Ag-ikaindan nen Jehova Iray Manmamatoor ed Sikato

‘Ag-ikaindan nen Jehova iray [“manmamatoor ed sikato,” NW]; niyapiger ira lawas.’​—SAL. 37:28.

1, 2. (a) Antoray agawgawa nen koma-samplon siglo B.C.E. ya akasubokay katooran na saray lingkor na Dios? (b) Diad anton taloran kipapasen ya ag-inkaindan nen Jehova iray nanmatoor ed sikato?

 KOMA-SAMPLON siglo B.C.E. ed saman, tan kaukolan a mandesisyon iray lingkor nen Jehova. No aglabat naabuloyan iray mamaamianen a tribu a mansarili, tinmerak lay guerra ed nasyon na Israel. Tampol a pinabiskeg na kapkapangitronon ari ra a si Jeroboam so pakayari to diad impangiletneg toy balon relihyon. Tan labay ton sigpot a suportaan na saray sakop to itan a panagdayew. Anto kasi gawaen na saray matoor a managdayew nen Jehova? Mansiansia kasi ira’d dapag to? Diad katuaan to, nilibo so nanggawa na ontan, tan sikaray inasikaso tan sinalimbengan nen Jehova legan dan mansiasiansian matoor.​—1 Ara. 12:1-33; 2 Awa. 11:13, 14.

² Natan et nasusubok met so katooran na saray lingkor na Dios. Oniay impasakbay na Biblia: “Mandangka kayo, manbantay kayo ta say kabusol yo, say Diablo, wala ed kaliberliber yo a singa onmuang a leon a manaanap na buagen to.” Sarag tayo kasin ‘sumpaen so Diablo tekep na mabiskeg a pananisia’? (1 Ped. 5:8, 9) Imanoen tayo pa natan so pigaran agawa antis tan kayari inkitrono nen Arin Jeroboam nen 997 B.C.E. tan nengnengen tayo no antoray naaralan tayo. Diad saraman a kritikal a panaon, saray matoor a lingkor nen Jehova et napapairap, nidudunget ira ed saray impluensya na apostata, tan aliwan bastabasta iray susumpalen dan kimey. Balet diad amin na saratan a kipapasen et ag-inkaindan nen Jehova iramay nanmatoor ed sikato, tan seguradon ontan met so gawaen to natan.​—Sal. 37:28. *

Sano Napapairap

3. Akin et aliwan malames so uley nen Arin David?

³ Pantongtongan tayo ni iramay kipapasen a nanresulta’d impagmaliw ya ari nen Jeroboam. Say kuan na Uliran 29:2 et “sano say marelmeng a too manuley, say baley maningel.” Sanen si Arin David ni so manuuley ed Israel, saray Israelita et agnaningel. Ag-ayadyari si David, balet ta sikatoy nanmatoor tan nanmatalek ed Dios. Kanian, say uley nen David et aliwan malames. Akisipanan si Jehova ed sikato: “Say abung mo tan say nanarian mo mansiansia lawas ed arap mo, say yurongan mo niletneg lawas.”​—2 Sam. 7:16.

4. Anto so kondisyon pian tuloytuloy a nabendisyonan so uley nen Solomon?

⁴ Say uley na anak nen David a si Solomon et talagan mareen tan maaligwas ed gapo, kanian dugarugay impangusar ed satan bilang panangilitrato ed Milenyon Uley nen Kristo Jesus. (Sal. 72:1, 17) Diad saman et anggapoy rason na anggan dinan ed saray 12 tribu na Israel pian manrebelde. Balet, walay kondisyon pian tuloytuloy a nabendisyonan si Solomon tan saray sakop to. Oniay inkuan nen Jehova ed sikato: “No manakar ka ed saray panontonan ko, tan agamilen mo so saray panguksoyan ko, tan unoren mo so saray amin a ganggan ko, a manakar ka ed sikara; diad satan iletneg ko so  salitak ed sika, a sinalitak ed David ya amam. Et manayam ak ed nanleleetan na saray anak na Israel, tan agko ikaindan so baley ko ya Israel.”​—1 Ara. 6:11-13.

