Bibele Yi Hundzula Vutomi Bya Vanhu

I yini leswi susumeteleke muntshwa un’wana wa le Mexico la nga xirho xa ntlawa wa tinsula-voya lowu vuriwaka Vasathana Lavatsongo, leswaku a hundzuka a va muaka-tiko la tshembekaka ni la gingiritekaka? Ha yini n’wamabindzu un’wana waxisati wa Mujapani loyi bindzu rakwe a ri famba kahle a tshike ku hlongorisa rifuwo evuton’wini byakwe naswona u titwa njhani hi mindzulamiso leyi a yi endleke? I yini lexi susumeteleke Murhaxiya un’wana loyi a a ri muxavisi wa swibamu leswaku a tshika bindzu rakwe leri a ri n’wi nghenisela mali yo tala kambe leri a ri nga ri enawini? Twana leswi vanhu lava va swi vulaka.

MATIMU YAKWE HI KU KOMISA

VITO: ADRIAN PEREZ

MALEMBE: 30

TIKO: MEXICO

LESWI A A SWI ENDLA: XIRHO XA TINSULA-VOYA

VUTOMI BYA MINA: Loko ndzi ri ni malembe ya kwalomu ka 13, ndyangu wa ka hina wu rhurhele edorobeni ra Ecatepec de Morelos, eXifundzheni xa Mexico. Hi nkarhi wolowo, doroba rero a ri tele vugevenga lebyi a byi endliwa hi vantshwa, ku onheteriwa ka miako ni nhundzu ni ku tirhisa swidzidzirisi. Ndzi sungule ku nwa byala ku tlula mpimo, ndzi onhetela nhundzu ni ku va ni mahanyelo yo biha.

Endzhakunyana hi tlhelele eSan Vicente, ku nga doroba leri ndzi velekiweke eka rona. Hambiswiritano, ku tirhisiwa ka swidzidzirisi a ku ri xiphiqo lexikulu ni le dorobeni rero. A swi tolovelekile ku vona vantshwa va lo lakahla eswitarateni onge hiloko va file. Ndzi joyine ntlawa wa tinsula-voya lowu vuriwaka Vasathana Lavatsongo. A hi yiva naswona hi tirhisa swidzidzirisi, ngopfu-ngopfu a hi dzaha benzine kumbe glu. Hakanyingi a ndzi nga swi tsundzuki leswaku ndzi fike njhani ekaya, naswona minkarhi yin’wana a ndzi etlela eswitarateni onge hiloko ndzi lo fa. Van’wana va vanghana va mina va hetelele va khomiwile hikwalaho ko yiva ni ku dlaya.

Ku nga khathariseki swilo hinkwaswo swo biha leswi a ndzi swi endla, a ndzi pfumela leswaku Xikwembu xi kona. A ndzi hlanganyela eka minhlangano ya vukhongeri, yo fana ni ku khongela emahlweni ka swihambano hi nkarhi wa Vhiki ro Hlawuleka leswaku ripfalo ra mina ri nga ha ndzi kingindzi ngopfu. Kambe endzhaku ka nhlangano  lowu, hinkwerhu ka hina ku katsa ni wanuna loyi a a tlanga xiphemu xa Kreste, a hi nwa byala hi dakwa hi tlangela leswi hi hlanganyeleke eka xiendlakalo lexi.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndza ha ri eka malembe ya vuntshwa, ndzi sungule ku dyondza Bibele ni Timbhoni ta Yehovha. A ndzi nga swi tivi leswaku ndzi hanyela yini kutani ndzi xiye leswaku loko ndzi hambeta ndzi hanya hi ndlela yoleyo, swilo a swi nga ta ndzi fambela kahle. Ndzi khumbiwe swinene hi mhaka leyi tsariweke eka Vagalatiya 6:8, leyi nge: “Loyi a byalelaka nyama ya yena u ta tshovela ku onhaka enyameni yakwe, kambe loyi a byalelaka moya u ta tshovela vutomi lebyi nga heriki emoyeni.” Tsalwa leri ri ndzi endle ndzi xiya leswaku loko ndzi lava ku va swilo swi ndzi fambela kahle, ndzi fanele ndzi byala ndzi ri karhi ndzi ehleketa hi ntshovelo lowu ndzi nga ta wu kuma enkarhini lowu taka.

Loko ndzi ri karhi ndzi dyondza Bibele, ndzi sungule ku twisisa leswaku Yehovha i Xikwembu lexi hanyaka lexi khathalaka ha mina, naswona xi tiyimisele ku ndzi rivalela swidyoho leswi ndzi swi endleke enkarhini lowu hundzeke. Ndzi tivonele hi ya mina leswaku xa swi yingisa swikhongelo xi tlhela xi swi hlamula.

