Leyi I Minkarhi Ya Mangava

BIBELE yi profete leswaku vanhu va ta weriwa hi “minkarhi ya mangava leyi swi nonon’hwaka ku langutana na yona.” Yi vula leswaku nkarhi wolowo i ‘masiku yo hetelela.’ (2 Timotiya 3:1-5; 2 Petro 3:3-7) Yesu Kreste u vulavule hi nkarhi wolowo loko a hlamula xivutiso lexi a vutisiweke xona hi vadyondzisiwa vakwe malunghana ni “makumu ya mafambiselo ya swilo.” (Matewu 24:3) Xana sweswi hi hanya emasikwini yo hetelela? Ringanisa leswi Bibele yi swi profeteke ni swiviko swa sweswinyana leswi tshahiweke laha hansi, kutani u tiendlela xiboho.

Leswi Bibele yi swi profeteke: tinyimpi emisaveni hinkwayo—Luka 21:10; Nhlavutelo 6:4.

Leswi vuriwaka hi swiviko swa sweswinyana: “Eka malembe ya dzana lama hundzeke nhlayo ya vanhu lava feke hikwalaho ka tinyimpi yi andze kanharhu ku tlula ya lava feke eka malembe ya 1 900 lama hundzeke, ku fikela enkarhini lowu Kreste a velekiweke ha wona.”—Worldwatch Institute.

Leswi Bibele yi swi profeteke: ku kayivela ka swakudya ni vuvabyi—Luka 21:11; Nhlavutelo 6:5-8.

Leswi vuriwaka hi swiviko swa sweswinyana: Hi 2004 ku ringanyetiwe leswaku vanhu lava endlaka 863 wa timiliyoni emisaveni a va nga ri na swona swakudya leswi ringaneke, ku nga nhlayo leyi tlakukeke hi nkombo wa timiliyoni loko yi ringanisiwa ni ya lembe ra 2003.—United Nations Food and Agriculture Organization.

Vanhu va kwalomu ka gidi ra timiliyoni va tshama emikhukhwini; vanhu lava endlaka 2 600 wa magidi ya timiliyoni a va na swona swihambukelo leswi fanelekaka ni lunghiselelo lerinene ro cukumeta thyaka; vanhu lava endlaka 1 100 wa magidi ya timiliyoni a va na wona mati yo nwa lama tengeke.—Worldwatch Institute.

Vanhu va 500 wa timiliyoni va khomiwa hi vuvabyi bya malariya; vanhu va 40 wa timiliyoni va ni HIV-AIDS; kasi hi 2005 vanhu va 1,6 ya miliyoni va dlayiwe hi vuvabyi bya rifuva.—Vandla ra Rihanyo ra Misava Hinkwayo.

Leswi Bibele yi swi profeteke: ku onhiwa ka misava—Nhlavutelo 11:18.

Leswi vuriwaka hi swiviko swa sweswinyana: “Leswi vanhu va swi endleke swi vange xiyimo lexi nga ha endlaka leswaku mixaka yo tala ya swiharhi ni swimilana swi va ekhombyeni ro herisiwa ku nga ri khale.” “Kwalomu ka 75 wa tiphesente ta mintirho leyi pulanete yi yi endlaka hi ntumbuluko leswaku swilo leswi hanyaka swi kota ku hambeta swi hanya yi karhi ya hunguteka.”—Millennium Ecosystem Assessment.

 “Tigasi leti vangiweke hi vanhu ti endle leswaku maxelo ya pulanete ya Misava ma cinca swinene naswona sweswo swi nga vanga makhombo yo tala emisaveni.”—NASA, Goddard Institute for Space Studies.

Leswi Bibele yi swi profeteke: mahungu lamanene ya Mfumo wa Xikwembu ma chumayeriwa emisaveni hinkwayo—Matewu 24:14; Nhlavutelo 14:6, 7.

Leswi vuriwaka hi swiviko swa sweswinyana: Hi lembe ra 2007 Timbhoni ta Yehovha leti ringanaka 6 957 854 ti hete tiawara to tlula 1,4 wa tibiliyoni ti chumayela mahungu lamanene ya Mfumo wa Xikwembu ematikweni ya 236.—Buku Ya Lembe Ya Timbhoni Ta Yehovha Ya 2008.

Hilaha swi kombisiweke hakona laha henhla, Bibele yi profete leswaku hambileswi ku nga ni mahungu yo tala yo biha, ku ni xivangelo lexi endlaka leswaku vanhu va va ni ntshembo wa leswaku swilo swi ta cinca swi va leswinene. Yesu u vulavule hi “mahungu lamanene” ya Mfumo wa Xikwembu. Mfumo wa Xikwembu i yini? Ha yini wu nyika vanhu xivangelo xa leswaku swilo swi ta antswa enkarhini lowu taka? Kutani Mfumo wa Xikwembu wu ta ku khumba njhani wena?

[Marito lama tshahiweke exihlokweni lama nga eka tluka 5]

Bibele yi profete swiyimo swa misava leswi hi swi vonaka namuntlha