Diri Ka Maaram Kon Diin Ito Mauswag!
Diri Ka Maaram Kon Diin Ito Mauswag!
“Ha aga pagsabwag han imo liso ngan ha kulop ayaw hawiri an imo kamot; kay diri ka maaram kon hain an mauswag.”—EKLES. 11:6.
1. Kay ano nga nahipapausa ngan naaabat naton nga ubos kita kon nakikita naton an proseso han pagtubo?
AN PARAUMA kinahanglan mapailubon. (Jak. 5:7) Katapos niya isabwag an liso o binhi, kinahanglan maghulat hiya nga tumurok ngan tumubo ito. Kon maopay an panahon, hinay-hinay nga makikita an mga tumos nga nagawas ha tuna. Katapos, natubo ito ngan nagkakaada mga uhay. Pag-abot han panahon, mahimo na ito anihon han parauma. Urusahon gud nga makita an milagro han pagtubo! Naaabat liwat naton nga ubos kita kon nasasantop naton kon hin-o an nagpapatubo hito. Maaataman naton an liso. Mabibisibisan naton ito. Kondi an Dios la an makakapatubo hito.—Itanding ha 1 Korinto 3:6.
2. Ano an igintututdo ni Jesus mahitungod ha proseso han espirituwal nga pagtubo ha mga ilustrasyon nga ginhisgotan ha nauna nga artikulo?
2 Sugad han gin-unabi ha nauna nga artikulo, iginpariho ni Jesus an pagsangyaw han Ginhadian ha pagsabwag hin binhi. Ha ilustrasyon ni Jesus mahitungod ha magkalain-lain nga klase hin tuna, ginpabug-atan niya nga bisan kon maopay nga binhi an iginsabwag han parauma, nadepende ha kahimtang han kasingkasing han usa kon an binhi mag-uuswag ha pagkahamtong o diri. (Mar. 4:3-9) Ha iya ilustrasyon mahitungod han magsarabwag nga nakaturog, ginpabug-atan niya nga diri bug-os nga nasasabtan han parauma an proseso han pagtubo. Tungod ini kay an pagtubo nahitatabo pinaagi han gahum han Dios, diri pinaagi han pangalimbasog han tawo. (Mar. 4:26-29) Aton paghisgotan yana an tulo pa nga ilustrasyon ni Jesus—an liso han mustasa, an ipaturubo, ngan an pukot. a
An Ilustrasyon Mahitungod han Liso han Mustasa
3, 4. An ilustrasyon mahitungod han liso han mustasa nagpapatin-awhan ano nga punto may kalabotan ha mensahe han Ginhadian?
3 An ilustrasyon mahitungod han liso han mustasa nga mababasa liwat ha Markos kapitulo 4 nagpapatin-aw hin duha nga punto: siyahan, an daku nga pag-uswag han mensahe mahitungod han Ginhadian; ikaduha, an panalipod ha mga nakarawat hito. Hi Jesus nagsiring: “Igsusugad ta an Ginhadian han Dios hin ano? O ha ano ba nga pananglitan aton hiya igpapananglit? Ha usa nga liso han mustasa, nga kon isabwag ha tuna, amo an labi nga gutiay han ngatanan nga mga gahi, nga aada ha tuna; kondi kon hisabwag na, magtitinubo, ngan madaku pa ha ngatanan nga urutanon, ngan manananga hin duro kadagku, nga an mga katamsihan ha langit sadang makahapon ha ilarom han iya lambong.”—Mar. 4:30-32.
4 Iginhulagway dinhi an pag-uswag han “ginhadian han Dios” sugad nga ebidensya han pagsarang han mensahe han Ginhadian ngan pagtubo han Kristiano nga kongregasyon tikang han Pentekostes 33 K.P. An liso han mustasa gutiay nga binhi nga mahimo magsimbolo hin usa nga butang nga gutiay hinduro. (Itanding an Lukas 17:6.) Kondi, pag-abot han panahon mahimo humitaas ito hin 3 tubtob 5 metros ngan magkaada dagku nga sanga salit baga na ito hin kahoy.—Mat. 13:31, 32.
