Zeova pa pou kit bann ki fidel avek li

“[Zeova] pa pou kit son bann fidel. Sirman zot pou ganny garde pour en letan endefini.”—PS. 37:28.

1, 2. (a) Dan dizyenm syek A.N.L., ki bann levennman ki ti teste fidelite bann serviter Bondye? (b) Ki sa trwa sitiasyon kot Zeova ti prezerv bann ki fidel avek li?

I TI dan dizyenm syek A.N.L. e ti’n ler pour bann serviter Zeova fer en desizyon. Bann tribi dan nor Izrael ti byen mekontan e pros pour konmans en lager sivil, me sa ti ganny evite ler zot ti ganny en serten lendepandans. Zot nouvo lerwa Yarobam ti azir deswit pour ranforsi son pouvwar par kree en nouvo larelizyon ofisyel pour sa nasyon. I ti demann son bann sitwayen pour soumet avek li antyerman. Ki bann serviter fidel Zeova ti pou fer? Eski zot ti pou reste fidel anver sa Bondye ki zot ti pe adore? I ti annan plizyer milye ki ti fer li e Zeova ti vey lo zot ler zot ti reste fidel anver li.—1 Rwa. 12:1-33; 2 Kron. 11:13, 14.

² Ozordi osi fidelite bann serviter Bondye pe ganny teste. Labib i averti: “Reste vizilan e vey byen. Zot lennmi, dyab pe pas partou konman en lyon ki kriye, pe rode ki i pou devore.” Eski nou pou kapab reisi “reste ferm dan lafwa e reziste li?” (1 Pyer 5:8, 9) Annou egzamin serten levennman ki ti arive apepre menm letan ki Lerwa Yarobam ti vin o pouvwar dan lannen 997 A.N.L. e vwar ki leson nou kapab tire. Dan sa bann letan difisil, bann serviter fidel Zeova ti pe soufer anba labi pouvwar. Zot ti osi an danze spirityelman ler zot ti pe desarz zot bann responsabilite difisil akoz zot ti kapab ganny enfliyanse par bann aposta. Dan sak sa bann sitiasyon, Zeova pa ti kit bann ki fidel avek li e i pa pou fer li osi ozordi.—Ps. 37:28.

Ler i annan labi pouvwar

3. Akoz lepep pa ti soufer par labi pouvwar anba renny Lerwa David?

³ Premyerman annou vwar dan ki sir­konstans Yarobam ti vin lerwa. Proverb 29:2 i dir: “Ler en dimoun mesan i dominen, lepep i soupire.” Anba renny Lerwa David, pep Izrael pa ti soupire. David pa ti parfe, me i ti fidel e annan konfyans dan Bondye. Son dominasyon pa ti fer soufer lepep. Zeova ti fer en lalyans avek David, i ti dir: “Ou lakaz ek ou rwayonm pou reste for pour en letan endefini devan ou; ou tronn li menm pou ganny solidman etablir pour en letan endefini.”—2 Sam. 7:16.

4. Pour Salomon eksperyans bann benediksyon pandan son renny, sa ti depan lo kwa?

⁴ O konmansman renny Salomon garson David, ti annan lape e prosperite. Sa ti byen reprezant sa Mil an ki Zezi Kris pou dirize. (Ps. 72:1, 17) Napa enn parmi sa 12 tribi Izrael ki ti annan rezon pour revolte sa letan. Me, sa benediksyon ki Salomon ek son bann sitwayen ti gannyen ti baze lo serten kondisyon. Zeova ti’n dir avek Salomon: “Si ou mars dapre mon bann lalwa, si ou akonplir mon bann zizman e si ou vreman gard tou mon komannman par swiv zot, alor mon pou vreman akonplir mon  parol ki mon’n dir avek David ou papa konsernan ou e mon pou reste parmi bann garson Izrael e mon pa pou kit mon pep Izrael.”—1 Rwa. 6:11-13.

5, 6. Ki ti arive ler Salomon ti vin enfidel anver Bondye?

⁵ Dan son vye zour, Salomon ti vin enfidel anver Zeova e i ti konmans partisip dan fo ladorasyon. (1 Rwa. 11:4-6) Ptitapti, Salomon ti aret obeir lalwa Zeova e i ti vin deplizanpli dir. I ti telman abiz son pouvwar ki menm apre son lanmor, lepep ti konplent avek son garson Reabam ki ti son sikseser e demann li pour donn zot soulazman. (1 Rwa. 12:4) Ki mannyer Zeova ti reazir ler Salomon ti vin enfidel?

