Taime ati rahi i teie nei

UA TOHU te Bibilia e e faaruru te huitaata i te mau taime “ati rahi” faaruru atâ. Te faataa ra te reira i tera area tau mai te “anotau hopea.” (Timoteo 2, 3:1-5; Petero 2, 3:3-7) Ua faahiti Iesu Mesia i taua noa tau ra i to ˈna pahonoraa i te hoê uiraa a ta ˈna mau pǐpǐ no nia i “te hopea o teie nei ao.” (Mataio 24:3) Te ora ra anei tatou i teie nei i te mau mahana hopea? A faaau na i ta te Bibilia i tohu i te mau parau faataa hopea nei  e faahitihia ra i muri nei, e na oe iho â e faaoti no oe iho.

Ta te Bibilia i tohu: aroraa rahi—Luka 21:10; Apokalupo 6:4.

Ta te mau parau faataa hopea nei e parau ra: “Ua tataitoru te taata tei pohe na roto i te tamaˈi i te 20raa o te senekele i te mau senekele atoa na mua ˈtu ia amuihia, hou te fanauraa o Iesu.”—Pu maimiraa Worldwatch.

Ta te Bibilia i tohu: oˈe e maˈi—Luka 21:11; Apokalupo 6:5-8.

Ta te mau parau faataa hopea nei e parau ra: I 2004, te manaˈohia ra e e 863 mirioni taata i te fenua aita e paia maitai ra, e 7 mirioni hau aˈe ïa i 2003 ra.—Faanahonahoraa a te mau Nunaa Amui i te pae no te maa e te ohipa faaapu.

Fatata hoê tausani mirioni tiahapa taata e ora ra i roto i te mau fare riirii; e 2 600 mirioni taata e ere ra i te vai-mâ-raa faufaa o te tino; 1 100 mirioni taata aita e pape inu mâ.—Pu maimiraa Worldwatch.

E 500 mirioni taata tei roohia i te malaria; e 40 mirioni te ora ra e te heˈa mate; ua haapohe te maˈi tutoo 1 600 tausani taata i 2005 ra.—Faanahonahoraa o te ao nei o te ea.

Ta te Bibilia i tohu: te faainoraa o te fenua—Apokalupo 11:18.

Ta te mau parau faataa hopea nei e parau ra: “No te mau ohipa a te taata, ua mou fatata roa e rave rahi huru animara e raau tanu.” “Ua itehia e ua fatata e piti i nia i te toru o te mau mea horoahia mai e te natura i te huitaata i te iti mai na te ao atoa.”—Hiˈopoaraa o te faanahoraa natura no te mireniuma.

“Te fatata ra te mahanahanaraa o te Fenua ta te taata e faatupu ra i te aratai i te hoê ahuaraˈi ati mau o te fenua, o te nehenehe e faatupu i te mau faahopearaa atâta mau â no te paraneta.”—NASA, Pu maimiraa na te reva teitei Goddard.

Ta te Bibilia i tohu: te parau apî maitai o te Basileia o te Atua porohia e ati aˈe te fenua—Mataio 24:14; Apokalupo 14:6, 7.

Ta te mau parau faataa hopea nei e parau ra: I te roaraa o 2007, ua horoa e 6 957 854 Ite no Iehova hau atu i te 1 400 mirioni hora i roto i te pororaa i te parau apî maitai o te Basileia o te Atua i roto e 236 fenua.—Annuaire des Témoins de Jéhovah 2008.

 Mai tei tapaohia i nia nei, ua tohu te Bibilia e noa ˈtu te mau parau peapea atoa, e tumu iho â no te manaˈo maitai. Ua faahiti Iesu i te “evanelia” o te Basileia o te Atua. Eaha te Basileia o te Atua? E nafea te reira e taaihia ˈi i te tiaturiraa o te huitaata no te hoê tau no a muri aˈe maitai aˈe? E e nafea ïa te Basileia o te Atua e ohipa ˈi i nia ia oe?

[Parau iti faaôhia i te api 5]

Ua tohu te Bibilia i te mau tupuraa o te ao ta tatou e ite ra i teie mahana