U Fa Kpa?

Lu hanma zwa Yesu lamenee?

Mbafantakerada gba anyiman sha kwagh u zwa u Yesu yange lamen jighilii yô. Nahan kpa, shighe u Yesu lu shin tar la, a shi nan kpa lamen zwa Heberu man zwa Shiria. Sha shighe ugen la, Yesu za nyôr ken shinagoge ken gar u Nasareti ken Galilia, maa tôô ngeren u kwaghôron u profeti u Yesaia, u alaghga i nger un ken zwa Heberu yô, gba ôron. Bibilo ôr kwagh u tesen ér Yesu gema avur a yange ôr la ken zwa Shiria ga.—Luka 4:16-21.

Profesôr G. Ernest Wright ôr kwagh u ijô i yange i lamen ken tar u Palesetina sha shighe u Yesu Kristu lu shin tar la wener: “Ikyav tese ér lu zwa Grika man zwa Shiria ior kpishi lamen hen shighe la ye . . . alaghga lu zwa Romanu ushoja mba Mbaromanu man mbatomov lamen ye, kpa mba eren kwaghaôndo u Mbayuda yô alaghga ve lamen zwa Heberu u ior lamen ken derianyom u hiihii la.” Ka nahan ve Pilatu nger ikyav i yange var sha kon u mtsaha u i mande Yesu sha mi la ken ijô itiar ye; ijô shon yô, lu zwa Heberu man u Romanu man u Grika.—Yohane 19:20.

Orvesen Alan Millard nger ken takerada na u i yer ér Discoveries From the Time of Jesus la wener: “Mbaromanu mba ve lu ugomna la lamen a ior ken zwa Grika, man alaghga Yesu na Pilatu mlumun sha akaa a yange pine un zum i lu ôron un ijir la ken zwa Grika.” Bibilo pase se jighilii ér kape i lu la ga, nahan cii kpa ijiir i môm tsô Bibilo kaa ér Yesu lam a Pilatu sha ikyev i tafinta ga.—Yohane 18:28-40.

Profesôr Wright ôr ken takerada u i yer ér Biblical Archaeology, 1962, peeji 243 la ér, “Yesu yange una lamen zwa Grika shin zwa Romanu kpa se fa jighilii ga, nahan kpa yange una zenden kwaghaôndo u pasen yô a lam a ior ken zwa Shiria shin zwa Heberu u yange i nungwa asember a ken zwa Shiria sha mi kpishi, u isham ior lamen la.”

Awen a yange i maa tempel u ken Yerusalem a mi la kehe kuma nan je?

Zum u mbahenen mba Yesu lu lamen a na sha kwagh u tempel u ken Yerusalem yô, ugen ken ve kaa a na ér: “Ortesen, nenge ambaawen ne man shi ambaayou ne!” (Marku 13:1) Awen ne agen yange kehe kuma nan je?

Shighe u Yesu lu shin tar la, Tor Herode maa Tempel u sha Uwo la gbanger je hemba tempel u sha ayange a Solomon la kwa har. Yange i wa imaagh ki tempel ne hemba kehen a hanma imaagh ki gen sha ayange la cii; ki lihe kuma angahar 1,575 shi ki gbanger kuma angahar 910. I kaa ér awen agen a yange i maa tempel ne a mi la lihe kuma angahar 35, shi gbanger kuma angahar 15, shi tav kuma angahar 10. Awen ne agen kpuaa yuhwa je hemba utôn 50. Orfantakerada ugen kaa ér iwen ne igen yange i yuhwa je nôngo u kuman utôn 400, man “ma iwen i môm sha ayange a tsuaa la yuhwa kuma sha i ga.”

Yesu yange gema kaa a orhenen na la ér: “U nenge uzegembaayoughouv mban kpa? Iwen i môm tsô kpaa i á de i i̱ lu sha igen ngi ga, á yôhôr a ca ca.” (Marku 13:2) Ken inyom i 70 la, ushoja mba Mbaromanu yôhôr awen a vesen ne, man zan zan hegen kpa awen ne nga hen inya, sha ajiir a yange ve daa a ve haa la.

[Picture on page 23]

Awen a tempel a yange i daa a i haa ken won u tempel u sha uwo ken Yerusalem la