“Oi Diba Lasi, Do Ia Tubu Namonamo O Lasi”!
“Oi Diba Lasi, Do Ia Tubu Namonamo O Lasi”!
“Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi.”—HAD. 11:6.
1. Dahaka dainai uhe idia tubu dalana be hoa gauna bona dahaka dainai ita manau?
BIRU tauna do ia haheauka be gau badana. (Iam. 5:7) Uhe ia hadoa murinai, do ia naria ela bona idia tubu. Bema medu ia diho, ia hadoa gaudia be idia tubu daekau bona rau idia atoa. Bena, idia bada bona huahua idia atoa. Nega sisina murinai, uma ena huahua be idia mage bona gogoa negana ia ginidae vadaeni. Uhe edia tubu dalana be hoa gauna! Ita ese ita naria bona ita dairia, to Dirava sibona ese unai uhe ia hatubua. Unai ita lalopararalaia neganai, ita manau.—1 Korinto 3:6 hahegeregerea.
2. Stadi ginigunana ai kamonai tauna be hahediba tauna ai do ia lao karana dekenai Iesu be dahaka point haida ia hahedinaraia?
2 Stadi ginigunana lalonai, Iesu ese Basileia harorolaia gaukarana be uhe hadoa gaukarana ida ia hahegeregerea. Tano idauidau ena parabole lalonai, Iesu ia hahedinaraia ena be uhe hadoa tauna ese uhe namodia ia hadoa, to tano namona dekenai idia moru gaudia sibona ese huahua idia atoa. Unai hegeregerena, sivarai namona idia kamonai taudia edia kudouna hegeregerena, sivarai namona ena uhe be do ia tubu bona huahua ia atoa eiava lasi. (Mar. 4:3-9) Uhe ia hadoa bena ia mahuta tauna ena parabole lalonai, Iesu ia hahedinaraia uhe hadoa tauna be uhe ia tubu dalana ia diba lasi. Badina unai uhe be taunimanima ese idia hatubua lasi, to Dirava ese ena siahu amo unai ia karaia. (Mar. 4:26-29) Mani hari ita ese Iesu ena parabole toi ita itaia—idia be mastadi uhena, paraoa hatubua muramurana bona reke edia parabole. *
Mastadi Uhena
3, 4. Mastadi uhena ena parabole ese dahaka ia laulaulaia?
3 Mareko karoa 4 dekenai mastadi uhena ena parabole ese point rua ia hahedinaraia: Ginigunana be Basileia ena sivarai ena tubu dalana, bona iharuana be unai sivarai idia abia dae taudia be Dirava ese ia gimaia. Iesu ia gwau: “Dirava ena Basileia be dahaka bamona? Edena parabole dekenai anina ita hedinaraia? Ia hegeregere mastadi au ena uhena bamona, tano dekenai hadoa neganai be ia maragimaragi, tanobada ena uhe idauidau edia bada ia be henunai. To idia hadoa, bona ia tubu neganai, ia bada herea, aniani ava ibounai edia bada ia hanaia, iena rigi danu be bada herea, bona ataiai manudia idia helai unuseni, iena keruma dekenai.”—Mar. 4:30-32.
4 Inai parabole ese “Dirava ena Basileia” ia tubu dalana ia laulaulaia—unai be Basileia ena sivarai be gabu ibounai dekenai idia harorolaia bona Pentekoste 33 C.E. amo Keristani kongrigeisen be ia bada ia lao ema bona hari. Oibe, mastadi uhena be maragi momokani bona gau maragina ta ia laulaulaia diba. (Luka 17:6 hahegeregerea.) To, gabeai ia tubu neganai, ena lata be mita 3.5 bamona bona ena rigi be idia goada bona au badana ta ai ia lao.—Mat. 13:31, 32.
