I Hre Si Lo A Ṭhang Tur Chu!

“Zîngah i chi tuh la, tlaiah i kut sûm suh; i hre si lo, a ṭhang ṭha tûr khawii nge, hei hi nge, kha kha nge, an ṭha ve ve dâwn.”​—⁠THUR. 11:⁠6.

1. Engvângin nge thlai ṭhan dân hmuh chu thil mak tak leh engmah kan nih lohzia lantîrtu a nih?

LO NEITU chuan chhel taka a nghah a ngai a. (Jak. 5:⁠7) Chi a theh hnuah chuan, a ṭiah a, a ṭhan hun tûr a nghah a ngai a ni. Zawi zawiin, dinhmun a ṭhat hunah thlai chi chu lei châr tâwn khiin, a lo chhawr chhuak ṭan a, a lo puitling chho a ni. Tichuan, buh fang pum paitu thlaiah a lo ṭhang a. A tâwpah chuan, lo neitu chuan buh seng tûr chu a lo nei ta a ni. Chutianga thlai a ṭhan chhoh dân hmuh chu a va mak êm! A Ṭhantîrtu hriatna pawh chuan engmah kan nih lohzia a târ lang chiang hle. Buh chi chu kan enkawl thei a, tuiin kan châwm thei bawk. Mahse, Pathian chauhvin a ṭhantîr thei a ni.​—⁠1 Korinth 3:6 nên khaikhin rawh.

2. Thuziak hmasaa kan ngaihtuah tâk tehkhin thute aṭangin, thlarau lama ṭhan chhohna chungchâng Isua’n eng thu nge a zirtîr?

² Thuziak hmasain a târ lan tawh angin, Isua chuan Lalram thu hrilhna chu lo neituin a theh buh chi nên a khaikhin a. Lei chi hrang hrang chungchâng tehkhin thuah, Isua chuan lo neituin chi ṭha a theh chung pawhin, mite thinlung dinhmun chuan buh chi chu a ṭhan puitlin dâwn leh dâwn loh a hril tih a sawi uar a. (Mk. 4:​3-9) Buh chi thehtu muhîl chungchâng tehkhin thuah chuan, lo neituin buh chi ṭhan dân a hriat chian loh thu a sawi uar thung a ni. Chutianga a hriat loh chhan chu, buh chi ṭhan chhan chu mihringte thawh rim vâng ni lova, Pathian thiltihtheihna zâra thleng a nih vâng a ni. (Mk. 4:​26-29) Tûnah chuan Isua sawi tehkhin thu dang pathum i lo ngaihtuah ang u​—⁠anṭam chi fang, dawidim, leh lênkhang tehkhin thute chu. *

Anṭam Chi Fang Tehkhin Thu

3, 4. Anṭam chi fang tehkhin thu chuan Lalram thuchah chungchâng eng nge a târ lan?

³ Marka bung 4-a chhinchhiah tho anṭam chi fang tehkhin thu chuan thil pahnih a târ lang: a hmasain, Lalram thuchah a ṭhan chhoh chakzia mak tak; leh a pahnihnaah chuan, chu mi pawmtute hnêna vênhimna pêk chungchâng chu. Isua chuan: “Pathian ram chu engtin nge kan tehkhin ang? A nih loh leh, eng tehkhin thuin nge kan tehkhin ang? Anṭam chi fang khat leia an thehin, leia chi zawng zawng aiin tê ber mah sela, a theh hnuah erawh chuan a lo ṭiak a, thlai zawng zawng aiin a lo lian ta zâwk a, zâr lian tak takte a lo nei a, chutichuan chunglêng savate chu a bukah chuan an riak thei ṭhîn; chutiang chu a ni,” tiin.​—⁠Mk. 4:​30-32.

⁴ Hetah hian C.E. 33, Pentikost nî aṭanga Lalram thuchah a darh zau dân leh Kristian kohhran a ṭhan chhoh dânin a târ lan angin, “Pathian ram” ṭhan chhoh dân entîrna chu kan hmu a. Anṭam chi fang chu thil tê tak sawi nâna hman theih tûr thlai chi te tak tê a ni. (Luka 17:6 nên khaikhin rawh.) Mahse, anṭam kûng ṭhenkhat erawh chu feet 10 aṭanga feet 15 vêl laia sâng a ni thei a, a kûngpui chu mipa bân puam tiat lai leh a zârte pawh rinawm tak a  ni thei a; chuvângin thing ang tluka sawi theih a ni.​—⁠Mt. 13:​31, 32.