5. Ano nga pag-uswag an naeksperyensyahan han kongregasyon ha siyahan nga siglo?
5 An pagtubo han kongregasyon nagtikang ha gutiay nga paagi han 33 K.P., han mga 120 nga disipulo an gindihogan han baraan nga espiritu. Ha sulod la hin halipot nga panahon, inin gutiay nga kongregasyon nadugangan hin yinukot nga tumuroo. (Basaha an Buhat 2:41; 4:4; 5:28; 6:7; 12:24; 19:20.) Ha sulod hin trenta ka tuig, nagdamu gud an espirituwal nga mag-arani salit hi apostol Pablo nakagsiring ha kongregasyon ha Kolosas nga an maopay nga sumat “iginwali [na] ha ngatanan nga mga binuhat ha ilarom han langit.” (Kol. 1:23) Makatirigamnan gud ito nga pag-uswag!
6, 7. (a) Ano nga pag-uswag an nahitatabo tikang han 1914? (b) Ano pa nga pag-uswag an mahitatabo?
6 Tikang nga naestablisar an Ginhadian han Dios ha langit han 1914, an mga sanga han “kahoy” nga mustasa nag-uswag lahos pa han ginlalaoman. Nakita han katawohan han Dios an literal nga katumanan han igintagna ni Isaias: “An usa nga gutiayay mahihimo nga usa ka yukot, ngan an usa nga gutiay usa nga nasud nga makusog.” (Isa. 60:22) Waray mahanduraw han gutiay nga grupo han mga dinihogan nga nakikigbahin ha pagsangyaw temprano han ika-20 ka siglo nga ha tuig 2008, mga pito ka milyon nga Saksi an makikigbahin hini nga buruhaton ha sobra 230 nga katunaan. Urusahon gud ito nga pagtubo nga maipapariho ha liso han mustasa ha ilustrasyon ni Jesus!
7 Kondi tubtob la ba dida ito nga pagtubo? Diri. Maabot an panahon nga an ngatanan nga tawo ha tuna magigin sakop han Ginhadian han Dios. Hito nga panahon, napoo na an ngatanan nga nakontra. Matutuman ini diri pinaagi ha pangalimbasog han tawo kondi tungod han panhilabot han Soberano nga Ginoo nga hi Jehova ha mga buruhaton dinhi ha tuna. (Basaha an Daniel 2:34, 35.) Makikita naton hito nga panahon an ultimo nga katumanan han usa pa nga tagna ni Isaias: “An tuna mapupuno han hibaro ni Jehova, sugad nga an katubigan nagpupuno han dagat.”—Isa. 11:9.
8. (a) Hin-o an ginrirepresentaran han katamsihan ha ilustrasyon ni Jesus? (b) Bisan yana, napapanalipdan kita kontra ha ano?
8 Nagsiring hi Jesus nga an katamsihan ha langit nakabiling hin mahahapunan ilarom han lambong hini nga Ginhadian. Ini nga katamsihan diri nagrirepresentar ha mga kaaway han Ginhadian nga nanunuktok han mag-opay nga liso, sugad han mga tamsi ha ilustrasyon mahitungod han tawo nga nagsabwag hin binhi ha magkalain-lain nga klase hin tuna. (Mar. 4:4) Lugod, hini nga ilustrasyon, an katamsihan nagrirepresentar ha mga tangkod-an-kasingkasing nga namimiling hin panalipod ha sulod han kongregasyon. Bisan yana, napapanalipdan hira kontra han mga buhat nga nakakahugaw ha ira espirituwalidad ngan han maghugaw nga buhat hinin maraot nga kalibotan. (Itanding an Isaias 32:1, 2.) Sugad man, iginpariho ni Jehova an Mesianiko nga Ginhadian ha usa nga kahoy, ngan nagtagna: “Dida ha bukid han kahitas-an han Israel akon ini tatanmon; ngan ini manananga, ngan mabunga, ngan magigin maopay nga sedro: ngan ha tungod hini maukoy an ngatanan nga katamsihan ha tagsa-tagsa nga pako; ha landong han mga sanga hini, hira maukoy.”—Esek. 17:23.
An Ilustrasyon Mahitungod han Ipaturubo
9, 10. (a) Ano an ginpabug-atan ni Jesus ha ilustrasyon mahitungod han ipaturubo? (b) Ha Biblia, ano an agsob simbolohan han ipaturubo? Ngan ano nga pakiana mahitungod han paggamit ni Jesus han ipaturubo an aton paghihisgotan?
