba e ile ya bolela kudu ka tiragalo ye gomme batho ba bantši ba ile ba tseba ka tshwaro e mpe ya Dihlatse tša Jehofa. Ka morago ga go bala dipego tša ditaba tšeo, ke ile ka itshola le go feta. Ke be ke tseba seo ke swanetšego go se dira.

Moya wa Modimo o a Mmatlafatša

Ke ile ka lemoga gabohloko gore ke swanetše go emela therešo ya Beibele, ka gona ke ile ka dira boiteko bjo bogolo bja gore ke dirišwe modirong wa rena wa ka sephiring wa go bolela ka Beibele. Ka baka la go ithuta Beibele ka mo go tseneletšego, moya wa Modimo o ile wa mmatlafatša e le gore ke kgaotše mekgwa e sa hlwekago e bjalo ka go kgoga.

 Ka 1951, ke ile ka kolobetšwa e le leswao la boineelo bja-ka go Modimo gomme ke ile ka thomološa tsela ya bophelo yeo ke bego ke e tlogetše mo e ka bago nywageng e lesome e fetilego. Mafelelong, ke ile ka thoma go bona Jehofa e le Tate wa kgonthe—yo a botegago le yo a nago le lerato le sa felego. Gaešita le ge ke ile ka dira diphetho tše sego bohlale ge ke be ke sa le yo mofsa, ke ile ka kgongwa ke kgonthišetšo ya Beibele ya gore Modimo o tla ntebalela. Bjalo ka Tate yo lerato, Modimo o ile a tšwela pele a nkgoga “ka lerala la leratô.”—Hosea 11:4.

Nakong yeo e thata, re be re swara diboka tša Bokriste ka sephiring magaeng a fapa-fapanego a Dihlatse gomme re be re dira modiro wa rena wa go bolela ka Beibele ka tsela e sa rulaganywago. Ke ile ka golegwa ka nako ya ka tlase ga ngwaga ke kolobeditšwe. Mma o ile a mpona ganyenyane pele tsheko e thoma. Bjalo ka ge go boletšwe mathomong a sehlogo se, o ile a nkgokarela ka matla gomme a mphegelela ka gore: “Bjale tia matla.” Ke ile ka dula ke išitše maswafo fase e bile ke tiile ka morago ga ge ke ahloletšwe nywaga e mehlano kgolegong.

Ke ile ka bewa ka seleng e nyenyane gotee le bagolegwa ba bangwe ba bararo, ka gona ke ile ka kgona go boledišana ka therešo ya Beibele le banna ba bao mohlomongwe ba ka bego ba sa ka ba e hwetša. Gaešita le ge ke be ke se na Beibele goba dikgatišo tšeo di theilwego Beibeleng, ke ile ka makatšwa ke gore ke be ke kgona go gopola mangwalo gotee le ditlhaloso tša ona go tšwa diiring tše dintši tšeo ke di feditšego ke ithuta Beibele. Ke be ke dula ke botša bagolegwa-gotee le nna gore ge e ba ke be ke swanetše go hlankela kgolegong ka nywaga e mehlano, Jehofa o be a tla nnea matla a go dira bjalo. Lega go le bjalo, a ka mpulela sebaka sa gore ke tšwe kgolegong pele ga nako. Ke be ke ipotša gore ge e ba a ka mpulela sebaka seo, ke mang yo a ka nthibelago?

Go Hlankela ka Tokologo e Nyenyane

Ka November 1953, mmušo o ile wa phumola ditatofatšo tša rena; Dihlatse tša Jehofa ka moka tšeo di bego di le kgolegong di ile tša lokollwa. Ka nako yeo ke ile ka kwa gore thibelo yeo e bego e beilwe modirong wa rena wa go bolela ka Beibele e be e tlošitšwe dikgweding tše pedi pele ga moo. Gatee-tee re ile ra thoma go rulaganya diphuthego lefsa gotee le modiro wa rena wa go bolela ka Beibele. Re ile ra hwetša lefelo la go swarela diboka lebatong la ka tlase la moago o lego bogareng bja motse wa Maribor. Re ile ra bea leswao lebotong, leo le bego le balega ka gore: “Dihlatse tša Jehofa—Phuthego ya Maribor.” Lethabo la go hlankela Jehofa ka bolokologi le ile la tlatša dipelo tša rena ka tebogo e kgolo.

