Yehova Kakalekelelapo Bapandulwe’mo Bandi

‘Yehova kakalekelelapo bapandulwe’mo bandi; balelelwe nyeke.’—MIT. 37:28.

1, 2. (a) Lelo i ngikadila’ka yātūdile pa ditompo bengidi ba kikōkeji ba Leza mu myaka katwa ka dikumi K.K.K? (b) Yehova ulamanga ba kikōkeji bandi mu ngikadila’ka isatu?

 TUDI mu mwaka wa katwa ka dikumi K.K.K. kadi i kitatyi kya kukwata butyibi. Bana na bana badi basaka kulwa divita, ino abaepuka’dyo na kupa bisaka bya kungala bya Isalela bwanapabo. Yeloboame mulopwe wabo mupya, wepangila kukomeja bulopwe bwandi na kutūla’ko mutōtelo mupya wa Leta. Wanena babikalwa bandi bonso batwele’mo. Le bengidi ba Yehova ba kikōkeji bakalonga namani? Lelo bakakōkela nyeke Leza wabo obatōta? Eyo, bavule bākōkele, Yehova nandi webakinga ponso pobādi balamine bululame bwabo.—1 Bal. 12:1-33; 2 Bil. 11:13, 14.

² Bengidi ba Yehova ba kikōkeji ba dyalelo nabo batompibwanga. Bible udyumuna’mba: “Tūkijai mityima, tengelai, wimushikilwe, ke dyabola kadi, unangakana bwa ntambo ubuluma, ukimba wakubokota.” Lelo tubwanya kumukomena na “bukankamane bwa mu kwitabija” kwetu? (1 Pet. 5:8, 9) Pano tubandaulei binkumenkume byāfikile pa kubikikwa kwa Mulopwe Yeloboame mu mwaka wa 997 K.K.K. kadi tutalei i ñeni’ka yotuboila’ko. Mu yoya myaka ya malwa, bengidi ba kikōkeji ba Yehova bāsusukile. Bādi bajokolokwe na batupondo, abo’ko bavuija biselwa byabo bikomo. Mu ino ngikadila yonso Yehova kālekelelepo bapandulwe’mo bandi, ne dyalelo nadyo kakebalekelelapo.—Mit. 37:28.

Pobasusulwa

3. Mwanda waka bulopwe bwa Davida kebwādipo bwa kasusu?

³ Dibajinji, tubandaulei ngikadila yāfikije Yeloboame ku kubikala. Tutanga mu Nkindi 29:2 amba: “Mubi pa kulela bantu ke babinze.” Bantu kebādipo babinza pādi Davida bu mulopwe wa Isalela wa kala. Davida kādipo mubwaninine, ino’ko wādi na kikōkeji kadi wādi umukulupile. Bulopwe bwa Davida kebwādipo bwa kasusu. Yehova wāsambile kipwano na Davida amba: “Njibo yobe ne bulopwe bobe bikakankamikibwa po-o nyeke ne nyeke ku meso obe; kipona kyobe kikakomejibwa nyeke.”—2 Sam. 7:16.

4. I bika byādi bya kuleta madyese mu bulopwe bwa Solomone?

⁴ Bulopwe bwa Solomone mwanā Davida bwādi dibajinji bwa ndoe ne ntundubuko, o mwanda bwādi bwelekeja senene Umbikalo ukāya’ko wa Myaka Kanunu wa Yesu Kidishitu. (Mit. 72:1, 17) Kekwādipo muntu nansha umo wa mu bisaka 12 wādi na bubinga bwa kutomboka. Inoko, Solomone ne bantu bandi bādi ba kweselwa ponso pobādi bakōkele. Yehova wālombwele Solomone amba: “Shi wende mu bitūngo byami, ne kulonga misoñanya yami ne kulama bijila byami byonso ne kunanga monka; nabya nkafikijanga mwanda wami kodi, o nanenena shobe Davida. Ebiyampe nkekalanga umbukata mwa bāna ba Isalela,  ino nkikelelelapo bantu bami bene Isalela, mhm.”—1 Bal. 6:11-13.