9 An pagtubo diri pirme aktuwal nga nakikita han tawo. Pinabug-atan ini han sunod nga ilustrasyon ni Jesus. Hiya nagsiring: “An ginhadian han langit sugad han ipaturubo nga kinuha han usa nga babaye ngan igsalakot niya ha tulo ka takos nga harina, tubtob han pagtubo han ngatanan.” (Mat. 13:33) Ano an ginrirepresentaran hini nga ipaturubo, ngan ano an kaparihoan hini ha pagtubo han Ginhadian?
10 Ha Biblia, an ipaturubo agsob nga nagsisimbolo ha sala. Ha sugad hito nga paagi gin-gamit ni apostol Pablo an ipaturubo han ginhihisgotan niya an nakakadaot nga impluwensya han usa nga makasasala ha kongregasyon han Korinto ha kadaan nga panahon. (1 Kor. 5:6-8) Ginagamit ba dinhi ni Jesus an ipaturubo ha pagsimbolo han pagtubo han diri maopay nga butang?
11. Paonan-o gin-gamit an ipaturubo ha Israel ha kadaan nga panahon?
11 Antes batunon ito nga pakiana, kinahanglan naton tigamnan an tulo nga importante nga impormasyon. Siyahan, bisan kon igindiri ni Jehova an ipaturubo durante ha pyesta han Paskua, ha iba nga higayon ginkarawat gud niya an mga halad nga may ipaturubo. Gin-gamit an ipaturubo ha mga halad nga gin-aarangbitan, ngan kinaburut-on nga iginpipresentar ito han naghahalad sugad nga pagpasalamat tungod han damu nga bendisyon ni Jehova. Makalilipay gud ini nga pangaon.—Leb. 7:11-15.
12. Ano an aton hibabaroan ha paagi han paggamit han Biblia hin mga simbolo?
12 Ikaduha, bisan kon an usa nga simbolo mahimo gamiton ha negatibo nga kahulogan ha usa nga kahimtang ha Kasuratan, ha lain nga kahimtang bangin positibo ito. Pananglitan, ha 1 Pedro 5:8, iginpariho hi Satanas ha usa nga leon basi ihulagway an iya kabangis ngan pagin peligroso. Kondi ha Pahayag 5:5, iginpariho hi Jesus ha leon—‘an Leon ha panon ni Juda.’ Ha kahimtang ni Jesus, an leon gin-gamit sugad nga simbolo han may kaisog nga hustisya.
13. Ano an iginpapatin-aw han ilustrasyon ni Jesus mahitungod han ipaturubo may kalabotan ha espirituwal nga pagtubo?
13 Ikatulo, ha ilustrasyon ni Jesus, waray hiya sumiring nga an ipaturubo nakadaot ha bug-os nga minasa nga harina, salit diri na ito magagamit. Ginhisgotan la niya an normal nga proseso han paghimo hin tinapay. Tinuyo nga iginbutang han babaye an ipaturubo, ngan maopay an resulta hito. An ipaturubo iginsalakot ha minasa nga harina. Salit, an proseso han pagtubo waray niya makita. Nagpapahinumdom ini ha aton han tawo nga nagsabwag hin binhi ngan nakaturog ha gab-i. Hi Jesus nagsiring nga “an gahi maturok, ngan magtitinubo, nga diri [han tawo] hibabaroan kon naoonan-o.” (Mar. 4:27) Simple gud ito nga paagi ha pag-ilustrar han diri nakikita nga proseso han espirituwal nga pagtubo! Ha tinikangan bangin diri naton makita an pagtubo, kondi ha paglabay han panahon nagtitikaklaro an mga resulta hito.
14. Ano nga bahin han pagsangyaw an ginsisimbolohan han ipaturubo nga nakapatubo han bug-os nga minasa?
14 Ini nga pagtubo diri la kay diri-nakikita han tawo kondi nahitatabo liwat ito ha bug-os nga tuna. Usa pa ini nga punto nga ginpapabug-atan ha ilustrasyon mahitungod han ipaturubo. Napapatubo hito an bug-os nga minasa, an ngatanan nga “tulo ka gantang” nga harina. (Luk. 13:21) Pariho ha ipaturubo, nag-uuswag an pagsangyaw han Ginhadian, tungod hito nagdadamu an disipulo tubtob nga an Ginhadian iginsasangyaw na yana “ha sidsid gud han kalibotan.” (Buh. 1:8; Mat. 24:14) Makalilipay gud nga pribilehiyo nga magin bahin hinin urusahon nga pag-uswag han buruhaton han Ginhadian!