Mathomong a 1961, ke ile ka thoma go hlankela ka nako e tletšego ke le modiredi yo a bitšwago mmulamadibogo. Dikgweding tše ka bago tshela ka morago, ke ile ka laletšwa gore ke tlo hlankela ofising ya lekala ya Dihlatse tša Jehofa kua Yugoslavia. E be e le Zagreb kua Croatia. Ka nako yeo, moago wa lekala e be e le phapoši e tee e nyenyane gomme go e na le bašomi ba bararo ba banna. Bakriste-gotee le rena bao ba bego ba dula kgaufsi ba be ba e-tla mosegare go tlo re thuša go gatiša makasine wa Morokami ka maleme a naga ya gešo.

Basadi ba Bakriste ba ba bego ba dula kgaufsi le bona ba be ba thuša modirong woo. Gare ga dilo tše dingwe, ba be ba rokelela matlakala a dimakasine. Ke be ke dira mešomo e fapa-fapanego, go akaretša go bala taba e fetoletšwego, go fetolela, go sepetša mangwalo le go ngwala dipego.

Kabelo e Mpsha

Ka 1964, ke ile ka abelwa go hlankela bjalo ka molebeledi wa mosepedi, e lego seo se bego se akaretša maeto a ka mehla a go etela diphuthego tše dintši tša Dihlatse bakeng sa go matlafatša tumelo ya tšona. Ke ile ka thabela modiro wo kudu. Gantši ke be ke sepela ka pese goba setimela go tloga phuthegong e nngwe go ya go e nngwe. E le gore ke fihlelele Dihlatse tšeo di bego di dula metsaneng, gantši ke be ke sepela ka paesekela goba ka maoto, ka dinako tše dingwe ke sepela lerageng leo le išago go fihla dikokoilaneng.

Ka dinako tše dingwe go be go direga dilo tšeo di bego di re segiša. Ka nako e nngwe, ngwanabo rena wa Mokriste o ile a nkiša phuthegong e nngwe ka karikana yeo e bego e gogwa ke pere. Ge karikana e be e e-ya godimo le fase tseleng ya lekgwara, leotwana le lengwe la yona le ile la tlemologa gomme la tšwa. Bobedi bja rena re ile ra wela fase. Ge re be re sa wetše fase, re lebeletše pere, e ile ya re lebelela mo o ka rego e maketše. Gaešita le ge go fetile nywaga e mentši, re sa dutše re sega taba yeo. Lerato leo le se nago boikaketši la bagwera bao ba rategago ba tikologong ya magaeng ke selo seo se thabišago seo ke tla dulago ke se tšeela godimo.

Motseng wa Novi Sad, ke ile ka tlwaelana le Marika, yo a bego a hlankela bjalo ka mmulamadibogo.  Ke ile ka kgahlišwa kudu ke go rata ga gagwe therešo ya Beibele le phišego ya gagwe bodireding moo ke ilego ka rata go mo nyala. Re ile ra thoma go hlankela diphuthego re le gotee modirong wa bosepedi nako e itšego ka morago ga ge re nyalane.

Lapa lešo le be le ile la lebeletšana le mathata a lona nakong ya thibelo. Tate o ile a pharwa ka molato wa maaka wa gore o be a dirišana le manaba nakong ya ntwa gomme a lahlegelwa ke mošomo wa gagwe. O ile a lwa ka nako e telele gore a bušetšwe mošomong eupša a se atlege gomme seo se ile sa mo nyamiša kudu. Tumelo ya gagwe e ile ya fokola ka nakwana eupša e ile ya matlafala pele a e-hwa. O be a hlankela ka mafolofolo phuthegong ya gabo ge a be a e-hwa ka 1984. Mma, yo a ikokobeditšego le yo a botegago, o be a hwile pele ga moo ka 1965. Majda o sa dutše a hlankela le phuthego ya Maribor.

