Jehova Ok Nojwang’ Joge Momakore Kode

‘Jehova ok nojwang’ joge maler [“momakore kode,” NW ]. Okungogi nyaka chieng’.’​—ZAB. 37:28.

1, 2. (a) Gin gik mage ma ne otimore e kar higa 997 Ka Ndalowa Podi, ma ne okelo tem ne jotich Nyasaye ma ne omakore kode? (b) Jehova norito joge ma nomakore kode kuom gik mage adek?

KAR higa 997 Ka Ndalowa Podi, ne en kinde makende ahinya nimar oganda Nyasaye ne nyaka yier gima ne gidwaro. Noyudo lweny ma ne chiegni muoch e kind dhoudi mag Israel osegeng’, nikech dhoudi ma ne ni masawa koro ne osemi loch ma margi giwegi e okang’ matin. Jeroboam, ruodhgi manyien, notimo piyo mondo ogur lochne kane ochako din manyien mar Sirkal. Nochiko ni jogo manie e bwo lochne nyaka winje chuth. Jotich Jehova ma ne ochung’ motegno ne dhi timo nade? Be ne gidhi siko ka gimakre chuth gi Nyasaye ma ne gisebedo ka gilamo? Gana mang’eny notimo kamano, kendo Jehova noritogi sama ne gidhi nyime chung’ motegno e bwo tem.​—1 Ruo. 12:1-33; 2 Weche 11:13, 14.

² Jotich Nyasaye momakore kode, bende yudo tem e kindewagi. Muma chiwo siem kama: “Ritreuru, kiuru; nikech jasiku, Satan, bayo ka sibuor ma goyo asumbi, kodwaro ng’a ma dongam.” Be wanyalo ‘tame ka wachung’ matek e yie’? (1 Pet. 5:8, 9) We wanon ane moko kuom gik ma ne timore kane iketo Jeroboam ruoth e higa mar 997 Ka Ndalowa Podi, mondo wane puonj mwanyalo yudo. E kindego, jotich Jehova ma ne ochung’ motegno ne isando. Bende timbe ma ne ok winjore gi lamo madier, ma ne gin timbe manyalo kethogi, ne onya, to gie kindeno bende, jotich Jehova ne nigi migepe matek chopo. Kuom gigi duto, Jehova ne ok ojwang’o joge ma ne omakore kode, kendo ok obi jwang’o jogo matimo kamano e kindegi.​—Zab. 37:28.

Sama Gin e Bwo Sand

3. Ang’o momiyo loch Daudi ne ok kel ne ji sand?

³ We wakwong wanon ane gik ma ne oyudo timore kane Jeroboam pok obedo ruoth. Ngeche 29:2 wacho kama: “Ka ng’a marach okawo ruoth, ji ng’ur.” E bwo loch Daudi Ruodh Israel machon, ji ne ok ng’ur. Daudi ne ok en ng’at makare chuth, to kata kamano, ne omakore gi Nyasaye kendo ne ogene. Loch Daudi ne ok kel ne ji sand. Jehova notimo singruok gi Daudi, kowacho kama: “Dhoodi kod pinyruodhi ginibed kogurgi ma ginibedi nyaka chieng’ e nyimi: kom-duong’ mari nobedi ma nyaka chieng’.”—2 Sam. 7:16.

4. Gweth ma ne ji yudo e kinde loch Suleman ne obedoe nikech ang’o?

⁴ E kar chakruok loch Suleman wuod Daudi, kuwe ne ogundho kendo ji ne neno ber, omiyo lojno ne en kaka tipo mar Loch Kristo Yesu mar Higini Gana Achiel. (Zab. 72:1, 17) Onge gima ne nyalo miyo dhoudi 12 mag Israel ong’anj ne loch Suleman. Kata kamano, gweth ma Suleman ne yudo koda jogo ma ne olocho e wigi, ne bedoe nikech luwo chik. Ne oyudo Jehova osewacho ne Suleman kama: “Kiwuotho e chikna, kendo imako buchega, kendo irito chikna ni mondo iwuothi kuomgi; eka nasir wachna kodi, ma nawacho ni Daudi wuoru. Kendo anadag e kind nyithind Israel, mi ok anawe joga Israel ng’ang’.”​—1 Ruo. 6:11-13.