Ku cinca ndlela leyi a ndzi hanya ha yona a ku nga ri matlangwana. A swi tika swinene ku tihambanisa ni ntlawa wolowo wa tinsula-voya. A ndzi nga pfumeleriwi ku nghena etindhawini tin’wana hambileswi a ndzi nga ha ri xirho xa ntlawa wolowo. Minkarhi yin’wana, a ndzi boheka ku tumbelela vanghana va mina va khale, hikuva a va tshamela ku ndzi lava-lava leswaku va ndzi sindzisa ku tlhela ndzi va xirho xa vona.

Loko ndzi sungule ku ya eminhlanganweni ni Timbhoni eHolweni ya Mfumo, ndzi vone ku hambana lokukulu hikuva swirho swa vandlha a swi ri ni xinghana ni rirhandzu. Ndzi hlamarisiwe hi ndlela leyi ripfumelo ra vona a ri tiye swinene ha yona ni leswaku a va hanya hi ku ya hi leswi a va swi dyondzisa. Vanhu lava a va hambane swinene ni lava a ndzi hanya na vona eku sunguleni.

NDLELA LEYI NDZI VUYERIWEKE HA YONA: Se ndzi ni malembe ya khume ndzi khuvuriwile tanihi Mbhoni ya Yehovha. Ndzi ringeta hi matimba ku tirhisa tidyondzo ta Bibele evuton’wini bya mina. Hikwalaho ka sweswo, swirho swa ndyangu wa ka hina swa ndzi xixima. Sweswi swi ndzi tiva ndzi ri mutirhi la gingiritekaka, naswona ndzi kota ni ku swi pfuna hi timali. Manana u sungule ku dyondza Bibele naswona sweswi i Mbhoni ya Yehovha. Nakambe Tatana u karhi u cinca ndlela leyi a hanyaka ha yona. Swirho swo tala swa ndyangu wa ka hina a hi Timbhoni ta Yehovha, kambe endzhaku ko xiya ndlela leyi ndzi cinceke vutomi bya mina ha yona, swa pfumela leswaku Bibele yi nga pfuna munhu leswaku a antswisa vutomi byakwe.

MATIMU YAKWE HI KU KOMISA

VITO: YAYOI NAGATANI

MALEMBE: 50

TIKO: JAPANI

LESWI A A SWI ENDLA: N’WAMABINDZU WAXISATI LOYI BINDZU RAKWE A RI FAMBA KAHLE

VUTOMI BYA MINA: Ndzi kulele exidorobanini lexi teleke hi vanhu lava nga ni xinghana. Tatana a a ri ni xitolo lexikulu edorobeni ni vatirhi va khume lava a va tirha eka yena. Muti wa ka hina a wu ri ekusuhi ni xitolo, kutani hambileswi Manana na Tatana a va tshama va khomekile, a ndzi kalanga ndzi khomiwa hi xivundza.

Hi mina mativula eka vana vanharhu  va vanhwanyana, naswona ku sukela loko ndza ha ri ntsongo, ndzi dyondzisiwe ku fambisa bindzu ra le kaya. Ndzi tekiwe ndza ha ri ntsongo. Nuna wa mina u tshike ntirho wakwe wa le bangi leswaku a ta pfuneta eka bindzu ra le kaya. Hi kume vana vanharhu lava a vo lumulana kunene. Manana a a khathalela vana loko a ri karhi a endla mintirho ya le kaya, loko mina ndzi ri karhi ndzi tirha exitolo ku sukela nimpundzu ku ya fika nimadyambu. Hambileswi a hi khomekile, a hi wu kuma nkarhi wa ku dzumba swin’we hi ri ndyangu.

Hiloko switolo swo tala swi hlaseriwa hi ku tsana ka matimba ya mali, kutani bindzu ra hina ri sungula ku ka ri nga ha fambi kahle. Hikwalaho ka sweswo, hi endle xiboho xo pfula xitolo xin’wana etlhelo ka gondzo lerikulu, lexi xavisaka swilo leswi tirhisiwaka ku lunghisa ni ku sasekisa tiyindlu. Ka ha sale siku rin’we leswaku ku endliwa nkhuvo wo sungula ku aka xitolo lexintshwa, tatana wa mina loyi a a ri muungameri wa khampani ya hina u wile hileswi byongo byakwe byi kavanyetekeke hi xitshuketa. A nga ha swi kotanga ku vulavula kahle, kutani vutihlamuleri bya ku fambisa xitolo lexintshwa byi rhwexiwe mina. Nuna wa mina u sale eka xitolo lexa khale. Hi sungule ku khomeka swinene.

