Komana Mwahoshaña Chachiwahi “Idimi Ditooka”?
Komana Mwahoshaña Chachiwahi “Idimi Ditooka”?
“Nakabalumuna madimi anyuza akekali idimi ditooka, kulonda wejima wawu akatambikaña ijina daYehova.”—ZEFWANIYA 3:9.
1. Chawaananyi chachiwahi chatwinkayi Yehova?
CHAWAANA chakuhosha hichafumini kudi muchidi wamuntuku, ilaña kudi Nleñi yawantu, Yehova Nzambi. (Kwidika 4:11, 12) Wamwinkeli muntu watachi Adama, wuswa wakuhosha niwakutuña mazu amaha kulonda kutohesha idimi dindi. (Kutachika 2:19, 20, 23) Ichi hichawana chachiwahi nankashi! Chaleñelaña muchidi wamuntu kutiyañana naTata yawu wamwiwulu nikuhameka ijina dindi dadiwahi.
2. Muloñadi antu chiyabulilañawu kuhosha idimi dimu?
2 Munkulakaji yayaaka 17 yakusambila yakuhanda kwawantu, antu ejima ahosheleña idimi dimu, adiña ‘namazu awu wowamu hohu.’ (Kutachika 11:1) Kuhiñahu, mpinji yaNimirodi wadikañili yashikili. Kwambukaku nanshimbi yaYehova, antu abulaña kwovwahila apompeleli heluña denjili nakutenawu nawu Babeli, muloña akeñeleña kushakama mwiluña dimu. Atachikili kutuña kaposhi keneni, bayi neyi kulonda kumuhameka Yehovaku ilaña kulonda ‘kutiyakana ijina.’ Dichi, Yehova waluwañesheli idimi dahosheleñawu akwakudikaña nawa wayileñeleli kuhosha madimi amboka-mboka. Nawa wayipalañesheli mwahita iseki dejima.—Tañenu Kutachika 11:4-8.
3. Chumanyi chamwekeni chelili Yehova yaluwañeshi idimi dawakwakudikaña haBabeli?
3 Makonu, kudi madimi amavulu chikupu, antu amakwawu ahoshaña nawu mukaayi ahoshaña madimi akubadika ha 6,800. Iyi nyichidi yejima ayihoshaña munjila yashiyashana. Chidi neyi hampinji yaluwañesheliyi Yehova Nzambi idimi dawakwakudikaña, muyitoñojoka yawu wafumishilimu idimi dahosheleñawu hatachi. Bayi neyi Yehova washili hohu muyitoñojoka yawu nhoshelu yayihaku, ilaña wahimpili cheñi mwakuhoshela nikuyileja njila jajiha mwakuzatishila mazu. Dimuloña watenenenuwu dina iluña nawu “Babeli” daya mukwila nawu kuluwañesha. (Kutachika 11:9) Chakuhayamisha, Bayibolu hohu diyi yalumbulula chachiwahi kutalisha hakutachika kwamadimi amboka-mboka yitunakumona makonu.
Idimi Dadiha, Nawa Ditooka
4. Chumanyi chashimwineñahu dehi Yehova nindi chakamwekana mumafuku etu?
4 Neyi chochahayamishaña nsañu yamuBayibolu kutalisha hanochu Nzambi chadiñijiliyi munsañu yahaBabeli, chuma chakuhayamisha chikupu nawa chalema chinakumwekana makonu. Kuhitila mudi kaprofwetu Zefwaniya, Yehova washimwineñahu dehi nindi: “Nakabalumuna madimi anyuza akekali idimi ditooka, kulonda wejima wawu akatambikaña ijina daYehova, kulonda akamukalakelaña namuchima wawu wumu.” (Zefwaniya 3:9) Indi idi “idimi ditooka” hichumanyi, nawa tunateli kudiza ñahi hakwila nawu tudihosheña chachiwahi?