5. Aposetolo edia negai, Keristani kongrigeisen be edena bamona ia bada ia lao?
5 Lagani 33 C.E. ai hahediba taudia 120 be lauma helaga ese ia horodia neganai, Keristani kongrigeisen maragina ia tubu matamaia. Nega kwadogi lalonai, kamonai taudia tausen momo idia vareai bona unai kongrigeisen maragina ia bada ia lao. (Kara 2:41; 4:4; 5:28; 6:7; 12:24; 19:20 duahia.) Lagani 30 lalonai Basileia harorolaia taudia edia namba be ia bada herea, unai dainai aposetolo Paulo ese Kolose kongrigeisen ia hamaoroa, sivarai namona be “tanobada ibounai dekenai ai harorolaia vadaeni.” (Kol. 1:23) Oibe, haroro taudia be idia hutuma idia lao!
6, 7. (a) Lagani 1914 amo ema bona hari, dahaka ia bada ia lao? (b) Vaira negana ai tanobada dekenai dahaka do ia vara?
6 Lagani 1914 ai guba dekenai Dirava ena Basileia ia gini negana amo, mastadi “auna” ena rigi idia tubu bona idia bada idia lao bamona. Dirava ena taunimanima ese Isaia ena peroveta herevana ena guguru idia itaia, ia gwau: “Ierusalema e, oiemu ladana maragi momokani tauna mai ena famili, be bese badana mai goadana danu do idia lao.” (Isa. 60:22) Guna, Basileia idia harorolaia horoa taudia edia orea maragina be idia diba lasi, lagani 2008 ai Iehova ena Witnes taudia 7 milioni bamona be tano 230 mai kahana lalonai haroro gaukara do idia karaia noho. Mastadi uhena ena parabole hegeregerena, Basileia harorolaia taudia be hutuma bada herea ai idia lao!
7 To, Basileia ena tubu dalana be unuseniai ia doko lasi. Gabeai, Dirava ena Basileia idia abia dae taudia sibona ese tanobada ibounai do idia noholaia. Basileia idia inai henia taudia ta be do ia noho lasi. Siahu Ibounai Lohiabadana, Iehova ese idia ibounai do ia hadikaia ore. (Daniela 2:34, 35 duahia.) Unai nega ai, ita ese Isaia ena peroveta herevana ma ta ena guguru do ita itaia, ia gwau: “Badina be tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.”—Isa. 11:9.
8. (a) Mastadi uhena ena parabole lalonai manu be daidia ia laulaulaia? (b) Hari inai negai, kongrigeisen ese dahaka gaudia amo ita ia gimaia?
8 Parabole hegeregerena, Iesu ia hahedinaraia ataiai manudia be Basileia ena keruma dekenai do idia helai. Tano idauidau ena parabole lalonai manu be Basileia ena inai taudia ia laulaulaidia, idia ese tano ai idia moru uhe idia ania ore. To, mastadi uhena ena parabole lalonai idia hedinarai manu be idau. (Mar. 4:4) Unai manu be kudou-maoro taudia ia laulaulaia, bona idia ura Keristani kongrigeisen ena gimaia henunai idia noho. Hari inai negai danu, Dirava tura henia karana idia hadikaia gaudia bona tanobada ena kara mirodia amo kongrigeisen ese kudou-maoro taudia ia gimaia noho. (Isaia 32:1, 2 hahegeregerea.) Peroveta herevana ta lalonai, Iehova ese Mesia ena Basileia be au ta bamona ia gwauraia: “Israela ena ororo ena ataiai do lau hadoa, iena rigina do idia tubu bona iena huahuana be do ia atoa, bona sida auna namo herea do lau halaoa. Vadaeni iena henunai be mauri gaudia idauidau do idia noho. Bona iena ikerukeru lalonai ataiai manu idauidau ese edia ruma do idia karaia.”—Ese. 17:23.
Paraoa Hatubua Muramurana
9, 10. (a) Paraoa hatubua muramurana ena parabole amo Iesu ese dahaka ia hahedinaraia? (b) Baibel lalonai nega momo hatubua muramurana be dahaka ia laulaulaia, bona edena henanadai do ita laloa?