5. Kum zabi khatnaa Kristian kohhran chuan eng ang ṭhan chhohna nge a tawh?

⁵ Kristian kohhran ṭhan chhohna chu C.E. 33-a zirtîr 120 vêlte thlarau thianghlima hriak thih a nih khân a inṭan a. Rei rial lovin, zirtîrte awmna chu kohhran te tak tê chu ringtu sâng têlte awmna a lo ni ta thuai a ni. (Tirhkohte 2:41; 4:4; 5:28; 6:7; 12:24; 19:20 chhiar rawh.) Buh sengtute an pun chak êm avângin, kum sawmthum chhûngin tirhkoh Paula chuan Kolossa kohhrante hnênah chanchin ṭha chu “vân hnuaia thil siam zawng zawngte zînga tlângaupui” tawh angin a sawi thei a ni. (Kol. 1:23) Ṭhan chhohna ropui a va ni êm!

6, 7. (a) Kum 1914 aṭangin eng ang ṭhan chhohna nge lo awm? (b) Eng anga ṭhan chhohna nge lo la thleng dâwn?

⁶ Kum 1914-a vâna Pathian Ram din a nih aṭang khân, anṭam “thing” zârte chu beisei phâk bâkin a duah a. Pathian mite chuan Isaia chhinchhiah hrilh lâwkna thlen famkimna chu an hmu a ni: “Hnam tê ber pawh hnam ropui tak an ni ang a, hnam tlêmte pawh hnam chak tak an ni ang,” tih hi. (Is. 60:22) Kum zabi 20-na ṭantirha Lalram thu hrilhnaa tel hriak thih tlêm tête chuan kum 2008-ah chuan ram 230 chuangah Thuhretu maktaduai sarih dâwn laiin thu an hril ang tih an ngaihtuah pha hauh lo vang. Chu chu ṭhan chhohna mak tak, Isua sawi tehkhin thua anṭam chi fang ṭhan dân nêna tehkhin theih a va ni êm!

⁷ Mahse, ṭhan chhohna chu chutah chuan a tâwp mai em? Tâwp mai lo ve. Nakinah chuan leilunga chêng tawh phawtte chu Pathian Ram khua leh tuite an lo ni ang a. Dodâltute zawng zawng chu paih chhuah vek an ni ang. Hei hi mihringte ṭan lâkna vânga lo thleng tûr a ni lo va, lei chungthua Lal Chungnungber Jehova inrawlhna avânga lo thleng tûr a ni. (Daniela 2:​34, 35 chhiar rawh.) Chutih hunah chuan Isaia hrilh lâwkna dang thlen famkimna hnuhnûng ber chu kan hmu tawh ang: “Tuite hian tuifinriat a khuh reng angin, leilung hi LALPA hriatnain a khat zo vek dâwn a ni,” tih chu.​—⁠Is. 11:⁠9.

8. (a) Isua sawi tehkhin thua savate chuan tute nge an entîr? (b) Tûnah ngei pawh hian, eng laka vênhim nge kan nih?

⁸ Isua chuan chunglêng savate’n he Lalram hlima riah hmun an hmuh theih thu a sawi a. Hêng savate hi buh chi thehtu tehkhin thua savate anga chi ṭha ei tum Lalram hmêlhmate an ni lo. (Mk. 4:⁠4) He tehkhin thuah hian, savate chuan Kristian kohhran chhûnga inhumhimna zawng mi rilru ṭhate a entîr zâwk mah a ni. Tûnah ngei pawh hian, hêng mite hi thlarau lam chîn dân ṭha lote leh he khawvêl suaksual thiltih bawlhhlawhte laka vênhim an ni a. (Isaia 32:​1, 2 nên khaikhin rawh.) Chutiang bawkin Jehova chuan Messia Lalram chu thing nêna khaikhinin, heti hian a lo sawi lâwk a ni: “Israel sânna tlângah chuan ka phun ang a, zârte a rawn chhuah ang a, a lo rah ang a, Sidar ropui tak a ni ang: a hnuaiah chuan chunglêng sava chi tinrêng an chêng ang a, a zâr hlimah te chuan an awm ang,” tiin.​—⁠Ezek. 17:⁠23.