5, 6. Solomone pa kuleka kukōkela Leza, lelo byāikele namani?

⁵ Solomone pa kununupa, wābulwa kikōkeji kudi Yehova ne kushilula wāshilula kutōta bilezaleza. (1 Bal. 11:4-6) Bityebitye, Solomone wāleka kukōkela ku bijila bya Yehova ne kwikala na kasusu. Kino kyo kyālengeje, aye pa kufwa bantu bātompola ne kwabija wandi mwana mpyana Lehaboma ebapeleleje’ko lupungu. (1 Bal. 12:4) I bika byālongele Yehova pābudilwe Solomone kikōkeji?

⁶ Bible witulombola’mba: “Yehova wafunina Solomone bulobo, mwanda mutyima wandi wadi muvundamine kudi . . . Leza wa Isalela, wesokwele kwadi misungu ibidi.” Penepa Yehova wānena Solomone amba: “Ke-wi-muntu . . . abe kulaminepo kipwano kyami ne bitūngo byami byo nakusoñenye, nami nanshi nkasananga bulopwe kodi, i binebine ino nkapana’bo kudi mwingidi obe.”—1 Bal. 11:9-11.

7. Nansha Yehova byaāpelele Solomone, i muswelo’ka waālelele bantu bandi ba kikōkeji?

⁷ Ebiya Yehova wātuma mupolofeto Ahiya kukashinga munyongolodi māni. Uno munyongolodi i Yeloboame, nkanka wāingile mu bulopwe bwa Solomone. Nansha Yehova byaāshele mulamate ku kipwano kya bulopwe kyaāsambile na Davida, ino wāitabije kwilala kwa bisaka 12. Bisaka 10 byāpelwe Yeloboame; bibidi nabyo byashala ku musuku wa Davida, na Mulopwe Lehaboma. (1 Bal. 11:29-37; 12:16, 17, 21) Yehova wānene Yeloboame amba: “Penepa kikekalanga namino, shi wivwana ku byonsololo byo nakusoñanya, ne kukaswa kunanga mu mashinda ami, ne kulonga kyokya kyoloke mu meso ami, kulama bitūngo byami ne bijila byami, mwalongele Davida mwingidi wami; nankyo nkekalanga nobe, nkakushimikila njibo mikomo, mo neishimikile Davida, kabidi nkapana Isalela kodi.” (1 Bal. 11:38) Yehova wāivwene kudila kwa bantu bandi ebiya wāsendulula myanda mwa kwibanyongolwela ku kasusu.

8. Le i bikoleja’ka bisusula bantu ba Leza dyalelo?

⁸ Masusu ne bukondame bibavula dyalelo. Musapudi 8:9 unena’mba: “Kudi kitatyi kya kulela muntu pa muntu mukwabo ne kwisanshija ponka.” Busunga bwa lwiso ne bulopwe boneke bibwanya kuponeneja bantu bavule mu bufudile. Divule balopwe, bansunga, ne bendeji ba bipwilo bekalanga boneke. O mwanda pamo bwa Lota, bengidi ba Leza ba kikōkeji ba dyalelo bafitwanga “mutyima nyeke pa mwanda wa mwikadilo umbi wa boba bantu bakondame.” (2 Pet. 2:7, Myanda Miyampe ku Bonso) Kadi, ponso potulonda misoñanya ya Leza, twikalanga ba tuvukwa-mpuya ba bendeji ba kibengo.—2 Tem. 3:1-5, 12.

9. (a) Yehova ke mulonge kala bika mwanda wa kunyongolola bantu bandi? (b) Mwanda waka tukulupile amba Yesu ukakōkela nyeke Leza?