9 Taunimanima be gau ta ia tubu dalana idia itaia diba lasi. Iesu ena parabole ma ta lalonai, unai point ia hahedinaraia. Ia gwau: “Guba Basileia be hatubua ena muramura bamona, hahine ta ese ia abia, paraoa momo, hegeregere disi toi danu ia mikisi karaia, ia lao bona inai muramura ese paraoa ibounai ia hatubua, ia bada vadaeni.” (Mat. 13:33) Unai hatubua muramurana be dahaka ia laulaulaia, bona Basileia ena tubu karana dekenai ena anina be dahaka?
10 Baibel lalonai nega momo hatubua muramura be kara dika ia laulaulaia. Aposetolo Paulo be Korinto kongrigeisen lalonai tau ta ena kara dika ese ma haida do ia hadikaia diba karana ia hahedinaraia totona, paraoa hatubua muramurana ia herevalaia. (1 Kor. 5:6-8) Vadaeni, Iesu be hatubua muramurana ia herevalaia neganai, ia be gau dikana ta ia gwauraia, a?
11. Gunaguna Israela taudia be edena dala ai hatubua muramurana idia gaukaralaia?
11 Namona be point toi do ita laloa guna bena gabeai unai henanadai do ita haerelaia. Gau ginigunana be, ena be nega haida Iehova ese Pasova ariana dekenai paraoa hatubua muramurana ia abia dae lasi, to nega ma haida ai paraoa mai edia hatubua muramura edia boubou gaudia ia abia dae. Israela tauna be Iehova ese ia henia hahenamo idauidau dainai Dirava ia tanikiu henia totona, gabua beredi mai ena hatubua muramura ia bouboulaia diba. Gabeai, idia bouboulaia gaudia be mai moale ida idia ania.—Lev. 7:11-15.
12. Baibel lalonai parabole idia torea daladia amo dahaka ita dibaia?
12 Gau iharuana be, nega haida Baibel ena parabole lalonai idia gaukaralaia gauna ta ese gau namona ia laulaulaia, to ma nega haida ia be gau dikana ia laulaulaia danu. Hegeregere, 1 Petero 5:8 ese Satani be laiona bamona ia gwauraia, badina unai ese ia hahedinaraia ia be dagedage bona mase ia havaraia diba. To, Apokalupo 5:5 ia gwau Iesu be laiona bamona—“Iuda iduhuna ena Laiona.” Unai ese hahemaoro mai ena gari lasi karana ia laulaulaia.
13. Kamonai tauna ena hetura karana Dirava ida ia goada ia lao be Keriso ese edena bamona ia hahedinaraia?
13 Gau ihatoina be, Iesu ena parabole lalonai ia gwau lasi hatubua muramurana ese paraoa ibounai ia hadikaia bena idia negea. Lasi. To, ia be vaia taunimanima ese paraoa idia karaia dalana ia hahedinaraia sibona. Ruma hahinena be paraoa lalonai hatubua muramura ia atoa bona paraoa ibounai ia bada. Hatubua muramura be paraoa ibounai lalonai ia mikisia, unai dainai ruma hahinena be hatubua muramurana ena gaukara dalana ia itaia diba lasi. Unai ita duahia neganai, uhe ia hadoa bena hanuaboi ia mahuta tauna ena parabole ita laloatao. Iesu ia gwau, “uhe hadoa gauna ia tubu bona ia vara, to hadoa tauna ia diba lasi edena bamona uhe ia tubu.” (Mar. 4:27) Unai amo Keriso ese kamonai tauna ena hetura karana Dirava ida ia goada ia lao karana ia hahedinaraia! Matamanai, ena kara ia haidaua bona ia goada be iseda matana amo ita itaia lasi, to gabeai ia hedinarai goevagoeva.
14. Hatubua muramura ese paraoa ibounai ia habadaia ena anina haroro gaukara dekenai be dahaka?
14 Unai parabole ese unai sibona ia hahedinaraia lasi, to inai point ma ta ia hahedinaraia danu: Tanobada hegegemadai kamonai taudia momo be Dirava idia tura henia noho. Parabole lalonai hatubua muramurana ese paraoa ena “disi toi” ia hatubua. (Luka 13:21) Paraoa hatubua muramura hegeregerena, haroro gaukarana dainai hahediba taudia edia namba be ia bada ia lao, bona hari idia ese Basileia ena sivarai namona be “tanobada ena kahana ibounai” dekenai idia harorolaia noho. (Kara 1:8; Mat. 24:14) Unai Basileia harorolaia gaukara badana lalonai ita vareai be hahenamo badana ta!