 Dawidim Tehkhin Thu

9, 10. (a) Isua chuan dawidim chungchâng tehkhin thu a sawiah eng thu nge a sawi uar? (b) Bible-ah dawidimin eng nge a entîr fo va, Isua’n tehkhin thua dawidim a hman dân chungchângah eng zawhna nge kan ngaihtuah ang?

⁹ Ṭhan chhohna chu mihring mita hmuh theih a ni ziah ṭhîn lo. A dawta Isua sawi tehkhin thu chuan chu chu a sawi uar a ni. Ani chuan: “Vân ram chu, dawidim hmeichhiain a lâka, chhangphut tehkhâwng thum zîngah a zaa a thawh vek thlenga a phûma ang chu a ni,” tiin a sawi. (Mt. 13:33) He dawidim hian eng nge a entîr a, Lalram ṭhan chhohna nên engtin nge a inkûngkaih?

¹⁰ Bible-ah chuan dawidim chu sual entîr nâna hman a ni fo va. Tirhkoh Paula chuan hmân lai Korinth khua kohhrana mi sualte thununna ṭha lo tak a sawinaah dawidim chu hetiang zâwng hian a lo hmang a ni. (1 Kor. 5:​6-8) Isua chuan tûnah pawh hian ṭhan chhohna ṭha lo sawi nân dawidim chu a hmang em?

11. Hmân lai Israel ramah engtin nge dawidim hman a nih?

¹¹ Chu zawhna chu kan chhân hmain, thil nihphung pathum kan hriat hmasak a ngai a ni. A hmasain, Jehova chuan Kalhlên Kût hun chhûngin dawidim hman chu khap mah se, hun dangah chuan dawidim tel thilhlante chu a pawm tho va. Dawidim chu lâwmthu sawina remna thilhlan inthawinaah chuan a tel a, chutah chuan a hlântu chuan Jehova malsâwmna tam takte chunga a lâwmna avângin, mahni duhthuin a hlân a ni. Chu thilhlante eina chuan a eitute chungah hlimna a thlen dâwn a ni.​—⁠Lev. 7:​11-15.

12. Bible-in entîrna ṭawngkam a hman dân aṭangin eng nge kan zir theih?

¹² A pahnihnaah, thil engemaw chu thil ṭha lo lam sawi nâna hman châng awm mah se, thil ṭha lam sawi nâna hman châng pawh a awm thei a ni. Entîr nân, 1 Petera 5:8 chuan Setana chu sakeibaknei nên a khaikhin a, a hlauhawmna leh a kawlhna entîr nâna hman a ni. Mahse, Thu Puan 5:​5-ah chuan Isua chu sakeibaknei​—⁠“sakeibaknei, Juda hnama mi”​—⁠anga sawi a ni thung. He mi ṭumah hian, sakeibaknei chu huaisenna leh dikna entîr nâna hman a ni.

13. Isua sawi dawidim tehkhin thu chuan thlarau lama ṭhan chhohna chungchâng eng nge a târ lan?

¹³ A pathumnaah, Isua chuan a tehkhin thu sawiah dawidimin chhangphut hlâwm chu hman theih loh tûrin a tichhe vek tih a sawi lo. Chhang siam dân phung pângngai a sawi mai zâwk a ni. Chhûngkaw nu ber chuan dawidim chu a chhang siam tûrah a telh a, chu chuan a tih ṭhat phah a ni. Dawidim chu chhangphut hlâwm zînga phûm a ni a. Chutiang chuan, dawidim avânga chhangphut hlâwm a thawh lai chu chhûngkaw nu ber chuan a hmu lo. Hei hian Isua tehkhin thua buh chi a theh hnua zâna muhîla chu min hriat chhuahtîr a ni. Ani chuan “a zia a hriat lohvin, lo ṭiakin [a] lo ṭhang” tih a sawi. (Mk. 4:27) Hmuh theih lohva thlarau lama ṭhan chhohna entîrtu tehkhin thu hriat thiam awlsam tak a va ni êm! A tîr chuan a ṭhan dân chu kan hmu lo mai thei, mahse, a tâwpah chuan a lo lang ta ṭhîn a ni.

