Jehová ndohejamoʼãi arakaʼeve umi iñeʼẽrendúvape

‘Jehová ndohejaichéne umi iñeʼẽrendúvape. Opa ára g̃uarã oñangarekóta hesekuéra.’ (SAL. 37:28.)

1, 2. a) Mbaʼépa oikovaʼekue yma Ñandejára siervokuérare? b) Mbaʼéicha javépa Jehová ndohejaivaʼekue isiervokuéra iñeʼẽrendúvape?

 YMA Jesús ou mboyve, Ñandejára siervokuéra odesidivaʼerã peteĩ mbaʼe iñimportantetereíva. Israélpe oikomoʼãvaʼekue peteĩ ñorairõ guasu, ha ani hag̃ua oiko upéva oñemosãso umi diez trívu norteyguápe. Péro Jeroboán, pe rréi norteygua omombaretese igoviérno, upévare omoĩ peteĩ rrelihión pyahu ha oipota enterove omombaʼe ha iñeʼẽrendu chupe añoite. Mbaʼépa ojapóta Jehová siervokuéra? Iñeʼẽrendútapa chupe? Hetaiterei ningo oĩ iñeʼẽrendúva Jehovápe, upévare Haʼe oñangareko ha oipytyvõ chupekuéra (1 Rey. 12:1-33; 2 Cró. 11:13, 14).

² Koʼág̃a rupi, oĩ avei heta ndoipotáiva Ñandejára siervokuéra iñeʼẽrendu Chupe. La Biblia heʼi: ‘Peikokuaákena ha peñeñangareko, Satanás oikógui peteĩ león pochýicha pende jerére oheka mávapepa hoʼúta’. Ikatútapa ñañemoĩ Satanás rehe ñamombaretéramo ñande jerovia? (1 Ped. 5:8, 9, BNP) Ñambohovái hag̃ua ko porandu, jahechamíta umi mbaʼe oikovaʼekue Jeroboánre oñemoĩrõ guare chupe rréiramo. Upéva oiko áño 997-pe Jesús ou mboyve, ha jahecháta mbaʼépa ikatu ñanemboʼe upe oikovaʼekue. Upe tiémpope Jehová siervokuérape oñembohasa asy. Avei umi apóstata ombotavyse chupekuéra, ha ojapovaʼerã hikuái Jehová heʼíva ijetuʼúramo jepe. Péro Jehová ndohejaivaʼekue isiervokuéra iñeʼẽrendúvape, ha koʼág̃a nañanderejamoʼãi avei (Sal. 37:28).

Jehová siervokuéra ohasa asy jave

3. Mbaʼérepa ndaiporivaʼekue ohasa asýva David oisãmbyhy aja?

³ Jahechamína mbaʼépa oikovaʼekue oñemoĩ hag̃ua Jeroboánpe rréiramo. Proverbios 29:2-pe heʼi: ‘Iñañáva oisãmbyhy aja, hetãyguakuéra ohasa asy’. David iñimperféktoramo jepe iñeʼẽrenduvaʼekue Jehovápe ha ojerovia hese. Upévare haʼe oisãmbyhy aja ndaiporivaʼekue ohasa asýva. Jehová opromete Davídpe: ‘Nde rogaygua ha ne retã rehe añangarekóta ha regovernáta opa ára g̃uarã’ (2 Sam. 7:16).

4. Mbaʼépa Jehová heʼi Salomónpe ojapo hag̃ua oipotáramo akóinte ovendesi chupekuéra?

⁴ David rire, oisãmbyhy itaʼýra Salomón, ha ogoverna ñepyrũme ojeiko pyʼaguapýpe ha opavave oiko porãiterei. Ha péicha ohechauka mbaʼéichatapa Jesucristo ogoverna vove (Sal. 72:1, 17). Umi doce trívu Israelgua ndorekói mbaʼérepa opuʼã hag̃ua Salomón rehe. Péro Salomón ojapovaʼerã peteĩ mbaʼe oipotáramo Jehová akóinte ovendesi chupe ha hetãyguápe. Heʼi chupe: ‘Nde reikóramo che ñeʼẽme heʼiháicha ha rejapo che rembipota, ha reikóramo che aipotaháicha, che ajapóta opaite mbaʼe haʼevaʼekue nde ru Davídpe. Upéicha Che aikóta Israelgua apytépe ha ndahejamoʼãi che retãygua Israélpe’ (1 Rey. 6:11-13, ÑÑB).