5, 6. Anto so resulta na ag-impanmatoor nen Solomon ed Dios?

⁵ Sanen minmasiken lay Solomon, sikatoy nagmaliw ya agmatoor ed si Jehova tan ginapoan toy mibiang ed palson panagdayew. (1 Ara. 11:4-6) Kalkalna ton atundaan so pangunor ed saray ganggan nen Jehova tan nagmaliw a malames. Linmoor itan anggad punton anta inatey la et inreklamo ni na saray totoo ed anak tan mananawir to a si Roboam, tan akikasi ran bawasan komon nen Roboam so pakakabelatan da. (1 Ara. 12:4) Anto sirin so ginawa nen Jehova sanen agnanmatoor si Solomon?

⁶ Oniay inkuan na Biblia: “Si Jehova sinmanok ed Solomon, lapud say puso to binmeneg ed . . . Dios na Israel, a pinmayawar ed sikato na amidua.” Onia met so inkuan nen Jehova ed si Solomon: “Bangta . . . agmo inunor so sipan ko tan saray panontonan ko, ya ingganggan ko ed sika, petepeteg a pignisen ko so nanarian ed sika tan iter ko ed aripen mo.”​—1 Ara. 11:9-11.

7. Anggano impulisay la si Solomon, panon nin intultuloy ya inasikaso nen Jehova iray manmamatoor ed Sikato?

⁷ Imbaki sirin nen Jehova si propetan Ahias pian lanaan so intarya Ton manangiliktar. Saya et si Jeroboam, sakey a maabilidar a lakin nanlingkor ed gobierno nen Solomon. Anggano nansiansian matoor si Jehova ed samay impisipanan to ed kinen David nipaakar ed Panarian, inabuloyan To a napaldua so 12 tribu. Samploran tribu so onla’d si Jeroboam, bangta duara so natilak ed kapolian nen David, a natan et irerepresenta la nen Arin Roboam. (1 Ara. 11:29-37; 12:16, 17, 21) Oniay inkuan nen Jehova ed si Jeroboam: “Nagawa naani, no ondengel ka ed amin ya iganggan ko ed sika, tan manakar ka ed saray daladalan ko, tan gawaen mo so maptek ed saray matak, ya unoren mo so saray panontonan ko tan saray ganggan ko, a singa si David ya aripen ko ginawa to; a siak wala ak ed sika, tan ipaalageyan ta ka na matalek ya abung, singa impaalagey ko nipaakar ed David, tan iter ko so Israel ed sika.” (1 Ara. 11:38) Sirin, kinmiwas si Jehova parad saray totoo to tan nanggawa na paraan pian ontunday paniirap da.

8. Antoran subok so pakakapairapan na saray totoo na Dios natan?

⁸ Natan et amayamay met so nagagawan ag-inkahustisya tan panamairap. “[Saray] totoon walay pakayari . . . manirap iray totoon uuleyan da,” so kuan na Ecclesiastes 8:9. (Maung a Balita) Lapud inkaagum na saray negosyante tan inkakurakot na saray manuley et nayarin nakusboy ekonomya. Maslak a lider ed gobierno, komersyo, tan relihyon et aliwan marakep so ehemplon ipapanengneng da. Kanian singa si matunong a Lot, saray matoor a lingkor na Dios natan et ‘maneermen a tuloy ed mauges a panagbilay na saray totoo.’ (2 Ped. 2:7) Niarum ni, anggano anggapoy gagawaen tayon mauges ed panggugunaet tayon mangiyaplika ed saray ganggan na Dios, sikatayo ni mabetbet a papasegsegangen na mapasang iran manuley.​—2 Tim. 3:1-5, 12.

9. (a) Anto la ray ginawa nen Jehova pian iliktar iray totoo to? (b) Akin et makaseguro itayo a lawas manmatoor si Jesus ed Dios?

