Dili Biyaan ni Jehova ang mga Maunongon Kaniya

‘Dili pagabiyaan [ni Jehova] ang mga maunongon kaniya. Sila pagabantayan hangtod sa panahong walay tino.’​—SAL. 37:28.

1, 2. (a) Unsang mga panghitabo sa ikanapulong siglo W.K.P. ang nagsulay sa pagkamaunongon sa mga alagad sa Diyos? (b) Sa unsang tulo ka kahimtang nga gibantayan ni Jehova ang mga maunongon kaniya?

 KADTO maoy ikanapulong siglo W.K.P. ug panahon usab kadto sa paghimog desisyon. Kon wala pa hatagig kagawasan ang amihanang mga tribo sa Israel nga diskontento sa pagmando ni Rehoboam, mahitabo unta ang gubat. Ang ilang bag-ong natudlo nga hari, si Jeroboam, milihok dayon sa pagpalig-on sa iyang gahom pinaagi sa pagtukod ug bag-ong relihiyon sa Estado. Gibaod niya sa iyang mga ginsakpan ang bug-os nga pagkamaunongon. Unsay buhaton sa matinumanong mga alagad ni Jehova? Magpabilin ba silang maunongon sa Diyos nga ilang gisimba? Libolibo ang nagmaunongon kang Jehova, ug iyang gibantayan sila samtang sila naghupot sa ilang integridad.​—1 Hari 12:1-33; 2 Cron. 11:13, 14.

² Ang pagkamaunongon sa mga alagad sa Diyos gisulayan usab sa atong adlaw. “Hupti ninyo ang maayong panghunahuna,” nagpasidaan ang Bibliya. “Ang inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.” Makahimo ba kita sa ‘pagbarog batok kaniya, nga malig-on sa pagtuo’? (1 Ped. 5:8, 9) Atong susihon ang pipila ka panghitabo nga misangko sa pagkaentrono ni Haring Jeroboam niadtong 997 W.K.P. ug atong tan-awon kon unsay atong makat-onan niana. Niadtong malisod nga panahon, ang matinumanong mga alagad ni Jehova gidaogdaog. Sila naladlad usab sa impluwensiya sa mga apostata samtang nagtuman sa malisod nga mga asaynment gikan sa Diyos. Niining mga kahimtanga, wala biyai ni Jehova ang mga maunongon kaniya, ug mao man usab karon.​—Sal. 37:28.

Sa Dihang Gidaogdaog

3. Nganong ang pagmando ni Haring David dili madaogdaogon?

³ Ato unang susihon ang mga kahimtang nga mitultol sa pagkahimong hari ni Jeroboam. Ang Proverbio 29:2 nag-ingon: “Sa dihang ang daotan magamando, ang katawhan manghupaw.” Ilalom sa pagmando ni Haring David sa karaang Israel, ang mga tawo wala manghupaw. Si David dili hingpit, apan siya maunongon sa Diyos ug nagsalig kaniya. Ang pagmando ni David dili madaogdaogon. Si Jehova naghimog pakigsaad uban kang David nga nag-ingon: “Ang imong balay ug ang imong gingharian mahimong malig-on hangtod sa panahong walay tino sa imong atubangan; ang imong trono matukod nga malig-on hangtod sa panahong walay tino.”​—2 Sam. 7:16.

4. Aron padayong matagamtam ang mga panalangin panahon sa pagmando ni Solomon, unsay angay nilang buhaton?

⁴ Sa sinugdan, ang pagmando sa anak ni David nga si Solomon malinawon ug mauswagon kaayo. Kini haom nga naglandong sa umaabot nga Usa ka Libo ka Tuig nga Pagmando ni Kristo Jesus. (Sal. 72:1, 17) Niadtong panahona, walay usa sa 12 ka tribo sa Israel ang may katarongan nga moalsa. Apan aron padayong matagamtam ang mga panalangin, dunay angayng buhaton si Solomon ug ang iyang mga ginsakpan. Si Jehova miingon kang Solomon: “Kon ikaw molakaw sa akong mga lagda ug motuman sa akong hudisyal nga mga hukom ug sa tinuod magatuman sa tanan kong mga sugo pinaagi sa paglakaw diha kanila, akong tumanon gayod usab ang akong pulong nganha kanimo nga akong gisulti kang  David nga imong amahan; ug sa pagkatinuod ako mopuyo sa taliwala sa mga anak sa Israel, ug dili ko biyaan ang akong katawhang Israel.”​—1 Hari 6:11-13.