5, 6. Mbaʼépa oiko Salomón naiñeʼẽrenduvéi haguére Jehovápe?

⁵ Péro, Salomón ituja rire naiñeʼẽrenduvéi  ha omombaʼeguasu umi ñandejára guaʼúpe (1 Rey. 11:4-6). Mbeguekatúpe ndojapovéima Jehová heʼíva ha oiko chugui peteĩ mburuvicha ojopyetereíva hapichándi. Upéicha rupi haʼe omano rire, umi Israelgua ojekeha itaʼýra Rehoboámpe, ha ojerure chupe anivemínte hag̃ua ombohasa asy chupekuéra (1 Rey. 12:4). Mbaʼépa oiko Salomón naiñeʼẽrenduvéi haguére Jehovápe?

⁶ La Biblia heʼi: ‘Jehová ipochy Salomón rehe omboyke haguére chupe’. Upévare heʼi Salomónpe: ‘Reñemomombyrýgui chehegui ha nderejapovéigui reprometevaʼekue chéve, aipeʼáta ndehegui ne rréino ha ameʼẽta ne rembiguáipe’ (1 Rey. 11:9-11, ÑÑB).

7. Jehová omboykéramo jepe Salomónpe, mbaʼépa ojapo omosãso hag̃ua isiervokuérape?

⁷ Upéicha Jehová omboyke Salomónpe, ha upe rire omondo proféta Ahíyape omoĩ hag̃ua peteĩ mburuvicha pyahu omosãso hag̃ua isiervokuérape. Upe mburuvicha pyahu ningo Jeroboán, peteĩ kuimbaʼe ikatupyryetereíva ombaʼapovaʼekue Salomónpe g̃uarã. Jehová ndahesaráiriramo jepe upe oprometéva Davídpe, oheja ojedividi Israel goviérno péicha: diez trívu oĩta Jeroboán poguýpe, ha dos katu opytáta umi David rogaygua poguýpe, omoakãva rréi Rehoboam (1 Rey. 11: 29-37; 12:16, 17, 21). Jehová heʼi Jeroboánpe: ‘Neñeʼẽrenduvaʼerã opaite mbaʼépe, reiko che rapére, ha rejapo iporãva. Rejapovaʼerã che haʼéva ha che rembipota che rembiguái David ojapo haguéicha. Upéicharõ, che aiméta avei nendive ha amopuʼãta ndéve g̃uarã nde róga amopuʼã haguéicha David róga, ha che ameʼẽta ndéve nembaʼerã Israel’ (1 Rey. 11:38). Jehová oñangareko isiervokuérare ha oguenohẽ chupekuéra jejopy vaígui.

8. Mbaʼépa ombohasa asy Jehová siervokuérape koʼág̃a rupi?

⁸ Koʼág̃a rupi oĩ avei heta oporombohasa asýva ha ojapóva mbaʼe vai hapicháre. Eclesiastés 8:9-pe heʼi: ‘Umi mburuvicha ningo oiporu ipuʼaka ojapo hag̃ua ivaíva hapicháre’. Heta goviérno ha komersiánte ningo imondaiterei ha upévare hetaiterei oĩ imboriahúva. Ha umi omoakãva polítika, rrelihión ha umi empresariokuéra heko kyʼa. Jehová siervokuérape oipyʼapy ‘ohechávo mbaʼéichapa umi hénte heko kyʼa’, oiko haguéicha Lot tiémpope (2 Ped. 2:7). Péro ñañehaʼãramo jepe jaiko Ñandejára Ñeʼẽ heʼiháicha ha ndajajapói ivaíva ñande rapicháre, pyʼỹinte umi mburuvicha ñandepersegi (2 Tim. 3:1-5, 12).

9. a) Mbaʼépa Jehová ojapóma isiervokuéra rehehápe? b) Mbaʼérepa jajeroviakuaa Jesús iñeʼẽrendutaha Jehovápe opa ára g̃uarã?