Xitolo xa hina lexintshwa xi nghenise mali yo tala. Ndzi tinyungubyise ngopfu hi leswi ndzi swi endleke naswona ndzi titsone vurhongo hikwalaho ka ntirho. Hambileswi a ndzi va rhandza vana va mina, minkarhi hinkwayo a ndzi ehleketa hi ntirho. A ndzi nga ri na wona nkarhi wo vulavula ni nuna wa mina, naswona loko ho tshuka hi wu kumile, a hi holova swinene. Leswaku ndzi susa ntshikilelo lowu a ndzi ri na wona, ndzi sungule ku famba ni vanghana va mina ni van’wamabindzu-kulorhi vusiku byin’wana ni byin’wana hi ya tinwela. Hinkwaswo leswi a ndzi swi endla a ku ri ku tirha, ku nwa ni ku etlela. A ndzi fuwile kambe a ndzi nga tsakanga naswona a ndzi nga swi tivi leswaku sweswo swi vangiwa hi yini.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndzi sungule ku dyondza Bibele ni Timbhoni ta Yehovha, tindzimana tinharhu ta Bibele ti ndzi pfune swinene. Ndzi ririle loko ndzi twisisa leswi Matewu 5:3 yi vulaka swona: “Va tsaka lava khathalaka hi xilaveko xa vona xa moya, hikuva mfumo wa matilo i wa vona.” Ndzimana leyi yi hlamusela leswaku ha yini a ndzi nga tsakanga hambileswi a ndzi fuwile naswona vanghana va mina va ndzi xixima. Ndzi xiye leswaku nchumu wun’we ntsena lowu a wu ta ndzi tisela ntsako wa xiviri a ku ri ku khathala hi vuxaka bya mina na Yehovha.

Hi nkarhi wolowo, mali ya le Japani a yi tsanile naswona ndzi vone ku hetiseka ka marito lama nga eka 1 Timotiya 6:9 eka vanghana va mina: “Lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuhunguki ni loku vavisaka, loku nghenisaka vanhu endzovisweni ni le ku onhakeni.” Ndzi xiye leswaku marito ya Yesu lama tsariweke eka Matewu 6:24 lama nge, “a mi nge vi hlonga ra Xikwembu ni ra Rifuwo” ma tirha eka mina hi ku kongoma, kutani ndzi endle xiboho xo endla mindzulamiso yo karhi evuton’wini bya mina.

Ndzi xiye leswaku a ndzi honisa vatswari va mina, nuna wa mina ni vana va mina. Nakambe a swi ri erivaleni leswaku se a ndzi ri ni timfanelo tin’wana leti nga tsakisiki. A ndzi titlakusa. Vanhu a ndzi nga va lehiseli mbilu. Naswona a ndzi ri ni ximbilwa-mbilwana. Eku sunguleni, a ndzi ehleketa leswaku ndzi nge swi koti ku cinca vutomi bya mina kutani ndzi va Mukreste. Hambiswiritano, a ndzi va rhandza swinene vana va mina naswona ndzi xiye leswaku loko ndzi tirhisa ndzayo ya Bibele loko ndzi tirhisana ni swirho swa ndyangu wa mina, vana va mina a va endla leswi a ndzi va dyondzisa swona. Ndzi tinyike nkarhi wo tala wo tshama na vona naswona ndzi fambe na vona eminhlanganweni ya Vukreste.

NDLELA LEYI NDZI VUYERIWEKE HA YONA: Ku tiva leswaku xikongomelo xa vutomi i yini ni ku tirhela Xikwembu swin’we ni ku hanya vutomi lebyi xi tsakisaka, swi endle leswaku ndzi va ni ntsako wa xiviri ni ku eneriseka. A ndzi nga ha wu honisi ndyangu wa mina hikwalaho ka ntirho, kutani ndzi kote ku tlhela ndzi va ni xindzhuti lexi a ndzi nga ha ri na xona.

Loko Manana a vona ndlela leyi vumunhu bya mina byi cinceke ha yona hileswi ndzi hanyaka hi milawu ya Bibele, u susumeteleke ku dyondza Bibele ni ku va Mukreste. Lexi tsakisaka, Tatana ni nuna wa mina a va lwisananga na xona xiboho lexi ndzi xi endleke. Vuxaka bya mina ni vana va mina byi ye byi tiya swinene naswona sweswi ndyangu wa mina wu tsakile swinene.

MATIMU YAKWE HI KU KOMISA

VITO: MIKHAIL ZUYEV

MALEMBE: 51

TIKO: RHAXIYA

LESWI A A SWI ENDLA: MUXAVISI WA SWIBAMU LESWI NGA RIKI ENAWINI

VUTOMI BYA MINA: Doroba ra Krasnogorsk leri ndzi humaka eka rona ri rhendzeriwe hi mirhi ni byanyi bya rihlaza. Nambu wa Moscow wu khuluka wu ya edzongeni. Miti leyi nga evupela-dyambu ni le n’walungwini wa doroba leri, a ku sele katsongo leswaku yi funengetiwa hi nkhwati.

