Dinako tše di Hlobaetšago Gona Bjale

BEIBELE e boletše e sa le pele gore batho ba be ba tla lebeletšana le “dinako tše di hlobaetšago tšeo go lego thata go lebeletšana le tšona.” E hlalosa dinako tše e le ‘mehla ya bofelo.’ (2 Timotheo 3:1-5; 2 Petro 3:3-7) Jesu Kriste o boletše ka mehla e swanago ge a be a araba potšišo yeo e botšišitšwego ke barutiwa ba gagwe mabapi le “bofelo bja tshepedišo ya dilo.” (Mateo 24:3) Na gabjale re phela mehleng ya bofelo? Bapiša seo Beibele e se boletšego e sa le pele le seo dipego tša morago bjale tšeo di tsopotšwego ka mo tlase di se bolelago gomme o itirele phetho.

Seo Beibele e se boletšego e sa le pele: dintwa tša lefase ka bophara​—Luka 21:10; Kutollo 6:4.

Seo dipego tša morago bjale di se bolelago: “Mahu ao a bakilwego ke dintwa lekgolong la bo-20 la nywaga a feta mahu ao a bilego gona nywaga-kgolong ka moka e fetilego ka makga a mararo, go tloga go belegweng ga Kriste.”​—Worldwatch Institute.

Seo Beibele e se boletšego e sa le pele: tlhaelelo ya dijo le malwetši​—Luka 21:11; Kutollo 6:5-8.

Seo dipego tša morago bjale di se bolelago: Ka 2004, batho bao ba balelwago go dimilione tše 863 ba be ba bolawa ke tlala, e lego koketšego ya batho ba dimilione tše šupa go feta ka 2003.​—United Nations Food and Agriculture Organization.

Mo e ka bago batho ba dimilione tše sekete ba dula mekhukhung; ba dimilione tše dikete tše 2,6 ga ba na tshepedišo ya go lahlwa ga ditšhila; ba dimilione tše dikete tše 1,1 ga ba na meetse a hlwekilego.​—Worldwatch Institute.

Bolwetši bja Malaria bo hlasela batho ba dimilione tše 500; ba dimilione tše 40 ba na le bolwetši bja HIV-AIDS; bolwetši bja mafahla bo bolaile batho ba dimilione tše 1,6 ka 2005.​—Mokgatlo wa Lefase wa tša Maphelo.

Seo Beibele e se boletšego e sa le pele: go senywa ga lefase​—Kutollo 11:18.

Seo dipego tša morago bjale di se bolelago: “Dilo tšeo batho ba di dirago di dirile gore lefase le fihle bokgoleng bjoo go nago le kgonagalo ya gore mehuta e mengwe e mentši ya diphedi le  dimela e fedišwe ka mo go feletšego.” “Go hweditšwe gore mo e ka bago pedi-tharong ya ditirelo tšeo tlhago e re neago tšona bakeng sa go thekga bophelo di a fokotšega lefaseng ka bophara.”​—Millennium Ecosystem Assessment.

“Dikgase tše kotsi tšeo di dirilwego ke batho di dirile gore boemo bja leratadima bja lefase bo be kgaufsi le go ba kotsing, moo go nago le kgonagalo ya gore polanete ye e be le ditla-morago tše kotsi.”​—NASA, Goddard Institute for Space Studies.

Seo Beibele e se boletšego e sa le pele: ditaba tše dibotse tša Mmušo wa Modimo di bolelwa lefaseng ka bophara​—Mateo 24:14; Kutollo 14:6, 7.

Seo dipego tša morago bjale di se bolelago: Ka 2007, tlhora ya Dihlatse tša Jehofa tše 6 957 854 di feditše diiri tša ka godimo ga dimilione tše dikete tše 1,4 di bolela ka ditaba tše dibotse tša Mmušo wa Modimo dinageng tše 236.​—2008 Yearbook of Jehovah’s Witnesses.

Bjalo ka ge go boletšwe ka mo godimo, Beibele e boletše e sa le pele gore go sa šetšwe ditaba ka moka tše mpe, go tla ba le lebaka la go ba le kholofelo. Jesu o boletše ka ‘ditaba tše dibotse’ tša Mmušo wa Modimo. Mmušo wa Modimo ke’ng? O tswalana bjang le go ba ga batho le kholofelo ka bokamoso bjo bokaone? Le gona, Mmušo wa Modimo o tla go kgoma bjang?

[Ntlhakgolo go letlakala 5]

Beibele e boletše e sa le pele ka maemo a lefase ao re a bonago lehono