⁹ Balet makaseguro itayo ed sakey a bengatla: Agbalot paulyanan nen Jehova iray manmamatoor ed sikato! Nonoten pa labat iray ginawa to lan kundang pian nasalatan iray mauges a manuley. Niletneg la so Mesianikon Panarian na Dios. Ngalngali lan sanlasus taon a manuuley si Jesu-Kristo ed tawen. Agla manbayag, sigpot to lan ikday pakainawaan so amin ya ontatakot ed ngaran na Dios. (Basaen so Apocalipsis 11:15-18.) Apaneknekan la nen Jesus so inkamatoor to ed Dios anggad patey. Kanian seguradon agto dismayaen iray sakop to, a singa ginawa nen Solomon.​—Heb. 7:26; 1 Ped. 2:6.

10. (a) Panon tayon nipatnag ya aapresyaen tayo so Panarian na Dios? (b) No ondadalan itayo ed subsubok, makapanilalo itayo ed anto?

¹⁰ Say Panarian na Dios et petepeteg a gobierno a mangekal ed amin ya irap. Say panmamatooran tayo et si Jehova a Dios tan say uksoyan to. Lapud sigpot itayon manmamatalek ed Panarian, ipupulisay tayoy mauges a kagagawa na sayan  mundo tan maseseg tayon gegegemtanen iray maabig a gawa. (Tito 2:12-14) Panggugunaetan tayo met so mansiansian andi-matik ed mundo. (2 Ped. 3:14) Antokaman so nadalan tayon subok natan, makapanilalo itayon protektaan itayo nen Jehova ed saray pakapeligroay espiritualidad tayo. (Basaen so Salmo 97:10.) Sakey ni, oniay impaseguro na Salmo 116:15: “Mabmabli ed mata nen Jehova so ipapatey na saray sasantos to.” Ontan lay panamabli nen Jehova ed saray lingkor to ya agto ra abuloyan a naandi bilang grupo.

Sano Walaray Impluensya na Apostata

11. Panon a nagmaliw ya agmatoor si Jeroboam?

¹¹ Diad tua, say tarok komon na uley nen Arin Jeroboam ed totoo na Dios et inawa. Balet ta lalo laingen ya anubok ed katooran da so ginawa to. Agto nankontentoan so galang tan pribilehyon niiter ed sikato, tan nanggawa ni paraan pian pabiskegen so inkaari to. Oniay rason to: “No saya a baley ontatdang a mangiyapay na bagbagat ed abung nen Jehova ed Jerusalem, sirin say puso na sayan baley ompawil ed katawan da, salanti Roboam ya ari ed Juda; et pateyen da ak tan ompawil ira ed Roboam ya ari ed Juda.” Sikatoy angiletneg sirin na balon relihyon ya akasentro ed duaran balitok a kilaw a baka. “Et impasen to so sakey ed Betel, tan say sakey inyan to ed Dan. Et saya a bengatla nagmaliw a kasalanan; ta say baley linma a manpikasi ed arap na sakey, anggan diman ni ed Dan. Et nanggawa na saray abung ed saray atagey a pasen, tan nanggawa na saray saserdote a nanlapu ed nanleleetan na amin a baley, ya aliwa ra ed saray anak nen Levi.” Angimbento ni ingen si Jeroboam na dili ton agew na “liket nipaakar ed saray anak na Israel,” tan ginapoan toy ‘ontatdang ed altar a manpasob na insenso.’​—1 Ara. 12:26-33.

12. Anto so ginawa na saramay matoor ed Dios sanen angiletneg si Jeroboam na panagdayew ed kilaw a baka diad Israel?

¹² Natan, anto kasi gawaen na saramay matoor ed Dios a walad mamaamianen iran tribu? Saramay Levitan manaayam ed syudad a niiter ed sikara diad teritorya na mamaamianen a panarian, et agla nampalpaleen, tampol iran kinmiwas a singa saray matoor ya ateng da. (Exo. 32:26-28; Num. 35:6-8; Deu. 33:8, 9) Intilak da ray tawir da, insan inyaalis day pamilya ra ed abalaten, diad Juda, pian nitultuloy dan nadayew si Jehova ya anggapoy makaamper. (2 Awa. 11:13, 14) Tan saramay Israelita a temporaryon manaayam ed Juda et pinili ray manpirmi la ditan tan agla ra sinmempet. (2 Awa. 10:17) Sineguro nen Jehova a lukas so dalan a papawil ed tuan panagdayew, pian diad saginonor iran henerasyon, no walaray taga mamaamianen a panarian a labay dan taynan so panagdayew ed kilaw a baka, et sarag day makapawil ed Juda.​—2 Awa. 15:9-15.