⁹ Upéicharamo jepe, jajeroviakuaa Jehová ndohejamoʼãiha arakaʼeve isiervokuéra iñeʼẽrendúvape. Ñapensamínte umi mbaʼe Jehová ojapómavare oipeʼa hag̃ua umi goviérno oĩva ko múndo añáme. Haʼe ningo omoĩma Jesucrístope rréiramo. Ojapóma cien áño rupi oisãmbyhyhahína yvágape. Jesús koʼẽrõitéma osalváta umi omombaʼévape Ñandejára réra (jaleemína Revelación 11:15-18). Jesús ojapo Jehová heʼíva omano meve, upévare jajeroviakuaa hese iñeʼẽrendutaha opa ára g̃uarã. Haʼe ndofallamoʼãi hembiguaikuéra ndive Salomón ojapo haguéicha. Jesús katuete ojapopaitéta oprometevaʼekue (Heb. 7:26; 1 Ped. 2:6).

10. a) Mbaʼéichapa jahechauka ñamombaʼeha Ñandejára Rréino? b) Tahaʼe haʼéva upe jahasavañaína, mbaʼe rehépa ikatu jajerovia?

¹⁰ Ñandejára Rréino ohundipaitéta opa mbaʼe ñanembohasa asýva. Upévare jahechauka hag̃ua ñamombaʼeha ko goviérno ñañemoĩvaʼerã ipoguýpe ha ñaneñeʼẽrendu Jehovápe. Ha jajerovia rupi Ñandejára Rréinore, ñamboyke umi mbaʼe vai oĩva ko múndo añáme ha jajapo iporãva (Tito 2:12-14). Upéicha avei ndajajeheʼái ko múndore (2 Ped. 3:14). Tahaʼe haʼéva upe jahasavañaína, ikatu jajerovia Jehová oñangarekotaha ñanderehe ani hag̃ua ikangy ñande jerovia (jaleemína Salmo 97:10). Salmo 116:15-pe heʼi avei ñandéve: “Ñandejára ombyasy ohechávo omano umi hese ojeroviáva”. Péicha jahecha Jehová omombaʼetereiha isiervokuérape ha ndohejamoʼãiha oñehundi chupekuéra.

 Umi apóstata ñanembotavyse jave

11. Mbaʼe ivaívapa ojapo Jeroboán?

¹¹ Rréi Jeroboán ikatuvaʼerãmoʼã oipytyvõ Jehová siervokuérape. Péro upéva rangue, ojapo heta mbaʼe vai ha ojopy chupekuéra ani hag̃ua iñeʼẽrendu Jehovápe. Jeroboán ningo noñekontentái oñemoĩ haguére chupe rréiramo, ha oñehaʼã omombareteve igoviérno. Jeroboán heʼi péicha: ‘Umi Israelgua ohóramo Jerusalénpe omeʼẽ hag̃ua sakrifísio Jehovápe, ohayhu jeýne hikuái Rehoboámpe, mburuvicha guasu Judapegua, ha chejukáne oho jey hag̃ua hendive.’ Upévare Jeroboán omoñepyrũ peteĩ rrelihión pyahu, ha omoĩ oñemombaʼeguasu hag̃ua mokõi tororaʼy raʼanga. Ha peteĩ taʼanga ‘omoĩ Betélpe ha ambue Dánpe. Péicha umi Israelgua hembiapo vai, oĩgui ohóva Dánpe omombaʼeguasu hag̃ua upe taʼanga. Ha omopuʼã avei óga ijyvateha rupi ha oiporavo saserdoterã umi hénte apytégui, umi ndahaʼéiva Leví familiare’. Upe rréi pyahu omoñepyrũ avei ‘peteĩ arete guasu umi Israelguápe g̃uarã’ ha ‘ohapy insiénso altár ári’ (1 Rey. 12:26-33).