5, 6. Unsay nahitabo sa dihang si Solomon wala na magmaunongon sa Diyos?

⁵ Pagkatigulang na ni Solomon, wala na siya magmatinumanon kang Jehova ug siya nakigbahin sa bakak nga pagsimba. (1 Hari 11:4-6) Siya inanayng mihunong sa pagsunod sa mga balaod ni Jehova ug nahimong madaogdaogon. Hilabihan ang iyang pagkamadaogdaogon nga bisan human sa iyang kamatayon, ang mga tawo nagreklamo bahin kaniya ngadto sa iyang anak ug manununod nga si Rehoboam, ug sila mihangyo nga pagaanon ang ilang yugo. (1 Hari 12:4) Unsay gibuhat ni Jehova sa dihang si Solomon wala na magmatinumanon kaniya?

⁶ Ang Bibliya nagtug-an kanato: “Si Jehova nasuko kang Solomon, tungod kay ang iyang kasingkasing misimang gikan [sa] . . . Diyos sa Israel, ang usang nagpakita kaniya sa makaduha.” Si Jehova miingon kang Solomon: “Tungod kay . . . ikaw wala magtuman sa akong pakigsaad ug sa akong mga lagda nga akong gihatag ingong sugo kanimo, ako sa walay pakyas maglangkat sa gingharian gikan kanimo, ug ihatag ko gayod kini sa imong alagad.”​—1 Hari 11:9-11.

7. Bisan tuod iyang gisalikway si Solomon, sa unsang paagi si Jehova nag-atiman sa mga maunongon Kaniya?

⁷ Dayon gipadala ni Jehova ang manalagnang si Ahias aron magdihog ug usa ka manluluwas. Siya mao si Jeroboam, usa ka tawong may katakos, nga nagtrabaho ilalom kang Solomon. Bisan tuod si Jehova nagmaunongon sa iyang pakigsaad kang David maylabot sa Gingharian, Siya miuyon nga mabahin ang 12 ka tribo. Ang napulo ihatag kang Jeroboam; ang duha magpabilin sa kaliwat ni David, nga nianang tungora gihawasan ni Haring Rehoboam. (1 Hari 11:29-37; 12:16, 17, 21) Si Jehova miingon kang Jeroboam: “Mahitabo nga, kon imong sundon ang tanan nga akong isugo kanimo, ug ikaw molakaw diha sa akong mga dalan ug sa pagkatinuod mobuhat kon unsay matarong sa akong mga mata pinaagi sa pagtuman sa akong mga lagda ug sa akong mga sugo, ingon sa gibuhat ni David nga akong alagad, ako magauban usab kanimo, ug tukoran ko ikaw ug usa ka malungtaron nga balay, ingon sa akong gitukod alang kang David, ug akong ihatag kanimo ang Israel.” (1 Hari 11:38) Si Jehova milihok alang sa iyang katawhan ug nagtaganag paagi aron sila makalingkawas gikan sa pagdaogdaog.

8. Unsang mga kalisdanan ang nasinati sa katawhan sa Diyos karon?

⁸ Kaylap kaayo ang pagdaogdaog ug inhustisya karon. “Ang tawo nagmando sa tawo alang sa iyang kadaotan,” nag-ingon ang Ecclesiastes 8:9. Ang hakog nga komersiyo ug hiwi nga pagmando mahimong mosangpot sa kalisod sa ekonomiya. Ang mga lider sa gobyerno, sa relihiyon, ug ang dagkong mga negosyante sagad wala maghatag ug maayong sulondan. Busa, sama sa matarong nga si Lot, ang mga maunongon sa Diyos karon “naguol pag-ayo gumikan sa pagpatuyang sa mga masupilon-sa-balaod nga katawhan diha sa malaw-ayng panggawi.” (2 Ped. 2:7) Dugang pa, bisag naningkamot kita sa pagkinabuhi sumala sa mga sukdanan sa Diyos ug wala manghilabot sa uban, sagad nga gilutos kita sa mapahitas-ong mga magmamando.​—2 Tim. 3:1-5, 12.

9. (a) Unsay nahimo na ni Jehova aron sa pagluwas sa iyang katawhan? (b) Nganong makaseguro kita nga si Jesus magmaunongon gayod sa Diyos?