13. Diad panaon tayo, panon a nasusubok iray totoo na Dios ed impluensya na saray apostata?

 ¹³ Natan et walaray impluensya na saray apostata a pakakasubokan na saray totoo na Dios. Saray arum a manuley et mangileletneg na relihyon parad interon nasasakopan da, tan papaskaren da ran manuporta ed satan. Ibabaga met na saray klero na Kakristianoan tan arum ni ran mapalakbat a totoo a sikara kuno imay nipasakbay a saserdote ed espiritual a templo. Balet, dia labat ed limog na saray tuan Kristiano so pakaromogan tayo na peteg iran alanaan a manutugyop ed “peteg ya inkasaserdote.”​—1 Ped. 2:9; Apo. 14:1-5.

14. Anto so nepeg a reaksion tayo ed saray ideya na apostata?

¹⁴ Singa saramay matoor a Levita nen komasamplon siglo B.C.E., saray matoor ed Dios natan et agmet papapalikdo ed saray bangat na saray apostata. Alisto iray alanaan tan saray kakaiba ran Kristiano ya ompaliis tan mangipulisay ed saratan a palson ideya. (Basaen so Roma 16:17.) Anggaman mabulos itayon manpapasakop ed gobierno diad sekular iran pamaakaran tan mansiasiansia itayon neutral diad saray gulo ed mundo, say katooran tayo et walad Panarian na Dios. (Juan 18:36; Rom. 13:1-8) Agtayo papanisiaan iramay mankuan a manlilingkor ed Dios balet no nengnengen moy kagagawa ra et agda lanlamang rerespetoen.​—Tito 1:16.

15. Akin et manepeg labat a panmatooran tayo so “matoor tan makabat ya aripen”?

¹⁵ Nonoten met a nanggawa na dalan si Jehova pian makapaway iray matuan impanpuso manlapud marelmeng a mundo, tan makaloob ira ed espiritual a paraiso a pinawala to. (2 Cor. 12:1-4) Agaylay pisalsalamat tayo ed saya kanian agtayo onsisian ed “matoor tan makabat ya aripen, a sikato’y impasen na katawan to a mangimaton ed sankaabungan to, a mangiter ed sikara na tagano ed panaon a kinepeg to.” Sayan aripen so angipudiran nen Kristo ed “amin a walad sikato.” (Mat. 24:45-47) Kanian diad biang tayo, anggan walaray desisyon dan agtayo tanto natatalosan, aliwan rason itan pian agtayo la ontulok, odino ompawil tayo ed mundo nen Satanas. Noagta, pakiwasen itayo na katooran a manpaabeba tan alagden si Jehova a mamalinew ed saray bengabengatla.

Sano Manusumpal ed Kimkimey ya Inter na Dios

16. Anto so kimey a niiter ed samay propetan nanlapud Juda?

¹⁶ Kinondena nen Jehova so impan-apostata nen Jeroboam. Sikatoy angibaki na propeta manlapud Juda pian onla ed amianen, diad Betel, tan onapireng ed kinen Jeroboam legan a manbabagat ed altar. Kaukolan ya ipasabi na sayan propeta so makapasinagem a mensahe na panangukom ed si Jeroboam. Kanian, aliwan bastabasta iyan asainmin.​—1 Ara. 13:1-3.