5. Indi idimi ditooka hichumanyi, nawa chumanyi chinafumi mukubalumuna kwanidi idimi?
5 Idimi ditooka hichalala chahosha hadi Yehova Nzambi ninkeñelu yindi yekala Mwizu dindi, Bayibolu. Idi “idimi” dabombelamu kutiyishisha chikupu chalala chahosha haWanta waNzambi nichiwakajilika ijina daYehova, kuyiñisha wanta windi, nikuhana wumi wahaya nyaka kudi muchidi wamuntu washinshika. Yumanyi yakafuma mukubalumuna kwanidi idimi? Atuleja nawu antu “akatambikaña ijina daYehova” nawa “akamukalakelaña namuchima wawu wumu.” Kwambukaku nachamwekeni haBabeli, iku kubalumuna kwedimi ditooka kunaleñeli kuhameka ijina daYehova nikunuñañana kwawantu jindi.
Kudiza Idimi Ditooka
6, 7. (a) Chumanyi chakeñekaña hakudiza idimi dadiha, nawa chumichi chinadifwani ñahi nakudiza idimi ditooka? (b) Yumanyi yitukudiza?
6 Neyi muntu nakukeña kudiza idimi dadiha, watela kuzata nañovu kubadika hohu kuhemba mazu amaha kumutu. Kudiza idimi dadiha kwabombelamu kudiza njila yayiha yakutoñojokelamu, nichakuhosha mazu amaha. Kutoñojoka chiwahi nikuhosha namaleñu kunateli kwambuka mwidimi dikwawu. Kutena mazu amaha kwakeñekaña kuzatisha yidi yamujimba yitwazatishaña hakuhosha yidi neyi idimi munjila yambukaku. Chochimu nihakudiza idimi ditooka dachalala chamuBayibolu. Kudi yuma yayivulu yakeñekaña kubadika hakudiza hohu nsañu yantesha yalema yamuBayibolu. Kudiza chachiwahi idimi chakeñekaña kubalumuna yitoñojoka yetu.—Tañenu Aroma 12:2; Aefwesesa 4:23.
7 Chumanyi chatela kutukwasha kutiyishisha idimi ditooka nikudihosha chachiwahi? Neyi chochichekala hakudiza idimi didi dejima, kwekala jinjila jalema jinateli kutwikwasha kulonda kwiluka kuhosha chachiwahi idimi dachalala chamuBayibolu. Tushinshikenu hajinjila jazatishañawu antu hakudiza idimi dikwawu kulonda kwiluka chijinateli kutukwasha kudiza idi idimi dadiha dachifwikija.
Kuhosha Chiwahi Idimi Ditooka
8, 9. Chumanyi chitwatela kwila neyi tunakukeña kudiza idimi ditooka, nawa muloñadi chichalemena?
8 Tiyililenu nakashinshi. Hakutachika, idimi dadiha dinateli kwikala dakala chikupu kudi muntu wabula kuditiyahu dehi. (Isaya 33:19) Ilaña neyi muntu yashaku kashinshi chikupu kuyuma yinakutiyayi, wukutachika kwiluka mazu amakwawu nikwiluka chakuyihosha. Munjila yoyimu, atukonkomwena nawu: “Dichi twadi kusweja kushaku muchima kunsañu oju jitwatiyili, twakenda kahuñumuka.” (Aheberu 2:1) Kakavulu, Yesu wakonkomweneni atumbanji twindi nindi: “Yowu wukweti matu akutiya, atiyi.” (Matewu 11:15; 13:43; Maku 4:23; Luka 14:35) Eñañi, twatela ‘kutiyilila nikwiluka chachiwahi’ yuma yitwatiyaña kulonda kuyilaku hambidi mukwiluka idimi ditooka.—Matewu 15:10; Maku 7:14.
9 Kutiyilila kwakeñekaña kushaku kashinshi, nawa kashinshi kitwashañaku kalema chikupu. (Luka 8:18) Hampinji yitwekalaña hakupompa kwawakwaKristu, komana twashañaku kashinshi kuyuma yinakulumbululawu tahindi yitoñojoka yetu yekalaña kwacheñi? Twatela kuzata nañovu kulonda kushaku kashinshi kuyuma yinakuhoshawu. Neyi nehi tukwikala akwakutiya nakuhuwañesha.—Aheberu 5:11.