⁹ Apan makaseguro kita niining hinungdanong kamatuoran: Si Jehova dili mobiya sa mga maunongon kaniya! Hunahunaa lang kon unsa nay iyang nahimo aron pulihan ang hiwi nga mga magmamando sa kalibotan. Natukod na ang Mesiyanikong Gingharian sa Diyos diin si Kristo Jesus ang maghari. Siya nagmando sa langit duolan nag usa ka gatos ka tuig. Sa dili madugay iyang hatagag bug-os nga kahupayan kadtong may kahadlok sa ngalan sa Diyos. (Basaha ang Pinadayag 11:15-18.) Gipamatud-an ni Jesus ang iyang pagkamaunongon sa Diyos hangtod sa kamatayon. Sukwahi sa gibuhat ni Solomon, dili gayod niya pakyason ang iyang mga ginsakpan.​—Heb. 7:26; 1 Ped. 2:6.

10. (a) Sa unsang paagi atong ikapakita nga atong gipabilhan ang Gingharian sa Diyos? (b) Sa dihang nag-atubang ug mga pagsulay, sa unsa kita makasalig?

¹⁰ Ang Gingharian sa Diyos maoy usa ka tinuod nga kagamhanan nga magtapos sa tanang pagdaogdaog. Kita angayng magmaunongon ngadto lamang kang Jehova nga Diyos ug sa iyang Gingharian. Uban ang bug-os nga pagsalig sa Gingharian, kita nagsalikway sa pagkadili-diyosnon ug nagmasiboton sa maayong mga buhat. (Tito 2:12-14) Kita  naningkamot nga dili mabulingan sa kalibotan. (2 Ped. 3:14) Bisan unsang mga pagsulay ang atong maatubang karon, kita makasalig nga si Jehova manalipod kanato batok sa espirituwal nga kadaot. (Basaha ang Salmo 97:10) Dugang pa, ang Salmo 116:15 nagpasalig kanato: “Bililhon sa mga mata ni Jehova ang kamatayon sa mga maunongon niya.” Ang mga alagad ni Jehova bililhon kaayo kaniya nga dili niya itugot nga silang tanan mapuo.

Sa Dihang Naladlad sa Impluwensiya sa mga Apostata

11. Sa unsang paagi si Jeroboam nahimong dili maunongon?

¹¹ Ang pagmando ni Haring Jeroboam angay untang makahatag ug kahupayan sa katawhan sa Diyos. Hinunoa, ang iyang gibuhat nagsulay na hinuon sa ilang pagkamaunongon sa Diyos. Kay wala makontento sa kadungganan ug pribilehiyo nga gihatag kaniya, si Jeroboam nangitag mga paagi sa pagpalig-on sa iyang pagkahari. “Kon kini nga katawhan padayon nga motungas aron sa paghalad ug mga halad sa balay ni Jehova sa Jerusalem,” siya nangatarongan, “ang kasingkasing niini nga katawhan mobalik usab gayod sa ilang ginoo, si Rehoboam nga hari sa Juda; ug tinong patyon ako nila ug mobalik kang Rehoboam nga hari sa Juda.” Busa gitukod ni Jeroboam ang usa ka bag-ong relihiyon nga nalangkit sa pagsimba sa duha ka bulawan nga nating baka. “Unya iyang gibutang ang usa sa Bethel, ug ang lain iyang gibutang sa Dan. Ug kining butanga nahimong hinungdan sa pagkasala, ug ang katawhan miadto sa atubangan niini hangtod sa Dan. Ug siya naghimo ug balay sa hatag-as nga mga dapit ug naghimog mga saserdote gikan sa kasagarang katawhan, nga dili mga anak ni Levi.” Nagtakda pa gani si Jeroboam ug adlaw sa pagsaulog sa “pista alang sa mga anak sa Israel,” ug “naghimog mga halad ibabaw sa halaran aron sa paghimog gipaaso nga halad.”​—1 Hari 12:26-33.

12. Sa dihang gipatuman ni Jeroboam sa Israel ang pagsimba sa nating baka, unsay gibuhat sa mga maunongon sa Diyos sa amihanang gingharian?