5, 6. Ang’o ma notimore kane Suleman oweyo makore gi Nyasaye?

 ⁵ Kane Suleman oseti, noweyo luwo Jehova, kendo nochako luwo lamo mar miriambo. (1 Ruo. 11:4-6) Mosmos, nochopo kama Suleman noweyo luwo chike Jehova, mochako sando ji. Lochne nobedo marach ma kata mana bang’ thone, ji ne odhi ng’ur e nyim Rehoboam wuode makoro nosekawo kare, ka gidwaro mondo giyudie yueyo. (1 Ruo. 12:4) Jehova ne otimo nade kane Suleman oweyo luwe?

⁶ Muma wachonwa kama: “Jehova nobedo gi mirima kuom Suleman, nikech chunye nolokore oa kuom . . . Nyasach Israel, ma nosefwenyorene diriyo.” Jehova nowacho ne Suleman niya: “Nikech . . . ok irito muma mara gi buchega, abiro golo pinyruoth oa kuomi, kendo abiro miye jatichni.” ​—1 Ruo. 11:9-11.

7. Kata obedo ni Jehova ne odagi Suleman, ne orito nade joge ma ne omakore kode chuth?

⁷ Bang’e Jehova nooro janabi Ahija mondo owir mo jal ma ne dhi reso ji e bwo sand mar Suleman. Jalo ne en Jeroboam, ng’at ma ne oromre gi tij ruoth, kendo noyudo osebedo kotiyo e bwo sirkand Suleman. Kata obedo ni Jehova ne omakore chuth gi singruok mar Pinyruoth ma ne otimo gi Daudi, ne oyie mondo dhoudi 12 opogre ma gibedo gi loje ariyo. Ne idhi mi Jeroboam dhoudi apar; to dhoudi ariyo ne dhi dong’ ne loch mar jood Daudi, ma gie kindeno ne en Ruoth Rehoboam. (1 Ruo. 11:29-37; 12:16, 17, 21) Jehova nowacho ne Jeroboam kama: “To ka niwinj duto machikoi, kendo iwuotho e yorega, mitimo maber e wang’a, mar rito buchega kod chikna kaka jatichna Daudi notimo; eka anabed kodi, mi analosni dhoot mochungo kaka naloso ni Daudi, kendo anamii Israel.” (1 Ruo. 11:38) Jehova nokonyo joge, kendo nomiyogi yor resruok a e bwo sand.

8. Gin tembe mage makelo sand ne oganda Nyasaye e kindegi?

⁸ Sand koda timbe ma ok kare ng’eny e piny sani. Eklesiastes 8:9, wacho kama: ‘Ng’ato bedo gi teko kuom machielo mondo ohime.’ Jo ohelni ma jowuoro koda sirkande mopong’ gi mibadhi, nyalo kelo ne ji dhier. Pile, jotelo mag sirkal, mag ohelni, koda mag din, keto ranyisi marach e timo timbe ma ok kare. Omiyo, mana kaka Lut ng’at makare, jogo ma omakore gi Nyasaye e kindegi bende, “chandore nikech tim anjawo mag jo moduwore.” (2 Pet. 2:7) E wi mano, kaka watemo dak kaluwore gi chike Nyasaye, wabedo joma joloch maricho dwaro ni mondo osand.​—2 Timo. 3:1-5, 12.

9. (a) En ang’o ma Jehova osetimo mondo omi ores joge? (b) Ang’o momiyo wanyalo bedo gadier ni kinde duto Yesu biro makore chuth gi Nyasaye?