14. Dawidimin chhangphut hlâwm a thawhtîr vekna tehkhin thu chuan thu hrilh rawngbâwlna pêng a eng ber nge a entîr?

¹⁴ He ṭhan chhohna hi mihring mita hmuh  theih loh mai a ni lo, chu chu khawvêl hmun tinah a thleng bawk a ni. Hei hi dawidim tehkhin thua sawi uar dang pakhat leh chu a ni. Dawidim chuan “chhangphut tehkhâwng thum” chu a titho vek a. (Lk. 13:21) Dawidim angin, thlarau lama ṭhan chhohna awmtîrtu thu hrilhna chuan Lalram chu “kâwlkil thleng pawhin” a darhzautîr tawh a ni. (Tirh. 1:8; Mt. 24:14) He mak taka darhzau zêl Lalram rawngbâwlnaa kan tel thei hi chanvo ropui a va ni êm!

Lênkhang

15, 16. (a) Lênkhang tehkhin thu chu tawifel takin sawi rawh. (b) Lênkhang chuan eng nge a entîr a, he tehkhin thu hian eng lama Lalram ṭhan chhohna nge a sihhmuh?

¹⁵ Isua Krista zirtîr nia inchhâlte tam lam ai chuan, zirtîrte’n mize ṭha an neih chu a pawimawh zâwk a. Isua chuan tehkhin thu dang, lênkhang chungchâng tehkhin thu a pêk khân, he mi lama Lalram ṭhan chhohna chungchâng a sihhmuh a ni. Ani chuan: “Tin, vân ram chu lênkhang, tuifinriata dena, chi tinrêng fûn khâwmna ang chu a ni leh pek a,” tiin a sawi.​—⁠Mt. 13:⁠47.

¹⁶ Lalram thu hrilhna entîrtu chu lênkhang chuan sangha chi tinrêng a fûn khâwm a ni. Isua chuan heti hian a sawi belh a ni: “Chu [lênkhang] chu a khah veleh a kamah an hnûk chhuak a; tin, an ṭhu a, a ṭha zawng chu bâwmah an la khâwm a, a chhia erawh chu an paih a. Khawvêl tâwp hunah [Grik ṭawnga syn·teʹlei·a tih a ni a, a awmzia chu “hun tâwp lam” tihna] chuan chutiang bawkin a awm ang; vântirhkohte chu an lo chhuak ang a, mi fel zing ata mi sualte chu an hlîr ang a, rawh tuina meiah chuan an paih ang; chutah chuan ṭah leh ha ṭhialna chu a awm ang,” tiin.​—⁠Mt. 13:​48-50.

17. Lênkhang tehkhin thua târ lan hlîrna chu eng huna thleng tûr nge?

¹⁷ He hlîrna hian Isua’n a ropuina nêna a lo kal huna lo thleng tûr nia a sawi kêl leh berâmte chunga rorêlna hnuhnûng ber chu a kâwk em? (Mt. 25:​31-33) Kâwk lo ve. Chu rorêlna hnuhnûng ber chu hrehawm nasa tak chhûnga Isua a lo kal huna thleng tûr a ni. Chu mi nêna inkalh takin, lênkhang tehkhin thua Isua sawi hlîrna chu ‘khawvêl hun tâwp lama’ thleng tûr a ni a. * Chu chu tûn hun hi a ni​—⁠hrehawm  nasa tak lo thlenna tûr hun chu. Chutiang a nih chuan, engtin nge chu hlîrna chu tûn hunah a thlen mêk?

18, 19. (a) Engtin nge hlîrna hna chu tûnah a thlen mêk? (b) Rilru ṭha pute’n eng nge an tih ngei ngai? (Footnote en bawk rawh.)

¹⁸ Tûn lai hunah hian tuifinriatin a entîr mihringte zînga entîr nei sangha maktaduai têlte chu Jehova kohhran lama hîpin an awm a ni. Ṭhenkhat chu Hriatrengna inkhâwmah an lo tel a, a dangte chu kan inkhâwmnaah an lo tel bawk a; a ṭhen lehte erawh chuan Bible zir an remti a ni. Mahse, hêng zawng zawngte hi Kristian dik an lo ni em? Anni chu ‘lui kama hnuh chhuah’ an ni mai thei; mahse, Isua chuan “a ṭha” te chauh chu bâwmin a entîr Kristian kohhrana lâk luh an nih thu min hrilh a ni. A chhia erawh chu paih an ni a, a tâwpah nakina tihboralna tûr entîrtu rawh tuina meiah chuan paih an ni.