¹² Unsa may buhaton sa mga maunongon sa Diyos nga sakop sa amihanang gingharian? Sama sa ilang matinumanong mga katigulangan, milihok dayon ang mga Levihanon nga nagpuyo sa mga siyudad nga gihatag kanila diha sa amihanang gingharian. (Ex. 32:26-28; Num. 35:6-8; Deut. 33:8, 9) Ilang gibiyaan ang ilang mga panulondon ug sila mibalhin ngadto sa Juda uban sa ilang mga pamilya, diin sila makapadayon sa pagsimba kang Jehova nga walay babag. (2 Cron. 11:13, 14) Ang ubang mga Israelinhon nga temporaryong nanimuyo sa Juda nagpabilin didto imbes mobalik sa ilang pinuy-anan. (2 Cron. 10:17) Gitino ni Jehova nga magpabiling bukas ang kahigayonan nga mobalik sa matuod nga pagsimba aron ang nagsunod nga kaliwatan sa mga Israelinhon diha sa amihanang gingharian mahimong motalikod sa pagsimba sa nating baka ug mobalik sa Juda.​—2 Cron. 15:9-15.

13. Sa modernong panahon, sa unsang paagi ang impluwensiya sa mga apostata nagsulay sa katawhan sa Diyos?

 ¹³ Ang mga apostata ug ang ilang impluwensiya nagpameligro sa katawhan sa Diyos karon. Ang pipila ka magmamando nagtukod ug kaugalingong matang sa relihiyon sa Estado ug nagpugos sa ilang mga ginsakpan sa pagdawat niana. Ang klero sa Kakristiyanohan ug ang ubang mga mapangahason nangangkon nga sila kono ang naglangkob sa gitagna nga “harianong pagkasaserdote.” Apan taliwala lamang sa matuod nga mga Kristohanon nga atong makaplagan ang matuod nga mga dinihogan, nga naglangkob sa “harianong pagkasaserdote.”​—1 Ped. 2:9; Pin. 14:1-5.

14. Unsay angay natong reaksiyon sa pagtulon-an sa mga apostata?

¹⁴ Sama sa matinumanong mga Levihanon sa ikanapulong siglo W.K.P., ang mga maunongon sa Diyos karon wala malimbongi sa pagtulon-an sa mga apostata. Ang mga dinihogan ug ang ilang kaubang mga Kristohanon naglikay ug nagsalikway gayod sa mga pagtulon-an sa mga apostata. (Basaha ang Roma 16:17.) Bisan tuod kinabubut-on kitang magpasakop sa mga awtoridad sa kagamhanan maylabot sa sekular nga mga butang, kita magpabiling neyutral sa mga panagbangi sa kalibotan ug magmaunongon lamang sa Gingharian sa Diyos. (Juan 18:36; Roma 13:1-8) Atong gisalikway ang bakak nga mga pangangkon niadtong nag-angkon nga nag-alagad sa Diyos apan sa samang higayon nagpasipala kaniya pinaagi sa ilang mga gawi.​—Tito 1:16.

15. Nganong angay kitang magmaunongon sa “matinumanon ug maalamong ulipon”?

¹⁵ Hunahunaa usab nga gipaposible ni Jehova nga ang mga matinud-anog kasingkasing makabiya sa daotang kalibotan, sa mahulagwayong paagi, ug mobalhin ngadto sa espirituwal nga paraiso nga iyang gilalang. (2 Cor. 12:1-4) Kita mapasalamatong nakig-uban sa “matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanila sa ilang pagkaon sa hustong panahon.” Gitudlo ni Kristo kining maong ulipon “ibabaw sa tanan niyang mga kabtangan.” (Mat. 24:45-47) Busa, bisag wala kaayo kita makasabot sa desisyon nga gihimo sa ulipon nga matang, dili kana katarongan nga atong isalikway ang maong desisyon o mobalik kita ngadto sa kalibotan ni Satanas. Hinunoa, ang pagkamaunongon magtukmod kanato sa pagpaubos ug sa paghulat nga tin-awon ni Jehova ang mga butang.

Samtang Nagtuman sa Asaynment nga Gihatag sa Diyos

16. Unsang asaynment ang nadawat sa manalagna sa Juda?

¹⁶ Gihukman ni Jehova si Jeroboam tungod kay nahimo siyang apostata. Iyang gisugo ang usa ka manalagna sa Juda sa pag-adto sa Bethel, sa amihanan, ug sa pag-atubang kang Jeroboam samtang siya naghalad diha sa iyang halaran. Kinahanglang ipahayag sa manalagna ang mensahe sa paghukom batok kang Jeroboam. Lisod gayod kadto nga asaynment.​—1 Hari 13:1-3.