⁶ Labib i dir nou: “Zeova ti ankoler avek Salomon akoz son leker ti’n elwannyen avek . . . Bondye Izrael, sa enn ki ti aparet de fwa avek li.” Zeova ti dir avek Salomon: “Akoz . . . ou pa’n gard mon lalyans ek lalwa ki mon ti donn avek ou konman en lord, san fot mon pou aras ou sa rwayonm e sirman mon pou donn li avek ou serviter.”—1 Rwa. 11:9-11.

7. Menm si Salomon ti ganny rezete, ki mannyer Zeova ti pran swen avek bann ki ti fidel avek Li?

⁷ Apre sa, Zeova ti anvoy profet Aiya pour swazir en lot dimoun pour delivre sa pep kont labi pouvwar Salomon. Se Yarobam ki ti ganny swazir pour delivre sa pep. I ti en travayer konpetan ki ti travay pour gouvernman Salomon ler i ti lerwa. Kantmenm Zeova ti reste fidel anver lalyans ki i ti fer avek David, I ti permet ki sa douz tribi i diviz an de group. Dis tribi ti pou ganny donnen avek Yarobam; de ti pou reste avek desandans David ki ti pe aprezan ganny reprezante par Lerwa Reabam. (1 Rwa. 11:29-37; 12:16, 17, 21) Zeova ti dir avek Yarobam: “E la sa ki devret arive, si ou obeir tou sa ki mon’n konmann ou e ou mars dan mon bann semen e ou vreman fer sa ki drwat dan mon lizye par gard mon bann lalwa ek komannman zis parey David mon serviter ti fer, alors mon pou vreman avek ou, e mon pou konstrir pour ou en lakaz ki pou dirab, parey mon’n fer pour David, e mon pou donn ou Izrael.” (1 Rwa. 11:38) Zeova ti azir an faver son pep e donn zot en fason pour zot ganny soulaze kont labi pouvwar.

8. Ki leprev pep Bondye i pas atraver ozordi?

⁸ Nou vwar labi pouvwar ek lenzistis preski partou ozordi. Eklezyast 8:9 i dir: “Zonm in domin zonm e sa in fer ditor zot menm.” Akoz bann biznesmenn ki voras ek bann gouvernman koronpi, kondisyon lekonomi i kapab vin difisil. Bann sef gouvernman, biznes ek relizye i souvan donn move legzanp. Alors parey Lot ki ti en zonm drwat, bann ki fidel avek Bondye dan nou letan i “byen sagrinen par kondwit deregle bann move dimoun.” (2 Pyer 2:7) An plis ki sa, malgre nou fer bokou zefor pour obeir bann standar Bondye, souvan nou ganny persekite par bann dirizan arogan.—2 Tim. 3:1-5, 12.

9. (a) Ki Zeova in fini deza fer pour delivre son pep? (b) Akoz nou kapab annan lasirans ki Zezi pou touzour fidel avek Bondye?

⁹ Kantmenm sa, nou kapab annan lasirans konsernan sa laverite enportan: Zeova pa pou kit bann ki fidel avek li! Zis mazin konsernan bann dispozisyon ki i’n fini deza pran pour ranplas sa bann dirizan koronpi dan sa lemonn. Rwayonm Bondye kot Kris pe dirize konman lerwa in fini deza ganny etablir. I pros pour fer san-t-an depi ki Zezi Kri pe rennyen dan lesyel. Byento i pou anmenn en soulazman total pour bann ki respekte non Bondye. (Lir Revelasyon 11:15-18.) Zezi in deza demontre son fidelite pour Bondye ziska lanmor. I pa pou zanmen dezapwent son bann sitwayen parey Salomon.—Ebr. 7:26; 1 Pyer 2:6.

10. (a) Ki mannyer nou kapab demontre ki nou apresye Rwayonm Bondye? (b) Ler nou pas atraver bann leprev, ki konfyans nou kapab annan?

¹⁰ Rwayonm Bondye i en vre gouvernman ki pou met en lafen avek tou labi pouvwar. Nou devret soumet antyerman zis avek Zeova ek son Rwayonm. Si nou annan konfyans total dan sa Rwayonm, nou pou abandonn latitid sa lemonn ki pa krwar dan Bondye e reste  determinen pour fer dibyen. (Tit 2:12-14) Nou bezwen fer bokou zefor pour reste pir dan sa lemonn. (2 Pyer 3:14) Nenport ki leprev nou kapab pe fer fas avek ozordi, nou kapab annan konfyans ki Zeova pou protez nou kont okenn danze spirityel. (Lir Psonm 97:10.) Deplis, Psonm 116:15 i asir nou ki “dan lizye Zeova lanmor son bann fidel i presye.” Bann serviter Zeova i telman presye pour li ki i pa pou les zot ganny detri konman en group.