Loko ndza ha ri ntsongo a ndzi rhandza ku ba swibakela ni ku tlanga hi swibamu. A ndzi heta nkarhi wo tala ndzi endla vutiolori. Nakambe a ndzi endla swibamu leswi nga riki enawini, tikulu ni mikwana. Hi ku famba ka nkarhi sweswo swi hundzuke bindzu ra mina. A ndzi hlelekile naswona a ndzi kota ku xavisela swigevenga swibamu swa mina.

NDLELA LEYI BIBELE YI HUNDZULEKE VUTOMI BYA MINA HA YONA: Eku sunguleni ka va-1990 ndzi hlangane ni Timbhoni ta Yehovha, kambe eku sunguleni a ndzi nga ti tshembi. A ti ndzi vutisa swivutiso swo tala malunghana ni swilo leswi ndzi swi rhandzaka.

Siku rin’wana un’wana wa tona u ndzi hlayele Varhoma 14:12 leyi nge: “Un’wana ni un’wana wa hina u ta tihlamulela eka Xikwembu.” Ndzi tivutisile leswaku a ndzi ta ku yini eka Xikwembu. Tsalwa leri ri ndzi susumetele ku dyondza leswi Xikwembu xi swi languteleke eka mina.

Ndzi tikarhatele ku tirhisa ndzayo ya Bibele leyi tsariweke eka Vakolosa 3:5-10 leyi nge: “Hikokwalaho, dlayani swirho swa miri wa n’wina leswi nga emisaveni malunghana ni vumbhisa, thyaka, ku navela ka vuxaka bya rimbewu, ku navela loku vavisaka, ni ku tshwa, ku nga ku gandzela swifaniso swa hava. Hikwalaho ka swilo sweswo vukarhi bya Xikwembu bya ta. . . . Cukumetani hinkwaswo ekule na n’wina, vukarhi, ku hlundzuka, vubihi, mavulavulelo ya nhlambha, ni mavulavulelo lama thyakeke ma suseni emilon’wini ya n’wina. Mi nga hembelani. Hluvulani vumunhu bya khale ni mikhuva ya byona, kutani mi tiambexa vumunhu lebyintshwa.”

Swi ndzi tikele ngopfu ku endla mindzulamiso yoleyo. Swigevenga leswi a ndzi swi xavisela swibamu a swi tshamela ku ndzi nyika mali swi lava swibamu swin’wana naswona a swi ndzi tikela ku tikhoma loko vanhu va ndzi rhuketela. Hambiswiritano, ndzi tshovelele swibamu swa mina swo tala leswi a ndzi swi teka swi ri swa nkoka. Loko ndzi ri karhi ndzi dyondza hi rirhandzu leri Xikwembu na Kreste va ndzi kombeke rona, ndzi susumeteleke ku va rhandza. Ndzi ye emahlweni ndzi dyondza Bibele, ndzi ya eminhlanganweni ya vandlha ni ku khongelela mpfuno wa Xikwembu.

NDLELA LEYI NDZI VUYERIWEKE HA YONA: Hikwalaho ka leswi a ndzi endla matshalatshala lamakulu ni leswi a ndzi pfuniwa hi vamakwerhu lava nga Vakreste, ndzi sungule ku va ni timfanelo letinene hakatsongo-tsongo. Swa ndzi tsakisa ku tiva leswaku Yehovha Xikwembu wa khathala hi un’wana ni un’wana wa hina hambi ku ri vanhu lava feke. (Mintirho 24:15) Ndzi tsakisiwa hi ndlela leyi Timbhoni ta Yehovha ti tshembekeke ha yona. Naswona ndza yi tlangela ndlela leyi a ti ndzi khathalela ha yona naswona ya ndzi hlamarisa ndlela leyi ti tshembekaka ha yona eka Xikwembu.

Eku sunguleni, swirho swin’wana swa ndyangu wa mina swin’we ni vanghana va mina a va nga swi lavi leswaku ndzi va Mbhoni. Kambe a va ti chavelela hileswaku a swi antswa ku va ndzi va mupfumeri ku ri ni ku va ndzi tirhisana ni swigevenga. Sweswi ndza tsaka hileswi ndzi nga ha tinyiketelangiki eku xaviseni ka swibamu kambe ndzi tinyiketeleke ku pfuna van’wana leswaku va dyondza hi Xikwembu xa ku rhula.

[Xifaniso lexi nga eka tluka 27]

A ndzi hlanganyela eka minhlangano ya kereke ya Khatoliki leswaku ripfalo ra mina ri nga ndzi kingindzi

[Xifaniso lexi nga eka tluka 28]

A ndzi fuwile kambe a ndzi nga tsakanga