⁹ Kata kamano, wanyalo bedo gadier chuth kuom ng’eyo ni: Jehova ok bi jwang’o joge momakore kode! Par ane okang’ ma osekawo chop sani, mar golo joloch maricho. Pinyruodh Nyasaye manie lwet Mesia, Kristo Yesu, osechako locho. Yesu Kristo osebedo kalocho e polo chiegni higini mia achiel sani. E kinde machiegni, obiro kelo resruok chuth ne jogo moluoro nying’ Nyasaye. (Som Fweny 11:15-18.) Yesu nosenyiso ni omakore chuth gi Nyasaye, kotimo kamano nyaka e thone. Ok obi timo marach ne joma obiro locho e wigi, kaka Suleman ne otimo.​—Hibr. 7:26; 1 Pet. 2:6.

10. (a) Wanyalo nyiso nade ni wamor gi Pinyruodh Nyasaye? (b) Sama wan e bwo tem, wanyalo bedo gadier kuom wach mane?

¹⁰ Pinyruodh Nyasaye en sirkal madier mabiro tieko sand duto te. Wan wachung’ korka Jehova Nyasaye kod Pinyruodhe kende. Ka wan gi geno chutho kuom Pinyruodhno, wakwedo timbe mag pinyni ma ok nyis luoro Nyasaye, kendo waketo kinda e luwo timbe mabeyo. (Tito 2:12-14) Watemo matek mondo kik wabed gi mbala mar pinyni. (2 Pet. 3:14) E tem moro amora mwanyalo yudo gie sani, wanyalo bedo gadier ni Jehova biro ritowa mondo wadong’ ka wachung’ motegno. (Som Zaburi 97:10.) E wi mano, Zaburi 116:15 singonwa kama: ‘Tho jo maler [“jo momakore kode,” NW ] nigi nengo maduong’ e nyim Jehova.’ Jehova ohero jotichne ahinya ma ok obi weyo mondo gilal nono ka gin oganda.

 Sama Timbe Jo Moweyo Yie Nyalo Kethogi

11. Jeroboam ne oweyo nade makore gi Nyasaye?

¹¹ Loch mar Ruoth Jeroboam ne dokelo yueyo moromo ne oganda Nyasaye. To kar mano, timbene nomedo kelo tem ne jotich Nyasaye. Nikech migawo mar bedo ruoth ma ne oyudo osemiye ok ne orome, Jeroboam nochako manyo yore mag medo guro lochne. Nowacho e chunye kama: “Ka jogi duto idho dhiyo Jerusalem mar timo misengini e od Jehova, eka chuny jogi didog ni ruodhgi, mana ni Rehoboam ruodh Juda; kamano di ginega, kendo di gidog ni Rehoboam ruodh Juda.” Omiyo Jeroboam ne ochako lamo moro manyien milamoe nyiruedhi ariyo mag dhahabu. ‘Achiel noketo Bethel, to machielo noketo Dan. Kendo wachni nodoko richo, niwira ji nedhi lemo e nyimgi kargi ariyo, nyaka Dan bende. Kendo noloso udi mag kuonde moting’ore, kendo noketo jodolo ma ji ajia nono ma ok yawuot Lawi.’ Jeroboam ne oketo koda odiechieng’ ma mare owuon mar “sawo ni nyithind Israel,” kendo ne odhi nyime gi ‘chiwo misengini e kar misango, kendo nowang’o ubani.’​—1 Ruo. 12:26-33.

12. Jogo ma nomakore gi Nyasaye to odak e pinyruoth ma masawa, ne otimo nade kane Jeroboam ochako lamo mar nyiruedhi e Israel?