12. Mbaʼépa ojapo Jehová siervokuéra iñeʼẽrendúva oikóva Jeroboán ogovernahápe?

¹² Mbaʼépa ojapo Jehová siervokuéra iñeʼẽrendúva oikóva Jeroboán ogovernahápe? Umi levíta oikóva nórte gotyo iñeʼẽrendu Jehovápe, ojapo haguéicha umi Ñandejára siérvo ypykue (Éxo. 32:26-28; Núm. 35:6-8; Deu. 33:8, 9). Oheja umi táva oñemeʼẽvaʼekue chupekuéra oiko hag̃ua ha ova ifamiliakuéra ndive Judápe sur gotyo. Upépe omombaʼeguasúta hikuái Jehovápe (2 Cró. 11:13, 14). Ha umi diez trivuygua oiko sapyʼa vaʼekue Judápe katu odesidi opytánte upépe (2 Cró. 10:17). Heta áño rire jepe Jehová oheja umi norteygua oserviséva chupe ova Judápe (2 Cró. 15:9-15).

13. Mbaʼépa ojapo koʼág̃a umi apóstata ñanemboykese rupi Jehová rapégui?

¹³ Koʼág̃a ningo umi apóstata ñanemboykese avei Jehová rapégui. Upévare oĩ mburuvicha omoĩva peteĩ rrelihiónte ojesegi hag̃ua hetãme ha mbaretépe omoingese hentekuérape upe rrelihiónpe. Umi rrelihión japu omoakãva ha ambue tapicha oporombotavyséva katu heʼi, haʼekuéra oisãmbyhytaha Ñandejára Rréinope. Péro jaikuaa porã Jehová oiporavoha ijespíritu rupive umi oisãmbyhýtavape Jesús ndive (1 Ped. 2:9; Rev. 14:1-5).

14. Mbaʼépa ojapo koʼág̃a rupi Jehová siervokuéra ani hag̃ua ombotavy chupekuéra umi apóstata?

¹⁴ Koʼág̃a rupi, Jehová siervokuéra ndohejái ombotavy chupekuéra umi apóstata, umi Leví familiare ojapo haguéicha yma. Upévare umi ungido ha iñirũnguéra pyaʼe omboyke umi apóstata heʼíva (jaleemína Romanos 16:17). Ñaneñeʼẽrendúramo jepe mburuvichakuérape heta mbaʼépe,  ndajajeheʼái ko múndore. Ñamotenonde Ñandejára Rréino ha jajepytaso mbarete ijykére (Juan 18:36; Rom. 13:1-8). Avei nañahendúi umi heʼívape ijehe oserviha Ñandejárape, péro ndojapóiva hembipota (Tito 1:16).

15. Mbaʼérepa ñaneñeʼẽrenduvaʼerã pe ‘tembiguái jeroviaha ha iñarandúvape’?

¹⁵ Ñande ningo jahechakuaa Jehová oipytyvõha umi ipyʼaporãvape omboyke hag̃ua ko múndo aña ha omombaʼeguasu chupe (2 Cor. 12:1-4). Jaagradesékena Jehovápe upévare ha ñaneñeʼẽrendu pe ‘tembiguái jeroviaha ha iñarandúvape’. Jesucristo omoĩ rupi ko tembiguái ‘poguýpe opa mbaʼe oguerekóva’ ha péicha ñanepytyvõ ñamombarete hag̃ua ñande jerovia (Mat. 24:45-47). Upévare, nañantendéiramo jepe peteĩ mbaʼe heʼíva pe tembiguái jeroviaha, ndovaléi ñamboyke ha jaha Satanás múndope. Ñaneñeʼẽrendúramo ñaneumíldeta ha jahejáta Jehová omyesakã umi mbaʼe.

Oñemeʼẽ jave ñandéve ñane rembiaporã ijetuʼuetereíva

16. Maʼerãpa Jehová omondo peteĩ proféta Judeaygua Betélpe?

¹⁶ Jehová okastiga Jeroboánpe oñemoĩ haguére hese. Omondo peteĩ proféta Judeaygua Betélpe ogueraha hag̃ua chupe peteĩ mensáhe oikuaveʼẽ jave sakrifísio altár ári. Ha oiméne ijetuʼurakaʼe upe profétape heʼi hag̃ua Jeroboánpe Jehová okastigataha chupe (1 Rey. 13:1-3).