Reke
15, 16. (a) Reke ena parabole mani oi herevalaia. (b) Reke be dahaka ia laulaulaia, bona momo be hahediba taudia ai idia lao ena anina be dahaka?
15 Iesu Keriso ena hahediba taudia ai idia ura lao taudia idia momo be gau badana lasi, to anina bada gauna be idia be hahediba taudia momokani ai do idia lao eiava lasi. Iesu ese parabole ma ta ai unai point ia herevalaia. Unai be reke ena parabole. Ia gwau: “Guba Basileia be reke bamona, davara dekenai idia atoa, gwarume idauidau momo idia vareai.”—Mat. 13:47.
16 Gwarume idauidau ia veria reke ese Basileia harorolaia gaukarana ia laulaulaia. Iesu ia gwau: “Ia honu neganai, reke be kone dekenai idia veria lao, gwarume namodia idia haboua baketi dekenai, to gwarume dikadia idia negea. Tanobada dokona neganai be unai bamona. Aneru ese kara dika taudia bona kara maoromaoro taudia do idia hapararaia. Kara dika taudia be lahi badana dekenai do idia negea vareai, unuseni do idia tai, edia isena do idia koria auka masemase.”—Mat. 13:48-50.
17. Reke ena parabole lalonai idia karaia hapararaia gaukarana be edena nega ia herevalaia?
17 Unai hapararaia gaukarana be Iesu ese mai hairai ida do ia mai bona hahemaoro ginigabena ai mamoe bona nanigosi do ia hapararaia negana ia herevalaia, a? (Mat. 25:31-33) Lasi. Hahemaoro ginigabena be hisihisi badana negana ai do ia karaia. To, reke ena parabole lalonai gwarume hapararaia gaukarana be “tanobada dokona neganai” do ia vara. * Ita be hari unai nega lalonai ita noho bona inai nega dokona ai hisihisi badana do ia vara. Vadaeni, hari inai negai, hapararaia gaukarana be edena bamona ia vara?
18, 19. (a) Hari inai negai, edena dala ai hapararaia gaukarana idia karaia noho? (b) Kudou-maoro taudia be dahaka do idia karaia be namo? (Rau 21 dekenai futnout itaia.)
18 Hari inai negai reke ena parabole hegeregerena, gwarume ese idia laulaulaia taudia milioni momo be Iehova ena kongrigeisen lalonai idia vareai noho. Haida be Memorial dekenai idia mai, haida be hebou dekenai idia mai bona ma haida idia ura Baibel idia stadilaia. To, idia iboudiai be Keristani taudia momokanidia ai do idia lao, eiava? Idia ibounai be “kone dekenai idia veria lao,” to Iesu ia gwau “namodia” sibona be baketi lalonai idia haboua. Unai baketi be Keristani kongrigeisen idauidau ia laulaulaia. To, gwarume dikadia be idia negea, anina be kara dika taudia be gabeai lahi badana lalonai do idia negea vareai, anina be do idia mase hanaihanai.
19 Gwarume dikadia hegeregerena, haida be guna Iehova ena Witnes taudia danu Baibel idia stadilaia, to edia stadi idia hadokoa. Tama sina haida be Keristani taudia to edia natudia idia ura lasi Iesu murinai idia raka. Idia ura lasi Iehova idia hesiai henia, eiava haida be nega sisina lalonai Iehova idia hesiai henia to gabeai orea idia rakatania. * (Ese. 33:32, 33) To, mai anina bada gauna be inai: Hahemaoro dinana ginigabena ia do mai lasi neganai, namona be kudou-maoro taudia iboudiai be “baketi” o kongrigeisen lalonai do idia vareai bona unai roho mauri gabuna dekenai idia noho.