Bodiredi bja Rena Kua Austria

Ka 1972, nna le Marika re ile ra amogela taletšo ya go yo bolela ka Beibele le bašomi ba bantši ba ba tšwago Yugoslavia bao ba hudugetšego Austria. Ge re fihla Vienna, e lego motse-mošate wa Austria, re be re sa nagane gore ye e be tla ba kabelo ya rena ya sa ruri. Ganyenyane-ganyenyane Austria ka moka go ile gwa thewa diphuthego le dihlopha tše difsa tšeo di bolelago maleme ao a bolelwago kua Yugoslavia.

Ge nako e dutše e e-ya, ke ile ka thoma go hlankela bjalo ka molebeledi wa mosepedi, ke etela diphuthego tšeo di oketšegago gotee le dihlopha nageng ka moka. Ka morago re ile ra laletšwa gore re etele Jeremane le Switzerland, moo le gona go bego go theilwe diphuthego tšeo di bolelago maleme a Yugoslavia. Ke ile ka kgona go thuša go rulaganya dikopano tše dintši tše dinyenyane le tše dikgolo dinageng tše.

Ka dinako tše dingwe, dikopanong tše bjalo tše dikgolo go be go e-tla ditho tša Sehlopha se Bušago gomme ke ile ka kgona go kopana le Martin Poetzinger gape. Re ile ra gopotšana ditiragalo tšeo di diregilego nywageng e ka bago 40 e fetilego ge a be a etela lapeng lešo kgafetša-kgafetša. Ke ile ka mmotšiša gore, “Na o sa gopola kamoo ke bego ke rata go bala encyclopedia ya gago e nyenyane ka gona?”

Ge a e-tšwa ka phapošing yeo re bego re le ka go yona o ile a araba ka gore: “Ema go se nene.” O ile a boa a swere puku yeo gomme a nnea yona. O itše: “E amogele e le mpho e tšwago go mogwera.” Puku yeo e sa dutše e le karolo ya bohlokwa ya bokgobapuku bja-ka.

Go Fokola Mmeleng—Eupša ke sa le Mafolofolo

Ka 1983, ke ile ka tsebišwa gore ke na le kankere. Nakwana ka morago ga moo ke ile ka botšwa gore ke tlo hwa. Ye e be e le nako e gateletšago, kudu-kudu go Marika, eupša ka baka la tlhokomelo ya gagwe e lerato le go thušwa ka tsela ya kgonthe ke bana bešo ba bantši ba Bakriste, ke sa dutše ke thabela bophelo bjo bo kgotsofatšago le bjo bo nago le morero.

Nna le Marika re sa dutše re tšwela pele ka bodiredi bja nako e tletšego Vienna. Ke fetša nako e ntši ke e-ya lekaleng mesong go yo dira modiro wa bofetoledi gomme Marika o swarega ka modiro wa go bolela le batho ka Beibele motseng. Go nthabiša kudu go bona gore sehlopha se senyenyane sa bašomi ba tšwago Yugoslavia bao ba hudugetšego Austria bao ba fetogilego Dihlatse se gotše go fihla go palo ya ka godimo ga 1 300. Nna le Marika re thabetše go thuša bontši bja bona go ithuta therešo ya Beibele.

Nywageng ya morago bjale, ke bile le kabelo e kgethegilego ya go tšea karolo mananeong a go neelwa ga meago ya diofisi tša makala dinageng tšeo e kilego ya ba karolo ya Yugoslavia—kua Croatia ka 1999 le kua Slovenia ka 2006. Ke be ke le yo mongwe wa Dihlatse tša kgale tšeo di ilego tša kgopelwa gore di laodiše kamoo modiro wa go bolela le batho ka Beibele o thomilego ka gona dinageng tše, mo e ka bago nywageng e 70 e fetilego.

Ruri Jehofa ke Tate yo lerato yo a ikemišeditšego go re lebalela diphošo tša rena ka mo go feletšego. Ruri ke leboga gore ga a latiše melato ya rena! (Psalme 130:3) O bile botho go nna gaešita le go nkgaugela e le ka kgonthe.

[Mengwalo ya tlase]

[Seswantšho go letlakala 27]

Go tloga ka go le letshadi go ya go le letona: Batswadi ba-ka e lego Berta le Franz Moc̆nik, Majda le nna re le kua Maribor, Slovenia ka bo-1940

[Seswantšho go letlakala 29]

Ke e-na le mosadi wa-ka Marika