17. Mbaʼéichapa Jehová oñangareko iprofétare?

¹⁷ Jeroboán ohendúvo upe proféta heʼíva ipochyeterei. Oipyso ipo pe proféta gotyo ha heʼi hembiguaikuérape: ‘Pejagarrapy chupe!’. Péro ojagarra mboyve chupe hikuái, ‘ipo oipysovaʼekue ijypi chugui, hatãmba ha ndaikatuvéi omonguʼe. Ha pe altár ojeka ha oñehẽmba chugui tanimbu’. Upémaramo Jeroboán heʼi pe profétape ojerure hag̃ua Jehovápe omongueramínte hag̃ua chupe. Pe proféta oñemboʼe, ha Jeroboán okuera. Péicha jahecha Ñandejára oñangarekoha iprofétare (1 Rey. 13:4-6).

18. Mbaʼéichapa Jehová oñangareko ñanderehe?

¹⁸ Heta vése jajuhu nañanerenduséiva térã ijarhélva japredika ha ñaporomboʼe jave (Mat. 24:14; 28:19, 20). Aníkena jakyhyjégui ndajapredikavéi kyreʼỹme. Ñande ningo ikatu ‘jaservi Jehovápe pyʼaguasúpe ha hekoitépe’, pe proféta ojapo haguéicha oñeʼẽrõ guare Jeroboánpe (Luc. 1:74, 75). * Nañahaʼarõiramo jepe Jehová ojapo peteĩ milágro ñane tiémpope, haʼe oñangareko ñanderehe ha ñanepytyvõ ijespíritu ha hiʼanhelkuéra rupive (jaleemína Juan 14:15-17; Revelación 14:6). Jehová ningo ndohejamoʼãi arakaʼeve isiervokuéra kyhyjeʼỹme opredikávape (Fili. 1:14, 28).

Jehová oñangarekóta isiervokuéra iñeʼẽrendúvare

19, 20. a) Mbaʼérepa ikatu jajerovia Jehová nañanderejamoʼãiha arakaʼeve? b) Mbaʼe porandúpa ñambohováita pe artíkulo oúvape?

¹⁹ Jehová ningo hekojoja opa mbaʼépe (Rev. 15:4; 16:5). Upéva ojehecha avei hembiapokuére (Sal. 145:17). Ñandejára Ñeʼẽ heʼi voi: ‘Haʼe oñangarekohína umi hese ojeroviávare’ (Pro. 2:8). Umi iñeʼẽrendúva Jehovápe oikuaa porã Haʼe oipytyvõtaha ha ohechaukataha chupekuéra haperã. Tahaʼe ohasa asy jave térã ombotavyse jave chupekuéra umi apóstata, térã ojapo jave umi tembiapo ijetuʼúva.

²⁰ Ñande ñañeporanduvaʼerã: “Mbaʼépa ikatu chepytyvõ cheñeʼẽrendu hag̃ua Jehovápe ahasa asy jave térã Satanás chemoñuhãse jave?”. Térã: “Mbaʼéichapa ikatu cheñeʼẽrendu Jehovápe che pyʼaite guive?”.

[Nóta]

Mbaʼépa ñambohováita?

• Mbaʼéichapa Jehová ohechaukavaʼekue ndohejaiha isiervokuéra iñeʼẽrendúvape ohasa asy jave?

• Mbaʼépa jajapovaʼerã umi apóstata ñanembotavyséramo?

• Mbaʼéichapa Jehová oñangareko isiervokuéra iñeʼẽrendúvare opredika jave?

[Porandu ñahesaʼỹijóva]

[Mápa oĩva páhina 11-pe]

(Emaña pe kuatiañeʼẽre rehecha hag̃ua osẽ hagueichaite ko párte)

RRÉINO NORTEYGUA (Umi diez trívu)(Jeroboán)

Dan

SIQUEM

Betel

RRÉINO SURGUA (Judaygua)(Rehoboam)

JERUSALÉN

[Taʼanga]

Jehová ndohejaivaʼekue isiervokuéra iñeʼẽrendúvape, Jeroboán omoñepyrũrõ guare peteĩ rrelihión pyahu

[Nóta oĩva taʼanga ndive páhina 9]

Jehová heʼi Salomónpe mbaʼépa ojapovaʼerã ovendesi hag̃ua chupe ha hetãyguápe