20, 21. (a) Iesu ena parabole toi amo dahaka gaudia ita dibaia? (b) Emu lalona oi hadaia dahaka oi karaia totona?
20 Vadaeni, Iesu ena parabole amo dahaka ita dibaia? Gau ginigunana be, mastadi uhena bamona, Basileia ena sivarai namona idia abia dae taudia edia namba be ia bada ia lao noho. Gau ta ese Iehova ena gaukara ia bada ia lao karana ia koua diba lasi! (Isa. 54:17) Ma danu, mastadi auna ena “keruma dekenai” idia helai taudia be Dirava ese Satani bona ena tanobada dikana amo ia gimadia. Gau iharuana be, Dirava ese Basileia ena gaukara ia habadaia noho. Hatubua muramurana be paraoa lalonai idia mikisia bona paraoa ia bada hegeregerena, ena be taunimanima edia matana amo idia itaia lasi to kamonai tauna ena hetura karana Dirava ida ia goada ia lao! Gau ihatoina be, hereva idia kamonai taudia iboudiai be hahediba taudia namodia ai do idia lao lasi. Haida be Iesu ena parabole lalonai ia gwauraia gwarume dikadia bamona.
21 To, ita moale badina Iehova ese kamonai taudia namodia momo ia veridia mai noho! (Ioa. 6:44) Unai dainai, tano momo lalonai Iehova ena taunimanima edia namba be ia bada ia lao. Unai ia vara dainai, namona be Iehova Dirava ita hanamoa. Unai ita itaia dainai, namona be ita ta ta ese inai hereva ita badinaia: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.”—Had. 11:6.
[Footnotes]
^ par. 2 Inai hereva ese guna June 15, 1992, ena Gima Kohorona, rau 17-22, bona October 1, 1975, The Watchtower, rau 589-608 ai idia hedinarai lalohadai gunana idia hamaoromaoroa.
^ par. 17 Ena be Mataio 13:39-43 ena parabole ese Basileia harorolaia gaukarana ena kahana ma ta ia herevalaia, to unai parabole bona reke ena parabole be nega tamona, “tanobada ena dokona” negana lalonai do idia guguru. Iesu ese ia gwauraia gwarume hapararaia gaukarana be hari idia karaia noho, bona unai hegeregerena hari danu uiti hadoa bona utua gaukarana idia karaia noho.—Gima Kohorona, October 15, 2000, rau 25-6; Dirava Momokani Tamona Tomadiho Henia, rau 178-181, paragraf 8-11.
^ par. 19 Anina be guna Baibel idia stadilaia to idia hadokoa, eiava Iehova ena taunimanima idia ura lasi bamoa taudia be aneru ese gwarume dikadia bamona idia negea vadaeni, a? Lasi! Bema ta be mai ena lalona ibounai ida Iehova dekenai ia giroa mai, Iehova ese unai tauna do ia abia dae.—Mal. 3:7.
Edena Bamona Do Oi Haere?
• Mastadi uhena ena parabole amo Basileia sivaraina harorolaia gaukarana ia bada dalana bona Iehova ena gimaia karana dekenai dahaka ita dibaia?
• Hatubua muramurana ese dahaka ia laulaulaia, bona Basileia ena gaukara ia bada ia lao karana dekenai dahaka point ia hahedinaraia?
• Reke ena parabole ese Basileia ena gaukara ia bada ia lao karana dekenai dahaka point ia hahedinaraia?
• Edena dala ai ita be ‘baketi dekenai idia haboua gwarume namodia’ huanai do ita noho?
[Study Questions]
[Pictures on page 18]
Mastadi uhena ena parabole amo Basileia sivarai harorolaia gaukarana ena bada dekenai dahaka ita dibaia?
[Picture on page 19]
Hatubua muramurana ena parabole amo dahaka ita dibaia?
[Picture on page 21]
Gwarume namodia be gwarume dikadia amo idia hapararaia karana ese dahaka ia laulaulaia?