Ler nou ekspoze avek lenfliyans bann aposta

11. Ki mannyer Yarobam ti vin enfidel?

¹¹ Renny Lerwa Yarobam ti pou’n kapab anmenn serten soulazman pour pep Bondye. Me o kontrer, son bann aksyon ti teste plis ankor fidelite lepep anver Bondye. Yarobam pa ti satisfe avek sa loner ek privilez ki i ti deza annan, i ti konmans rod lezot fason pour ganny plis pouvwar. I ti dir dan li menm: “Si sa pep i kontinyen mont Zerizalenm dan lakaz Zeova pour fer bann sakrifis, alor san fot leker sa pep pou retourn kot zot senyer Reabam lerwa Zida e sirman, zot pou touy mwan e retourn kot Reabam lerwa Zida.” Alor Yarobam ti form en nouvo larelizyon baze lo de pti bef annor. “Alors i ti met enn Betel e lot i ti met Dann. E sa keksoz ti fer ­lepep komet pese, e zot ti al ziska Dann pour ador enn. E i ti konmans fer en lakaz pour ladorasyon e fer bann dimoun parmi ­lepep an ­zeneral ki pa ti garson Levi vin bann pret.” Yarobam ti menm envant son prop zour “lafet pour bann garson Izrael” e i ti “ofer bann lofrann lo lotel pour fer lafimen sakrifisyel.”—1 Rwa. 12:26-33.

12. Ki bann ki ti fidel avek Bondye dan rwayonm nor ti fer ler Yarobam ti etablir ladorasyon pti bef an Izrael?

¹² Ki sa bann ki ti fidel avek Bondye dan rwayonm nor ti pou fer aprezan? Parey zot bann zanset ki ti fidel, sa bann Levit ki ti pe viv dan bann lavil ki zot ti’n gannyen dan sa teritwar dan rwayonm nor pa ti tarde pour reazir. (Egz. 32:26-28; Nom. 35:6-8; Det. 33:8, 9) Ansanm avek zot fanmir zot ti kit deryer zot leritaz e al dan sid, Zida, kot zot ti pou kapab ador Zeova san okenn lobstak. (2 Kron. 11:13, 14) Lezot Izraelit ki ti pe viv Zida tanporerman ti deside pour kontinyen reste laba olye retourn kot zot. (2 Kron. 10:17) Zeova ti donn sa zenerasyon ki ti pou vini plitar sorti dan rwayonm nor sa loportinite pour zot kapab retourn ver sa vre ladorasyon kot zot ti pou abandonn ladorasyon pti bef e retourn Zida.—2 Kron. 15:9-15.

13. Dan nou letan, ki mannyer lenfliyans ki bann aposta i annan in teste pep Bondye?

 ¹³ Bann Aposta ek zot lenfliyans i en danze pour pep Bondye ozordi. Serten dirizan in esey etablir zot prop larelizyon ofisyel e fors zot sitwayen pour aksepte li. Bann sef relizye ek lezot dimoun arogan in esey dir ki se zot sa “group pret rwayal.” Me i zis parmi bann vre Kretyen ki nou trouv sa bann ki’n vreman ganny swazir e ki form parti sa “group pret rwayal.”—1 Pyer 2:9; Rev. 14:1-5.

14. Ki mannyer nou devret reazir anver propagann bann aposta?

¹⁴ Parey bann Levit ki ti fidel dan letan pase dan dizyenm syek A.N.L., bann ki fidel avek Bondye ozordi pa les zot ganny tronpe par propagann bann aposta. Bann Kretyen swazir ek lezot Kretyen i azir vit pour rezet sa bann move pwennvi. (Lir Romen 16:17.) Antretan, nou volonterman soumet avek bann lotorite dan gouvernman dan bann keksoz ki annan pour fer avek lavi tou le zour e nou pa pran okenn kote dan bann konfli sa lemonn, parkont nou merit fidel zis anver Rwayonm Bondye. (Zan 18:36; Rom. 13:1-8) Nou devret rezet fo lakizasyon bann ki dir zot pe servi Bondye e ki an menm tan pe dezonnor li par zot kondwit.—Tit 1:16.

15. Akoz nou devret fidel anver “sa lesklav fidel e pridan”?

¹⁵ Mazin osi lefet ki Zeova in fer li posib pour bann dimoun senser sorti dan sa move lemonn, dan en fason senbolik, pour antre dan sa paradi spirityel ki i’n kree. (2 Kor. 12:1-4) Avek en leker ranpli avek rekonnesans, nou devret reste pros avek “sa [“lesklav fidel e pridan, NW”] ki son met in plas ansarz tou lezot serviter pour donn zot zot manze kan i ler.” Kris in met sa lesklav “ansarz tou son byen.” (Mat. 24:45-47) Alors, menm si personnelman nou pa vreman konpran en serten desizyon ki ganny pran par sa lesklav, nou napa okenn rezon pour rezet sa desizyon oubyen retourn dan lemonn Satan. O kontrer, nou fidelite pou pous nou pour azir avek limilite e esper Zeova pour donn leklersisman lo tou keksoz.