⁹ Tubwanya nanshi kwitabija buno bubinebine bwa’mba: Yehova kakalekelelapo bantu bapandulwe’mo bandi! Langa’po bidi bintu byakadi mulonge mwanda wa kupingakanya bendeji boneke ba ntanda. Bulopwe bwa Leza bwendejibwa na Yesu Kidishitu ke bushimikwe kala. Yesu Kidishitu i mubikale kala pano ke kintu kya myaka katwa. Panopano ponka usa kunyongolola lonso boba bakaminwe dijina dya Leza. (Tanga Kusokwelwa 11:15-18.) Yesu wākōkele Leza kufika’nka ne ku lufu. Kakālamukapo babikalwa bandi na mwaālamukile Solomone.—Bah. 7:26; 1 Pet. 2:6.

10. (a) Lelo tukalombola namani amba tulēmekele Bulopwe bwa Leza? (b) Lelo i bika byotukakulupila potudi mu matompo?

¹⁰ Bulopwe bwa Leza i umbikalo wa bine ukapwa masusu onso. Tufwaninwe kukōkela enka Yehova Leza ne Bulopwe bwandi. Tupelanga bumpikwa bwine-Leza bwa ntanda, ino tupyasakenanga mu mingilo milumbuluke na kikulupiji kyonso mu Bulopwe. (Tet. 2:12-14) Tuloñanga bukomo bwa kushala bakubulwa kiko mu ino ntanda. (2 Pet. 3:14) Nansha shi tutanwe na matompo a muswelo’ka, tukulupile amba Yehova uketukinga ku kyaka kya ku mushipiditu.  (Tanga Mitōto 97:10.) Kadi Mitōto 116:15 itukulupija’mba: “I luleme ku meso a Yehova lufu lwa bapandulwemo bandi.” Bengidi ba Yehova i balēme ku meso andi, o mwanda kakalekapo batukile kipukwi.

Pobajokolokwa na Batupondo

11. Lelo Yeloboame wābudilwe kikōkeji namani?

¹¹ Mulopwe Yeloboame wādi wa kupwija masusu a bantu ba Leza. Ino yō, bilongwa byandi byātūdile pa ditompo kikōkeji kya bantu ba Leza. Yeloboame kāsangedilepo bulēme ne kyepelo kyaāpelwe, ino wāshilula kukimba mwa kukomejeja bulopwe bwandi. Wālanga’mba: “Shi bantu bano’ba bakanda kwela bitapwa mu njibo ya Yehova pa Yelusalema, nankyo nabya mutyima wa bantu bano bakavundamukila kudi mfumwabo, ke kudi Lehaboma mulopwe wa Yuda kadi; nankyo bakangipaya, ne kwalukila kudi Lehaboma mulopwe wa Yuda.” Penepo Yeloboame wāshimika mutōtelo mupya wa kutōta bana ba ñombe babidi ba nsahabu. “Ebiya kadi wabīka umo mu Betele, ne mukwabo nandi mu Dani. Ino kino kintu kino’ki kyaalamuka ke kyabubi; penepo bantu ke minkonke yonka kutōta ku meso a umo, kutūla’nka ne ku Dani. Kadi walonga mobo a mitenta, watonga ne babitobo ba umbukata mwa bantu bonsololo, kebadipo ba ku bāna ba Levi.” Yeloboame wetongela’ko ne difuku dyandi dya “kidilo kya bāna ba Isalela,” kadi “wakanda ku madabahu kusōka ensense.”—1 Bal. 12:26-33.

12. Bengidi ba Leza ba kikōkeji ba mu bulopwe bwa kungala balongele bika pātūdile Yeloboame butōtyi bwa bana ba ñombe mu Isalela?