17. Panon a sinalimbengan nen Jehova so mensahero to?

¹⁷ Sinmanok a maong si Jeroboam nen nadngel toy panangukom nen Jehova. Inayagan to imay propetan imbaki na Dios, insan to inkuan ed saramay lalakin wadman: ‘Erel yo!’ Balet, antis iran makakiwas, biglan ‘amagaan so liman inyunat to sumpa ed sikato, dia ed ontan et agto la nipikos. Say altar met apinglis, tan saray dapol nibantak a nanlapu ed altar.’ Apilitan si Jeroboam a mikasi a pakepaen komon na samay propeta so sanok nen Jehova tan ipikasian ton ompawil komon ed dati so lima to. Et ontan so ginawa na propeta kanian inmabig so kinmebet a lima na ari. Sirin, sinalimbengan nen Jehova ed peligro so mensahero to.​—1 Ara. 13:4-6.

18. Panon itayon sasalimbengan nen Jehova diad andi-takot tayon panusumpal ed sagradon serbisyo tayo?

¹⁸ Diad matoor tayon pangipupulong ed Panarian tan panggagaway babangatan, no maminsan  et walaray mangipungit-pungit odino manpasnok ni ingen ed sikatayo. (Mat. 24:14; 28:19, 20) Balet, nepeg ya agtayon balot aabuloyan a naapektaay seseg tayo lapud natatakot tayon ompan agda tayo awaten. Singa samay propetan ag-asalambit so ngaran to, ya inmapireng ed si Jeroboam, apribilehyoan itayon “panlingkoran [si Jehova] ya andi-takot dia ed kasantosan [“katooran,” NW].” * (Luc. 1:74, 75) Anggaman agtayo la nailaloan natan a mamilagron onsalet si Jehova, siansia nin sasalimbengan tan tutulongan to iray Tasi to panamegley na masanton espiritu to tan saray anghel. (Basaen so Juan 14:15-17; Apocalipsis 14:6.) Agbalot paulyanan na Dios iramay andi-takot a mantutultuloy a mangiyaabawag ed salita to.​—Fil. 1:14, 28.

Iyapiger nen Jehova Iray Manmamatoor ed Sikato

19, 20. (a) Akin et makaseguro tayo ya ag-itayon balot taynan nen Jehova? (b) Antoran tepet so naebatan ed ontumbok ya artikulo?

¹⁹ Si Jehova et matoor a Dios tayo. Sikatoy “matoor ed amin a gawa to.” (Sal. 145:17, NW) Tan papaseguroan itayo na Biblia a “pansiansiaen to so dalan na saray santo [“matoor,” NW] to.” (Uli. 2:8) Saramay manmamatoor ed Dios et nailaloan day panangigiya tan pananuporta nen Jehova sano nipapaarap ira ed subsubok odino impluensya na saray apostata, odino sano susumpalen da iray makapaangat a kimey.

²⁰ Natan, nia ra so kaukolan tayon nodnonoten: Antoy makatulong pian napansiansiak so katooran ko ed si Jehova antokaman so onsabin subok odino tukso? Diad arum a salita, panon kon napabiskeg so katooran ko ed Dios?

[Saray paimano ed leksab]

Panon Mon Ebatan?

• Panon a pinaneknekan nen Jehova ya agto ikakaindan iray manmamatoor ed sikato sano sikaray napapairap?

• Panon so nepeg ya ikiwas tayo ed saray apostata tan ed saray ideya ra?

• Panon a sasalimbengan nen Jehova iray manmamatoor ed sikato legan dan mibibiang ed Kristianon ministeryo?

[Tepetepet Parad Panagaral]

[Mapa/Litrato ed pahina 5]

(Parad aktual a format, nengnengen so publikasyon)

AMIANEN A PANARIAN (Jeroboam)

Dan

SIKEM

Behel

ABALATEN A PANARIAN (Roboam)

JERUSALEM

[Litrato]

Agpinaulyanan nen Jehova iray manmamatoor ed sikato sanen angiletneg si Jeroboam na panagdayew ed kilaw a baka

[Litrato ed pahina 3]

Walay kondisyon pian mantultuloy a nabendisyonan si Solomon tan saray sakop to