¹² Jogo ma nomakore gi Nyasaye, to odak e pinyruoth ma masawa ne koro dhi timo nade? Mana kaka kweregi ma ne ochung’ motegno, jo Lawi ma noyudo odak e mier ma ne omigi e pinyruoth ma masawa, ne okawo okang’ mapiyo ma ok gideko. (Wuok 32:26-28; Kwan 35:6-8; Rapar 33:8, 9) Ne giweyo gikgi chien, ma gidaro joodgi ma giterogi Juda yo milambo, kama ne ginyalo dhi nyime lamo Jehova ma gimoro ok chandgi. (2 Weche 11:13, 14) Jo-Israel mamoko ma ne oyudo gin jodak e Juda kuom kinde, koro ne oyiero dak kuno chuth kar duogo e miechgi. (2 Weche 10:17) Jehova ne oketo chenro ma ne nyalo miyo jomoko e tienge ma bang’e kuom joma nodak e pinyruoth ma masawa, owe lamo mar nyiruedhi, mi gidog Juda.​—2 Weche 15:9-15.

13. E ndalogi, timbe koda pach joma oseng’anjo, osekelo tem nade ne oganda Nyasaye?

¹³ Timbe joma oseng’anjo moweyo yie kaachiel gi parogi, nyalo ketho oganda Nyasaye e ndalogi. Joloch moko osetemo loso din mar Sirkal, ka gichuno ji mondo oluw dinno. Jotend dinde maluongore ni Jokristo koda jomamoko, osetemo ketore ni gin e jodolo ma ne okor wachgi. Kata kamano, mana e kind Jokristo madier kende, ema wayudoe Jokristo madier mowal kuom roho, kendo gin ema giloso “dolo mag Ruoth.”​—1 Pet. 2:9; Fwe. 14:1-5.

14. Onego watim nade kuom paro mag jo moseng’anjo moweyo yie?

 ¹⁴ Mana kaka jo Lawi ma noluoro Nyasaye e kinde Jeroboam, oganda Nyasaye momakore kode e kindegi, ok yie mondo owuondgi gi riekni mag joma oseng’anjo moweyo yie. Jokristo mowal kuom roho kaachiel gi jowetegi, kwedo piyo kendo tamore riekni mag jogo ma oseng’anjo moweyo yie. (Som Jo Rumi 16:17.) Kata obedo ni wawinjo joloch e weche modok korka sirkal, kendo ok wariw lwedo konchiel e ywaruok mag pinyni, Pinyruodh Nyasaye ema wamakorego chuth. (Joha. 18:36; Rumi 13:1-8) Watamore weche jogo mawuondore ni gitiyo ne Nyasaye, to koni to ok gimiye duong’ kokalo kuom timbegi.​—Tito 1:16.

15. Ang’o momiyo onego wamakre gi “jatichno mogen, kendo mariek”?

¹⁵ Par ane bende kaka Jehova osemiyo joma chunygi nikare owuogi e piny marachni, korwakogi e riwruok mar ogandane morito kendo mopong’ gi kuwe kod hera. (2 Kor. 12:1-4) Ka wan gi chuny manyiso erokamano, wamakre machiegni gi “jatichno mogen, kendo mariek, ma ruodhe noketo kuom joode mondo opognigi chiemo e kinde makare.” Kristo oseketo jatichno e wi “gige duto.” (Math. 24:45-47) Omiyo, kata ka ng’ato kuomwa ok ong’eyo maber gimomiyo kweth mar jatichno okawo okang’ moro, mano ok mi koro watamre jatichno, kata dok e piny Satan. Kar mano, makruokwa chuth gi Nyasaye, biro miyo wabolore, kendo rito Jehova mondo oler weche.

Sama Gitimo Migepe Momiyogi

16. En migawo mane ma janabi moro mowuok Juda ne oyudo?

¹⁶ Jehova ne otamore Jeroboam nikech timne mar ng’anjo weyo lamo madier. Ne ooro janabi moro mowuok Juda mondo odhi Bethel e nyim Jeroboam sama Jeroboam ne chiwo misango e kare ma ne oloso. Janabino ne onego ochiw ote mapek ne Jeroboam. Onge kiawa, ni migawono ne ok yot.​—1 Ruo. 13:1-3.