¹⁹ Sangha chhiate angin, Jehova mite nêna tûn hmaa Bible zir tam takte chuan an zir chhun zawm tawh lo va. Kristian chhûngkuaa seilian ṭhenkhat chuan Isua hniak hnung chu an zui duh tak tak lo. Anni chuan Jehova rawngbâwl tûrin thu tlûkna an siam duh lo emaw, hun engemawti chhûng rawng an bâwl hnuah an bânsan leh mai emaw ṭhîn. * (Ezek. 33:​32, 33) Mahse, rorêlna hnuhnûng ber lo thlen hmaa rilru ṭha pu zawng zawngte chu bâwm anga sawi theih kohhran chhûnga lâk luha an awm leh hmun hima an awm chhun zawm zêl chu a pawimawh hle.

20, 21. (a) Ṭhan chhohna chungchânga Isua sawi tehkhin thu ennawnna aṭangin eng nge kan zir? (b) Eng nge tih i tum tlat?

²⁰ Ṭhan chhohna chungchânga Isua sawi tehkhin thute tawi têa ngaihtuahhona kan neih aṭangin eng nge kan zir theih le? A hmasain, anṭam chi fang a ṭhang chho angin, he leia Lalram thuchah ngaihsaktu an pung chak hle a ni. Jehova hna darh zau tûr chu engmahin a dang chat thei lo! (Is. 54:17) Chu bâkah, anṭam thing ‘buka riah tumte’ tân thlarau lam vênhimna pêk a ni bawk. A pahnihnaah chuan, Pathian chu ṭhantîrtu a ni a. Dawidim phûm chuan chhangphut hlâwm zawng zawng a fan chhuah angin, he ṭhan chhohna hi hmuh nghâl theih emaw, hriat nghâl theih emaw a ni lo; mahse, a ṭhang chho ngei a ni. A pathumnaah chuan, chanchin ṭha chhâng lêttu zawng zawngte chu sangha ṭha ang an ni kher lo. Ṭhenkhat chu Isua sawi tehkhin thua sangha chhia ang an ni.

²¹ Mahse, Jehova’n sangha ṭha tam takte a lama a hîp hmuh chu a va phûrawm tak êm! (Joh. 6:44) Chu chuan ram tinah a intahtawl zêlin punna mak tak mai a thlentîr a. Hêng punna zawng zawngte hian Jehova a chawimawi a ni. Hetiang punna kan mit ngeia kan hmuh avâng hian, kum zabi tam tak liam taa fuihna chhinchhiah: “Zîngah i chi tuh la, tlaiah i kut sûm suh; i hre si lo, a ṭhang ṭha tûr khawii nge, hei hi nge, kha kha nge, an ṭha ve ve dâwn,” tih thu chu zawm kan duh tûr a ni.​—⁠Thur. 11:⁠6. (w08 7/15)

[Footnote-te]

Engtin Nge Kan Chhân Ang?

• Isua sawi anṭam chi fang tehkhin thu chuan Lalram ṭhan chhohna leh thlarau lama vênhimna chungchâng eng nge min zirtîr?

• Isua sawi tehkhin thua dawidim chuan eng nge a entîr a, Lalram ṭhan chhohnaa eng thu dik nge Isua’n a sawi uar?

• Lênkhang tehkhin thu chuan Lalram ṭhan chhohna a eng ber nge a kawh?

• Engtin nge ‘bâwma lâk khâwmho’ zînga kan awm reng theih ang?

[Zirlai Atâna Zawhnate]

[Phêk 26-naa milemte]

Anṭam chi fang tehkhin thuin Lalram hmasâwnna chungchâng eng nge min zirtîr?

[Phêk 27-naa milem]

Dawidim tehkhin thu aṭangin eng nge kan zir?

[Phêk 28-naa milemte]

Sangha chhe zîng ata a ṭhate hlîrna chuan eng nge a entîr?