10, 11. (a) Kubombela hakutiyilila nakashinshi, chumanyi chikwawu chitwatela kwila? (b) Chumanyi chikwawu chabombela mukuhosha idimi ditooka?
10 Imbujolenu anhoshi elukisha. Atudizi adizaña idimi dadiha ayikoleshaña kutiyilila nakashinshi nikwimbujola chatenañawu mazu nichahoshañawu anhoshi akuluka yitembi. Chumichi chakwashañaku atudizi kubula kwikala nedimi dalema dinateli kuleñela antu kubula kuyitiya chiwahi jinakuhoshawu. Munjila yoyimu, twatela kudizila kudi antu ‘elukisha kuleja,’ idimi dadiha. (2 Timotewu 4:2) Lombenu wukwashu. Neyi munaluwañeshi itejenu mukuyifumbawu.—Tañenu Aheberu 12:5, 6, 11.
11 Kuhosha idimi ditooka himwabombela hohu kukuhwelela chalala nikudizisha antu amakwawuku, ilaña niyililu yetu yatela kwendelaña hamu nanshimbi jaNzambi. Hakwila nawu tutweshi kwila mwenimu, twatela kwimbujola amakwawu. Chumichi chabombelamu kwimbujola chikuhwelelu chawu nimuzañalu. Chabombelamu cheñi kwimbujola chihandilu chaYesu chejima. (1 Akorinda 11:1; Aheberu 12:2; 13:7) Neyi twilaña mwenimu, tukwikala anuñañana hakachi kawantu jaNzambi, nawa tukuhoshaña idimi ditooka mujila yoyimu.—1 Akorinda 4:16, 17.
12. Indi kudiza idimi dadiha kwabombelamu ñahi kwanuka?
12 Kuhembela yuma kumutu. Atudizi adizaña idimi atela kuhemba yuma yayivulu yayiha kumutu. Chumichi chabombelamu mazu amaha ninhoshelu. Kudi akwaKristu, kwanuka kunateli kuyikwasha chikupu kwiluka idimi ditooka. Chakadi nikujina, twatela kwanukaña majina anyikanda yamuBayibolu nichayisonekawu mundonda. Amakwawu ekala nachikonkwanyi chakwanukaña mazu ekala hansona jamuBayibolu hela jinsona. Amakwawu achimona kwikala chachiwahi kwanuka tumina twaWanta, majina anyichidi yawaIsarela, nimajina awapostolu 12, niyililu yanyikabu yakuspiritu. Kushankulu, aIsarela amavulu adizili kwanukaña masamu. Makonu, kansi weyala wanukileña mavasi amuBayibolu akubadika ha 80 hezu hezu hampinji yadiñayi nayaaka yitanu nachimu. Komana kwila tuzatishaña iyi njila yayiwahi nehi?
13. Muloñadi kufuntila-funtilahu chikwalemena chikupu?
13 Kufuntila-funtilahu kwakwashaña kwanuka, nawa yanukishu yakufuntila-funtilahu yekala yalema mukudiza kwawakwaKristu. Kapostolu Petulu wahosheli nindi: “Dichi nakeñi nami niyanukishi yumiyi mafuku ejima, hela mwayiluka, hela mwakola dehi munsañu yalala yimwekala nayu.” (2 Petulu 1:12) Muloñadi wutwakeñelaña yanukishu? Muloña yatuleñelaña kutiyishisha, kwiluka chikupu, nikukolesha chikonkwanyi chetu chakumwovwahila Yehova. (Masamu 119:129) Kuhitulukaña mpinji yejima munshimbi jaNzambi kwatukwashaña kudishinshika etwaweni nawa kwatukwashaña kukañesha chaaku chakubula kwikala ‘mukwakutiya wavulamenaña.’ (Yakoba 1:22-25) Neyi tukubulaña kwanuka chalala, yuma yikwawu yinateli kuluwañesha nyichima yetu nawa hitunateli kuhosha idimi ditooka chachiwahuku.