An Pukot
15, 16. (a) Isumaryo an ilustrasyon mahitungod han pukot. (b) Ano an ginsisimbolohan han pukot, ngan ha ano nga bahin han pag-uswag han Ginhadian naghihisgot ini nga ilustrasyon?
15 An mas importante kay ha kadamu han mga nag-aangkon nga disipulo ni Jesu-Kristo amo an kalidad han ira pagin disipulo. Gin-unabi ni Jesus ini nga bahin han pag-uswag han Ginhadian han naghatag hiya hin usa pa nga ilustrasyon mahitungod han pukot. Hiya nagsiring: “An ginhadian han langit sugad hin usa nga pukot, nga ginladlad ha dagat, ngan nakadakop hin magkadirodilain nga mga isda.”—Mat. 13:47.
16 An pukot, nga nagsisimbolo han pagsangyaw han Ginhadian, nakakatirok hin magkadirodilain nga isda. Hi Jesus nagpadayon: “Han kapuno [han pukot], ira ginbutong ngadto ha baybay; ngan nagkalingkod, ngan gintirok nira an mga mag-opay ngadto ha mga surudlan, kondi an mga magraot ira iginkalabog. Amo man ito ha kataposan han kalibotan: an mga anghel magkakagawas, ngan ira paglalainon an mga magraot tikang ha mga magtadong, ngan ipanlalabog hira ngadto ha tap-ong han kalayo: didto may manunook ngan manngingigot nga mga ngipon.”—Mat. 13:48-50.
17. Durante ha ano nga panahon mahitatabo an pagbulag-bulag nga gin-unabi ha ilustrasyon mahitungod han pukot?
17 Ini ba nga pagbulag-bulag nagtutudlok ha ultimo nga paghukom ha mga karnero ngan kanding nga ginsiring ni Jesus nga mahitatabo kon hiya umabot na ha iya himaya? (Mat. 25:31-33) Diri. Ito nga ultimo nga paghukom mahitatabo ha pagkanhi ni Jesus durante han daku nga kagol-anan. Ha kabaliktaran, an pagbulag-bulag nga gin-unabi ha ilustrasyon mahitungod han pukot mahitatabo durante ha “kataposan han kalibotan.” b Nagtutudlok ini ha aton panahon yana—an panahon nga matatapos ha daku nga kagol-anan. Salit, paonan-o nahitatabo an pagbulag-bulag yana?
18, 19. (a) Paonan-o ginbubuhat yana an pagbulag-bulag? (b) Ano an sadang buhaton han mga tangkod an kasingkasing? (Kitaa liwat an footnote ha pahina 21.)
18 Literal nga minilyon han simboliko nga isda tikang ha dagat han katawohan an nadadani ha kongregasyon ni Jehova yana. An pipira natambong ha Memoryal, an iba natambong ha aton mga katirok, ngan an iba pa nakarawat hin pag-aram ha Biblia. Kondi hira ba ngatanan tinuod nga Kristiano? Bisan kon hira “ginbutong ngadto ha baybay,” nagsiring hi Jesus nga an “mag-opay” la an gintitirok ngada ha mga surudlan nga nagsisimbolo han Kristiano nga kongregasyon. Kondi, an magraot iginlalabog ngadto ha simboliko nga kalayo nga nagpapasabot hin kabungkagan ha tidaraon.
19 Sugad han magraot nga isda, damu han nag-aaram hadto han Biblia upod han katawohan ni Jehova an inundang na. May-ada mga anak hin Saksi nga diri gud tinuod nga naruruyag nga magin sumurunod ni Jesus. Diri hira disidido ha pag-alagad kan Jehova o kon mag-alagad man hira, paglabay hin pipira ka panahon naundang na. c (Esek. 33:32, 33) Kondi, kinahanglan gud nga maruyag an mga tangkod-an-kasingkasing nga tirukon hira ngada ha sugad-surudlan nga mga kongregasyon antes han ultimo nga adlaw han paghukom ngan magpabilin ha talwas nga lugar.