17. Jehova ne orito nade janabine?

¹⁷ Mirima mager nomako Jeroboam bang’ winjo ote ma nowuok kuom Jehova. Ne orieyo lwete kuom ng’at Nyasaye, kokok matek ne joma ne ni machiegni kama: ‘Makeuru!’ To gikanyono, kapok ng’ato notimo gimoro amora, lwete ‘ma norieyono ne othal, ma ok nonyal duoke kuome kendo. Eka kar misango nobarore, mi buru nopukore ae kar misangono.’ Ne ochuno Jeroboam nyiso janabino mondo okwane ng’wono e nyim Jehova, kendo olamne mondo lwete oduog kaka pile. Janabino ne otimo kamano, mi lwete ne ochango. Omiyo, Jehova ne orito janabine, mondo kik hinye.​—1 Ruo. 13:4-6.

18. Jehova ritowa nade sama watiyone tich maler ma onge luoro?

¹⁸ Kaka wadhi nyime tiyo tij lando wach Pinyruoth, kendo timo ji jopuonjre, seche moko waromo gi joma ok dew, kata mana joma kwiny ma ok dwar winjo. (Math. 24:14; 28:19, 20) Kata kamano, ok onego wawe luoro mar ni ji ok bi winjwa, mondo omonwa tiyo tij lendo gi kinda. Mana kaka janabi ma ne ok ohul nyingeno, e kinde Jeroboam, wan-gi thuolo majaber mar ‘tiyone Jehova ma ok waluor,’ kendo ka wamakore kode thuth. * (Luka 1:74, 75) Kata obedo ni kindegi ok wagen ni Jehova biro ritowa e yor hono, podi oritowa kaka Joneno mage kokalo kuom roho mare maler koda malaikene. (Som Johana 14:15-17; Fweny 14:6.)  Nyasaye ok nojwang’ jogo ma dhi nyime wacho wachne gi chir ma onge luoro.​—Fili. 1:14, 28.

Jehova Biro Rito Joge Momakore Kode

19, 20. (a) Ang’o momiyo wanyalo bed gadier ni Jehova ok nojwang’wa ngang’? (b) Gin penjo mage mibiro non e sula maluwo?

¹⁹ Jehova Nyasachwa en Nyasaye ma omakore kodwa chuth. “Omakore gi tijene duto.” (Zab. 145:17, NW ) Kendo Muma singonwa kama: “Obiro rito yor joge momakore kode.” (Nge. 2:8, NW ) Sama jogo momakore gi Nyasaye romo gi tembe, kata paro mag joma oseng’anjo moweyo yie, kata seche ma gitimo migawo manenre ni pek, ginyalo bedo gadier ni Jehova biro tayogi kendo ritogi.

²⁰ Gima koro ng’ato ka ng’ato kuomwa onego opar en mae: En ang’o mabiro konya siko ka amakora gi Jehova kata bed mana ni ayudo tembe machalo nade? Tiende ni, ere kaka anyalo tego makruok mara gi Nyasaye?

[Weche moler piny]

Inyalo Dwoko Nade?

• Jehova osenyiso nade ni ok onyal jwang’o joge momakore kode e sama gin e bwo sand?

• Onego watim nade kuom timbe koda paro mag jo moseng’anjo moweyo yie?

• Jehova rito nade joge momakore kode e sama gitiyo tij lendo mar Jokristo?

[Penjo mag Puonjruok]

[Map/Picha e ite mar 10]

(Mondo ine weche momedore, ne bugno)

Dan

PINYRUOTH MA MASAWA (Jeroboam)

SHEKEM

Bethel

JERUSALEM

PINYRUOTH MA MILAMBO (Rehoboam)

[Picha]

Suleman koda joma ne olocho e wigi ne nyaka tim gima Nyasaye dwaro eka giyud gweth

[Picha manie ite mar 10]

Jehova ne ok ojwang’o joge ma ne omakore kode kane Jeroboam ochako lamo mar nyiruedhi