14. Chumanyi chatela kutukwasha neyi tunakudiza idimi ditooka?
14 Kutañila hewulu. (Chimwekeshu 1:3) Atudizi amakwawu esekaña kudiza idimi dadiha muwumweneni. Kudiza muwumweneni kwakañeshaña kwiluka chikupu. Neyi tunakudiza idimi ditooka, mpinji yikwawu twatela kutaña ‘nakutoñojokahu’ kulonda kutukwashi kushaku kashinshi. (Masamu 1:2) Neyi twila mwenimu, tukwiluka chikupu nsañu yitunakutaña. MuchiHeberu nhoshelu yakwila nawu ‘[kutaña] nakutoñojokahu’ yinesakanuku nakutoñojoka chikupu. Neyi chochakeñekaña kusuñunuka yakudya mwivumu hakwila nawu yitwikwashi, kutoñojokahu chikupu kwakeñekaña hakwila nawu tutiyishishi yuma yitwatañaña. Komana twekalañaku nampinji yeneni yakutoñojoka chikupu hayuma yitwadizaña? Hanyima yakutaña Bayibolu, twatela kutoñojoka chikupu hayuma yitunatañi.
15. Tunateli kwiluka ñahi ‘chakuzatisha mazu’ edimi ditooka?
15 Elukenu chakuzatisha mazu. Mpinji yikwawu, chekala chachiwahi kudiza chakuzatisha mazu, hela chakunuña mazu kulonda kutuña mukuku wamazu nikwiluka nshimbi, jedimi dadiha ditunakudiza. Ichi chatukwashaña kwiluka chekala odu idimi, kulonda tutweshi kudihosha chachiwahi. Neyi chochekala idimi namutapu wamazu, idimi ditooka dachalala chamuNsona dikweti ‘[mutapu] wamazu akukolesha.’ (2 Timotewu 1:13) Twatela kulondela iyi ntanjikilu.
16. Kukalanyi kutwatela kushinda, nawa tunateli kukwishinda ñahi?
16 Twalekenu kuyilaku hambidi. Muntu nateli kudiza idimi dacheñi chanti chakwila nateli nikuhanjeka, nkumininaku wukuleka kuyilaku hambidi. Kukala kwokumu kunateli kumwekana nikudi antu ahoshaña idimi ditooka. (Tañenu Aheberu 5:11-14.) Chumanyi chinateli kutukwasha kushinda iku kukala? Mwatela kuzata nañovu kulonda kutwalekahu kudiza idi idimi. “Dichi tulekenu kuhosha nsañu jaKristu jatachi, tukulenu tupami. Bayi twala cheñi chikuku chakubalumuka mumuchima nakuleka nyidimu yafwa, nichakumwitiya Nzambi, nichakuleja nsañu jakuwelawela nijakunañika makasa nijakusañuka afu nakusompa kwahaya nyakaku.”—Aheberu 6:1, 2.
17. Muloñadi kwikala nachaaku chakudiza chikwalemena? Hanenu chakutalilahu.
17 Tanjikenu mpinji yakudizaña. Chekala chachiwahi kudiza hakampinji kantesha mpinji yejima kubadika kudizaña kamu hampinji yayilehi. Mwatela kudiza hampinji yimunabuli kuzeya nawa kwosi akuyiluwañesha. Kudiza idimi dadiha kudi neyi kupula njila mwivunda. Neyi antu avulaña kuhita munjila, mwafukaña. Neyi njila abulaña kuyizatisha hampinji yayilehi, yamumaña. Dichi kutwalekahu chakadi kuleka chekala chalema. (Danyeli 6:16, 20) Lombenuña “nikutonenamu mwahita kukakela kwejima” hampinji yimunakuhosha idimi ditooka dachalala chamuBayibolu.—Aefwesesa 6:18.