¹² Le papo bengidi ba Leza ba kikōkeji ba mu bulopwe bwa kungala bādi ba kulonga namani? Enka bwa bankambo babo bādi na kikōkeji, Bene Levi ba mu bibundi byobāpelwe mu bulopwe bwa kungala kebāikelepo kulejaleja. (Div. 32:26-28; Umb. 35:6-8; Kup. 33:8, 9) Bāshiya bipyanwa byabo, bāvilukila ku Yuda pamo ne bisaka byabo, kobādi babwanya kwendelela na kutōta Yehova kasuku kandi (2 Bil. 11:13, 14) Bene Isalela bakwabo bāendele mu Yuda batonga kushadidila’mo pa kyaba kya kujokela monka kwabo. (2 Bil. 10:17) Yehova wātūdile’ko mikenga amba nkongo mikwabo ya bulopwe bwa kungala ikajokele ku mutōtelo wa bine ne kuleka kutōta bana ba ñombe ebiya baketolele ku Yuda.—2 Bil. 15:9-15.

13. Lelo bantu ba Leza bajokolokelwe namani na batupondo dyalelo?

¹³ Dyalelo nadyo batupondo i bajokoloke bantu ba Leza. Balopwe bamo batūdile’ko mutōtelo wa Leta, ne kuningila babikalwa babo kwiulonda. Bendeji ba Bipwilo bya Kine Kidishitu  ne ba kibengo bakwabo betēlanga bu bapidishitu ba ku mushipiditu. Inoko, enka mu Bene Kidishitu ba bine mo mudi bashingwe māni benebene, babundile “bupidishitu bwa bulopwe.”—1 Pet. 2:9; Kus. 14:1-5.

14. Le i muswelo’ka otufwaninwe kumona ñeni ya bupondo?

¹⁴ Bengidi ba Leza dyalelo kebatādilwepo na ñeni ya bupondo na kemwatādilwepo Bene Levi ba kikōkeji ba mu myaka katwa ka dikumi K.K.K. Bashingwe māni ne bapwani nabo bapelanga ñeni ya bupondo bukidi bonka kadi beiponejanga. (Tanga Loma 16:17.) Nansha byotukōkelanga ba lupusa mu bimobimo ne kuleka kwikuja mu malwi a ntanda, tukōkelanga ku Bulopwe bwa Leza. (Yoa. 18:36; Loma 13:1-8) Ketwitabijangapo binena boba betela bu bengidi ba Leza ino bamufutulula na mwiendelejo wabo.—Tet. 1:16.

15. Mwanda waka tufwaninwe kukōkela “umpika wa binebine, udi na manwa”?

¹⁵ Langa’po bidi mwālongele Yehova, wapa bantu ba mityima miyampe muswelo wa kutamba mu ntanda ya bubi ne kutwela mu paladisa ya ku mushipiditu yatūdile. (2 Kod. 12:1-4) Na mutyima wa kufwija’ko, tulamete ‘umpika wa binebine, udi na manwa upelwe kipango kudi mfumwandi amba amulamine, uleela’mo ne babidibwa pa kitungo kya mwaka po kitungilwe.’ Kidishitu i mupe uno umpika “lupeto lwandi lonso.” (Mat. 24:45-47) Nanshi, nansha shi bantu kebevwanijepo byalonga kabumbo ka umpika, kekudipo bubinga nansha bumo bwa kwibipela nansha bwa kwitolela mu ntanda ya Satana. Ino, kikōkeji kiketutonona tukokele Yehova ne kumukungila atōkeje myanda.

Pobavuija Mingilo Ibapele Leza

16. Le i mwingilo’ka wāpelwe mupolofeto watambile ku Yuda?

¹⁶ Yehova wātopekele Yeloboame pa mwanda wa bupondo bwandi. Wātumine mupolofeto kutamba ku Yuda ne kwenda ku Betele kungala kukemona na Yeloboame paādi wela kitapwa ku madabahu. Mupolofeto wāmusapwila musapu wa butyibi bwa malwa. Bine, uno shao wādi mwingilo mukomo!—1 Bal. 13:1-3.