20, 21. (a) Ano an aton hinbaroan ha pagrepaso han ilustrasyon ni Jesus may kalabotan ha pagtubo? (b) Determinado ka nga buhaton an ano?
20 Salit, ano an aton hinbaroan tikang ha halipot nga pagrepaso han ilustrasyon ni Jesus mahitungod han pagtubo? Siyahan, pariho ha pagtubo han liso han mustasa, daku hinduro an pag-uswag han Ginhadian dinhi ha tuna. Waray gud makakapugong ha pag-uswag han buruhaton ni Jehova! (Isa. 54:17) Dugang pa, ginpapanalipdan ha espirituwal an mga naruruyag ‘paghapon ha ilarom han lambong han kahoy.’ Ikaduha, an Dios an nagpapatubo hito. Pariho ha ipaturubo nga iginsalakot ha bug-os nga minasa, ini nga pagtubo diri pirme aktuwal nga nakikita o nasasabtan. Kondi nahitatabo gud ito! Ikatulo, diri ngatanan nga nakarawat tinuod nga maopay. An pipira ha ira pariho ha magraot nga isda ha ilustrasyon ni Jesus.
21 Kondi, makapadasig gud makita nga damu hinduro nga mag-opay an gintitirok ni Jehova! (Juan 6:44) Nagriresulta ini hin makatirigamnan nga pag-uswag ha damu hinduro nga nasud. Hi Jehova nga Dios an angay kumarawat han ngatanan nga kadayawan tungod hini nga pag-uswag. Tungod kay nakikita naton ini, sadang naton sundon an sagdon nga iginsurat mga siglo na an naglabay: “Ha aga pagsabwag han imo liso, . . . kay diri ka maaram kon hain an mauswag, kon ini ba o adto, o kon hira ba nga duha magpapariho kamaopay.”—Ekles. 11:6.
[Mga footnote]
a An masunod nga mga impormasyon amo an bag-o nga pagsaysay ha ginhisgotan hadto ha The Watchtower han Hunyo 15, 1992, pahina 17-22, ngan Oktubre 1, 1975, pahina 589-608.
b Bisan kon an Mateo 13:39-43 naghihisgot hin iba nga bahin han buruhaton ha pagsangyaw han Ginhadian, an panahon han katumanan hito pariho ha katumanan han ilustrasyon mahitungod han pukot—durante han “kataposan han kalibotan.” An pagbulag-bulag han simboliko nga isda nagpapadayon, sugad la nga an pagsabwag ngan pag-ani nagpapadayon tubtob hini nga peryodo han panahon.—The Watchtower, Oktubre 15, 2000, pahina 25-26; Worship the Only True God, pahina 178-181, parapo 8-11.
c Nangangahulogan ba ini nga an ngatanan nga inundang ha pag-aram o pakig-upod ha katawohan ni Jehova iginlabog na han mga anghel tungod kay magraot hira? Diri! Kondi kon an usa sinsero nga bumalik kan Jehova, kakarawaton hiya.—Mal. 3:7.
Ano an Imo Baton?
• Ano an igintututdo ha aton han ilustrasyon ni Jesus mahitungod han liso han mustasa may kalabotan ha pag-uswag han Ginhadian ngan ha panalipod ha espirituwal?
• Ano an ginsisimbolohan han ilustrasyon ni Jesus mahitungod han ipaturubo, ngan ano an iginpapatin-aw hito may kalabotan ha pag-uswag han Ginhadian?
• Ano nga bahin han pag-uswag han Ginhadian an ginpapabug-atan ha ilustrasyon mahitungod han pukot?
• Paonan-o naton masisiguro nga nagpapabilin kita nga kaupod han mga ‘gintirok ngadto ha surudlan’?
[Mga Pakiana]
[Mga Retrato ha pahina 18]
Ano an igintututdo ha aton han ilustrasyon mahitungod han liso han mustasa may kalabotan ha pag-uswag han Ginhadian?
[Retrato ha pahina 19]
Ano an aton hibabaroan ha ilustrasyon mahitungod han ipaturubo?
[Retrato ha pahina 21]
Ano an iginhuhulagway han pagbulaga han mag-opay nga isda tikang ha magraot?