Ler nou pe fer sa travay ki Bondye in donn nou

16. Ki travay en profet ki ti sorti Zida ti ganny demande pour fer?

¹⁶ Zeova ti kondann Yarobam akoz i ti rezet sa vre ladorasyon. I ti swazir en profet ki ti sorti Zida pour al dan nor ziska Betel pour vwar Yarobam pandan ki i ti pe ofer lafimen sakrifisyel kot son lotel. Sa profet ti’n vin kot Yarobam pour anons li en mesaz zizman ki ti sever. San okenn dout, sa pa ti en travay fasil.—1 Rwa. 13:1-3.

17. Ki mannyer Zeova ti protez son mesaze?

¹⁷ Yarobam ti ankoler ler i ti tann sa kondannasyon sorti kot Zeova. I ti lev son lanmen pour atrap sa reprezantan sorti kot Bondye, i ti kriy avek bann zonm ki ti lanmenm obor: “Atrap li!” Me sa menm moman avan ki okenn dimoun ti kapab azir, sa “lanmen ki i ti’n anvoye pour atrap li ti vin sek, e i pa ti kapab fer li retourn ver li. E lotel ti kas an de, lasann gra ki ti lo lotel ti fannen.” Yarobam ti forse fer sa profet demann Zeova pardon pour li e priye ki son lanmen sek i revin byen. Sa profet ti priy Zeova e son lanmen ti geri. Alor Zeova ti protez son mesaze pour li pa ganny okenn dimal.—1 Rwa. 13:4-6.

18. Ki mannyer Zeova i protez nou kan nou ofer li en servis sakre san okenn lafreyer?

¹⁸ Anmezir ki nou fidelman partisip dan sa travay predikasyon e fer disip, parfwa nou  rankontre dimoun ki pa reazir dan en fason amikal oubyen menm bann ki reazir dan en fason vyolan. (Mat. 24:14; 28:19, 20) Me nou pa devret les lafreyer ki dimoun i rezet nou fer nou devouman pour predikasyon diminyen. Parey sa profet dan letan Yarobam ki nou pa konn son non, nou annan sa “privilez pour ofer [Zeova] en servis sakre san lafreyer avek fidelite.” * (Lik 1:74, 75, NW) Menm si ozordi nou pa ekspekte ki Zeova i entervenir pour fer mirak, i ankor pe protez nou konman son bann Temwen atraver son lespri sen ek son bann lanz. (Lir Zan 14:15-17; Revelasyon 14:6.) Bondye pa pou zanmen abandonn bann ki kontinyen anons son parol san okenn lafreyer.—Fili. 1:14, 28.

Zeova pou protez bann ki fidel avek li

19, 20. (a) Akoz nou kapab annan lasirans ki Zeova pa pou zanmen kit nou? (b) Ki kestyon nou pou diskite dan lartik swivan?

¹⁹ Zeova i nou Bondye ki fidel. (Rev. 15:4; 16:5) I “fidel dan tou son travay.” (Ps. 145:17) E Labib i donn nou sa lasirans: “I pou protez semen son bann fidel.” (Prov. 2:8) Ler zot pas atraver bann leprev oubyen ekspoze avek propagann bann aposta, oubyen zot ganny konfye avek en travay difisil, bann ki fidel avek Bondye i kapab annan konfyans ki Zeova pou siport e gid zot.

²⁰ Sa ki sakenn de nou i bezwen reflesir lo la aprezan i sa kestyon swivan: Kwa ki pou ed mwan reste fidel anver Zeova malgre bann leprev oubyen tantasyon ki mon kapab gannyen? Andotmo, ki mannyer mon kapab ogmant mon fidelite anver Bondye?

[Not anba lo paz]

Ki ou pou reponn?

• Ki mannyer Zeova ti demontre ki i pa ti kit bann ki ti fidel avek li ler zot eksperyans labi pouvwar?

• Ki mannyer nou devret reazir anver bann aposta e zot propagann?

• Ki mannyer Zeova i protez bann ki fidel avek li ler zot pe partisip dan predikasyon?

[Kestyon]

[Map lo paz 10]

(For fully formatted text, see publication)

RWAYONM NOR (Yarobam)

Dann

SEKENM

Betel

RWAYONM SID (Reabam)

ZERIZALENM

[Picture]

Zeova pa ti abandonn bann ki ti fidel avek li ler Yarobam ti entrodwir ladorasyon pti bef

[Picture on page 8]

Benediksyon ki Salomon ek son bann sitwayen ti gannyen ti baze lo serten kondisyon