18. Muloñadi wutwatela kuhosha idimi ditooka mpinji yejima?
18 Hoshenuña muchidi wumunakudiza. Antu adizaña idimi dadiha ajinookaña kudihosha muloña atiyaña nsonyi hela achinaña kuluwañesha. Ichi chayileñelaña kubula kuyilaku hambidi. Hampinji yimunakudiza idimi, mwatela kwesekaña kudihosha. Neyi kadizi yavulaña kuhosha idimi dadiha, wukwikalaña wakasunuka hakudihosha. Ninetu twatela kuhoshaña idimi ditooka mpinji yejima. “Muloña namuchima muntu wetiyaña nakutambula kuloña; nakanwa wetejaña nakumona kuhanda.” (Aroma 10:10) Bayi neyi ‘twetejaña hatooka’ hampinji yakupapatishewa hohuku ilaña nihampinji yitwahoshaña hadi Yehova hampinji yidi yejima, kubombelahu nimpinji yitwakalakalaña mumudimu wakushimwina. (Matewu 28:19, 20; Aheberu 13:15) Kupompa kwawakwaKristu kwatwileñelaña kuhosha chiwahi nawa mukwihihisha idimi ditooka.—Tañenu Aheberu 10:23-25.
Hoshenuña Idimi Ditooka Mukunuñañana Kulonda Kumuhameka Yehova
19, 20. (a) Mudimwinyi wakuhayamisha wunakukalakalawu aYinsahu jaYehova makonu? (b) Chumanyi chimunakufwila kwila?
19 Chadiña chakuzañalesha chikupu kwikala muYerusalema hefuku daMulungu nantetemena mukakweji kaSivani 6, muchaaka cha 33 C.E. Nantetemena, henohu 9:00 kanda, antu apompeleli mwitala dahewulu “hiyakutachika kuhosha madimi acheñi,” muchihayamisha. (Yililu 2:4) Makonu, ambuña aNzambi hiyekala nachawana chakuhoshela mumadimi acheñuku. (1 Akorinda 13:8) Hela chochu, aYinsahu jaYehova ashimwinaña nsañu yayiwahi yaWanta mumadimi akubadika ha 430.
20 Wenowu muzañalu wutukweti hakwiluka netu hela chakwila twahoshaña idimi dacheñi, wejima wetu twanuñañana mukuhosha idimi ditooka dachalala chamuBayibolu! Munjila yikwawu, ichi dichaambu chachuma chamwekeni haBabeli. Antu jaYehova ahamekaña ijina dindi, wukwila neyi ahoshaña idimi dimu. (1 Akorinda 1:10) Wejima wetu tufwilenu kutwalekahu ‘kumukalakela namuchima wetu wumu’ nawamana kwetu nahela kaayi kejima hampinji yitunakudiza kuhosha chachiwahi nankashi idimi dimu, kulonda kulemesha Tata yetu wamwiwulu, Yehova.—Tañenu Masamu 150:1-6.
Mukwakula Nenudi?
• Indi idimi ditooka hichumanyi?
• Yumanyi yabombela mukuhosha idimi ditooka?
• Yumanyi yikutukwasha kuhosha idimi ditooka chachiwahi?
[Malwihu aKuzatisha haKudiza]
[Chikasha chidi hefu 28]
Yilenuku Hambidi haKuhosha Chachiwahi Idimi Ditooka Kuhitila
◆ mukutiyilila nakashinshi.
◆ mukwimbujola anhoshi elukisha.
◆ mukuhembela yuma kumutu nikufuntila-funtilahu.
◆ mukutañila hewulu.
Masamu 1:1, 2; Chimwekeshu 1:3
◆ mukwiluka “chakuzatisha mazu.”
◆ mukutwalekahu kuyilaku hambidi.
◆ mukutanjika mpinji yakudizaña.
Danyeli 6:16, 20; Aefwesesa 6:18
◆ mukuhoshaña muchidi wumunakudiza.