17. Sa unsang paagi gipanalipdan ni Jehova ang iyang mensahero?

¹⁷ Misilaob ang kasuko ni Jeroboam sa dihang nadungog niya ang paghukom ni Jehova. Iyang gisinggitan ang mga lalaki diha sa duol: “Dakpa ninyo siya!” Apan sa wala pa sila makahimog aksiyon, ang ‘kamot nga gipapunting [sa hari] batok [sa manalagna] mikuyos, ug wala na niya kini makungkong. Ug ang halaran napikas mao nga ang mantikaong mga abo nayabo gikan sa halaran.’ Si Jeroboam napugos sa paghangyo sa manalagna nga lukmayon si Jehova ug iampo siya nga maulian ang iyang kamot. Gibuhat kana sa manalagna, ug ang kamot sa hari naulian. Busa gipanalipdan ni Jehova ang iyang mensahero.​—1 Hari 13:4-6.

18. Sa unsang paagi si Jehova nanalipod kanato samtang kita maisogong naghatag kaniya ug sagradong pag-alagad?

¹⁸ Samtang kita maunongong nakigbahin sa  pagsangyaw sa Gingharian ug sa paghimog mga tinun-an, may mga panahon nga makasugat kitag mga tawo nga dili-mahigalaon, o masinupakon pa gani. (Mat. 24:14; 28:19, 20) Apan dili gayod nato tugotan kana nga magwagtang sa atong kadasig sa ministeryo. Sama sa wala-hinganli nga manalagna sa adlaw ni Jeroboam, kita adunay “pribilehiyo sa paghatag [kang Jehova] ug walay kahadlok nga sagradong pag-alagad uban ang pagkamaunongon.” a (Luc. 1:74, 75) Bisan tuod wala kita magdahom nga si Jehova manalipod kanato karon sa milagrosong paagi, siya nagabantay gihapon kanato ingong iyang mga Saksi pinaagi sa iyang balaang espiritu ug mga manulonda. (Basaha ang Juan 14:15-17; Pinadayag 14:6.) Dili gayod biyaan ni Jehova kadtong maisogong nagpadayon sa pagsulti sa iyang pulong.​—Filip. 1:14, 28.

Si Jehova Manalipod sa mga Maunongon Kaniya

19, 20. (a) Nganong makaseguro kita nga si Jehova dili gayod mobiya kanato? (b) Unsang mga pangutana ang hisgotan sa sunod nga artikulo?

¹⁹ Si Jehova mao ang atong maunongong Diyos. (Pin. 15:4; 16:5) Siya “maunongon sa tanan niyang mga buhat.” (Sal. 145:17) Ang Bibliya nagpasalig usab kanato: “Iyang bantayan ang dalan sa iyang mga maunongon.” (Prov. 2:8) Sa dihang nag-atubang ug mga pagsulay o naladlad sa impluwensiya sa mga apostata o sa dihang nagahimo sa usa ka malisod nga asaynment, ang mga maunongon sa Diyos makasalig sa giya ug tabang ni Jehova.

²⁰ Angay nato kining palandongon: Unsay motabang kanako sa pagpabiling maunongon kang Jehova bisan pa sa mga pagsulay o mga tentasyon nga hayan akong maatubang? Sa laing pagkasulti, sa unsang paagi ako makapabiling maunongon sa Diyos?

[Footnote]

Unsay Imong Tubag?

• Sa unsang paagi gipakita ni Jehova nga wala niya biyai ang mga maunongon kaniya sa dihang sila gidaogdaog?

• Unsay angay natong reaksiyon sa mga apostata ug sa ilang mga pagtulon-an?

• Sa unsang paagi nanalipod si Jehova sa mga maunongon kaniya samtang sila nakigbahin sa Kristohanong ministeryo?

[Mga Pangutana sa Pagtuon]

[Mapa/​Hulagway sa panid 5]

(Alang sa aktuwal nga pagkahan-ay, tan-awa ang publikasyon)

AMIHANANG GINGHARIAN (Jeroboam)

Dan

SEKEM

Bethel

HABAGATANG GINGHARIAN (Rehoboam)

JERUSALEM

[Hulagway]

Wala biyai ni Jehova ang mga maunongon kaniya sa dihang gipatuman ni Jeroboam ang pagsimba sa nating baka

[Hulagway sa panid 3]

Aron padayong matagamtam ang mga panalangin, dunay angayng buhaton si Solomon ug ang iyang mga ginsakpan