17. Le Yehova wālamine mukendi wandi namani?

¹⁷ Yeloboame wākalabala pa kwivwana matope amutopekele Yehova. Wāolola kuboko kwandi padi muntu wa Leza kanena bantu bādi kubwipi amba: “Mukwatei!” Ponka’po, abo kebajinine, “kuboko kwandi kwāolwele padi aye, kwauma ne kūma, penepa kadi kumona mwa kukōkejejapo kujokejako kwadi mpika. Madabahu nao etutakanya ne buto bwamwangika ku madabahu.” Yeloboame wāfula ku kuzenza mupolofeto asenge Yehova ne kulomba kuboko kwandi kwaūmine kujokele mokwadi kwikadile. Mupolofeto wālongele monka, kuboko nako kwabeluka. Mo mwālamine Yehova namino mukendi wandi ku bibi.—1 Bal. 13:4-6.

18. I muswelo’ka witulama Yehova potwendelela kumwingidila mingilo ikola moyo mpika?

¹⁸ Potwingila na kikōkeji mwingilo wa kusapula Bulopwe ne kulonga bana ba bwanga, kyaba kimo betufutululanga nansha kwitususula. (Mat. 24:14; 28:19, 20) Ino ketufwaninwepo kuleka moyo nansha kupelwa bitalaje bupyasakane bwetu mu mwingilo. Pamo bwa yewa mupolofeto katelelwe dijina wa mu mafuku a Yeloboame, ‘twingidilanga Yehova kwakubulwa moyo, umbu-ujila ne umboloke.’ * (Luka 1:74, 75) Nansha  byotuyukile amba Yehova ketunyongololangapo mu kingelengele dyalelo, ino ulamanga ne kukwatakanya batwe Batumoni bandi na mushipiditu sandu wandi ne na ba mwikeulu. (Tanga Yoano 14:15-17; Kusokwelwa 14:6.) Leza kakalekelelapo nansha dimo boba bendelela kusapula kinenwa kyandi moyo mpika.—Fid. 1:14, 28.

Yehova Kakalekelelapo Bapandulwe’mo Bandi

19, 20. (a) Mwanda waka tunena na mutyima umo amba Yehova kaketwelapo nansha dimo? (b) I bipangujo’ka bikabandaulwa mu kishinte kilonda’ko?

¹⁹ Yehova i Leza wa dikōkeji. (Kus. 15:4; 16:5, New World Translation) Yehova i “wa dikōkeji mu mingilo yandi yonso.” (Mit. 145:17, NW) Kadi Bible witukulupija’mba: ‘Ukalaminina dishinda dya bapandulwe’mo bandi.’ (Nk. 2:8) Bengidi ba kikōkeji ba Leza bakulupile amba Yehova kakebalekelelapo ino ukebakwatakanyanga ponso pobatompibwa, pobalwa na ñeni ya batupondo ne pobavuija mwingilo mukomo obapelwe.

²⁰ Pano kintu kyotufwaninwe kulangulukila’po umo ne umo i kino: I kika kikankwasha nkōkele Yehova nansha ntanwe na matompo ne byongo? Ko kunena’mba, lelo nkakankamika namani mutyima wami wa kukōkela Leza?

[Kunshi kwa Dyani]

Usa Kulondolola Namani?

• Yehova wālombwele namani amba kalekelelangapo bengidi bandi ba kikōkeji pobasusulwa?

• Lelo tufwaninwe kumona namani batupondo ne ñeni yabo?

• Yehova ulamanga muswelo’ka bengidi bandi ba kikōkeji pobengila mwingilo wa Bwine Kidishitu?

[Bipangujo bya Kifundwa]

[Kalata/Kifwatulo pa paje 10]

(Pa kuyukila’ko bikwabo, tala dibuku)

BULOPWE BWA KUNGALA (Yeloboame)

Dani

SHEKEMA

Betele

BULOPWE BWA KUNSHI Lehaboma)

YELUSALEMA

[Kifwatulo]

Yehova kālekelelepo bengidi bandi pāikele Yeloboame kutūla’ko mutōtelo wa byana bya ñombe

[Kifwatulo pa paje 8]

Solomone ne bantu bandi bādi ba kweselwa ponso pobādi bakōkele